1, 2. (a) Yini lejabulisa bantfu baNkulunkulu lamuhla? (b) Batali labangemaKhristu kanye nalabadzala belibandla, bangabasita njani bantfu labasha kute bacondze kutsi kusho kutsini kubhajatiswa?

UMZALWANE longulomdzala welibandla watsi kuChristopher loneminyaka lengu-12 budzala: “Ngikwati kusukela watalwa, futsi ngiyajabula kuva kutsi ufuna kubhajatiswa. Ngifuna kukubuta nangu umbuto, ‘Kungani ufuna kubhajatiswa?’” Lolomdzala bekanetizatfu letivakalako tekubuta lombuto. Kusijabulisa kakhulu kubona tinkhulungwane tebantfu labasha tibhajatiswa njalo ngemnyaka. (Umshumayeli 12:1) Kodvwa batali labangemaKhristu nalabadzala belibandla bafuna kuciniseka kutsi bantfu labasha batentela bona lesincumo futsi bayacondza kutsi kusho kutsini kubhajatiswa.

² EBhayibhelini sifundza kutsi kutinikela nekubhajatiswa kusicalo lesisha sekuphila kwemKhristu. Lokuphila lokusha  kutasiletsela tibusiso letinyenti letivela kuJehova, kodvwa kutawuphindze kuletse nekuphikiswa lokuvela kuSathane. (Taga 10:22; 1 Phetro 5:8) Kungako batali labangemaKhristu kufanele batinike sikhatsi sekufundzisa bantfwana babo kutsi kusho kutsini kuba ngumfundzi waKhristu. Nangabe bantfu labasha banebatali labangasiwo emaKhristu, labadzala belibandla batawubasita bacondze kutsi kusho kutsini kutinikela nekubhajatiwa. (Fundza Lukha 14:27-30.) Njengobe kufanele kwentiwe emalungiselelo latsite nangabe kutawuba nemsebenti wekwakha, bantfu labasha nabo kufanele batilungiselele ngaphambi kwekutsi babhajatiswe kuze batewukwati kukhonta Jehova ngekwetsembeka “kudzimate kube sekugcineni.” (Matewu 24:13) Yini letawusita bantfu labasha kutsi batimisele kukhonta Jehova kuze kube phakadze? Asesibone.

3. (a) Emavi aJesu naPhetro asifundzisani ngekubaluleka kwekubhajatiswa? (Matewu 28:19, 20; 1 Phetro 3:21) (b) Ngumiphi imibuto lesitawucoca ngayo futsi kungani kufanele sicoce ngayo?

³ Ungumuntfu lomusha lofuna kubhajatiswa yini? Nangabe kunjalo, loyo ngumgomo lomuhle kakhulu! Kulilungelo lelikhulu kubhajatiswa ube nguFakazi WaJehova. Loko kuyintfo umKhristu lokufanele ayente futsi kusinyatselo lesibaluleke kakhulu kulabo labafuna kusindziswa nakufika kuhlupheka lokukhulu. (Matewu 28:19, 20; 1 Phetro 3:21) Nawubhajatiswa, usuke ukhombisa kutsi wetsembise Jehova kutsi utamkhonta kuze kube phakadze. Uyafuna kusigcina lesetsembiso, ngako lemibuto lelandzelako itakusita ubone kutsi sewukulungele yini kubhajatiswa: (1) Sengivutfwe ngalokwenele yini kutsi ngingasenta lesincumo? (2) Nginaso yini vele sifiso sekubhajatiswa? (3) Ngiyacondza yini kutsi kusho kutsini kutinikela kuJehova? Asesicoce ngalemibuto.

4, 5. (a) Kungani kubhajatiswa kungasiko kwebantfu labadzala kuphela? (b) Kusho kutsini kuvutfwa kumKhristu?

⁴ LiBhayibheli alisho kutsi bantfu labadzala kuphela nobe bantfu lasebafike eminyakeni letsite labangabhajatiswa. KuTaga 20:11 sifundza kutsi: “Ngisho nemntfwana wembula similo sakhe ngendlela latiphetse ngayo; tento takhe tikhombisa kutsi similo sakhe sihle yini nome sibi.” Ngako ngisho nemntfwana angacondza kutsi kusho kutsini kwenta lokulungile futsi atinikele kuMdali wakhe. Ngaleyo ndlela, kubhajatiswa kubalulekile futsi kusinyatselo lesikahle kumuntfu lomusha lokhombise kutsi sewuvutsiwe futsi sewutinikele kuJehova.​—Taga 20:7.

⁵ Kusho kutsini kuvutfwa? Kuvutfwa akubhekiseli ngaso sonkhe sikhatsi eminyakeni yemuntfu nobe endleleni lakhule ngayo emtimbeni. LiBhayibheli litsi bantfu  labavutsiwe baceceshe “imicondvo yabo” kuze bakwati kwehlukanisa emkhatsini walokulungile nalokungakalungi. (Hebheru 5:14) Umuntfu lovutsiwe uyakwati lokulungile futsi uncumile enhlitiyweni yakhe kutsi akwente. Ngako angeke ayengeke kalula kutsi ente lokungakalungi. Akamdzingi ngasosonkhe sikhatsi lomunye umuntfu kute amtjele kutsi ente lokulungile. Ngako kunengcondvo kulindzela kutsi umuntfu lomusha lobhajatiswako ente lokulungile ngisho nobe batali bakhe nobe labanye bantfu labadzala bangekho dvutane naye.​—Catsanisa naFiliphi 2:12.

6, 7. (a) Chaza kutsi ngutiphi tinsayeya Danyela lahlangabetana nato ngesikhatsi aseBhabhulona. (b) Danyela wakhombisa njani kutsi uvutsiwe?

⁶ Umuntfu lomusha angakhona yini vele kukhombisa loluhlobo lwekuvutfwa lesesikhulume ngalo? Asewucabange ngesibonelo saDanyela. Kungenteka abeseminyekeni yekutfomba ngalesikhatsi atsatfwa kubatali bakhe ayiswa eBhabhulona. Danyela wabese uphila nebantfu lebebangayilaleli imiyalo yaNkulunkulu. Asesihlolisise simo sakhe. Abephatfwa njengemuntfu lobalulekile eBhabhulona. Bekangulomunye webantfu labasha labambalwa labebakhetfwe kutsi basebentele inkhosi. (Danyela 1:3-5, 13) Kubonakala shengatsi Danyela bekanesikhundla lesincono kakhulu eBhabhulona kunaleso bekangaba naso ka-Israyeli.

⁷ Ngako Danyela wenta njani kulesimo? Wabavumela yini bantfu baseBhabhulona kutsi bamshintje nome bente kukholwa kwakhe kube butsakatsaka? Cha! LiBhayibheli litsi ngesikhatsi aseBhabhulona, wancuma “enhlitiyweni yakhe kutsi  yena angeke atingcolise,” lokusho kutsi abengeke atimbandzakanye nanome yini lephatselene nekukhonta kwemanga. (Danyela 1:8) Loko kwakhombisa kutsi uvutsiwe!

8. Yini lesingayifundza esibonelweni saDanyela?

⁸ Yini lesingayifundza esibonelweni saDanyela? Umuntfu losemusha lovutsiwe utakuma acine kuloko lakukholelwako, ngisho nasetimeni letimatima. Angeke afane nelunwabu, lona lolushintjashintjako, kuye ngekutsi likuyiphi indzawo. Akatenti shengatsi ungumngani waNkulunkulu nakaseHholweni LeMbuso kodvwa abe ngumngani welive nakasesikolweni. Kunaloko, utawuhlala etsembekile ngisho nobe avivinywa.​—Fundza Efesu 4:14, 15.

9, 10. (a) Umuntfu lomusha angazuza njani nakacabanga ngendlela lenta ngayo nangabe kukholwa kwakhe kuvivinywa? (b) Kusho kutsini kubhajatiswa?

⁹ Kuliciniso kutsi sonkhe sinesono. Bantfu labasha, ngisho nalabadzala ngaletinye tikhatsi bayawenta emaphutsa. (Umshumayeli 7:20) Kodvwa nangabe ufuna kubhajatiswa, kutawuba kuhlakanipha kuhlolisisa kutsi utimisele kanganani kulalela imiyalo yaJehova. Tibute: ‘Sekwendlule sikhatsi lesitsite yini ngilalela Jehova?’ Cabanga ngendlela lowenta ngayo ngesikhatsi kukholwa kwakho kuvivinywa. Wakhona yini kuncuma kutsi nguyiphi intfo lelungile lokufanele uyente? NjengaDanyela, ukhona yini lokukhutsate kutsi usebentise emakhono akho kulelive laSathane? Nangabe ulingeka kutsi umlalele, uyakhona yini kucondza kutsi iyini intsandvo yaJehova ngalendzaba?​—Efesu 5:17.

¹⁰ Kungani kubalulekile kutsi utati timphendvulo talemibuto? Kungobe titakusita ubone kutsi kubaluleke kangakanani kubhajatiswa. Nawubhajatiswa usuke ukhombisa labanye kutsi wente setsembiso lesibalulekile kuJehova. Usuke wetsembisa Jehova kutsi utamtsandza futsi umkhonte ngayo yonkhe inhlitiyo yakho kuze kube phakadze. (Makho 12:30) Wonkhe umuntfu lobhajatiswako kufanele atimisele kugcina setsembiso sakhe kuJehova.​—Fundza Umshumayeli 5:4, 5.

11, 12. (a) Yini lokufanele aciniseke ngayo umuntfu lofuna kubhajatiswa? (b) Yini letakusita kutsi uhlale unembono lofana newaJehova ngekubhajatiswa?

¹¹ LiBhayibheli litsi bonkhe bantfu baJehova ngisho nebantfu labasha, batamkhonta ‘ngekutitsandzela.’ (Tihlabelelo 110:3, NW.) Ngako-ke, umuntfu lofuna kubhajatiswa kufanele aciniseke kutsi loko kusifiso lesisuka kuye. Loko kungadzinga kutsi acabangisise kahle ngalesifiso sakhe, ikakhulukati nangabe akhulele emndenini waBoFakazi.

¹² Nawusakhula, kungenteka bewubona bantfu labanyenti babhajatiswa, lokufaka ekhatsi bangani bakho nobe bantfwana bakini. Kodvwa kufanele ucaphele kutsi ungativa shengatsi kufanele ubhajatiswe ngobe  nje sewufike eminyakeni letsite nobe mhlawumbe ubona labanye babhajatiswa. Ungaciniseka njani kutsi kubhajatiswa ukutsatsa ngendlela Jehova lakutsatsa ngayo? Tinike sikhatsi ucabange ngekutsi kungani kubhajatiswa kubalulekile. Kulesihloko nakuleso lesilandzelako, utawutfola tizatfu letinyenti letinhle.

13. Ungabona ngani kutsi sincumo sekubhajatiswa sisuka enhlitiyweni yakho?

¹³ Lenye indlela longabona ngayo kutsi sincumo sakho sekubhajatiswa sisuka enhlitiyweni, kuhlola indlela lothantaza ngayo. Uthantaza kangakhi kuJehova? Icace kanganani imithantazo yakho? Timphendvulo talemibuto tingakhombisa kutsi unebuhlobo lobusedvute kanganani naJehova. (Tihlabelelo 25:4) Etikhatsini letinyenti, Jehova uphendvula imithantazo yetfu asebentisa liBhayibheli. Ngako lenye indlela longabona ngayo kutsi ufuna mbamba kusondzelana naJehova futsi ufuna kumkhonta ngalokusuka enhlitiyweni, kuhlola indlela lodadisha ngayo. (Joshuwa 1:8) Tibute: ‘Ngiba naso njalo yini sifundvo seliBhayibheli lengitichubela sona? Ngihlanganyela ngekutitsandzela yini ekukhonteni kwemndeni?’ Timphendvulo talemibuto titakusita ubone kutsi sincumo sakho sekubhajatiswa sisuka enhlitiyweni yini.

14. Chaza umehluko emkhatsini wekutinikela nekubhajatiswa.

¹⁴ Bantfu labanyenti labasha bangahle bangawati kahle umehluko lokhona emakhatsini wekutinikela nekubhajatiswa. Labanye bangatsi sebavele batinikele kuJehova kodvwa abakakulungeli kubhajatiswa. Kodvwa loko kungenteka yini? Nawutinikela uthantaza kuJehova umetsembise kutsi utamkhonta kuze kube phakadze. Nawubhajatiswa usuke ukhombisa labanye kutsi sewuvele utinikele kuJehova. Ngako ngaphambi kwekutsi ubhajatiswe, kudzingeka wati kutsi kusho kutsini kutinikela kuNkulunkulu.

15. Kusho kutsini kutinikela?

¹⁵ Nawunikela kuphila kwakho kuJehova usuke umtjela kutsi sewuwakhe. Umetsembisa kutsi kumkhonta kutawuba yintfo lebaluleke kakhulu ekuphileni kwakho. (Fundza Matewu 16:24.) Lesetsembiso losenta kuNkulunkulu sibaluleke kakhulu! (Matewu 5:33) Ngako ukhombisa njani kutsi uyati kutsi awusatiphileli wena kodvwa sewuphilela kwenta intsandvo yaJehova?​—Roma 14:8.

16, 17. (a) Fanekisa kutsi kusho kutsini kutidzela. (b) Umuntfu lotinikela kuNkulunkulu usuke atsini?

¹⁶ Cabanga ngalesibonelo. Ase sitsi umngani wakho ukupha imoto. Ukuniketa timphepha letishoko kutsi seyakho, bese utsi: “Lemoto lena yakho.” Kodvwa lomngani wakho uphindze atsi: “Tikhiya talemoto titawuhlala kimi, futsi ngimi lotakushayelela yona.” Ungativa njani ngalesipho? Ungamtsatsa njani lomngani wakho lokuphe lemoto?

¹⁷ Nangabe umuntfu anikela kuphila kwakhe kuJehova, usuke atjela Nkulunkulu atsi: “Ngikunika kuphila kwami. Mine sengiwakho.” Jehova usuke alindzele kutsi loyo muntfu asigcine setsembiso sakhe. Kodvwa kutsiwani nangabe loyo muntfu acala kungamlaleli Jehova ngekutsi atsandzane ngansense nemuntfu longamkhonti Nkulunkulu? Nobe kutsiwani nangabe loyo muntfu emukela umsebenti lotawunciphisa sikhatsi  lasicitsa emsebentini wekushumayela nobe lotamenta alahlekelwe yimihlangano yelibandla? Ngako loyo muntfu uyobe angasigcini setsembiso sakhe kuJehova. Loko kuyobe kufana nekugcina letikhiya emotweni. Nasitinikela kuJehova sisuke sitsi kuye: “Kuphila kwami sekusetandleni takho.” Ngako siyohlale senta loko Jehova lakufunako ngisho nobe singatsandzi kukwenta. Shengatsi singalingisa Jesu, lowatsi: “Ngobe ngehla ezulwini kuze ngitewukwenta intsandvo yaloyo longitfumile, hhayi intsandvo yami.”​—Johane 6:38.

18, 19. (a) Indzaba yaRose naChristopher ikhombisa njani kutsi kubhajatiswa kulilungelo leliholela etibusisweni? (b) Utiva njani ngekubhajatiswa?

¹⁸ Kuyacaca-ke kutsi kubhajatiswa kusincumo lesingasiwo umdlalo. Kulilungelo lelikhulu kutinikela kuJehova futsi ubhajatiswe. Bantfu labasha labatsandza Jehova nalabakwatiko kutsi kusho kutsini kutinikela, abadvonseli emuva nakufanele banikele kuphila kwabo kuNkulunkulu futsi babhajatiswe. Abatisoli ngesincumo sabo. Rose loseminyakeni yekutfomba watsi: “Ngiyamtsandza Jehova futsi bengingeke ngijabule nangabe bengingenta lenye intfo ngaphandle kwekumkhonta. Ayikho lenye intfo lengike ngaciniseka ngayo njengesincumo sami sekubhajatiswa.”

¹⁹ Kutsiwani ngaChristopher lokukhulunywe ngaye ekucaleni kwalesihloko? Utiva njani ngesincumo sakhe sekubhajatiswa lasenta ngesikhatsi aneminyaka lengu-12 budzala? Utsi ujabula kakhulu ngalesincumo. Wacala kuba lihlahlandlela lelivamile ngesikhatsi aneminyaka lengu-17 budzala futsi waba yinceku lesebentako nakaneminyaka lengu-18. Sikhuluma nje ukhonta eBethel. Utsi: “Kubhajatiswa bekusincumo lesikahle. Ngenetiseke kakhulu ekuphileni njengobe ngisemsebentini waJehova nasenhlanganweni yakhe.” Nangabe ufuna kubhajatiswa, ungatilungiselela njani? Sihloko lesilandzelako sitawuphendvula lombuto.