1, 2. Kungani Nkulunkulu atsi Danyela ‘bekayindvodza letsandzeka kakhulu,’ futsi singakhombisa njani kutsi siyalalela njengaDanyela?

NGESIKHATSI emaJuda ayiswa eBhabhulona, efika edolobheni lebeligcwele tithico kanye nebantfu lebebakhonta imimoya lemibi. Nanobe kunjalo, emaJuda letsembekile lafaka ekhatsi Danyela kanye nebangani bakhe labatsatfu abazange bakuvumele kubunjwa bantfu baseBhabhulona. (Danyela 1:6, 8, 12; 3:16-18) Danyela nebangani bakhe bemukela Jehova njengeMbumbi wabo futsi bachubeka bakhonta yena kuphela. Ngisho nobe Danyela abehlala nebantfu lababi, ingilosi yaNkulunkulu yatsi ‘bekayindvodza lebeyitsandzeka kakhulu.’​—Danyela 10:11, 19.

² Ngetikhatsi tekubhalwa kweliBhayibheli, umbumbi abengase agcishe libumba entfweni letsite kuze naselomile lifane nayo. Lamuhla, tikhonti teliciniso tiyati kutsi Jehova unguMbusi wako konkhe lokudaliwe futsi unalo ligunya lekubumba tive. (Fundza Jeremiya 18:6.) Nkulunkulu unalo neligunya lekubumba ngamunye wetfu. Nobe kunjalo, Jehova akaphoceleli muntfu kutsi ashintje. Esikhundleni saloko, ufuna kutsi kube ngitsi lesimvumelako kutsi  asibumbe. Kulesihloko, sitawufundza ngendlela lesingahlala ngayo silibumba lelitsambile etandleni taNkulunkulu. Sitawucoca ngalemibuto lelandzelako: (1) Singayigwema njani imikhuba lengasibangela kutsi singasemukeli seluleko saNkulunkulu futsi sibe libumba lelicinile? (2) Singabutfutfukisa njani buntfu lobungasisita kutsi sichubeke silalela futsi sibe libumba lelitsambile? (3) Yini batali labangemaKhristu labangayenta lekhombisa kutsi basebenta naNkulunkulu nababumba bantfwababo?

3. Ngumiphi imikhuba lengenta tinhlitiyo tetfu tibe lukhuni? Niketa sibonelo.

³ Taga 4:23 titsi: “Ngetulu kwako konkhe londvolota inhlitiyo yakho ngekunakekela konkhe, ngobe kuyo kugeleta tiyalu tekuphila.” Kuze sente tinhlitiyo tetfu tingabi lukhuni, kufanele sibe nekukholwa lokucinile, sigweme imikhuba lengakalungi lefaka ekhatsi kutigcabha, kanye nekuchubeka senta sono. Nangabe singakanaki, loko kungasibangela kutsi singalaleli futsi sivukele. (Danyela 5:1, 20; Hebheru 3:13, 18, 19) Nguloko lokwenteka ku-Uziya iNkhosi yakaJuda. (Fundza 2 Tikhronike 26:3-5, 16-21.) Ekucaleni Nkulunkulu wapha Uziya emandla ngobe abelalela futsi anebuhlobo lobuhle naye. Kodvwa ‘kwatsi kube Uziya abe nemandla, watiphakamisa.’ Watigabatisa kangangekutsi wetama kushisa imphepho ethempelini ngisho nobe loko bekufanele kwentiwe baphristi kuphela. Ngesikhatsi labaphristi bamtjela kutsi wente liphutsa, Uziya watfukutsela wagana lunwabu! Jehova wayehlisa lenkhosi letigabatisako, futsi yaba nebulephelo yaze yafa.​—Taga 16:18.

4, 5. Yini lengenteka nangabe sehluleka kuticaphela ekutigabatiseni? Niketa sibonelo.

⁴ Nangabe singakugwemi kutigabatisa, singabese sicabanga kutsi sincono kunalabanye futsi singase singasasemukeli seluleko lesisitfola eBhayibhelini. (Taga 29:1; Roma 12:3) Nguloko lokwenteka kulomunye lomdzala, lokutsiwa nguJim. Abengavumelani nalabanye labadzala ebandleni ngesimo lesitsite. Jim utsi: “Ngatjela labazalwane kutsi abanalo lutsandvo futsi ngase ngiyaphuma kulomhlangano.” Ngemuva kwetinyanga letingaba sitfupha, waya kulelinye libandla, kodvwa akazange abekwe njengalomdzala. Jim wadvumateka kakhulu. Abeciniseka kutsi wente intfo lekahle, kangangekutsi waze wayekela nekukhonta Jehova futsi wase uyaphola iminyaka lelishumi. Abesola Jehova ngaloko lobekwenteka futsi soyavuma kutsi abetigabatisa. Kwaphela iminyaka leminyenti bazalwane bamvakashela betama kumsita, kodvwa Jim bekangalwemukeli lusito lwabo.

⁵ Jim utsi: “Angizange ngiyekele kunaka emaphutsa alabanye.” Sibonelo sakhe sisikhombisa kutsi kutigabatisa kungasibangela kutsi sitivikele nasitiphetse kabi. Nangabe loko kwenteka, bese asisabi libumba lelitsambile. (Jeremiya 17:9) Ukhona yini umzalwane nobe dzadze lowake wakuvisa buhlungu? Nobe kwake kwenteka yini weva buhlungu ngekulahlekelwa lilungelo lelitsite, futsi wenta njani? Wavele watigabatisa yini nobe mhlawumbe wabona kutsi kwakha kuthula nemzalwane wakho kanye nekuhlala wetsembekile kuJehova ngiko lokubaluleke kakhulu?​—Fundza Tihlabelelo 119:165; Kholose 3:13.

6. Yini lengenteka nangabe senta sono?

⁶ Nangabe umuntfu achubeka ona futsi asifihla lesono, kungaba matima kutsi  emukele seluleko saNkulunkulu. Kona kuye kugcine sekungumkhuba nje. Umzalwane lotsite watsi, ngekuhamba kwesikhatsi kutiphatsa kwakhe lokungakalungi kwabese akusamhluphi. (Umshumayeli 8:11) Lomunye umzalwane lokwendlula sikhatsi lesitsite anemkhuba wekubuka titfombe letikhombisa kungcola watsi: “Ngatitfola sengingasabatsandzisisi labadzala.” Lomkhuba wabulimata buhlobo bakhe naJehova. Ngesikhatsi labanye sebati ngalomkhuba wakhe, watfola lusito kulabadzala. Kuliciniso kutsi sonkhe sinesono. Kodvwa nangabe sesicala kubagceka labo labeselulekako nobe nasente intfo lembi sibeke taba esikhundleni sekutsi sicele Nkulunkulu asitsetselele futsi asisite, tinhlitiyo tetfu tingase tibe lukhuni.

7, 8. (a) Ema-Israyeli asendvulo abonisa njani kutsi bekete kukholwa ngenca yekuba lukhuni kwetinhlitiyo tawo? (b) Ngusiphi sifundvo lesisitfolako?

⁷ Ngesikhatsi Jehova akhulula ema-Israyeli eGibhithe, ambona enta timangaliso letinyenti. Kodvwa ngesikhatsi sekatawufika eVeni Lesetsembiso, tinhlitiyo tawo tabese ticala kuba lukhuni. Yini leyabangela loko? Bekete kukholwa kuNkulunkulu. Esikhundleni sekwetsembela kuJehova, acala kwesaba futsi akhonona ngaMosi. Aze afuna ngisho nekubuyela emuva eGibhithe lapho abetigcila khona! Jehova weva buhlungu kakhulu waze watsi: “Labantfu batawuchubeka nekungedzelela kuze kube ngunini?” (Numeri 14:1-4, 11; Tihlabelelo 78:40, 41) Lama-Israyeli afela ehlane ngenca yekutsi tinhlitiyo tawo betilukhuni futsi bekete kukholwa.

⁸ Lamuhla, sekusedvute kakhulu kutsi singene eveni lelisha futsi kukholwa kwetfu kuyavivinywa. Ngako kudzingeka sikuhlole kukholwa kwetfu kutsi kucine kanganani. Singabona ngani kutsi kucinile? Singahlola emavi aJesu latfolakala kuMatewu 6:33. Tibute: ‘Imigomo yami netincumo lengitentako kuyakhombisa yini kutsi ngiwakholelwa mbamba emavi aJesu? Kuyenteka yini ngilahlekelwe yimihlangano nobe ngingayi ensimini kuze ngente imali lenyenti? Yini lengitayenta nangabe umsebenti wami udzinga emandla ami nesikhatsi sami lesinyenti? Ngitalivumela yini lelive kutsi lingibumbe mhlawumbe ngize ngiyekele ngisho nekukhonta Jehova?’

9. Kungani kufanele ‘sichubeke sihlola’ kutsi sisekukholweni yini, futsi singakwenta njani loko?

⁹ Nangabe singakulaleli loko liBhayibheli lelikushoko mayelana nekutihlanganisa nebangani lababi, kuyekeliswa kwalotsite kuba nguFakazi, nobe tindlela tekutijabulisa, tinhlitiyo tetfu tingaba lukhuni. Yini lokufanele uyente nangabe loku kucala kwenteka kuwe? Kudzingeka ukuhlole ngekushesha kukholwa kwakho! LiBhayibheli litsi: “Chubekani nitihlola kutsi nisekukholweni yini, chubekani nihlola loko nine leningiko.” (2 Khorinte 13:5) Ungatikhohlisi, sebentisa liVi laNkulunkulu njalo kuze ulungise kucabanga kwakho.

10. Yini lengasisita kutsi sibe libumba lelitsambile etandleni taJehova?

¹⁰ Kuze asisite kutsi sichubeke siba libumba  lelitsambile, Nkulunkulu usinikete liVi lakhe, libandla lebuKhristu kanye nemsebenti wekushumayela. Nangabe sifundza liBhayibheli futsi sizindla ngalo onkhe malanga, kungasisita kutsi sibe libumba lelitsambile etandleni taJehova futsi simvumele kutsi asibumbe. Jehova wayala emakhosi aka-Israyeli kutsi atibhalele umtsetfo waNkulunkulu futsi awufundze onkhe malanga. (Dutheronomi 17:18, 19) Baphostoli bebati kutsi kufundza imiBhalo kanye nekuzindla ngayo bekubaluleke kakhulu emsebentini wekushumayela. Basebentisa tincenye letitsite temiBhalo yesiHebheru tikhatsi letingaba ngemakhulu emibhalweni yabo, futsi nabashumayela bebabakhutsata bantfu kutsi nabo basebentise imiBhalo. (Imisebenti 17:11) Ngendlela lefanako, natsi siyakubona kubaluleka kwekufundza liVi laNkulunkulu nekuzindla ngalo onkhe malanga. (1 Thimothi 4:15) Loko kusisita kutsi sihlale sitfobekile futsi Jehova uyakhona kusibumba.

11, 12. Jehova angalisebentisa njani libandla lebuKhristu kutsi lisibumbe, kuye ngetidzingo temuntfu ngamunye? Niketa sibonelo.

¹¹ Jehova uyakwati loko ngamunye wetfu lakudzingako, futsi usebentisa libandla lebuKhristu kute lisibumbe. Jim lesikhulume ngaye ekucaleni, wacala kushintja indlela lenta ngayo ngesikhatsi lomunye lomdzala akhombisa kutsi unendzaba naye. Jim utsi: “Lomzalwane akazange angisole ngisho nakanye ngesimo lebengikuso. Esikhundleni saloko, waba nembono lokahle futsi wakhombisa kutsi unesifiso lesicotfo sekungisita.” Ngemuva kwetinyanga leticishe tibe tintsatfu, lona lomdzala  wamema Jim emhlanganweni. Jim utsi ebandleni bamemukela ngemusa futsi lutsandvo lwabo lwamsita washintja indlela labecabanga ngayo. Wacala kubona kutsi indlela labetiva ngayo bekungasiyo lebaluleke kakhulu. Labadzala labasebandleni laJim nemkakhe bamkhutsata, futsi kancane kancane wabuyela wakhonta Jehova. Jim waphindze wazuza ngekufundza sihloko lesitsi “UJehova Akumelwe Asolwe,” nalesitsi “Khonza UJehova Ngokwethembeka” letitfolakala ku-Sicongosekulindza saNovember 15, 1992, lesitfolakala ngesiZulu.

¹² Ngekuhamba kwesikhatsi Jim waphindze waba ngulomdzala welibandla. Kusukela lapho, usite labanye bazalwane kutsi bacatulule tinkinga tabo futsi bacinise kukholwa kwabo. Utsi bekacabanga kutsi unebuhlobo lobusedvute naJehova, kodvwa bekenta liphutsa! Uyatisola ngekutsi wavumela kutigabatisa kwamenta wanaka emaphutsa alabanye bantfu kunekutsi anake tintfo letibaluleke kakhulu.​—1 Khorinte 10:12.

13. Umsebenti wekushumayela ungasisita kutsi sibe nebuntfu lobunjani, futsi loko kungaba namuphi umphumela?

¹³ Umsebenti wekushumayela nawo ungasibumba futsi usisite sibe bantfu labancono. Kanjani? Nangabe sishumayela tindzaba letimnandzi, kufanele sikhombise buntfu lobufaka ekhatsi kutfobeka kanye naletinye titselo temoya waNkulunkulu . (Galathiya 5:22, 23) Cabanga ngebuntfu lobuhle umsebenti wekushumayela lokusite kutsi ubutfutfukise. Nangabe silingisa Khristu, bantfu bayawulalela umlayeto lesiwushumayelako futsi bangahle bashintje nendlela labasitsatsa ngayo. Cabanga ngaBoFakazi lababili e-Australia labetama kushumayela lomunye umfati, kodvwa wabatfukutselela kakhulu futsi bekaluhlata. Nobe kunjalo, laBoFakazi bamlalela ngenhlonipho. Ngekuhamba kwesikhatsi, lomfati watisola ngendlela lenta ngayo futsi wabhalela lihhovisi leligatja incwadzi. Wacolisa ngalesento sakhe. Watsi: “Ngisilima kutsi ngingamelana nebantfu labashumayela liVi laNkulunkulu futsi ngibacoshe ngaleyo ndlela.” Kuloku lesesicoce ngako, siyabona kutsi kubalulekile kuba nemusa nasishumayela. Kuliciniso kutsi umsebenti wetfu wekushumayela uyabasita labanye, kodvwa natsi uyasisita kutsi sitfutfukise buntfu betfu.

14. Yini batali lokufanele bayente nangabe bafuna kuphumelela nababumba bantfwana babo?

¹⁴ Bantfwana labanyenti batfobekile futsi bayakulangatelela kufundza. (Matewu 18:1-4) Ngako kukuhlakanipha ngebatali kutsi basite bantfwababo bafundze liciniso basebancane futsi balitsandze. (2 Thimothi 3:14, 15) Kuze baphumelele, batali kufanele bacale balitsandze bona liciniso futsi bakusebentise loko labakufundzako ekuphileni kwabo. Nangabe batali benta njalo, kutawuba melula ngebantfwababo kutsi balitsandze liciniso. Batawuphindze  bacondze kutsi seluleko labasitfola kubatali babo sikhombisa kutsi bayabatsandza nekutsi Jehova uyabatsandza.

15, 16. Batali kufanele bakhombise njani kwetsembela kuNkulunkulu nangabe umntfwanabo ayekelisiwe kuba nguFakazi?

¹⁵ Ngisho nobe batali babafundzisa bantfwababo liciniso, labanye babo bayamshiya Jehova nobe bayekeliswe kuba BoFakazi. Nangabe loko kwenteka, umndeni uva buhlungu kakhulu. Lomunye dzadze waseNingizimu Afrika utsi: “Ngesikhatsi umnaketfu ayekeliswa kuba nguFakazi, kwaba shengatsi ufile. Bekubuhlungu kakhulu!” Kodvwa yini yena nebatali bakhe labayenta? Balalela ticondziso letitfolakala eBhayibhelini. (Fundza 1 Khorinte 5:11, 13.) Labatali bebati kutsi kulalela seluleko saNkulunkulu bekutabasita bonkhe. Babona kutsi kuyekeliswa kuba nguFakazi kusiyalo selutsandvo lesivela kuJehova. Ngako bebachumana nendvodzana yabo kuphela nangabe kunesidzingo nobe nangabe kunetintfo letitsintsa umndeni.

¹⁶ Lendvodzana yativa njani? Ngekuhamba kwesikhatsi yatsi: “Bengati kutsi umndeni wami awungizondi, kodvwa bewulalela Jehova kanye nenhlangano yakhe.” Yachubeka yatsi: “Nangabe timo tikuphocelela kutsi ucele Jehova akusite futsi akucolele, ubese uyabona kutsi umdzinga kanganani.” Cabanga ngendlela lomndeni lowajabula ngayo ngesikhatsi lelijaha libuyela kuJehova! Sitawujabula futsi siphumelele nangabe sihlale silalela Nkulunkulu.​—Taga 3:5, 6; 28:26.

17. Kungani kulalela Jehova kufanele kube yindlela yetfu yekuphila, futsi loko kungasizuzisa njani?

¹⁷ Umphrofethi Isaya washo kutsi emaJuda lebekaseBhabhulona bekatawuphendvuka bese atsi: “Wena [Jehova], unguBabe wetfu. Tsine silibumba, wena ungumbumbi, sonkhe singumsebenti wetandla takho.” Bekatawuphindze ancenge Jehova atsi: “Ungatikhumbuli tono tetfu phakadze naphakadze. Awu, siyakuncusa, sibuke, ngobe sonkhe sibantfu bakho.” (Isaya 64:8, 9) Nangabe sitfobekile futsi simlalela Jehova, siba ligugu kuye njengaDanyela. Asebentisa liVi lakhe, umoya wakhe kanye nenhlangano yakhe, Jehova utawuchubeka asibumba kuze kutsi esikhatsini lesitako sikhone kuba ‘bantfwana baNkulunkulu’ labete sono.​—Roma 8:21.