1, 2. Kungani bumngani baJonathani naDavide busibonelo lesihamba embili sekwetsembeka?

KUNGENTEKA Jonathani wamangala nakabona indlela Davide laba nesibindzi ngayo. Davide abebulele sidlakela lesinguGoliyathi futsi waletsa ‘inhloko yalomFilisti’ kuyise waJonathani, iNkhosi Sawula yaka-Israyeli. (1 Samuweli 17:57) Jonathani bekangangabati kutsi Nkulunkulu usekela Davide, futsi kusukela ngaleso sikhatsi yena naDavide baba ngematse nelulwimi. Betsembisana kutsi batawuhlala betsembekile kulomunye nalomunye. (1 Samuweli 18:1-3) Kuko konkhe kuphila kwakhe, Jonathani abetsembekile kuDavide.

² Jonathani wachubeka etsembekile kuDavide nanobe Jehova abekhetse Davide kutsi abe yinkhosi yaka-Israyeli esikhundleni sakhe. Ngesikhatsi Sawula etama kubulala Davide, Jonathani abekhatsatekile ngalomngani wakhe. Bekati kutsi Davide usehlane eHoreshi, ngako waya lapho kute amkhutsate kutsi achubeke etsembela kuJehova. Jonathani watjela  Davide watsi: “Ungesabi, ngobe sandla sababe, Sawula, singeke sifinyelele kuwe. Wena utawuba yinkhosi ka-Israyeli, mine nje ngitawuba wesibili kuwe.”​—1 Samuweli 23:16, 17.

3. Yini lebeyibaluleke kakhulu kuJonathani kunekwetsembeka kwakhe kuDavide, futsi sikwati njani loko? (Buka sitfombe lesisekucaleni kwalesihloko.)

³ Ngalokuvamile, siyabatsandza bantfu labetsembekile. Kodvwa Jonathani simtsandza ngobe abetsembeke kuDavide kuphela yini? Cha, bekubaluleke kakhulu kuye kwetsembeka kuNkulunkulu. Ecinisweni nguleso sizatfu lesamenta wetsembeka kuDavide futsi wangabi nemona nanobe Davide abetawuba yinkhosi esikhundleni sakhe. Jonathani waze wasita Davide kutsi etsembele kuJehova. Bobabili bachubeka betsembekile kulomunye nalomunye nakuJehova. Basigcina setsembiso sabo lebesitsi: “Simakadze ungufakazi emkhatsini wetfu sobabili nasemkhatsini wetitukulwane tetfu phakadze naphakadze.”​—1 Samuweli 20:42.

4. (a) Yini letasenta kutsi sijabule futsi senetiseke? (b) Sitawucoca ngani kulesihloko?

⁴ Natsi kufanele setsembeke emindenini yetfu, ebanganini nakubazalwane betfu. (1 Thesalonika 2:10, 11) Kodvwa lokubaluleke kakhulu kutsi kufanele setsembeke kuJehova, ngobe nguye lowasipha kuphila. (Sembulo 4:11) Nasetsembeka kuye siyajabula futsi senetiseke. Siyati kutsi kufanele setsembeke kuye ngisho nobe sibhekene nebumatima. Kulesihloko, sitawufundza ngendlela sibonelo saJonathani lesitasisita ngayo kutsi sihlale setsembekile kuJehova kuletimo letilandzelako: (1) nasibona shengatsi umuntfu loneligunya akumfaneli kutsi simhloniphe, (2) nakufanele sikhetse kutsi sitawetsembeka kubani, (3) nangabe umzalwane loholako angasiphatsi ngendlela lefanele, (4) nalapho sibona shengatsi kumatima kugcina setsembiso.

5. Ngesikhatsi Sawula ayinkhosi, kungani bekumatima ngema-Israyeli kutsi etsembeke kuNkulunkulu?

⁵ Jonathani kanye nebantfu baka-Israyeli bebabhekene nesimo lesimatima. INkhosi Sawula, uyise waJonathani beyingasalaleli futsi buhlobo bayo naJehova baphela. (1 Samuweli 15:17-23) Nanobe kunjalo, Nkulunkulu wamvumela Sawula kutsi achubeke ayinkhosi iminyaka leminyenti. Ngako bekumatima ngebantfu kutsi betsembeke kuNkulunkulu ngesikhatsi inkhosi yabo lebeyikhetfwe kutsi ihlale “esihlalweni sebukhosi” saJehova yenta tintfo letimbi.​—1 Tikhronike 29:23.

6. Yini lekhombisa kutsi Jonathani wachubeka etsembekile kuJehova?

⁶ Jonathani wachubeka etsembekile kuJehova. Cabanga ngaloko Jonathani lakwenta ngemuva nje kwekutsi Sawula acale kungasamlaleli Nkulunkulu. (1 Samuweli 13:13, 14) Ngaleso sikhatsi libutfo lelikhulu lemaFilisti leta netincola temphi letingu-30 000 kutohlasela ema-Israyeli. Sawula abenemasotja langu-600 nje kuphela, futsi bekunguye naJonathani lebebanetikhali. Kodvwa Jonathani akazange esabe. Wakhumbula emavi emphrofethi Samuweli latsi: “Ngenca yelibito lakhe lelikhulu Simakadze angeke asilahle sive sakhe.” (1 Samuweli 12:22) Watsi kulelinye lisotja: “Kute lokungaphatamisa Simakadze  kutsi asisindzise ngebantfu labanyenti nome ngebantfu labambalwa.” Ngako yena nalelisotja bahlasela licembu lemaFilisti futsi babulala langu-20. Jonathani abenekukholwa kuJehova, futsi wambusisa. Jehova wabangela kutsi kube nekutamatama kwemhlaba, futsi emaFilisti esaba kakhulu. Ngemuva kwaloko abulalana odvwa futsi ema-Israyeli ayincoba lemphi.​—1 Samuweli 13:5, 15, 22; 14:1, 2, 6, 14, 15, 20.

7. Jonathani abemphatsa njani uyise?

⁷ Nanobe Sawula achubeka nekungamlaleli Jehova, kodvwa Jonathani akayekelanga kumhlonipha uyise. Sibonelo saloko kutsi bebalekelelana nabalwa timphi kute bavikele bantfu baJehova.​—1 Samuweli 31:1, 2.

8, 9. Sikhombisa njani kutsi setsembekile kuNkulunkulu nasibahlonipha labo labaneligunya?

⁸ NjengaJonathani, singetsembeka kuJehova ngekutsi silalele hulumende welive lesihlala kulo nangabe loko lakushoko kungashayisani netimiso teliBhayibheli. Jehova uvumele kutsi “tiphatsimandla” tibe neligunya kitsi, futsi ufuna sitihloniphe. (Fundza Roma 13:1, 2.) Kungako kufanele simhloniphe umuntfu losegunyeni ngisho nobe angaketsembeki futsi sinemuva wekutsi akumfaneli kutsi simhloniphe. Ecinisweni, kufanele sibahloniphe bonkhe labo Jehova labanikete ligunya.​—1 Khorinte 11:3; Hebheru 13:17.

⁹ Olga longudzadze waseNingizimu Melika,  wakhombisa kwetsembeka kwakhe kuJehova ngekutsi ahloniphe indvodza yakhe nanobe beyimphatsa kabi. ^[1] (Fundza kwatiswa lokusekugcineni.) Ngalesinye sikhatsi beyingamkhulumisi nobe isho tintfo letimvisa buhlungu ngobe nje anguFakazi waJehova. Yamtjela nekutsi itamshiya, itsatse bantfwana ihambe nabo. Kodvwa Olga akazange ‘aphindzisele lokubi ngalokubi.’ Wenta konkhe lokusemandleni akhe kute abe ngumfati lokahle. Bekayiphekela, ayiwashela futsi anakekela nalamanye emalunga emndeni wayo. (Roma 12:17) Nangabe litfuba livela, bekahle ahamba nayo nayivakashela umndeni wayo nobe bangani bayo. Sibonelo saloku kutsi ngesikhatsi baya emngcwabeni wababetala wakhe lobewukulelinye lidolobha, walungisa tonkhe tintfo lebebatatidzinga nabaya khona. Nabefika esontfweni lapho bekuchutjelwa khona inkonzo yemngcwabo, wayimela ngephandle. Ngemuva kweminyaka leminyenti, indvodza ya-Olga yacala kumphatsa kahle ngobe bekayibeketelela futsi ayihlonipha. Nyalo ngiyo lemkhutsata kutsi aye esifundvweni futsi immikise. Ngaletinye tikhatsi nayo iba khona esifundvweni.​—1 Phetro 3:1.

10. Yini leyenta Jonathani wati kutsi kufanele etsembeke kubani?

¹⁰ Ngesikhatsi Sawula atsi utawubulala Davide, Jonathani kwadzingeka atsatse sincumo lesimatima. Bekafuna kwetsembeka kuyise, ngesikhatsi lesifanako afuna kwetsembeka nakuDavide. Bekati kutsi Nkulunkulu usekela Davide hhayi Sawula, ngako wakhetsa kwetsembeka kuDavide. Watjela Davide kutsi abhace wase utjela Sawula sizatfu sekutsi angambulali Davide.​—Fundza 1 Samuweli 19:1-6.

11, 12. Kumtsandza kwetfu Nkulunkulu kusisita njani kutsi setsembeke kuye?

¹¹ Alice, longudzadze lohlala e-Australia, kwadzingeka akhetse kutsi utawetsembeka kubani. Ngesikhatsi afundzelwa, wacocela emalunga emndeni wakhe ngetintfo labekatifundza. Waphindze wawachazela nekutsi ngeke asawugubha Khisimusi, wawatjela nesizatfu saloko. Ekucaleni emalunga emndeni wakhe ajabha, futsi ngekuhamba kwesikhatsi amtfukutselela kakhulu. Acabanga kutsi Alice akasenandzaba nawo. Make wakhe wamtjela kutsi akafuni kuphindze ambone. Alice utsi: “Ngetfuka futsi ngeva buhlungu kakhulu ngobe bengiwutsandza umndeni wakitsi. Nobe kunjalo, ngatitjela kutsi ngitawutsandza kakhulu Jehova neNdvodzana yakhe, futsi ngabhajatiswa emhlanganweni wesigodzi lowalandzela.”​—Matewu 10:37.

¹² Akukafaneli sivumele kwetsembeka etintfweni letifaka ekhatsi licembu letemidlalo, sikolwa nobe live lesihlala kulo kutsi kubaluleke kakhulu kunekwetsembeka kwetfu kuJehova. Nasi sibonelo: Henry bekakutsandza kuba secenjini lesikolwa le-chess futsi bekafuna kusita sikolwa sakhe kutsi siphumelele emncintiswaneni. Kodvwa ngesizatfu sekutsi abehlale adlala ngetimphelasontfo, bekete sikhatsi lesenele sekuya ensimini nobe sekuya esifundvweni. Henry utsi intfo lebeseyibaluleke kakhulu kuye kutsi etsembeke esikolweni kunekutsi etsembeke kuNkulunkulu. Ngako wancuma kuyekela kudlalela sikolwa.​—Matewu 6:33.

13. Kwetsembeka kuNkulunkulu kungasisita njani kutsi sibeketelele tinkinga emndenini?

 ¹³ Ngaletinye tikhatsi kungaba matima kwetsembeka emalungeni emndeni lehlukehlukene ngesikhatsi lesifanako. Nasi sibonelo: Ken utsi: “Bengifuna kuhlale ngivakashela make wami losakhulile futsi bengifuna naye ahle asivakashela. Kodvwa make nemfati wami bebangevani. Bengingakhoni kubajabulisa bobabili ngesikhatsi sinye.” Ken wacabangisisa ngaloko lokushiwo liBhayibheli futsi wabona kutsi kulesimo kufanele ajabulise umfati wakhe futsi etsembeke kuye. Ngako watfola sisombululo lesamjabulisa umfati wakhe. Ngemuva kwaloko, wamchazela kutsi kungani kufanele abe nemusa kumake wakhe. Wachazela nenina sizatfu sekutsi ahloniphe umfati wakhe.​—Fundza Genesisi 2:24; 1 Khorinte 13:4, 5.

14. Kungani Sawula abengamphatsi kahle Jonathani?

¹⁴ Singaphindze setsembeke kuJehova nangabe umzalwane loholako ebandleni angasiphatsi ngendlela lefanele. INkhosi Sawula beyibekwe nguNkulunkulu kodvwa beyingayiphatsi kahle indvodzana yayo. Beyingacondzi kutsi kungani Jonathani atsandza Davide. Ngako ngesikhatsi Jonathani etama kusita Davide, Sawula bekatfukutsela futsi ahlaze Jonathani embikwebantfu labanyenti. Kodvwa Jonathani wachubeka amhlonipha uyise. Ngesikhatsi lesifanako, wahlala etsembekile kuJehova nakuDavide lobekakhetfwe nguNkulunkulu kutsi abe yinkhosi lelandzelako ka-Israyeli.​—1 Samuweli 20:30-41.

15. Kufanele sente njani nangabe umzalwane loholako angasiphatsi ngendlela lefanele?

 ¹⁵ Emabandleni lamuhla, bazalwane labaholako betama kubaphatsa kahle bonkhe bantfu. Kodvwa labazalwane banesono. Ngaleso sizatfu kumelula kutsi bangasicondzi sizatfu sekutsi kungani sente lokutsite. (1 Samuweli 1:13-17) Ngako nangabe sehlulelwe ngendlela lengakafaneli, kufanele sihlale setsembekile kuJehova.

16. Ngutiphi timo lokufanele sikhombise kuto kutsi setsembekile kuJehova futsi site bugovu?

¹⁶ Sawula bekafuna kutsi Jonathani abe yinkhosi letawulandzela esikhundleni saDavide. (1 Samuweli 20:31) Kodvwa Jonathani bekatsandza Jehova futsi etsembekile kuye. Ngako esikhundleni sekutsi abe nemona, Jonathani waba ngumngani waDavide futsi wasigcina setsembiso lasenta kuye. Ecinisweni wonkhe umuntfu lotsandza Jehova futsi lowetsembekile kuye, “wenta sifungo, asigcine, nome sekumatima.” (Tihlabelelo 15:4) Ngesizatfu sekutsi setsembekile kuNkulunkulu, sitatigcina tetsembiso tetfu. Nasi sibonelo: Nangabe senta sivumelwano ebhizinisini, sitawenta loko lesivumelene ngako ngisho nobe loko kumatima. Nasinetinkinga emshadweni wetfu, sitawukhombisa kutsi siyamtsandza Jehova ngekuhlala setsembekile kumlingani wetfu wemshado.​—Fundza Malakhi 2:13-16.

17. Lesihloko sikusite njani?

¹⁷ Sifuna kwetsembeka kuNkulunkulu ngisho nobe sibhekene netimo letimatima, njengobe kwenta Jonathani. Ngako-ke shengatsi singahlale setsembekile kubazalwane nabodzadzewetfu ngisho nalapho basidvumata. Ngaleyo ndlela sitawenta inhlitiyo yaJehova ijabule futsi nguloko kanye lokusijabulisako. (Taga 27:11) Singaciniseka kutsi utawuhlale asentela lokuncono kakhulu futsi asinakekela. Esihlokweni lesilandzelako sitawubona kutsi yini lesingayifundza kulabanye bantfu labaphila ngesikhatsi saDavide, lebebatsembekile nalabebangaketsembeki.