1-2. (a) Ngekusho kwemyalo waJesu lokuMatewu 28:18-20, ngumuphi umgomo loyinhloko welibandla lebuKhristu? (b) Ngumiphi imibuto lesitayiphendvula kulesihloko?

KUNGENTEKA baphostoli bebajabule kakhulu njengobe bebahlangene entsabeni. Ngemuva kwekuvuswa kwakhe, Jesu bekahlele kutsi babe nemhlangano naye kulentsaba. (Mat. 28:16) Kulapho khona “abonakala ngesikhatsi sinye kubazalwane labangetulu kwemakhulu lasihlanu.” (1  Khor. 15:6) Jesu bekabite lomhlangano kute anike bafundzi bakhe umyalo lobalulekile: “Ngako-ke hambani nente bantfu bato tonkhe tive babe bafundzi bami.”—Fundza Matewu 28:18-20.

² Bafundzi labeva lamavi aJesu baba yincenye yelibandla lemaKhristu angelikhulu lekucala. Umgomo wabo loyinhloko bewukutsi bente bantfu labanyenti babe bafundzi baJesu. * Lamuhla, kunemabandla lamanyenti emaKhristu eliciniso emhlabeni wonkhe, futsi umgomo wawo loyinhloko solo uyafanana. Kulesihloko sitawuphendvula imibuto lemine: Kungani umsebenti wekwenta bafundzi ubalulekile? Kuhlanganisani kwenta bafundzi? Onkhe emaKhristu anencenye yini ekwenteni bafundzi? Kungani kudzingeka sibeketele kute siwente kahle lomsebenti?

3. Ngekusho kwembhalo waJohane 14:6 na-17:3, umsebenti wekwenta bafundzi ubaluleke ngani?

³ Kungani umsebenti wekwenta bafundzi ubaluleke kakhulu? Kungobe bafundzi baJesu kuphela labangaba bangani baNkulunkulu. Ngetulu kwaloko, labo labalandzela Jesu banemphilo lencono nyalo futsi banematsemba ekuphila phakadze esikhatsini lesitako. (Fundza Johane 14:6; 17:3.) Ecinisweni Jesu usiphatsise umsebenti lobaluleke kakhulu, kodvwa lomsebenti asiwenti sisodvwa. Umphostoli Pawula watsi yena kanye nalabanye labesebenta nabo ‘batisebenti letikanye naNkulunkulu’ (1 Khor. 3:9) Lelo lilungelo lelikhulu Jehova naJesu labalinike bantfu labanesono.

4. Yini lesiyifundzako kulokwenteka ku-Ivan naMatilde?

⁴ Umsebenti wekwenta bafundzi ungasiletsela injabulo lenkhulu. Cabanga ngesibonelo sa-Ivan nemkakhe, Matilde baseColombia. Bafakaza kuDavier losemusha lowabatjela kutsi: “Ngifuna kwenta lushintjo ekuphileni kwami, kodvwa angikhoni.” Davier bekangumshayi wesibhakela, asebentisa tidzakamiva, anatsa kakhulu, futsi ahlala nentfombi yakhe Erika. Ivan utsi: “Sacala kufundza naye liBhayibheli endzaweni lebeyikhashane nalapho bekahlala khona, futsi kwakudzingeka sihambe ngemabhayisikili ema-awa lamanyenti emgwacweni lobewuneludzaka. Ngemuva kwekubona intfutfuko Davier labetiphatsa ngayo, Erika wacala kufundza natsi liBhayibheli.” Ngekuhamba kwesikhatsi Davier wayekela kusebentisa tidzakamiva, kunatsa tjwala kanye nekushaya sibhakela. Washada na-Erika. Matilde utsi: “Ngesikhatsi Davier na-Erika babhajatiswa nga-2016 sakhumbula emavi Davier labehlale awasho, ‘Ngifuna kushintja, kodvwa angikhoni.’ Sajabula kakhulu kangangekutsi sakhala.” Siyaciniseka kutsi sijabula kakhulu nasibona bantfu baba bafundzi baKhristu.

5. Ngusiphi sinyatselo sekucala lokufanele sisitsatse kute sente bantfu babe bafundzi?

⁵ Sinyatselo sekucala lokudzingeka sisitsatse ‘kufuna’ bantfu labafuna kufundza ngaJehova. (Mat. 10:11) Sikhombisa kutsi siBoFakazi BaJehova ngekutsi sishumayele bonkhe bantfu lesihlangana nabo. Sikhombisa kutsi singemaKhristu eliciniso nasilalela umyalo waKhristu wekushumayela.

6. Yini lengasisita kutsi siphumelele emsebentini wekushumayela?

⁶ Bantfu labanyenti lesihlangana nabo bayafuna kuva emaciniso laseBhayibhelini, kodvwa labanye bacale babonakale bangenandzaba. Kudzingeka sibente babe nesifiso sekufundza. Kute siphumelele emsebentini wetfu, kudzingeka silungiselele kahle. Khetsa tihloko letitawukhanga bantfu lohlangana nabo. Bese uhlela indlela lotasetfula ngayo.

7. Ungayicalisa njani incociswano nebantfu, futsi kubaluleke kangakanani kutsi ubalalele uphindze ubahloniphe?

⁷ Nasi sibonelo, nawucoca nemnikati welikhaya ungahle utsi: “Ngicela kuva umbono wakho nganayi indzaba. Lamuhla kunetinkinga letikhatsata bantfu labanyenti emhlabeni wonkhe. Ucabanga kutsi siyamdzinga yini hulumende longacedza tonkhe tinkinga letikhona emhlabeni?” Ungabese ucoca ngemBhalo waDanyela 2:44. Noma ungatsi kumakhelwane wakho: “Ucabanga kutsi nguyiphi indlela lekahle yekukhulisa bantfwana labalalelako? Ngingatsandza kuva umbono wakho.” Ningabese nicoca ngemBhalo wa-Dutheronomi 6:6, 7. Kunobe ngabe ngusiphi sihloko lokhetsa  kucoca ngaso, cabanga ngebantfu labakulalele. Cabanga ngekutsi batawuzuza njani nabeva emaciniso laseBhayibhelini. Kubalulekile kubalalela futsi uhloniphe imibono yabo nawucoca nabo. Ngaleyo ndlela utawukhona kukucondza loko labakushoko futsi nabo batawuba nesifiso sekukulalela.

8. Kungani kubuyela kulesike sacoca nabo kudzinga imetamo?

⁸ Ngaphambi kwekutsi umuntfu asemukele sifundvo seliBhayibheli, kudzinga sikhatsi lesinyenti kanye nemetamo kubuyela kuye. Leni? Kungobe kungenteka bantfu lebesicoce nabo singabatfoli nasesibuyela. Kungenteka kudzingeke ubuyele emahlandla lamanyenti ngaphambi kwekutsi umnikati welikhaya avume kufundza nawe. Khumbula kutsi sihlahla sikhula kahle nasiniselwa njalo. Ngalokufanako, umuntfu utamtsandza kakhulu Jehova naJesu nangabe sicoca naye njalo ngeliVi laNkulunkulu.

9-10. Yini lesenta sitsi onkhe emaKhristu anesandla ekufuneni bantfu labanetinhlitiyo leticotfo?

⁹ Onkhe emaKhristu anesandla ekufuneni bantfu labanetinhlitiyo leticotfo. Lomsebenti wekwenta bafundzi singawufananisa nemsebenti wekufuna umntfwana lolahlekile. Sikusho ngani loko. Cabanga ngalokwenteka ngesikhatsi umfana loneminyaka lemitsatfu alahleka ekhaya. Wafunwa bantfu lebebacishe babe ngu-500. Ekugcineni watfolwa ngulenye indvodza emva kwema-awa langu 20 alahlekile. Lendvodza ayizange ivume kutsi bantfu bayidvumise. Yatsi: “Lomntfwana utfolakele ngenca yekutsi bonkhe bantfu bebabambisene.”

¹⁰ Bantfu labanyenti namuhla bafanana nalomntfwana. Bativa balahliwe futsi bete litsemba. (Efesu 2:12) BoFakazi baJehova labangetulu kwetigidzi letisiphohlongo bayabambisana  kute batfole bantfu labanjalo. Kungenteka ungamtfoli umuntfu lofisa kudadisha naye liBhayibheli. Nobe kunjalo, labanye bamemeteli labasensimini lokuyo bangahle bamtfole umuntfu lofisa kufundza emaciniso laseVini laNkulunkulu. Nangabe umzalwane nobe dzadze atfola umuntfu loba ngumfundzi waKhristu, bonkhe lababe nencenye ekumfuneni baba nesizatfu sekujabula.

11. Ngutiphi letinye tindlela longasita ngato ekwenteni bafundzi ngisho nome ngabe ute sifundvo seliBhayibheli?

¹¹ Ngisho nobe kwanyalo usengakasitfoli sifundvo seliBhayibheli, tikhona letinye tindlela longasita ngato ekwenteni bafundzi. Nasi sibonelo, nangabe kunetivakashi leticalako kuta eHholeni leMbuso ungatemukela futsi ube nebungani. Nawenta njalo utawube ubasita kutsi baciniseke kutsi lutsandvo ngilo lolusenta sibe ngemaKhristu eliciniso. (Joh. 13:34, 35) Ngisho nobe usho timphendvulo letimfisha nawusemhlanganweni, tingabasita bantfu labasandza kuhlanganyela kutsi nabo bavete kukholwa kwabo ngendlela lekahle futsi lehloniphekile. Ungaphindze uhambe nemmemeteli losemusha ensimini futsi umsite asebentise imiBhalo nakafundzisa bantfu. Nawenta njalo usuke umfundzisa kutsi alingise Khristu.—Luk. 10:25-28.

12. Kudzingeka size sibe nemakhono lakhetsekile yini kute sente bafundzi? Chaza.

¹² Kute kitsi lokufanele acabange kutsi udzinga emakhono lakhetsekile kute akhone kusita bantfu babe bafundzi baKhristu. Leni? Cabanga ngalokwenteka kuFaustina lohlala e-Bolivia. Nakacala kubona boFakazi baJehova bekangakwati kufundza, kodvwa nyalo sewuyakhona kufundza ngelizinga leliphansi. Sowubhajatisiwe futsi uyakutsandza kufundzisa labanye. Uvame kuchuba tifundvo teliBhayibheli letisihlanu ngeliviki. Ngisho nakuba Faustina angakhoni kufundza kahle ukhonile kusita bantfu labasitfupha kutsi babhajatiswe.—Luk. 10:21.

13. Ngisho nome simatasa ngutiphi tibusiso lesingatitfola nasenta bafundzi?

¹³ EmaKhristu lamanyenti amatasatasa kakhulu ngaleminye imisebenti lebalulekile. Nanobe kunjalo, bayatinika sikhatsi sekufundzisa labanye liBhayibheli, futsi loko kuwajabulisa kakhulu. Cabanga ngesibonelo saMelanie wase-Alaska. Wakhulisa indvodzakati yakhe leneminyaka lesiphohlongo ayedvwa. Bekasebenta onkhe malanga futsi anakekela umtali wakhe lobekane-cancer. Melanie bekunguye kuphela Fakazi edolobheni labehlala kulo. Bekathantaza acela emandla ekuyoshumayela ngisho nobe bekumakhata ngobe bekafuna kutfola umuntfu langafundza naye liBhayibheli. Ekugcineni wacoca naSara, lowajabula kakhulu nakeva kutsi Nkulunkulu  unelibito. Ngekuhamba kwesikhatsi Sara wavuma kufundza naye liBhayibheli. Melanie utsi: “NgaboLesihlanu entsambama bengihlale ngidziniwe, kodvwa mine nendvodzakati yami besichubeka sifundza naSara futsi loko kwasisita kakhulu. Bekusijabulisa kucwaninga kute sitfole timphendvulo temibuto yaSara, futsi sajabula nasimbona aba ngumngani waJehova.” Sara waba nesibindzi sekubeketelela kuphikiswa, wavalelisa esontfweni lakhe futsi wabhajatiswa.

14. (a) Umsebenti wekwenta bafundzi ufana njani nekudvweba? (b) Emavi lashiwo nguPawula laku2 Thimothi 4:1, 2 akutsintsa njani wena?

¹⁴ Ngisho nobe ungamtfoli longafundza naye liBhayibheli ungapheli emandla ekuchubeka ufuna bantfu labangaba bafundzi. Khumbula kutsi Jesu wafananisa umsebenti wekwenta bafundzi nekudvweba. Bekuphela ema-awa lamanyenti badvwebi bangakabambi ngisho yinye inhlanti. Bebavame kusebenta kuze kube sebusuku noma bavuke ekuseni kakhulu futsi ngaletinye tikhatsi bebahamba emabanga lamadze. (Luk. 5:5) Ngendlela lefanako, emaKhristu lamanyenti acitsa sikhatsi lesinyenti enta bafundzi ngetikhatsi letehlukene nasetindzaweni letehlukene. Leni? Kute atoba nematfuba lamanyenti ekuhlangana nebantfu. Labo labatimiselako ekufuneni bafundzi bavame kutfola umvuzo wekuhlangana nebantfu labafunako kuwulalela umlayeto lesiwushumayelako. Ungetama yini kushumayela ngesikhatsi lapho ungahlangana khona nebantfu labanyenti nobe endzaweni lapho ungatfola khona bantfu labanyenti?—Fundza 2 Thimothi 4:1, 2.

15. Kungani kudzingeka sibeketele nasifundzisa bantfu liBhayibheli?

 ¹⁵ Kungani kuchuba tifundvo teliBhayibheli kudzinga kutsi ubeketele? Lesinye sizatfu kutsi sifuna kwenta lokungetulu kwekumane sisite umfundzi kutsi ati futsi atsandze loko lokufundziswa liBhayibheli. Sifuna kumsita kutsi amati futsi amtsandze Jehova longumBhali weliBhayibheli. Ngetulu kwekufundzisa umfundzi loko Jesu lafuna kutsi bafundzi bakhe bakwente, sifuna kusita umfundzi kutsi ayati indlela lekufanele siphile ngayo njengobe singemaKhristu eliciniso. Ngekubeketela kufanele sisite umfundzi nakasetama kamatima kusebentisa timiso teliBhayibheli. Labanyenti bayakhona kushintja indlela labacabanga ngayo nendlela labenta ngayo tintfo ngetinyanga letimbalwa, kantsi labanye kubatsatsa sikhatsi lesidze.

16. Yini loyifundzile kulokwenteka kuRaúl?

¹⁶ Lesinye sitfunya seliVangeli ePeru saba nelitfuba lekulandzisa ngetinzuzo tekubeketela. Lesitfunywa selivangeli sitsi: “Mine naRaúl lebengimfundzela liBhayibheli safundza tincwadzi letimbili. Kodvwa bekasolo anetinkinga letimatima ekuphileni kwakhe. Bekanetinkinga emshadweni wakhe, beketfuka inhlamba, futsi bantfwana bakhe bebakutfola kumatima kumhlonipha. Bekaba khona njalo emihlanganweni, ngako ngachubeka ngimvakashela yena nemndeni wakhe. Nasekuphele iminyaka lengetulu kwalemitsatfu sacala kubonana naye, wakufanelekela kubhajatiswa.”

17. Sitawucoca ngani esihlokweni lesilandzelako?

¹⁷ Jesu watsi: “Hambani nente bantfu bato tonkhe tive babe bafundzi.” Kute silalele lomyalo kudzingeka sikhulume nebantfu labacabanga ngendlela leyehlukile kulesicabanga ngayo, lokufaka ekhatsi bantfu labangasiwo emalunga enkholo noma labangakholelwa kutsi Nkulunkulu ukhona. Esihlokweni lesilandzelako sitawufundza kutsi singacoca njani nebantfu labanjalo.