1, 2. Davide wakhombisa njani kutsi wetsembekile kuNkulunkulu? (Buka sitfombe lesisekucaleni kwalesihloko.)

SAWULA kanye nemasotja akhe langu-3 000 bebatfungatsa Davide ehlane lelikaJuda kute bambulale. Ngalelinye lilanga ebusuku, Davide nemadvodza labehamba nawo bayitfola indzawo lapho Sawula nemasotja akhe babakanekise khona. BoSawula bebalele butfongo, ngako Davide na-Abishayi banyenya bendlula lamasotja baze befika lapho bekulele khona Sawula. Abishayi wahlebela Davide watsi: “Mane ungivumele ngimgwaze ngesikhali, size siyewuphumela emhlabatsini; ngingeke ngiphindze kwesibili.” Kodvwa Davide akamvumelanga kutsi akwente loko. Watjela Abishayi watsi: “Ungacali umbulale! Ngubani nje longabeka sandla kulogcotjiwe waSimakadze ajinge angabi nacala?” Ngemuva kwaloko Davide watsi: Jehova ‘akavumi kutsi ngingabeka sandla sami etikwalogcotjiwe wakhe.’​—1 Samuweli 26:8-12.

² Davide abekwati kahle lobekufanele akwente kute etsembeke  kuJehova. Bekati kutsi kufanele amhloniphe Sawula, futsi akazange akucabange ngisho nekumlimata. Kungani? Kungobe Nkulunkulu abekhetse Sawula kutsi abeyinkhosi yaka-Israyeli. Lamuhla, Jehova ufuna tonkhe tinceku takhe tetsembeke kuye futsi tibahloniphe labo labavumele kutsi babe neligunya, njengobe kwakunjalo nasendvulo.​—Fundza Mikha 6:8.

3. Abishayi wakhombisa njani kutsi wetsembekile kuDavide?

³ Abishayi abemhlonipha Davide ngobe bekati kutsi Nkulunkulu umkhetse kutsi abe yinkhosi. Nobe kunjalo, ngesikhatsi sekayinkhosi, Davide wenta tono letikhulu. Walala nemfati wa-Uriya, wase utjela Jowabe kutsi aciniseke kutsi Uriya uyabulawa emphini. (2 Samuweli 11:2-4, 14, 15; 1 Tikhronike 2:16) Jowabe abengumnakabo Abishayi, ngako kungenteka Abishayi abevile ngaloko lokwentiwa nguDavide, kodvwa wachubeka amhlonipha. Ngetulu kwaloko, Abishayi abengumholi welibutfo lemphi futsi abengalisebentisa lelo gunya kute atente inkhosi, kodvwa akakwentanga loko. Esikhundleni saloko, waba yinceku yaDavide futsi wamvikela etitseni takhe.​—2 Samuweli 10:10; 20:6; 21:15-17.

4. (a) Davide wakhombisa njani kutsi wetsembekile kuNkulunkulu? (b) Ngutiphi letinye tibonelo lesitawufundza ngato?

⁴ Kuko konkhe kuphila kwakhe, Davide abetsembekile kuJehova. Ngesikhatsi asemusha, wabulala sidlakela lesinguGoliyathi, lesasetfuka Jehova nema-Israyeli. (1 Samuweli 17:23, 26, 48-51) Ngesikhatsi Davide ayinkhosi, umphrofethi waJehova longuNathani kwadzingeka kutsi ameluleke ngenca yetono lebekatentile. Ngekushesha, Davide wavuma kutsi wente sono futsi waphendvuka. (2 Samuweli 12:1-5, 13) Ngekuhamba kwesikhatsi, nasekakhulile wanikela ngetintfo letiligugu kute kwakhiwe lithempeli laJehova. (1 Tikhronike 29:1-5) Kuyacaca kutsi nanobe Davide enta tono letinkhulu ekuphileni kwakhe, akazange ayekele kwetsembeka kuNkulunkulu. (Tihlabelelo 51:4, 10; 86:2) Kulesihloko, sitawufundza ngesibonelo saDavide nalabanye labaphila ngesikhatsi sakhe futsi sibone kutsi singahlala njani setsembekile kuJehova kwendlula kwetsembeka kunobe ngubani. Sitawuphindze sifundze ngebuntfu lobutasisita kute sente loko.

5. Ngusiphi sifundvo lesisifundzako ephutseni lelentiwa ngu-Abishayi?

⁵ Ngesikhatsi Abishayi afuna kubulala Sawula, abetama kwetsembeka kuDavide. Kodvwa ngesizatfu sekutsi Davide bekati kutsi akukalungi kulimata ‘logcotjiwe waSimakadze,’ akazange amvumele Abishayi kutsi abulale lenkhosi. (1 Samuweli 26:8-11) Loku kusifundzisa sifundvo lesibalulekile: Nangabe kufanele sitsatse sincumo sekutsi ngubani lesitawetsembeka kuye kucala, kufanele sicabange ngetimiso teliBhayibheli letingasisita kuleso simo lesibhekene naso.

6. Ngisho nobe kuyintfo levamile kutsi setsembeke kumuntfu lolilunga lemndeni nakubangani, kungani kufanele sicaphele?

⁶ Kuyintfo levamile kutsi setsembeke kumuntfu lesimtsandzako, kungaba ngumngani nobe lilunga lemndeni. Kodvwa ngesizatfu sekutsi sinesono, loko lesikucabangako  kungasikhohlisa. (Jeremiya 17:9) Ngako-ke, nangabe umuntfu lotsite lesimtsandzako enta sono futsi ayekele kuba ngumKhristu, kufanele sikhumbule kutsi kubaluleke kakhulu kwetsembeka kuJehova kunekwetsembeka kulomunye umuntfu.​—Fundza Matewu 22:37.

7. Lomunye dzadze wahlala kanjani etsembekile kuNkulunkulu ngisho asesimeni lesimatima?

⁷ Nangabe lilunga lemndeni wakho liyekelisiwe kuba nguFakazi, ungamkhombisa Jehova kutsi wetsembekile kuYe. Nasi sibonelo: Ngalelinye lilanga, make wa-Anne lobekayekelisiwe kuba nguFakazi, wamshayela lucingo wamtjela kutsi ufuna kumvakashela. ^[1] (Fundza kwatiswa lokusekugcineni.) Make wa-Anne watsi uva buhlungu ngobe onkhe emalunga emndeni wakhe awafuni kumkhulumisa. Loku kwamvisa buhlungu Anne futsi wetsembisa unina kutsi utamphendvula ngekumbhalela incwadzi. Ngaphambi kwekutsi ayibhale, wazindla ngaletinye tetimiso teliBhayibheli. (1 Khorinte 5:11; 2 Johane 9-11) Kulencwadzi, wamchazela ngemusa kutsi nguye loshiye umndeni wakhe ngalesikhatsi ona futsi ala kuphendvuka. Anne waphindze wamtjela kutsi yinye indlela langaphindze ajabule ngayo, kutsi abuyele kuJehova.​—Jakobe 4:8.

8. Ngubuphi buntfu lobungasisita kute setsembeke kuNkulunkulu?

⁸ Ngesikhatsi saDavide, tinceku taNkulunkulu letetsembekile nato betitfobekile, tinemusa futsi tinesibindzi. Ase sifundze ngekutsi lobuntfu bungasisita njani kute setsembeke kuJehova.

9. Kungani Abneri etama kubulala Davide?

⁹ Indvodzana yaSawula lenguJonathani kanye nemholi welibutfo lemphi yaka-Israyeli, Abneri, bambona Davide aletse inhloko yaGoliyathi eNkhosini Sawula. Jonathani waba ngumngani waDavide futsi wahlale etsembekile kuye. (1 Samuweli 17:57–18:3) Kodvwa Abneri akazange etsembeke. Ngekuhamba kwesikhatsi, wadzimate wasita Sawula lobekafuna kubulala Davide. (1 Samuweli 26:1-5; Tihlabelelo 54:3) BoJonathani na-Abneri bebati kutsi Nkulunkulu bekafuna kube nguDavide inkhosi letawulandzela ka-Israyeli. Kodvwa ngemuva kwekufa kwaSawula, Abneri akazange amsekele Davide. Esikhundleni saloko, wetama  kubeka Ishboshethi indvodzana yaSawula kutsi abe yinkhosi. Ngemuva kwaloko, kungenteka Abneri bekafuna kube nguye inkhosi, futsi kungenteka nguleso sizatfu lesamenta walala nalomunye webafati beNkhosi Sawula. (2 Samuweli 3:6-11) Kungani Jonathani na-Abneri bebativa ngendlela leyehlukile ngaDavide? Kungenca yekutsi Jonathani abetsembekile kuJehova futsi atfobekile, kodvwa Abneri abengasinjalo.

10. Kungani Absalomu abengaketsembeki kuNkulunkulu?

¹⁰ Absalomu, indvodzana yeNkhosi Davide, abengaketsembeki kuNkulunkulu ngobe bekangakatfobeki. Abefuna kuba yinkhosi, ngako watsatsa ‘incola yemphi, emahhashi kanye nemadvodza langu-50 kutsi ahambe embikwakhe.’ (2 Samuweli 15:1) Waze wenta ema-Israyeli lamanyenti kutsi etsembeke kuye. Wetama nekubulala uyise, ngisho nobe bekati kutsi Jehova ubeke Davide kutsi abe yinkhosi yaka-Israyeli.​—2 Samuweli 15:13, 14; 17:1-4.

11. Singazuza njani etindzabeni letiseBhayibhelini letimayelana na-Abneri, Absalomu naBharuki?

¹¹ Nangabe umuntfu angakatfobeki futsi afuna kuba neligunya, kuba matima ngaye kutsi ahlale etsembekile kuNkulunkulu. Kuliciniso kutsi siyamtsandza Jehova, futsi asifuni kuba nemona nekutsi sibe bantfu lababi njenga-Abneri na-Absalomu. Kodvwa kufanele sicaphele kutsi singabi nesifiso sekuba nemali lenyenti nobe umsebenti lotasenta sitikhandze sibalulekile. Loko kutabulimata budlelwane betfu naJehova. Ngalesinye sikhatsi, mabhalane waJeremiya, Bharuki abefuna tintfo letinkhulu futsi besekangasajabuli ngekukhonta Nkulunkulu. Ngako Jehova watsi kuBharuki: “Loko lesengikwakhile ngiyawukuketula, ngikuzuphune naloko bengikuhlanyelile eveni lonkhe. Pho, ungatifunela yini wena tintfo letinkhulu? Ungatifuni.” (Jeremiya 45:4, 5) Bharuki wamlalela Jehova. Natsi kufanele simlalele ngobe ngekushesha utalibhubhisa lelive lelibi.

12. Khombisa kutsi kungani singeke sikhone kwetsembeka kuNkulunkulu nangabe sinebugovu.

¹² Lomunye umzalwane eMexico, ligama lakhe lokunguDaniel, kwadzingeka atsatse sincumo sekutsi utawetsembeka kubani. Abefuna kushada nemuntfu longamkhonti Jehova. Daniel utsi: “Ngachubeka ngibhalelana naye ngisho nobe sengilihlahlandlela.”  Kodvwa wabona kutsi loko lebekakwenta bekakhohliswa yinhlitiyo yakhe. Abengaketsembeki kuJehova, futsi bekudzingeka atfobeke. Ngako wakhuluma nemzalwane losanesikhatsi lesidze angulomdzala welibandla ngalentfombatane. Daniel uyachaza utsi: “Wangisita ngabona kutsi kuze ngetsembeke kuNkulunkulu, kwakufanele ngiyekele kuyibhalela. Ngemuva kwekuthantaza kanyenti, ngayekela kuyibhalela. Ngekushesha, yakhula indlela lebengiwujabulela ngayo umsebenti wekushumayela.” Nyalo Daniel unemfati lotsandza Jehova futsi ungumbonisi wesigodzi.

13. Nathani wahlala njani etsembekile kuNkulunkulu nakuDavide ngesikhatsi Davide enta sono?

¹³ Nangabe setsembekile kuJehova, singetsembeka nakulabanye futsi sibasite ngendlela lekahle. Umphrofethi Nathani wahlale etsembekile kuJehova nakuDavide. Ngemuva kwekutsi Davide atsetse umfati walenye indvodza futsi wayibulala, Jehova watfumela Nathani kute eluleke Davide. Nathani abenesibindzi futsi amhlonipha Jehova. Waphindze wenta ngekuhlakanipha futsi wakhuluma naDavide ngemusa. Abefuna Davide abone kutsi tatitinkhulu kangakanani tono lebekatentile. Ngako wamcocela ngendzaba yendvodza lebeyinjingile leyeba imvu yemuntfu lobekaphuyile. Davide nakeva lendzaba, watfukutsela wagana lunwabu ngaloko lobekwentiwe ngulendvodza lenjingile. Nathani wase utsi: “Lowo muntfu nguwe.” Davide kwamkhanyela kutsi wonile kuJehova.​—2 Samuweli 12:1-7, 13.

14. Ungakhombisa njani kutsi wetsembekile kuJehova nakubangani bakho nobe tihlobo takho?

¹⁴ Nawe ungetsembeka kuJehova uphindze wetsembeke nakulabanye ngekutsi ube nemusa. Nasi sibonelo: Ungaba nebufakazi bekutsi umzalwane wente sono lesikhulu. Ungase ufune kwetsembeka kuye, ikakhulukati nangabe angumngani losedvute nobe alilunga lemndeni. Kodvwa uyati nekutsi kubaluleke kakhulu kwetsembeka kuJehova. Ngako njengaNathani, lalela Jehova kodvwa bani nemusa kumzalwane wakho. Mtjele kutsi kufanele acele lusito kulabadzala futsi akhulume nabo ngekushesha. Nangabe angakwenti loko, kufanele wena uhambe uyobatjela. Nawenta njalo, utawuhlala wetsembekile kuJehova. Utawube uyakhombisa nekutsi unemusa kumzalwane wakho ngobe labadzala batamsita kutsi aphindze abe nebudlelwane lobuhle naJehova. Batameluleka ngemusa nangendlela lekahle.​—Fundza Levithikhusi 5:1; Galathiya 6:1.

15, 16. Kungani Hushayi bekadzinga sibindzi kute etsembeke kuNkulunkulu?

¹⁵ Hushayi bekangulomunye webangani beNkhosi Davide labetsembekile. Ngesikhatsi bantfu bafuna kubeka Absalomu kutsi abe yinkhosi, Hushayi kwadzingeka kutsi abe nesibindzi kute ahlale etsembekile kuDavide nakuNkulunkulu. Bekati kutsi  Absalomu ute eJerusalema kanye nemasotja akhe nekutsi Davide ubalekile. (2 Samuweli 15:13; 16:15) Kodvwa Hushayi wentani? Wamlahla yini Davide futsi wasekela Absalomu? Cha. Nanobe Davide besekakhulile futsi bantfu labanyenti bafuna kumbulala, Hushayi wahlala etsembekile kuDavide ngobe Jehova abekhetse Davide kutsi abe yinkhosi. Ngako Hushayi waya eNtsabeni Yemincumo kuze ayohlangana naDavide.​—2 Samuweli 15:30, 32.

¹⁶ Davide wacela Hushayi kutsi abuyele eJerusalema futsi ente shengatsi ungumngani wa-Absalomu, kuze atewukhohlisa Absalomu kutsi alalele seluleko sakhe esikhundleni sekutsi alalele seluleko sa-Ahithofeli. Hushayi bekanesibindzi futsi wafaka kuphila kwakhe engotini kute alalele Davide futsi ahlale etsembekile kuJehova. Davide wathantaza kuJehova wamcela kutsi asite Hushayi, futsi nguloko kanye lokwenteka. Absalomu walalela Hushayi esikhundleni sa-Ahithofeli.​—2 Samuweli 15:31; 17:14.

17. Kungani sidzinga sibindzi kute sihlale setsembekile?

¹⁷ Sidzinga sibindzi kute sihlale setsembekile kuJehova futsi simlalele esikhundleni sekwenta loko emlunga emindeni yetfu, lesisebenta nabo, nobe labo labasemagunyeni embuso labafuna sikwente. Nasi sibonelo: Kusukela asengumfanyana, Taro, lohlala eJapan, bekenta konkhe lokusemandleni akhe kuze ajabulise batali bakhe. Bekabalalela futsi etsembekile kubo, hhayi ngobe nje kwakufanele ente njalo, kodvwa ngobe bekabatsandza. Kodvwa ngesikhatsi acala kufundza liBhayibheli naBoFakazi BaJehova batali bakhe betama kumyekelisa. Loko kwamvisa buhlungu futsi kwakumatima kakhulu ngaye kubatjela kutsi ukhetse kuya emihlanganweni. Taro utsi: “Bangitfukutselela kakhulu kangangekutsi kwendlula iminyaka bangangivumeli kutsi ngiyobavakashela. Ngathantaza ngacela sibidzi kute ngihlale kuloko lebengikuncumile. Nyalo simo sesincono, futsi ngiyakwati kubavakashela njalo.”​—Fundza Taga 29:25.

18. Lesihloko sikuzuzise njani?

¹⁸ NjengaDavide, Jonathani, Nathani naHushayi, shengatsi natsi singaba nekwenetiseka lesikutfola ngobe setsembekile kuJehova. Asifuni kuba njenga-Abneri na-Abasalomu labebangaketsembeki. Kuliciniso kutsi sinesono futsi senta emaphutsa. Kodvwa singamkhombisa Jehova kutsi kwetsembeka kuye nguko lokumcoka kakhulu ekuphileni kwetfu.