Haykanush, longummemeteli longakabhajatiswa e-Armenia, watfola ipasipoti eceleni kwelikhaya lakhe. Kule pasipoti bekunemakhadi ekutsenga netinsambhansamba tetimali. Watjela indvodza yakhe nayo lebeyingummemeteli longakabhajatiswa ngaloko bekakutfolile.

Laba lababili labashadene bebanetinkinga tetimali futsi bebanetikweleti letinyenti. Kodvwa bakubona kuncono kutsatsa lemali bayinike umnikati wayo basebentisa likheli labalitfola kulepasipoti. Lendvodza nemndeni wayo lebebalahlekelwe nguletintfo bamangala kakhulu. Haykanush nemnyeni wakhe babachazela kutsi bebatsembekile ngenca yaloko bebakufundza eBhayibhelini. Base basebentisa lelotfuba kute bacoce nalomndeni ngaBoFakazi BaJehova futsi baniketa lomndeni tincwadzi letisekelwe eBhayibhelini.

Lomndeni bewufuna kuniketa Haykanush imali kute ubonge ngaloko bekakwentile, kodvwa wala kuyemukela. Ngelilanga lelilandzelako, make wakulomndeni wavakashela Haykanush nendvodza yakhe, kute abonge ngaloko bebabentele kona, futsi wancenga Haykanush kutsi atsatse indandatho yedayimane labemupha yona.

Njengobe kwenta lomndeni, bantfu labanyenti bangabamba wangephansi ngekwetsembeka kwaHaykanush nendvodza yakhe. Kodvwa kwammangalisa yini Jehova lokwetsembeka kwabo? Wakutsatsa njani? Bekubalulekile yini?

Timphendvulo talemibuto lesisandza kuyibuta timelula. Kungani sisho njalo? Kungobe tinceku taNkulunkulu tiyati kutsi kulingisa buntfu baJehova kuligugu kakhulu kuye kwendlula emadayimane, ligolide nobe letinye tintfo letingumcebo. Loko lokuligugu kuJehova kwehlukile kuloko bantfu labakutsatsa njengaloko lokubalulekile. (Isaya 55:8, 9) Tinceku takhe tiyati kutsi imetamo letiyentako kute tilingise buntfu baJehova iligugu kakhulu.

Singakubona loku kuloko liBhayibheli lelikushoko ngekucondza nangekuhlakanipha. Taga 3:13-15 titsi: “Ubusisiwe umuntfu lotfola kuhlakanipha nalowo lowemukela kucondza. Ngobe kuhlakanipha kwendlula isiliva ngekucebisa umuntfu, nenzuzo yako yinkhulu kuneyegolide. Kuhlakanipha kuligugu kakhulu, kwengca ematje laligugu; kute lokufisako longakulinganisa nako.” Kuyacaca-ke kutsi buntfu lobunjalo bubaluleke kakhulu kuJehova kwendlula nome ngumuphi umcebo.

Kutsiwani-ke ngekwetsembeka?

Jehova lucobo lwakhe wetsembekile. ‘Akawacali emanga.’ (Thithusi 1:2) Naku laphefumulela umphostoli Pawula kutsi akubhalele emaKhristu langemaHebheru ngelikhulu lekucala leminyaka: “Chubekani nisithantazela, ngobe setsemba kutsi sinanembeza lomsulwa, njengobe sifisa kutiphatsa ngekwetsembeka kuto tonkhe tintfo.”​—Hebheru 13:18.

Jesu Khristu waba sibonelo lesihle sekwetsembeka. Nasi sibonelo: Ngesikhatsi umPhristi Lophakeme Khayefase atsi: “Ngikufungisa Nkulunkulu lophilako, sitjele kutsi unguKhristu yini, iNdvodzana yaNkulunkulu!,” Jesu wetsembeka washo kutsi unguMesiya. Wakhuluma liciniso ngisho nobe bekati kutsi iSanhendrini ingase imbeke licala lekuhlambalata nekutsi loko bekutawubangela kutsi abulawe.​—Matewu 26:63-67.

Kutsiwani ngatsi? Nangabe sitikhandza sisesimeni lesingasenta sitfole lokutsite nasingawakhulumi onkhe emaciniso nobe siwashintja kancane, sitawube setsembekile yini?

Kungaba matima kwetsembeka kulamalanga ekugcina lapho bantfu labanyenti ‘batitsandza bona futsi batsandze imali.’ (2 Thimothi 3:2) Nakwenteka kuhhohloka umnotfo nome kubamatima kutfola umsebenti, bantfu labanyenti abakungabati kweba, kukhwabanisa nobe kwenta letinye tintfo letikhombisa kungetsembeki. Banyenti kakhulu bantfu labakwentako loku kangangekutsi baze bacabange kutsi indlela lenguyonayona yekutfola tintfo kutsi bangetsembeki. Nalamanye emaKhristu atsetse tincumo letimbi, futsi ‘ngekufuna kutizuzisa wona’ alahlekelwe lidvumela lelihle ebandleni.​—1 Thimothi 3:8; Thithusi 1:7.

Nobe kunjalo, emaKhristu lamanyenti alingisa Jesu. Ayabona kutsi kuba nebuntfu lobufanana nebaNkulunkulu kubaluleke kwendlula nobe ngumuphi umcebo. Kungako emaKhristu lasesesikolweni awakopi kute atfole emamaki lamahle. (Taga 20:23) Akusho kutsi ngaso sonkhe sikhatsi nawetsembekile  utawutfola sibongo lesihle, njengobe kwenteka kuHaykanush. Kodvwa Nkulunkulu utsi kuyintfo lekahle kwetsembeka futsi kusenta sibe nanembeza lohlantekile, lokuyintfo leligugu sibili.

Loko lokwenteka kuGagik kuyakufakazela loku. Utsi: “Ngaphambi kwekutsi ngibe ngumKhristu ngangisebentela inkapani lenkhulu. Umnikati walenkapani abebalekela kubhadala umtselo ngekubika inzuzo lencane letfolwe ngulenkapani. Njengamenenja kulenkapani, kwakulindzeleke kutsi ngakhe ‘sivumelwano’ ne-tax agent ngekutsi ngimfumbatsise angatokunaka loko lobekwentiwa ngulenkapani. Umphumela waloko waba kutsi ngatiwe njengemuntfu longaketsembeki. Ngesikhatsi ngifundza liciniso, ngawuyekela lomsebenti nanobe wawungibhadala kahle. Ngavula lami libhizinisi, ngalibhalisa ngalokusemtsetfweni futsi ngabhadala wonkhe umtselo.”​—2 Khorinte 8:21.

Gagik utsi: “Umholo wami wehla ngehhafu, ngako besekumatima kondla umndeni wami. Kodvwa, ngiyajabula nyalo futsi nginanembeza lohlantekile kuJehova. Ngisibonelo lesihle kumadvodzana ami lamabili, kani nasebandleni senginemalungelo. Nyalo senginelidvumela lelihle lekuba ngumuntfu lowetsembekile kulabo labahlola kutsi ngiwubhadala kahle yini umtselo nalabo lengenta nabo lelibhizinisi.”

Jehova uyabatsandza labo labamdvumisako ngekutsi balingise bunguye bakhe, lobufaka ekhatsi kwetsembeka. (Thithusi 2:10) Nasenta njalo wetsembisa kutsi utasisita. Waphefumulela iNkhosi Davide kutsi itsi: “Bengingumntfwana, manje sengimdzala, angizange sengimbone lolungile alahliwe, ngisho nebantfwabakhe abahambi bacela kudla.”​—Tihlabelelo 37:25.

Lokwenteka kuRuthe lobekatsembekile kuyakufakazela loko. Wachubeka anamatsele kuninatala wakhe Nawomi, esikhundleni sekumshiya njengobe besekagugile. Ruthe watfutsela ka-Israyeli, lapho bekangakhonta khona Nkulunkulu weliciniso. (Ruthe 1:16, 17) Abetsembekile futsi wasebenta ngekutikhandla akhwimita, alandzela loko lobekushiwo nguMtsetfo ngebantfu labaphuyile. NjengaDavide, Jehova akazange amlahle Ruthe naNawomi. (Ruthe 2:2-18) Akagcinanga nje ngekunika Ruthe tintfo labetidzinga kute aphile, kodvwa wamkhetsa kutsi abe yincenye yeluhlu lwentalo yeNkhosi Davide kanye nelwaMesiya lowetsenjisiwe!​—Ruthe 4:13-17; Matewu 1:5, 16.

Kungase kube matima ngaletinye tinceku taJehova kutsi titfole imali leyenele yekutinakekela. Esikhundleni sekutsi titfole indlela lemelula lehambisana nekungetsembeki kute titfole imali, tisebenta kamatima futsi tiyatimisela. Ngekwenta njalo, tiyakhombisa kutsi buntfu baNkulunkulu lobufaka ekhatsi kwetsembeka, bubaluleke kakhulu kuto kwendlula umcebo.​—Taga 12:24; Efesu 4:28.

NjengaRuthe, emaKhristu lasemhlabeni wonkhe akhombisile kutsi ayakholelwa emandleni aJehova ekuwasita. Ametsemba mbamba Loyo lowetsembisa watsi: “Ngeke ngize ngikushiye, futsi ngeke ngize ngikulahle.” (Hebrews 13:5) Sekukanyenti Jehova akhombisa kutsi angakhona kubasita labo labahlala betsembekile. Uhlale asigcina setsembiso sakhe sekunakekela tidzingo tetinceku takhe.—Matewu 6:33.

Kuliciniso kutsi bantfu bangatsatsa emadayimane naletinye tintfo letingumcebo njengaletibalulekile. Kodvwa singaciniseka kutsi kuBabe wetfu wasezulwini kubaluleke kakhulu kwetsembeka kwetfu kanye nalobunye buntfu betfu lobuhle, kwendlula nobe ngumuphi umcebo!