1-2. (a) Kungani kungakafaneli simangale nangabe hulumende asiyekelisa kukhonta Jehova? (b) Yini lesitawufundza ngayo kulesihloko?

NGA-2018, bangetulu kwa-223 000 bamemeteli betindzaba letimnandzi lebebahlala etindzaweni lapho khona imisebenti yetfu lephatselene nekukhonta Nkulunkulu ivinjelwe. Loko akumangalisi ngobe esihlokweni lesendlulile sifundzile kutsi emaKhristu eliciniso ayati kutsi atawushushiswa. (2 Thim. 3:12) Ngisho nome sihlala kuphi, bohulumende bangasivimba kutsi sikhonte Jehova Nkulunkulu wetfu lositsandzako. Loko kungenteka ngekushesha futsi singakalindzeli.

² Nangabe hulumende endzaweni lohlala kuyo akuyekelisa kukhonta Jehova, kungenteka utibute imibuto lefana naletsi: ‘Lushushiso lusho kutsi Jehova akasasitsandzi yini? Kuyekeliswa kushumayela kutawusenta siyekele yini kukhonta Jehova? Kufanele sitfutsele endzaweni lete yini lushushiso lapho khona sitawukhona kukhonta Jehova ngekukhululeka?’ Kulesihloko, sitawucoca ngetimphendvulo talemibuto. Sitawuphindze sifundze nangekutsi nangabe umsebenti wetfu uvinjelwe, yini lesingayenta kanye nalokungakafaneli siyente kute sichubeke sikhonta Jehova.

3. Ngekusho kwembhalo wa-2 Khorinte 11:23-27, nguluphi lushushiso umphostoli Pawula labhekana nalo, futsi yini lesiyifundzako kuloko?

³ Nangabe hulumende asiyekelisa kukhonta Jehova, kungenteka sifike esiphetfweni lesikabi sekutsi Nkulunkulu akasitsandzi. Khumbula kutsi lushushiso alusho kutsi Jehova akajabuli ngatsi. Cabanga ngemphostoli Pawula. Nkulunkulu bekamtsandza.  Bekangumphostoli futsi waba nelilungelo lekubhala tincwadzi letingu-14 EmiBhalweni YemaKhristu YesiGriki. Nanobe kunjalo, washushiswa kabuhlungu. (Fundza 2 Khorinte 11:23-27.) Lokwenteka kumphostoli Pawula kusifundzisa kutsi Jehova uyavuma kutsi tinceku takhe letetsembekile tishushiswe.

4. Kungani live lisitondza?

⁴ Jesu wachaza kutsi kungani kufanele silulindzele lushushiso. Watsi bantfu batasitondza ngobe asisiyo incenye yalelive. (Joh. 15:18, 19) Lushushiso alusho kutsi Jehova akasibusisi. Kodvwa lusho kutsi senta lokulungile emehlweni akhe.

5. Bantfu bangasiyekelisa yini kukhonta Jehova? Chaza.

⁵ Bantfu labasiphikisako ngeke basiyekelise kukhonta Jehova Nkulunkulu longuSomandla. Bantfu labanyenti betamile, kodvwa behlulekile. Cabanga ngalokwenteka ngesikhatsi kuneMphi Yelive Yesibili. Ngaleso sikhatsi, emaveni lamanyenti bohulumende babashushisa kabuhlungu bantfu baNkulunkulu. EmaNazi aseGermany, bohulumende base-Australia, iCanada kanye nalamanye emave bawumisa umsebenti waBoFakazi BaJehova. Nanobe kunjalo, cabanga ngalokwenteka. Nga-1939 nakucala lemphi bebangu-72 475 bamemeteli betindzaba letimnandzi emhlabeni wonkhe. Imibiko itsi nayiphela nga-1945 bamemeteli betindzaba letimnandzi besebangu-156 299 futsi loko kwaba sibusiso lesikhulu lesivela kuJehova. Linani lebamemeteli betindzaba letimnandzi beselandze kakhulu kunangesikhatsi kucala lemphi.

6. Kunekutsi lushushiso lusente sesabe, yini lolungasikhutsata kutsi siyente? Shano sibonelo.

⁶ Kunekutsi lusente sesabe, lushushiso lungasikhutsata kutsi sitimisele ekukhonteni Jehova. Nasi sibonelo, labanye labashadene lebebanemntfwana lomncane bebahlala eveni lapho khona hulumende ancuma kubayekelisa kukhonta Jehova. Kunekutsi besabe, bacala kuba ngemahlahlandlela lavamile. Lodzadze waze wayekela umsebenti wakhe lobewuholela kahle. Lomzalwane watsi lokuvinjelwa kukhonta Jehova kwenta bantfu labanyenti bafuna kubati kabanti BoFakazi BaJehova. Loko kwenta kwaba melula kutsi acalise tifundvo teliBhayibheli. Lokuvinjelwa kwalomsebenti kwaba naleminye  imiphumela lemihle. Lomunye lomdzala welibandla wakulelo live watsi bantfu labanyenti lebesebayekele kukhonta Jehova babese bacala kuya emihlanganweni yelibandla futsi baphindze bashumayela.

7. (a) Yini lesiyifundza emBhalweni waLevithikhusi 26:36, 37? (b) Yini lotayenta nangabe uyekeliswa kwenta imisebenti yekukhonta Jehova?

⁷ Nangabe titsa tetfu tivimba umsebenti wetfu, tisuke tifuna kusenta sesabe kukhonta Jehova. Tingaphindze tisakate tindzaba letingemanga ngatsi, titfumele tiphatsimandla kutsi tiyophenya imiti yetfu, tisimikise enkantolo nome tibophe labanye bazalwane betfu. Tisuke ticabanga kutsi sitawesaba bese siyayekela kukhonta Jehova nangabe labanye betfu sebaboshiwe. Nangabe sibavumela kutsi basente sesabe, singagcine sesiyekele kukhonta Jehova. Asifuni kulingisa bantfu lokukhulunywa ngabo emBhalweni wa-Levithikhusi 26:36, 37. (Fundza.) Asifuni kuvumela kwesaba kusente siyekele nome sinciphise lizinga lesenta ngalo imisebenti lesiyentela Jehova. Simetsemba ngalokuphelele Jehova futsi asifuni kuvumela bantfu basente sesabe. (Isa. 28:16) Sifuna sicondziso saJehova ngemthantazo. Ngesizatfu sekutsi Jehova uyasisekela, siyati kutsi ngisho bohulumende labanemandla angeke basiyekelise kukhonta Nkulunkulu wetfu ngekwetsembeka.—Heb. 13:6.

8-9. (a) Ngusiphi sincumo lokuyodzingeka sentiwe yinhloko yemndeni nobe umuntfu ngamunye? (b) Yini letasisita sente tincumo letihlakaniphile?

⁸ Nangabe endzaweni lohlala kuyo hulumende akuyekelisa kukhonta Jehova, kungenteka ucabange kutfutsa uye kulelinye live lapho khona ungakhona kukhonta Jehova ngenkhululeko. Lesi sincumo umuntfu ngamunye lokufanele atentele sona. Labanye bangakutfola kulusito kufundza ngaloko lokwentiwa ngemaKhristu angelikhulu lekucala ngesikhatsi ashushiswa. Ngemuva kwekutsi titsa tigcobe Stefano ngematje aze afe, bafundzi baJesu besuka eJerusalema baya eJudiya, eSamariya, baze bayofika eFenisiya, eSiphrosi nase-Antiyokhi. (Mat. 10:23; Imis. 8:1; 11:19) Nanobe kunjalo, labanye bantfu bangatsi ngemuva kwekufika kwalolunye lushushiso lwemaKhristu angelikhulu lekucala, umphostoli Pawula wancuma kungatfutsi. Wakhetsa kufaka kuphila kwakhe engotini kute ashumayele tindzaba letimnandzi futsi acinise kukholwa kwebazalwane emadolobheni lapho khona bekunelushushiso lolumatima.—Imis. 14:19-23.

⁹ Yini tsine lesiyifundzako kulendzaba? Inhloko yemndeni ngiyo lokufanele incume kutsi umndeni wayo utawutfutsa yini nobe cha. Ngaphambi kwekutsi incume, kufanele ithantaze futsi icabangisise ngetimo temndeni wayo kanye nemiphumela lemihle nome lemibi lengaba khona nangabe batfutsa. Kulendzaba, umKhristu ngamunye kufanele ‘atetfwalele umtfwalo wakhe.’ (Gal. 6:5) Akukafaneli sibehlulele labanye ngetincumo labatentako.

10. Lihhovisi leligatja kanye nalabadzala belibandla batasiniketa tiphi ticondziso?

¹⁰ Yini lengasisita kutsi sichubeke sikhonta Jehova ngisho nobe bohulumende basiyekelisa? Lihhovisi leligatja litawuniketa labadzala belibandla ticondziso kanye nendlela yekuchubeka sifundza ngaJehova, sibe siya emihlanganweni, kanye nendlela yekushumayela tindzaba letimnandzi. Nangabe lihhovisi leligatja lingakhoni kuchumana nalabadzala belibandla, labadzala batawusita bonkhe labasebandleni bachubeke bakhonta Jehova. Labazalwane batasiniketa ticondziso letitfolakala  eBhayibhelini kanye nasetincwadzini tetfu tebuKhristu.—Mat. 28:19, 20; Imis. 5:29; Heb. 10:24, 25.

11. Yini lengakwenta uciniseke kutsi utawuhlale utitfola tintfo letitakwenta ube nebuhlobo lobuhle naJehova, futsi yini longayenta kute uvikele liBhayibheli lakho kanye netincwadzi?

¹¹ Jehova wetsembisa tinceku takhe kutsi titawutfola konkhe letikudzingako kute tibe nebuhlobo lobuhle naye. (Isa. 65:13, 14; Luk. 12:42-44) Ngako ciniseka kutsi inhlangano yaJehova itakwenta konkhe lokusemandleni ayo kute uhlale wetsembekile kuJehova. Yini wena lokufanele uyente? Nangabe umsebenti wetfu uvinjelwe, tfola indzawo lekahle longafihla kuyo liBhayibheli lakho kanye naletinye tincwadzi. Kufanele ugadze kutsi letincwadzi letiligugu kungaba nguletinyatselisiwe nome letisetintfweni tebuchwepheshe awutibeki endzaweni lapho khona titawusheshe tibonakale. Sonkhe kufanele sente lokusemandleni etfu kute sihlale sinekukholwa lokucinile.

12. Labadzala bangayihlela njani imihlangano ngendlela lengeke isidvonsele emehlo ebantfu?

¹² Kutawentekani ngemihlangano yetfu yamaviki onkhe? Labadzala belibandla batawuhlela kutsi imihlangano ibanjelwe lapho khona bantfu labasiphikisako bangeke basibone. Bangahle bahlele kutsi sihlangane sibe ngemacembu lamancane futsi kungenteka sikhatsi kanye nendzawo lesibambela kuyo imihlangano ishintje kanyenti. Ungasita bonkhe labakulemihlangano ngekutsi ukhulumele phasi nawuya emihlanganweni noma ubuya kuyo. Kungahle kudzingeke ugcoke ngendlela lengeke ikudvonsele emehlo ebantfu.

13. Yini lesiyifundzako kulokwentiwa bazalwane betfu baseSoviet Union?

¹³ Umsebenti wekushumayela utawentiwa ngetindlela letehlukahlukene kuye ngetimo tendzawo. Ngenca yekutsi siyamtsandza Jehova futsi sifuna kutjela labanye ngeMbuso wakhe, sitawufuna indlela lekahle yekushumayela. (Luk. 8:1; Imis. 4:29) Mayelana nemsebenti waBoFakazi BaJehova wekushumayela, sati semlandvo lesiseSoviet Union, Emily B. Baran satsi: “Ngesikhatsi hulumende atjela BoFakazi kutsi bayekele kushumayela ngalabakukholelwako bacala kucoca nabomakhelwane babo nebantfu labasebenta nabo kanye nebangani babo. Ngesikhatsi BoFakazi baboshiwe ngenca yekushumayela bacala kushumayela kuletinye tiboshwa.” Ngisho nobe umsebenti waBoFakazi BaJehova bewuvinjelwe eSoviet Union, abazange bayekele kushumayela. Shengatsi ungatimisela kwenta lokufanako ngisho nobe umsebenti wekushumayela uvinjelwe endzaweni lohlala kuyo.

14. UmBhalo weTihlabelelo 39:1 usecwayisa ngayiphi ingoti?

¹⁴ Kunakisise loko lokucocela labanye.  Nangabe umsebenti wetfu uvinjelwe, kufanele sibone nangabe ‘kusikhatsi sekubindza.’ (Shu. 3:7) Kufanele siyilondvolote kahle imininingwane leyimfihlo, lefaka ekhatsi emagama ebazalwane betfu nabodzadze, indzawo lesihlangana kuyo, indlela lesishumayela ngayo kanye nendlela lesitfola ngayo imfundvo levela kuNkulunkulu. Lemininingwane angeke siyitjele tiphatsimandla nome sicocele bangani betfu nobe tihlobo letihlala eveni lesikulo nome kulamanye emave. Nangabe lemininingwane siyitjela labanye bantfu, sisuke sibeka kuphila kwebazalwane betfu engotini.—Fundza Tihlabelelo 39:1.

15. Yini Sathane letama kuyenta kitsi, futsi singalubalekela njani lolugibe?

¹⁵ Ungavumeli tinkinga letincane tisehlukanise. Sathane uyati kutsi angeke siphumelele nangabe sehlukene ekhatsi. (Mak. 3:24, 25) Utawuhlale etama kusehlukanisa. Loko ukwenta anelitsemba lekutsi sitawuhlaselana sodvwa esikhundleni sekutsi silwe naye.

16. Ngusiphi sibonelo lesihle lesasibekelwa ngudzadze Gertrud Poetzinger?

¹⁶ Ngisho nemaKhristu lavutsiwe kufanele agadze kutsi angabanjwa ngulolugibe. Cabanga ngadzadze Gertrud Poetzinger na-Elfriede Löhr lebebagcotjiwe. Labodzadze lababili kanye nalabanye bazalwane bebaboshwe enkambu yekuhlushwa ngemaNazi. Gertrud waba nemona ngesikhatsi Elfriede abeka tinkhulumo lebetikhutsata bodzadze lebebasenkambu. Ngekuhamba kwesikhatsi Gertrud watisola futsi wacela Jehova kutsi amsite. Watsi: “Kufanele sifundze kwemukela kutsi labanye banemakhono kunatsi futsi baphatsiswe imisebenti leminyenti kuneyetfu.” Yini leyamsita kutsi ayekele kuba nemona? Gertrud wanaka kakhulu buntfu lobuhle Elfriede labenabo kanye nekutsi bekanebungani. Loko kwamsita kutsi aphindze abe nebuhlobo lobuhle na-Elfriede. Bobabili bakhona kubeketelela kuhlushwa enkambu futsi bachubeka bakhonta Jehova ngekwetsembeka baze bashona. Nangabe sitimisela kutsi silungise kungevani nebazalwane betfu sitawuhlale sinebunye.— Khol. 3:13, 14.

17. Kungani kufanele silalele ticondziso?

¹⁷ Lalela ticondziso ngaso sonkhe sikhatsi. Sitawukhona kubalekela tinkinga nangabe silalela ticondziso lesititfola kubazalwane labetsenjwako futsi labaholako. (1 Phet. 5:5) Nasi sibonelo, kulelinye live lapho umsebenti wekushumayela bewuvinjelwe khona, bazalwane labaholako bacela bamemeteli kutsi bangabaniketi bantfu tincwadzi nabashumayela. Kodvwa lomunye umzalwane lobekalihlahlandlela bekatitjela kutsi uncono, ngako bekabaniketa bantfu tincwadzi nakasensimini. Waba yini umphumela? Ngekushesha nje ngemuva  kwekuba yena nalabanye bazalwane bacedze kufakaza bangakahleli, baphenywa ngemaphoyisa. Ekugcineni lamaphoyisa abalandzela futsi atitfola letincwadzi lebekatinika bantfu. Yini tsine lesiyifundzako? Kufanele sitilalele ticondziso ngisho nome singavumelani nato. Jehova utawuhlale asibusisa nangabe sibambisana nebazalwane lababeke kutsi basihole.

18. Kungani kungakafaneli sibeke imitsetfo lengakadzingeki?

¹⁸ Ungabeki imitsetfo lengakadzingeki. Nangabe labadzala babeka imitsetfo lengadzingeki basuke benta tintfo tibe lukhuni kulabanye. Umzalwane Juraj Kaminský ukhumbula loko lokwenteka ngesikhatsi umsebenti wekushumayela uvinjelwe eCzechoslovakia yakadzeni. Utsi: “Ngemuva kwekuboshwa kwebazalwane kanye nalabadzala belibandla labanyenti, labanye bazalwane lebebangakaboshwa lebebahola emabandleni kanye nasetigodzini bacala kubeka imitsetfo lemayelana nekutsi bamemeteli kufanele batiphatse njani futsi babentela luhla lwetintfo lebekufanele batente nalebekungakafaneli batente.”Jehova akasiniketi ligunya lekwentela labanye tincumo. Umuntfu lobeka imitsetfo lengakadzingeki usuke angavikeli bazalwane bakhe kodvwa usuke etama kutenta inkhosi ekukholweni kwabo.—2 Khor. 1:24.

19. Ngekusho kwa-2 Tikhronike 32:7, 8 yini lesenta sibe nesibindzi ngisho nobe Sathane asihlupha?

¹⁹ Sitsa setfu lesikhulu Sathane Develi angeke siyekele kuhlupha tinceku taJehova letetsembekile. (1 Phet. 5:8; Semb. 2:10) Sathane kanye nebantfu labamsekelako batawetama kusiyekelisa kukhonta Jehova. Nobe kunjalo, kute sizatfu sekutsi sincotjwe kwesaba. (Dut. 7:21) Jehova unatsi futsi utawuchubeka asisekela ngisho nobe umsebenti lesimentela wona uvinjelwe.—Fundza 2 Tikhronike 32:7, 8.

20. Yini lotimisele kuyenta?

²⁰ Shengatsi singatimisela kulingisa bazalwane betfu labatjela babusi bangesikhatsi sabo kutsi: “Yehlulelani nine kutsi kulungile yini emehlweni aNkulunkulu kutsi silalele nine kunekutsi silalele Yena. Kodvwa tsine ngeke siyekele kukhuluma ngetintfo lesitibonile nalesitivile.”—Imis. 4:19, 20.