1, 2. Ngumiphi imibuto lephakamako ngenca yemavi aJesu latfolakala kuMatewu 24:14?

JESU wabiketela kutsi emalangeni ekugcina tindzaba letimnandzi teMbuso betitawushunyayelwa kubantfu bonkhe. (Matewu 24:14) Njengobe siBoFakazi BaJehova satiwa emhlabeni wonkhe ngemsebenti wetfu wekushumayela. Labanye bantfu bayawutsandza umlayeto lesiwushumayelako, kantsi labanye abawutsandzi. Kodvwa ngisho nalabo labangawulaleli lomlayeto wetfu, bayawuhlonipha. Siyati kutsi lomsebenti Jesu lawubiketela, wentiwa ngitsi. Sinalo yini ligunya lekusho njalo? Singaciniseka njani kutsi umsebenti wetfu wekushumayela nguloyo lowabiketelwa nguJesu?

² Emacembu lamanyenti enkholo acabanga kutsi ashumayela umlayeto waJesu. Kodvwa kushumayela kwawo kuphelela etinshumayelweni labatenta emasontfweni, kuma-TV nobe ku-Internet, nobe mhlawumbe bangavele batjele labanye indlela labafundze ngayo ngaJesu. Labanye babona shengatsi kusita bantfu labadzinga lusito nobe kwenta umsebenti  wekuba ngudokotela, ngunesi nobe thishela kuyindlela yabo yekushumayela. Kodvwa loko labakwentako kungumsebenti wekushumayela Jesu lakhuluma ngawo yini?

3. Ngekusho kwaMatewu 28:19, 20 ngutiphi tintfo letine balandzeli baJesu lokufanele batente?

³ Jesu abefuna bafundzi bakhe bamele bantfu bete kubo yini? Cha! Ngemuva kwekuvuswa kwakhe, Jesu watjela emakhulu ebalandzeli bakhe watsi: “Ngako-ke, hambani nente bantfu bato tonkhe tive babe bafundzi bami, nibabhabhatise . . . , nibafundzise kugcina konkhe lenginitjele kona.” (Matewu 28:19, 20) Njengobe sibalandzeli baJesu, kudzingeka sente tintfo letine. Kufanele sente bafundzi, sibabhabhatise futsi sibafundzise. Kodvwa kwekucala kufanele sihambe siye kulabantfu. Lesinye sati seliBhayibheli sachaza satsi: “‘Kuhamba’ kungumsebenti wemKhristu ngamunye futsi kungaba kwewela umgwaco nobe kwewela lwandle.”​—Matewu 10:7; Lukha 10:3.

4. Kufaka ekhatsi ini kuba “badwebi bebantfu”?

⁴ Jesu bekalindzeleni kubafundzi bakhe? Abefuna bashumayele ngamunye ngamunye yini nobe abefuna bahleleke babe licembu? Njengobe kungeke kwenteke kutsi umuntfu munye ashumayele “tive tonkhe,” bafundzi bakhe bekutawudzingeka bahleleke babe licembu. Nguloko Jesu bekacondze kukusho nakamema bafundzi bakhe kutsi babe “badwebi bebantfu.” (Fundza Matewu 4:18-22.) Jesu abengabhekiseli kumdwebi munye losebentisa lidoba lakhe, lomele kutsi abambe inhlanti. Kunaloko, lokudweba Jesu bekakhuluma ngako kufaka ekhatsi emanethi. Loluhlobo lwekudweba ludzinga kutsi usebente ngekutidzela, uhleleke futsi usebentisane nalabanye bantfu.​—Lukha 5:1-11.

5. Ngumiphi imibuto lemine lokudzingeka iphendvulwe futsi ngani?

⁵ Kuze sati kutsi bobani labashumayela tindzaba letimnandzi lamuhla, kudzingeka siphendvule nayi imibuto lemine:

• Ngumuphi umlayeto balandzeli baJesu lokufanele bawushumayele?

• Kufanele sibe yini sisusa sabo?

• Ngutiphi tindlela lokufanele batisebentise?

• Kufanele ushunyayelwe ngelizinga lelingakanani lomsebenti futsi kufanele uchubeke sikhatsi lesingakanani?

Timphendvulo talemibuto titasisita sibone kutsi bobani labenta lomsebenti losindzisa kuphila futsi titawucinisa sifiso setfu sekuchubeka sishumayela.​—1 Thimothi 4:16.

6. Kungani ungaciniseka kutsi BoFakazi BaJehova bashumayela umlayeto loliciniso?

⁶ Fundza Lukha 4:43. Jesu washumayela ‘tindzaba letimnandzi teMbuso,’ futsi ufuna nebafundzi bakhe bente lokufanako. Nguliphi licembu lelishumayela lomlayeto kubo bonkhe bantfu? BoFakazi BaJehova kuphela. Ngisho nalabo labangasitsandzi  bayakuvuma loko. Loku sikubona endleleni lomunye umphristi lobesekahlale emaveni lamanyenti lehlukahlukene lakutjela lomunye Fakazi waJehova. Eveni ngalinye lomphristi bekabuta BoFakazi BaJehova kutsi ngumuphi umlayeto labawushumayelako. Lomphristi watsi: “Bonkhe bebangakahlakaniphi ngobe banginiketa imphendvulo lefanako: ‘Tindzaba letimnandzi teMbuso.’” Loko lokwashiwo ngulomphristi kwavele kwacaca kutsi asisito tilima kodvwa sinebunye njengobe singemaKhristu eliciniso. (1 Khorinte 1:10) UMbuso waNkulunkulu uphindze ungumlayeto loyihloko we-Sicongosekulindza Simemetela UMbuso WaJehova. Lomagazini utfolakala ngetilwimi letingu-254 futsi njalo ngenyanga kushicilelwa silinganiso semakhophi lacishe abe ngu-59000 000, lokwenta kutsi kube ngiwo losakatwa kakhulu emhlabeni.

7. Sati njani kutsi bafundisi beTinkholo Letitsi TebuKhristu abashumayeli umlayeto longiwo?

⁷ Bafundisi beTinkholo Letitsi TebuKhristu abashumayeli ngeMbuso waNkulunkulu. Nangabe kwenteka bakhuluma ngeMbuso, labanyenti batsi uyintfo lesenhlitiyweni yemuntfu. (Lukha 17:21) Ababafundzisi bantfu kutsi loMbuso unguhulumende wasezulwini lobuswa nguJesu. Esikhundleni saloko bavame kukhuluma ngaJesu ngaKhisimusi nobe ngema-Easter. Abachazi kutsi loMbuso utawucatulula tonkhe tinkinga tebantfu nekutsi ngekushesha utawucedza bonkhe bubi lobusemhlabeni. (Sembulo 19:11-21) Kuyacaca kutsi bafundisi beTinkholo Letitsi TebuKhristu abati kutsi yini Jesu latayenta njengobe ayiNkhosi yeMbuso waNkulunkulu. Ngenca yekutsi abawucondzi umlayeto waJesu, abasiboni sizatfu sekutsi kungani kufanele bashumayele.

8. Ngusiphi sisusa lesingakalungi sekwenta umsebenti wekushumayela?

⁸ Bafundzi baJesu akukafaneli bashumayele kute batfole imali nobe kute bakhe takhiwo takanokusho. Jesu watsi: “Niphiwe mahhala, nani phanini mahhala.” (Matewu 10:8) Ngako-ke, umsebenti wekushumayela akukafaneli ube libhizinisi. (2 Khorinte 2:17) Bafundzi baJesu akukafaneli balindzele kubhadalwa ngemsebenti wekushumayela labawentako. (Fundza Imisebenti 20:33-35.) Ngisho nobe sicondziso saJesu besicacile, emasontfo lamanyenti akoleka iminikelo kuze anakekele emasontfo awo futsi abhadale bafundisi naletinye tisebenti. Umphumela waloko ube kutsi bafundisi labanyenti beTinkholo Letitsi TebuKhristu sebanjinge kakhulu.​—Sembulo 17:4, 5.

9. BoFakazi BaJehova bakukhombise njani kutsi umsebenti wekushumayela bawenta ngesisusa lesihle?

⁹ BoFakazi BaJehova bayayikoleka yini iminikelo emaHholweni abo eMbuso nobe emihlanganweni lemikhulu? Cha! Umsebenti wabo usekelwa ngeminikelo yekutitsandzela. (2 Khorinte 9:7) Emnyakeni lowendlulile, BoFakazi BaJehova bacitse ema-awa latigidzigidzi letimbili bashumayela tindzaba letimnandzi futsi bachube tifundvo teliBhayibheli letingetulu kwetigidzi letiyimfica inyanga ngayinye.  Ababhadalwa ngekwenta lomsebenti wekushumayela kodvwa bayajabula kusebentisa imali yabo kuze bente lomsebenti. Lomunye umcwaningi akhuluma ngemsebenti waBoFakazi BaJehova watsi: “Umgomo wabo loyinhloko kushumayela nekufundzisa.” Waphindze watsi BoFakazi BaJehova bete bafundisi lababhadalwako. Ngako-ke, nangabe singashumayeli kuze sitfole imali, siyini sisusa setfu? Lomsebenti siwenta ngekutitsandzela ngobe sitsandza Jehova kanye nebantfu. Lesimo sengcondvo lesinjalo sigcwalisa siphrofetho lesiku-Tihlabelelo 110:3. (Fundza.)

10. Ngutiphi tindlela Jesu nebafundzi bakhe labatisebentisa nabashumayela?

¹⁰ Ngutiphi tindlela Jesu nebafundzi bakhe labatisebentisa nabashumayela? Bebaya nobe ngukuphi lapho bebangatfola khona bantfu. Sibonelo saloko kutsi bebashumayela etitaladini nasetimakethe. Bebaphindze bashumayele bantfu emakhaya abo. (Matewu 10:11; Lukha 8:1; Imisebenti 5:42; 20:20) Kushumayela umuti ngemuti kwakuyindlela lehlelekile yekutfola tonkhe tinhlobo tebantfu.

11, 12. Unganani umehluko nakucatsaniswa imetamo leyentiwa Tinkholo Letitsi TebuKhristu kanye nebantfu baJehova nakutiwa endzabeni yekushumayela tindzaba letimnandzi?

¹¹ Emasontfo eTinkholo Letitsi TebuKhristu ayatishumayela yini tindzaba letimnandzi njengobe kwenta Jesu? Ngalokuvamile, bafundisi lababhadalwako bashumayela emalunga elisontfo labo. Labafundisi ababenti bafundzi kodvwa betama kugcina emalunga elisontfo lasebavele banawo.  Ngaletinye tikhatsi betamile nekukhutsata emalunga abo kutsi ashumayele. Sibonelo saloko kutsi ngemnyaka wa-2001, Papa John Paul II wabhala incwadzi watsi emalunga elisontfo kufanele ashumayele livangeli futsi abe nenshisekelo lefanana neyemphostoli Pawula lowatsi: “Maye kimi nangabe ngingazange ngitimemetele letindzaba letimnandzi!” Lopapa wachubeka watsi lomsebenti wekushumayela kufanele ungentiwa nje kuphela bantfu labaceceshiwe, kodvwa kufanele wentiwe ngiwo onkhe emalunga elisontfo. Nanobe kunjalo, bambalwa labasilalela lesikhutsato.

¹² Kutsiwani ngaBoFakazi BaJehova? Ngibo bodvwa labashumayela kutsi Jesu bekasolo ayiNkhosi kusukela nga-1914. Balalela Jesu futsi benta umsebenti wekushumayela ube yintfo lebalulekile ekuphileni kwabo. (Makho 13:10) Incwadzi letsi “Pillars of Faith​—American Congregations and Their Partners” yatsi, kuBoFakazi BaJehova umsebenti wekushumayela ubaluleke kakhulu. Yaphindze yatsi nangabe batfole bantfu labalambile, labanesitunge nalabagulako, bayetama kubasita kodvwa abakhohlwa kutsi umgomo wabo loyinhloko kushumayela ngekuphela kwalelive kanye nekufundzisa bantfu ngensindziso. BoFakazi BaJehova bayachubeka bawushumayela lomlayeto futsi balingisa tindlela tekushumayela lebetisetjentiswa nguJesu nebafundzi bakhe.

13. Kufanele wentiwe ngelizinga lelingakanani umsebenti wekushumayela?

¹³ Jesu watsi balandzeli bakhe batawushumayela futsi bafundzise “emhlabeni wonkhe.” Bayalwa kutsi bente bantfu bato “tonkhe tive” babe bafundzi. (Matewu 24:14; 28:19, 20) Loku kusho kutsi letindzaba letimnandzi kufanele tishunyayelwe emhlabeni wonkhe.

14, 15. Yini lefakazela kutsi BoFakazi BaJehova basigcwalisile siphrofetho saJesu ngelizinga lomsebenti lowentiwe ngalo? (Buka sitfombe lesisekucaleni kwalesihloko.)

¹⁴ BoFakazi BaJehova kuphela labagcwalise siphrofetho saJesu sekutsi letindzaba letimnandzi titawushunyayelwa emhlabeni wonkhe. Kungani sisho njalo? EMelika kunebafundisi labacishe babe ngu-600 000 beTinkholo Letitsi TebuKhristu, kantsi kunaBoFakazi BaJehova labangaba ngu-1 200 000 labashumayela tindzaba letimnandzi. Emhlabeni wonkhe, kunebaphristi bemaKatolika labangaba ngu-400 000, kodvwa kunaBoFakazi BaJehova labangetulu kwetigidzi letisiphohlongo labashumayela tindzaba letimnandzi emaveni langu-240. Kuyacaca kutsi BoFakazi BaJehova bashumayela tindzaba letimnandzi emhlabeni wonkhe, futsi loko kuletsa ludvumo kuJehova.​—Tihlabelelo 34:1; 51:15.

¹⁵ Umgomo waBoFakazi BaJehova kushumayela tindzaba letimnandzi kubantfu labanyenti ngaphambi kwekutsi kufike kuphela. Kute sente lomsebenti, sihumushe futsi sashicilela tigidzi tetincwadzi, bomagazini, emapheshana netimemo temhlangano neteSikhumbuto ngetilwimi letingetulu kwa-700. Siniketa bantfu letintfo mahhala. Emnyakeni lowendlulile nje kuphela, sishicilele tincwadzi letisekelwe eBhayibhelini letingaba tigidzigidzi letingu-4.5. Siphindze sashicilela emakhophi langetulu kwetigidzi  letingu-200 te-Lihumusho Lemhlaba Lomusha LemiBhalo Lengcwele ngetilwimi letingetulu kwa-130. Ku-website yetfu kutfolakala lwati ngetilwimi letingetulu kwa-750. BoFakazi BaJehova kuphela labenta lomsebenti lomangalisako.

16. Sati njani kutsi BoFakazi BaJehova banemoya longcwele waNkulunkulu?

¹⁶ Umsebenti wekushumayela utawuchubeka sikhatsi lesingakanani? Jesu watsi letindzaba letimnandzi betitawushunyayelwa kudzimate kufike kuphela. Njengobe siBoFakazi BaJehova, sikhonile kushumayela kulamalanga ekugcina ngenca yekutsi sinemoya longcwele waJehova. (Imisebenti 1:8; 1 Phetro 4:14) Labanye bantfu labasetinkholweni nabo bangase basho batsi: “Sinawo umoya longcwele.” Kodvwa bayakhona yini kwenta umsebenti lowentiwa BoFakazi BaJehova kulamalanga ekugcina? Lamanye emacembu etamile kushumayela ngendlela lesishumayela ngayo kodvwa ehlulekile. Labanye bayafisa kushumayela, kodvwa bashumayela sikhashana. Labanye kungenteka bayashumayela emtini ngemuti kodvwa abashumayeli tindzaba letimnandzi teMbuso. Ngako-ke, angeke kwenteke kutsi benta lomsebenti Jesu lawucala.

17, 18. (a) Singaciniseka njani kutsi BoFakazi BaJehova ngibo labashumayela tindzaba letimnandzi teMbuso lamuhla? (b) Singakhona njani kuchubeka siwenta lomsebenti?

¹⁷ Ngako-ke, bobani labashumayela tindzaba letimnandzi teMbuso lamuhla? BoFakazi BaJehova kuphela! Sikwati njani loko? Sikwati ngobe sishumayela umlayeto loliciniso, lokutindzaba letimnandzi teMbuso. Sifuna bantfu nasisemsebentini wekushumayela, ngako sisebentisa indlela lekahle. Sinesisusa lesihle sekushumayela ngobe sitsandza Jehova kanye nebantfu. Umsebenti wetfu wekushumayela siwenta ngelizinga lelikhulu ngobe sishumayela bantfu bato tonkhe tive netilwimi. Sitawuchubeka sishumayela tindzaba letimnandzi teMbuso kudzimate kufike kuphela!

¹⁸ Kujabulisa mbamba kubona umsebenti lomuhle wekushumayela tindzaba letimnandzi lowentiwa bantfu baJehova kulamalanga ekugcina. Kodvwa sikhona njani kwenta wonkhe lomsebenti? Umphostoli Pawula wabhala watsi: “Nkulunkulu nguye lonenta nibe nemandla, futsi uninika sifiso nemandla ekwenta intsandvo yakhe.” (Filiphi 2:13) Shengatsi Jehova angachubeka asipha emandla ladzingekako kuze sente konkhe lokusemandleni etfu nasishumayela tindzaba letimnandzi!​—2 Thimothi 4:5.