1. Kungani Jehova anguMbumbi loncono kakhulu?

NGANOVEMBER 2010, livasi lelibumba laseShayina latsengiswa ngemali lecishe ibe ngemadola latigidzi letingu-70 eNgilandi. Kuyamangalisa kutsi umbumbi angasentisa libumba intfo levamile naleshiphile ibe livasi lelihle nalelidulile. Jehova uMbumbi wetfu uncono kakhulu kunembumbi longumuntfu. LiBhayibheli litsi Jehova wenta umuntfu lote sono “ngelutfuli lwemhlabatsi,” lokusho kutsi wambumba ngelibumba. (Genesisi 2:7) Lomuntfu longu-Adamu, wabitwa ngekutsi ‘yindvodzana yaNkulunkulu’ futsi wadalwa anelikhono lekulingisa buntfu baNkulunkulu.​—Lukha 3:38.

2, 3. Singayilingisa njani indlela yekucabanga yema-Israyeli laphendvuka?

² Ngesikhatsi Adamu avukela uMdali wakhe, akazange aphindze abitwe ngekutsi yindvodzana yaNkulunkulu. Kodvwa situkulwane lesinyenti sa-Adamu sakhetsa Jehova kutsi abe nguMbusi waso. (Hebheru 12:1) Ngekulalela uMdali waso ngekutitfoba, sikhombisile kutsi sifuna kubuswa nguye, asifuni kutsi Sathane abe nguYise waso neMbumbi waso. (Johane 8:44) Kwetsembeka kwaso kuNkulunkulu kusikhumbuta  ngema-Israyeli lebesekaphendvukile, latsi: “Wena [Jehova], unguBabe wetfu. Tsine silibumba, wena ungumbumbi, sonkhe singumsebenti wetandla takho.”​—Isaya 64:8.

³ Tikhonti taJehova teliciniso lamuhla nato tetama ngawo onkhe emandla ato kutsi tilalele futsi titfobeke. Tikutsatsa njengelilungelo kubita Jehova ngaBabe wato, futsi tifuna kutsi abe nguMbumbi wato. Sinaso yini tsine sifiso sekuba libumba lelitsambile, lelitawukwati kubunjwa nguNkulunkulu libe sitja lesiligugu? Bazalwane betfu nabodzadze sibatsatsa njengalabo labasatfutfuka yini nalabachubeka babunjwa nguNkulunkulu? Kute sibe nembono lofanele, sitawucoca ngendlela Jehova labakhetsa ngayo labo lababumbako, nekutsi kungani ababumba futsi ukwenta njani loko.

4. Jehova ubakhetsa njani labo labadvonsela kuye? Niketa tibonelo.

⁴ Jehova akababuki bantfu ngendlela tsine lesibabuka ngayo. Esikhundleni saloko, uhlola inhlitiyo futsi abone loko ngamunye wetfu langiko mbamba. (Fundza 1 Samuweli 16:7b.) Jehova wakubonisa loko ngesikhatsi asungula libandla lebuKhristu. Wadvonsela kuye nakuNdvodzana yakhe bantfu labanyenti, futsi labanye babo kungenteka bebabukelwa phansi. (Johane 6:44) Lomunye wabo bekungumFarisi lebekabitwa ngekutsi nguSawula, ‘abehlambalata, ahlupha labanye futsi edzelela.’ (1 Thimothi 1:13) Kodvwa Jehova wahlola inhlitiyo yaSawula futsi akazange amtsatse njengelibumba lelingenamsebenti. (Taga 17:3) Esikhundleni saloko, Jehova wabona kutsi Sawula angabumbeka abe ‘sitja sakhe lesikhetsekile’ lebesitawushumayela “kubetive, emakhosini nasemadvodzaneni aka-Israyeli.” (Imisebenti 9:15) Jehova waphindze wakhetsa labanye lebebangakhona kutsi babumbeke kute babe ‘belikhetselo,’ labebafaka ekhatsi tidzakwa, bantfu labatiphatsa kabi ngekwelicansi, kanye nemasela. (Roma 9:21; 1 Khorinte 6:9-11) Njengobe bebafundza imiBhalo, bacinisa kukholwa kwabo kuJehova futsi bamvumela kutsi ababumbe.

5, 6. Kumetsemba kwetfu Jehova njengembumbi wetfu kufanele kuyitsintse njani indlela lesicabanga ngayo (a) ngebantfu labasensimini yetfu (b) ngebazalwane betfu nabodzadze?

⁵ Jehova uyakwati kubakhetsa bantfu labafanele nekubadvonsa. Kungaleso sizatfu kungakafaneli sehlulele labanye ensimini yetfu nobe ebandleni lesikulo. Cabanga ngendlela lenye indvodza lebitwa ngekutsi nguMichael lebeyitiva ngayo ngesikhatsi BoFakazi BaJehova bayivakashele. Itsi: “Bengivele ngihambe ngingabanaki, kungatsi abekho. Bengingumuntfu loluhlata! Ngekuhamba kwesikhatsi, endzaweni leyehlukile, ngahlangana nemndeni lengawutsandza ngobe bewutiphatsa kahle. Ngako ngalelinye lilanga kwangetfusa kuva kutsi kantsi nabo baBoFakazi BaJehova! Kutiphatsa kwabo kwangenta ngabuyeketa tisusa tami tekubabandlulula.  Ngekushesha ngabona kutsi indlela lebengicabanga ngayo beyingakasekelwa emacinisweni kodvwa beyisekelwe kuloko lebengikuva ngebantfu nasekubeni ngumuntfu longanandzaba.” Michael wabese ufuna kwati lokunyenti futsi wasemukela sifundvo seliBhayibheli. Ngekuhamba kwesikhatsi wabhajatiswa futsi waba sisebenti sasikhatsi sonkhe.

⁶ Nasitsatsa Jehova njengeMbumbi wetfu, indlela lesicabanga ngayo ngebazalwane betfu nabodzadze nayo itawushintja. Ngamunye wabo sitamtsatsa njengaloyo losatfutfuka ngobe Jehova ubabona ngaleyondlela. Ubona loko labangiko mbamba ngekhatsi futsi uyati kutsi kuba nesono kwabo kuyintfo yesikhashana. Uyati nekutsi umuntfu ngamunye utawuba luhlobo lolunjani lwemuntfu. (Tihlabelelo 130:3) Singamlingisa Jehova nasinembono lokahle ngebazalwane betfu. Singaphindze sibambisane neMbumbi wetfu kute sisite bazalwane betfu nabodzadze kutsi batfutfuke. (1 Thesalonika 5:14, 15) Labadzala ebandleni kufanele babeke sibonelo lesihle sekwenta loko.​—Efesu 4:8, 11-13.

7. Yini lekwenta usibonge siyalo saJehova?

⁷ Labanye bantfu bangatsi: ‘Bengingakuboni kubaluleka kwesijeziso sebatali bami kwaze kwaba ngulapho nami ngiba nebami bantfwana.’ Njengobe sikhula, siyakubona kubaluleka kwesijeziso ngobe siyati kutsi siyindlela lesikhonjiswa ngayo kutsi siyatsandvwa. (Fundza Hebheru 12:5, 6, 11.) Jehova uyasitsandza njengobe sibantfwana bakhe, kungaleso sizatfu asiyala ngesineke futsi asibumba. Ufuna kutsi sihlakaniphe, sijabule futsi simtsandze njengaBabe wetfu. (Taga 23:15) Akajabuli nakasibona sihlupheka futsi akafuni sife sitoni letingakaphendvuki.​—Efesu 2:2, 3.

8, 9. Usifundzisa njani Jehova lamuhla, futsi lemfundvo itawuchubeka njani esikhatsini lesitako?

⁸ Ngalesikhatsi sisengakamati Jehova kungenteka besinemikhuba leminyenti lemibi. Kodvwa Jehova wasibumba wasisita senta lushintjo, kungako nyalo sesinebuntfu lobuhle. (Isaya 11:6-8; Kholose 3:9, 10) Siphila epharadisi lelingumfanekiso. Lesi simo lesikhetsekile Jehova lasentele sona kute sisisite lamuhla sikhone kubumbeka kahle. Kuso, sitiva sivikelekile futsi silondzekile ngisho nobe siphila eveni lelibi. Labo labakhule bangatsandvwa emindenini yabo, nyalo sebativa batsandvwa mbamba bazalwane babo nabodzadze kulelipharadisi lelingumfanekiso. (Johane 13:35) Natsi sesifundze kukhombisa labanye kutsi siyabatsandza. Ngetulu kwako konkhe, sesiyamati Jehova futsi siyabona kutsi uyasitsandza njengababe wetfu.​—Jakobe 4:8.

⁹ Emhlabeni lomusha, sitawuzuza ngalokugcwele kulelipharadisi lelingumfanekiso. Sitawuphindze sikujabulele nekuphila epharadisi lapho kutawube kubusa khona uMbuso waNkulunkulu. Ngaleso sikhatsi, Jehova utawube achubeka asibumba  futsi asifundzisa ngelizinga lelisetulu kakhulu. (Isaya 11:9) Jehova utawuphindze ente kutsi singasabi nesici emitimbeni nasetingcondvweni tetfu. Loko kutawenta kutsi kube melula ngatsi kutsi sitive kahle ticondziso takhe, bese sitilandzela njengobe tinjalo. Ngako asichubekeni sivumela Jehova kutsi asibumbe futsi simkhombise nekutsi lutsandvo lwakhe lubalulekile kitsi.​—Taga 3:11, 12.

10. Jesu wasiveta njani sineke kanye nelikhono leMbumbi Lomkhulu?

¹⁰ Njengobe umbumbi lonelikhono alati luhlobo lwelibumba lalusebentisako, neMbumbi wetfu Jehova usati kahle. Uyabati butsakatsaka betfu, loko lesingeke sikhone kukwenta, nentfutfuko lesesiyentile bese ubumba ngamunye wetfu acabanga ngaleto tintfo. (Fundza Tihlabelelo 103:10-14.) Indlela Jesu lasingatsa ngayo emaphutsa ebaphostoli bakhe, isifundzisa indlela Jehova lasitsatsa ngayo. Ngaletinye tikhatsi baphostoli bebaphikisana ngekutsi ngubani lomkhulu emkhatsini wabo. Kube bewukhona, bewutawutsini ngaloko lobekwentiwa ngulabaphostoli? Mhlawumbe bewutawucabanga kutsi abasilo libumba lelitsambile. Jesu bekati kutsi bebangabumbeka, kuphela nje nabalalela seluleko sakhe futsi balingise kutfobeka kwakhe ngobe abebabeketelela futsi abeluleka ngemusa. (Makho 9:33-37; 10:37, 41-45; Lukha 22:24-27) Ngemuva kwekuvuswa kwaJesu, baphostoli batfola umoya longcwele waNkulunkulu futsi bebangasanaki kutsi ngubani lomkhulu kubo. Esikhundleni saloko, besebanake kakhulu umsebenti Jesu labanika wona.​—Imisebenti 5:42.

11. Ngutiphi tindlela Davide lakhombisa ngato kutsi ulibumba lelitsambile, futsi tsine singamlingisa njani?

¹¹ Lamuhla, Jehova usebentisa liBhayibheli, umoya wakhe longcwele kanye nelibandla kute asibumbe. LiBhayibheli lingasibumba ngatiphi tindlela? Kufanele silifundze, sizindle ngaloko lesikufundzako, bese sicela Jehova asisite sikusebentise loko lesikufundzile. INkhosi Davide yabhala: “Nangilele ngiyakukhumbula; nangicwashile ebusuku ngizindla ngawe.” (Tihlabelelo 63:6) Yaphindze yatsi: “Ngiyamdvumisa Simakadze lowangeluleka, nanembeza wami uyangiyala ebusuku.” (Tihlabelelo 16:7) Davide wazindla ngeseluleko saJehova futsi wasivumela kutsi sibumbe imicabango nemiva yakhe ngisho nangesikhatsi bekumatima kwemukela leseluleko. (2 Samuweli 12:1-13) Davide wasibekela sibonelo lesihle kakhulu sekutfobeka nekulalela. Ngako-ke tibute: ‘Nangifundza liBhayibheli ngiyazindla yini ngalo, ngivumele seluleko saNkulunkulu siyitsintse imicabango yami lejulile kanye nemiva yami? Ngingakhona yini kukwenta kakhudlwana loko?’​—Tihlabelelo 1:2, 3.

12, 13. Jehova usibumba njani asebentisa umoya longcwele nelibandla lebuKhristu?

¹² Umoya longcwele ungasibumba ngetindlela letinyenti. Nasi sibonelo: Ungasisita silingise buntfu baJesu, siphindze sikhombise netincenye letehlukahlukene tetitselo temoya. (Galathiya 5:22, 23) Lenye incenye yaletitselo temoya, lutsandvo. Siyamtsandza Nkulunkulu futsi sifuna kumlalela sibunjwe nguye ngobe siyati kutsi imitsetfo yakhe izuzisa tsine. Ngetulu kwaloko, umoya longcwele ungasipha emandla kute sibalekele kubunjwa ngulelive lelibi. (Efesu 2:2) Ngalesikhatsi umphostoli Pawula asemusha, abehungwa  baholi benkholo yemaJuda labatigcabhako. Kodvwa umoya longcwele wamsita kutsi ashintje. Kamuva wabhala: “Ngobe nginemandla kuto tonkhe tintfo ngenca yaloyo longipha emandla.” (Filiphi 4:13) Natsi kufanele siwucele umoya longcwele waNkulunkulu, sati kutsi Jehova utayiphendvula imithantazo yetfu lecotfo.​—Tihlabelelo 10:17.

¹³ Jehova uphindze asebentise libandla nemadvodza lamadzala kutsi babumbe ngamunye wetfu. Nasi sibonelo: Nangabe labadzala babona kutsi sinebutsakatsaka lobutsite betama kusisita. Nobe kunjalo, abasiniketi seluleko lesisekelwe emibonweni yabo. (Galathiya 6:1) Ngekutfobeka bathantaza kuJehova kute abanikete kucondza nekuhlakanipha. Ngemuva kwaloko, bayacwaninga eBhayibhelini kanye nasetincwadzini tetfu tebuKhristu kute batfole imininingwane lengasisita. Nangabe labadzala beta kuwe batokweluleka ngemusa nelutsandvo, kumbe mayelana nendlela logcoke ngayo, khumbula kutsi loku bufakazi belutsandvo lwaNkulunkulu. Nawusisebentisa leseluleko utawuba njengelibumba lelitsambile, lelo Jehova lakhonako kulibumba futsi utawusitakala.

14. Ngisho nobe aneligunya lekwenta nome ngabe yini layitsandzako ngelibumba, Jehova ukhombisa njani kutsi uyayihlonipha inkhululeko yetfu yekutikhetsela?

¹⁴ Nasiyibona indlela Jehova lasibumba ngayo, itasisita kutsi sibe nebuhlobo lobuhle nebazalwanebetfu nabodzadze. Sitawuphindze sibe nembono lokahle ngebantfu labasensimini yetfu labafaka ekhatsi labo lesifundza nabo liBhayibheli. Ngetikhatsi tekubhalwa kweliBhayibheli, umbumbi bekudzingeka akhiphe ematje kanye naletinye tintfo, ngaphambi kwekutsi asebentise lolubumba kute lihlanteke. Jehova uMbumbi Lomkhulu, usita bantfu labafuna kubunjwa. Akabaphoceleli bantfu kutsi bashintje, esikhundleni saloko  ubakhombisa tindlela takhe letihlantekile. Ngibo labatikhetselako kutsi bayafuna yini kwenta tingucuko.

15, 16. Bantfu lesifundza nabo liBhayibheli bakhombisa njani kutsi bafuna Jehova ababumbe? Niketa sibonelo.

¹⁵ Ake ucabange ngaloko lokwenteka kuTessie, dzadze wase-Australia. Abekutfola kumelula kakhulu kufundza loko liBhayibheli lelikushoko. Nobe kunjalo, intfutfuko yakhe beyingabonakali futsi abengayi nasemihlanganweni. Dzadze labefundza naye abesathantazile kuJehova ngalendzaba futsi asabone kuncono kutsi ayekele kuchuba lesifundvo. Kepha kwabese kwenteka intfo lemangalisako. Ekhatsi nesifundvo sabo, Tessie watjela lodzadze ngaloko lebekumenta angatfutfuki. Watsi abetiva angumtentisi ngobe abetsandza kakhulu kugembula. Kodvwa manje abesakhetse kukuyekela lokugembula.

¹⁶ Ngekushesha Tessie wacala kuya emihlanganweni futsi waveta buntfu bebuKhristu ngisho nobe bangani bakhe bebahlekisa ngaye. Ngekuhamba kwesikhatsi Tessie wabhajatiswa futsi waba lihlahlandlela lelivamile nobe bantfwabakhe babancane. Kusebaleni-ke kutsi nangabe bantfu lesifundza nabo liBhayibheli bacala kwenta tingucuko kute bajabulise Nkulunkulu, utawusondzela kubo futsi ababumbe babe titja letiligugu.

17. (a) Yini lekujabulisako wena ngekutsi Jehova abe nguMbumbi wakho? (b) Ngutiphi letinye tintfo letimayelana nekubumba lesitawucoca ngato?

¹⁷ Nalamuhla, labanye babumbi babumba intfo ngesandla ize ibe sitja lesihle kakhulu. Ngesineke, natsi Jehova usibumba ngeseluleko sakhe, bese uyabuka kutsi siyabumbeka yini. (Fundza Tihlabelelo 32:8.) Uyabona yini kutsi Jehova ukukhatsalela mbamba? Uyayibona yini indlela Jehova lakubumba ngayo ngekucophelela? Nangabe kunjalo, ngutiphi tintfo letitakusita kutsi uhlale ulibumba lelitsambile Jehova langalisebentisa? Ngumiphi imikhuba lokufanele uyibalekele kute ungafanani nelibumba lelicinile lelingeke libumbeke? Batali bona bangabambisana njani naJehova kute ababumbele bantfwana babo? Lemibuto itawuphendvulwa esihlokweni lesilandzelako.