1, 2. Kungani Pawula abhalela emaKhristu langemaHebheru incwadzi?

NGEMNYAKA wanga-61, emabandla akulolonkhe laka-Israyeli abejabulela sikhatsi sekuthula. Ngisho nobe umphostoli Pawula abeboshiwe eRoma, abetsemba kutsi utawukhululwa ngekushesha. Thimothi labehamba naye emsebentini wekushumayela abesandza kukhululwa ejele, futsi bobabili bebafuna kuvakashela bazalwane labaseJudiya. (Hebheru 13:23) Eminyakeni lesihlanu lebeyiseta, emaKhristu aseJudiya, ikakhulukati lawo labehlala eJerusalema, bekutawudzingeka atsatse sinyatselo ngekushesha. Kungani? Kungobe Jesu abetjele balandzeli bakhe kutsi ngekushesha nababona iJerusalema itungeletwe ngemasotja, bekufanele babaleke.​—Lukha 21:20-24.

² Besekwendlule iminyaka lengu-28 Jesu ecwayise balandzeli bakhe. Ngaleso sikhatsi, emaKhristu ka-Israyeli achubeka etsembekile ngisho nobe abephatfwa kabi futsi abhekana netilingo letinyenti. (Hebheru 10:32-34) Kodvwa Pawula abefuna kuwenta akulungele loko lobekutawenteka esikhatsini lesitako. Bekusedvute kutsi abhekane nekuvivinywa lokukhulu kwekukholwa kwawo. (Matewu 24:20, 21; Hebheru 12:4) Bekufanele abeketele futsi abe nekukholwa lokucinile kute alalele secwayiso saJesu sekutsi abaleke, futsi nakenta loko  abetawuphila. (Fundza Hebheru 10:36-39.) Ngako Jehova waphefumulela Pawula kutsi abhalele lamaKhristu incwadzi. Lencwadzi nyalo ibitwa ngekutsi yincwadzi yemaHebheru, yabhalwa ngenjongo yekutsi iwacinise kute abhekane naloko lobekuseta.

3. Kungani kufanele sikujabulele kufundza incwadzi yemaHebheru?

³ Njengobe sibantfu baNkulunkulu, kufanele sikujabulele kufundza incwadzi yemaHebheru. Kungani? Kungobe sibhekene nesimo lesifana nesemaKhristu aseJudiya. Siphila ‘etikhatsini letibucayi lokumatima kubhekana nato,’ futsi labanyenti betfu bakubeketelele ngekwetsembeka kuphatfwa kabi. (2 Thimothi 3:1, 12) Kodvwa linyenti letfu liphila etindzaweni letinekuthula futsi aliphatfwa kabi ngalokucondzile. Ngako-ke, njengalamaKhristu angesikhatsi saPawula, natsi kufanele sihlale siphapheme. Kungani kunjalo? Kungobe ngekushesha sitawubhekana nekuvivinywa lokukhulu kwekukholwa kwetfu!​—Fundza Lukha 21:34-36.

4. Sitsini sihloko semnyaka wa-2016, futsi kungani kukhetfwe sona?

⁴ Yini letasisita kute sikulungele loko lesitawubhekana nako esikhatsini lesitako? Encwadzini yemaHebheru, Pawula washo tintfo letinyenti letitasisita kute sicinise kukholwa kwetfu. Lokunye lokubalulekile lakusho kutfolakala kuHebheru 13:1. Lombhalo usikhutsata utsi: “Hlalani ninelutsandvo lwebuzalwane.” Lelivesi likhetfwe kutsi libe sihloko semnyaka wa-2016.

5. Luyini lutsandvo lwebuzalwane?

⁵ Luyini lutsandvo lwebuzalwane? Ligama lesiGriki Pawula lalisebentisa lisho “kutsandza umzalwane.” Lutsandvo lwebuzalwane, lutsandvo lolucinile lolubakhona emkhatsini wemalunga emndeni nobe bangani labasedvute. (Johane 11:36) Asenti shengatsi sibobhuti nabosisi, kodvwa singibo. (Matewu 23:8) Pawula utsi: “Nonkhe tsandzanani ngelutsandvo lwebuzalwane. Nihambe embili ekuhloniphaneni.” (Roma 12:10) Lamavi ayakhombisa kutsi kufanele lucine lutsandvo lesinalo ngebazalwane betfu. Lolutsandvo lwebuzalwane lolusekelwe etimisweni tebuKhristu lusita bantfu baNkulunkulu kutsi babe bangani labasedvute futsi babe nebunye.

6. EmaKhristu eliciniso ayicondza njani inchazelo yelutsandvo lwebuzalwane?

⁶ Emavi latsi ‘lutsandvo lwebuzalwane’ atfolakala kanyenti etincwadzini temaKhristu. KumaJuda asendvulo, ligama lelitsi ‘umzalwane’ ngalokuvamile belisho sihlobo futsi ngaletinye tikhatsi belisho umuntfu lotsite longasilo lilunga lemndeni. Kodvwa abengeke abite umuntfu longasiye umJuda ngekutsi ngumzalwane. Nobe kunjalo, njengobe singemaKhristu eliciniso, ‘umzalwane’ wetfu ngunobe ngubani longumKhristu weliciniso, nome ngabe ubuya kuliphi live. (Roma 10:12) Jehova usifundzise kutsi sitsandzane njengobe sibazalwane. (1 Thesalonika 4:9) Kodvwa kungani kubalulekile kuhlale sikhombisa kutsi sinelutsandvo lwebuzalwane?

7. (a) Ngusiphi sizatfu lesibalulekile lesenta kutsi sikhombise lutsandvo lwebuzalwane? (b) Shano lesinye sizatfu lesenta kubaluleke kutsi sicinise indlela lesibatsandza ngayo labanye.

⁷ Sizatfu lesibalulekile lesenta sikhombise lutsandvo lwebuzalwane kutsi Jehova  usitjela kutsi sente njalo. Angeke simtsandze Jehova nangabe singafuni kutsandza bazalwane betfu. (1 Johane 4:7, 20, 21) Lesinye sizatfu kutsi siyadzingana, ikakhulukati ngetikhatsi letimatima. Ngalesikhatsi Pawula abhalela emaKhristu langemaHebheru, bekati kutsi ngekushesha lamanye bekutawudzingeka ashiye imiti yawo netintfo tawo. Jesu abeyichazile indlela leso sikhatsi lebesitawuba matima ngayo. (Makho 13:14-18; Lukha 21:21-23) Ngako ngaphambi kwekutsi sifike leso sikhatsi, lamaKhristu bekudzingeka acinise indlela labetsandzana ngayo.​—Roma 12:9.

8. Yini lokufanele siyente nyalo ngaphambi kwekutsi kuhlupheka lokukhulu kucale?

⁸ Sekusemnyango kuhlupheka lokukhulu lokungazange sekube khona. (Makho 13:19; Sembulo 7:1-3) Kutawudzingeka kutsi silalele leseluleko lesitsi: “Balekani, sive sami, ngenani etindlini tenu, nitivalele ngekhatsi. Tifihleni ngekhatsi kwesikhashana, kuze kwendlule lulaka lwakhe.” (Isaya 26:20) ‘Letindlu’ kungenteka tisho emabandla lapho sikhonta Jehova khona sinebazalwane nabodzadzewetfu. Kufanele sente lokungetulu kwekuhlala sihlangana ndzawonye. Pawula wakhumbuta emaKhristu langemaHebheru kutsi kufanele akhutsatane kute abe nelutsandvo futsi entelane lokuhle. (Hebheru 10:24, 25) Kufanele sicinise lutsandvo lwetfu lwebuzalwane nyalo ngobe lutasisita sikwati kubeketelela nobe ngutiphi tilingo lokungenteka sibhekane nato esikhatsini lesitako.

9. (a) Lamuhla, ngumaphi ematfuba lasivulekele ekukhombisa lutsandvo lwebuzalwane? (b) Shano tibonelo tendlela bantfu baJehova labakhombise ngato kutsi banelutsandvo lwebuzalwane.

⁹ Lamuhla sinematfuba lamanyenti lesingawasebentisa kute sikhombise lutsandvo lwebuzalwane, ngaphambi kwekucala kwekuhlupheka lokukhulu. Bazalwane betfu labanyenti bayahlupheka ngenca yekutamatama kwemhlaba, tikhukhula, tiphepho, ema-tsunami naletinye tehlakalo temvelo. Labanye bazalwane babeketelela kuphatfwa kabi. (Matewu 24:6-9) Kuphindze kube netinkinga tetimali tamalanga onkhe letibangelwa kuphila kulelive lelibi. (Sembulo 6:5, 6) Nobe kunjalo, njengobe bazalwane betfu babanetinkinga letinyenti, sivulekelwa ngematfuba lamanyenti ekukhombisa indlela lesibatsandza ngayo. Ngisho nobe lelive lesiphila kulo lite lutsandvo, kufanele sichubeke sikhombisa lutsandvo lwebuzalwane. (Matewu 24:12) ^[1]​—Fundza kwatiswa lokusekugcineni.

10. Yini lesitawufundza ngayo nyalo?

¹⁰ Ngisho nobe sinetinkinga, singakhombisa njani kutsi sifuna kuhlale sinelutsandvo lwebuzalwane? Kungabonakala  ngani kutsi sinalolutsandvo ngebazalwane betfu? Ngemuva kwekuba atsite “hlalani ninelutsandvo lwebuzalwane,” umphostoli Pawula washo tindlela letinyenti emaKhristu langakukhombisa ngato loku. Asesihlole letisitfupha tato.

11, 12. Kusho kutsini kwemukela tivakashi? (Buka sitfombe lesisekucaleni kwalesihloko.)

¹¹ “Ningakukhohlwa kwemukela tivakashi.” (Fundza Hebheru 13:2.) Asho kutsini emavi latsi “kwemukela tivakashi”? Emavi Pawula lawasebentisa asho “kuba nemusa etivakashini.” Kungenteka lamavi asikhumbuta Abrahama naLoti. Lamadvodza lamabili akhombisa umusa kubantfu bekuhamba labekangabati. Ngekuhamba kwesikhatsi, Abrahama naLoti batfola kutsi letivakashi bekutingilosi. (Genesisi 18:2-5; 19:1-3) Letibonelo takhutsata emaKhristu langemaHebheru kutsi akhombise lutsandvo lwebuzalwane ngekutsi emukele tivakashi.

¹² Singatemukela njani tivakashi? Singamema bazalwane nabodzadze kutsi bete emakhaya etfu kute batowudla natsi nobe sitewukhutsatana. Nangabe kungenteka utfole kutsi sisengakametayeli kahle umbonisi wesigodzi nemkakhe, singabamema kutsi bete emakhaya etfu nabavakashele libandla lesikulo. (3 Johane 5-8) Akudzingeki kutsi sente siphihli selidzili nobe sisebentise imali lenyenti. Umgomo wetfu kukhutsata bazalwane betfu, hhayi kubukisa ngaloko lesinako. Akukafaneli nekutsi simeme kuphela labo labangakhona kusentela lokutsite. (Lukha 10:42; 14:12-14) Lokubaluleke kakhulu kutsi singatikhadzi sesimatasatasa kangangekutsi size sikhohlwe kwemukela tivakashi!

13, 14. Yini lesingayenta kute ‘sikhumbule labasemajele’?

¹³ “Bakhumbuleni labo lababoshiwe.” (Fundza Hebheru 13:3.) Ngesikhatsi Pawula abhala lamavi, abekhuluma ngebazalwane lebebasejele baboshelwe kukholwa kwabo. Pawula walincoma lelibandla ngobe ‘belivelana nalababoshiwe.’ (Hebheru 10:34) Labanye bazalwane bamsita ngesikhatsi aboshwe iminyaka lemine ejele, kodvwa labanye bebahlala khashane. Bebangamsita njani Pawula? Bebangachubeka bamthantazela.​—Filiphi 1:12-14; Hebheru 13:18, 19.

¹⁴ Lamuhla, BoFakazi labanyenti babhadla ejele ngenca yekukholwa kwabo. Bazalwane nabodzadze labahlala etindzaweni letidvutane nalawo majele bangabasita ngetintfo labatidzingako. Kodvwa linyenti letfu lihlala khashane nalawo majele. Singabasita ngayiphi indlela futsi sikhombise kutsi asikabakhohlwa? Lutsandvo lwebuzalwane lutasenta kutsi sichubeke sibathantazela. Sibonelo saloku kutsi singathantazela bazalwane nabodzadze ngisho nebantfwana labasejele e-Eritrea, kufaka ekhatsi nebazalwane betfu bo-Paulos Eyassu, Isaac Mogos, kanye naNegede Teklemariam, losekuphele iminyaka lengu-20 babhadla ejele.

15. Singakhombisa njani kutsi siyayihlonipha imishado yetfu?

¹⁵ “Umshado awuhlonishwe ngibo  bonkhe bantfu.” (Fundza Hebheru 13:4.) Singaphindze sikhombise kutsi sinelutsandvo lwebuzalwane ngekutiphatsa kahle. (1 Thimothi 5:1, 2) Nasi sibonelo: Nangabe besingatiphatsa kabi ngekwelicansi nemzalwane nobe dzadze, singamlimata loyo muntfu silimate ngisho nemndeni wakhe. Bazalwane ngeke sebasetsembe. (1 Thesalonika 4:3-8) Cabanga ngendlela umfati langativa ngayo nangabe atfola kutsi indvodza yakhe ibuka titfombe letikhombisa kungcola. Angavele abone kutsi ayimtsandzi futsi ayitihloniphi tetsembiso tabo.​—Matewu 5:28.

16. Kwenetiseka kusisita njani kutsi sikhombise lutsandvo lwebuzalwane?

¹⁶ “Yeneliswani tintfo leninato.” (Fundza Hebheru 13:5.) Kwetsembela kuJehova kutasisita kutsi senetiseke. Loku kusisita njani kutsi sihlale sinelutsandvo lwebuzalwane? Nangabe senetiseka, sitawukhumbula kutsi bazalwane nabodzadzewetfu babaluleke kakhulu kunemali. (1 Thimothi 6:6-8) Ngeke sikhonone ngebazalwane betfu nobe ngesimo lesibhekene naso ekuphileni, futsi ngeke sibe nemona ngetintfo labanye labanato. Esikhundleni saloko, nasenetiseka ngalesinako, sitawephana.​—1 Thimothi 6:17-19.

17. ‘Kuba nesibindzi’ kusisita njani kutsi sikhombise lutsandvo lwebuzalwane?

¹⁷ Bani ‘nesibindzi.’ (Fundza Hebheru 13:6.) Kwetsembela kuJehova kusenta sibe nesibindzi sekubeketelela kuvivinywa lokumatima. Lesibindzi sisisita kutsi sibe nesimo sengcondvo lesihle. Nasinesimo sengcondvo lesihle, sitawukhona kukhombisa lutsandvo lwebuzalwane ngekutsi sikhutsate futsi sidvudvute bazalwane nabodzadzewetfu. (1 Thesalonika 5:14,  15) Ngisho nangesikhatsi sekuhlupheka lokukhulu, sitawuba nesibindzi ngobe sitawube sati kutsi kukhululwa kwetfu sekusemnyango.—Lukha 21:25-28.

18. Nguyiphi indlela lesingalucinisa ngayo lutsandvo lwetfu lwebuzalwane ngalabadzala belibandla?

¹⁸ “Khumbulani labo labaniholako.” (Fundza Hebheru 13:7, 17.) Labadzala labasemabandleni etfu basebentisa sikhatsi sabo kute basisite. Nasicabanga ngako konkhe labasentela kona, iyakhula indlela lesibatsandza ngayo. Asifuni bangajabuli nobe bacansuke ngaloko lesikwentako. Esikhundleni saloko, sifuna kubahlonipha. Nasenta njalo sisuke ‘sibacabangela kakhulu ngelutsandvo ngenca yemsebenti labawentako.’​—1 Thesalonika 5:13.

19, 20. Singachubeka njani sikhombisa lutsandvo lwebuzalwane kakhudlwana?

¹⁹ Bantfu baJehova badvume ngekutsi banelutsandvo lwebuzalwane. Nangesikhatsi saPawula bebanjalo. Kodvwa Pawula wakhutsata bazalwane kutsi balukhombise kakhudlwana lolutsandvo. Watsi: “Nichubeke nikwenta ngalokugcwele.” (1 Thesalonika 4:9, 10) Kuyacaca kutsi singatfutfukisa ekukhombiseni lutsandvo lwebuzalwane!

²⁰ Ngako-ke, nasibuka sihloko setfu semnyaka eHholweni LeMbuso kulomnyaka, asizindleni nganayi imibuto: Ngingakhona yini kutemukela kakhudlwana tivakashi? Ngingabasita njani bazalwane labasejele? Ngiyalihlonipha yini lilungiselelo laNkulunkulu lemshado? Yini letangisita kutsi ngenetiseke? Ngingametsemba njani kakhulu Jehova? Ngingakhombisa njani kutsi ngibahlonipha kakhulu labo labaholako ebandleni? Nasenta konkhe lokusemandleni kute sitfutfukise kuloku lokusitfupha, umbhalo wemnyaka ngeke nje umane ube luphawu lolusebondzeni; utasikhumbuta kutsi silalele emavi aPawula latsi: “Hlalani ninelutsandvo lwebuzalwane.”​—Hebheru 13:1.