1, 2. (a) Bativa njani BoFakazi BaJehova ngeliBhayibheli? (b) Nguyiphi incenye yeliBhayibheli wena loyitsandzako?

NJENGOBE siBoFakazi BaJehova siyalitsandza liBhayibheli. Lisiniketa indvudvuto, litsemba kanye neticondziso lesingatetsemba. (Roma 15:4) Alisiyo incwadzi lenemicondvo yebantfu kodvwa ‘lilivi laNkulunkulu.’​—1 Thesalonika 2:13.

² Ngalokuvamile sonkhe sinetincenye lesititsandzako eBhayibhelini. Labanye batsandza emaVangeli ngobe akhombisa buntfu lobuhle baJehova lobubonakala kuJesu. (Johane 14:9) Labanye batsandza tincwadzi tetiprofetho letinjengencwadzi yeSembulo, lesikhombisa “tintfo letitawukwenteka masinyane.” (Sembulo 1:1) Labanye bayadvudvuteka nabafundza Tihlabelelo, kantsi labanye bajabulela kufundza ngeteluleko letilusito letitfolakala encwadzini yeTaga. Kuyacaca-ke kutsi liBhayibheli liyincwadzi yawo wonkhe umuntfu.

3, 4. (a) Sitiva njani ngetincwadzi tetfu? (b) Ngutiphi tincwadzi teluhlobo lolutsite lwebantfu lesititfolako?

³ Ngenca yekutsi sitsandza liBhayibheli, siyatitsandza netincwadzi tetfu letisekelwe eVini laNkulunkulu. Tonkhe letincwadzi, tincwajana, bomagazini kanye naletinye tintfo lesititfolako,  kutipho letivela kuJehova. Tisisita kutsi sihlale sisedvute naye tiphindze ticinise kukholwa kwetfu.​—Thithusi 2:2.

⁴ Tincwadzi tetfu letinyenti tibhalelwe bonkhe BoFakazi BaJehova. Kodvwa tikhona tincwadzi letibhalelwe luhlobo lolutsite lwebantfu ngalokucondzile, njengebantfu labasha nobe batali. Tihloko letinyenti kanye nema-video latfolakala ku-website yetfu, tentelwe bantfu labangasibo BoFakazi BaJehova. Letinhlobonhlobo tetincwadzi tisikhombisa kutsi Jehova usigcinile setsembiso sakhe sekuniketa bonkhe bantfu imiyalo.​—Isaya 25:6.

5. Yini lesingaciniseka ngayo lejabulisa Jehova?

⁵ Labanyenti betfu bangatsandza kuba nesikhatsi lesinyenti sekufundza liBhayibheli netincwadzi tetfu. Ngako-ke kungenteka singasebentisi sikhatsi lesilinganako sekufundza tonkhe tincwadzi lesititfolako. Singaciniseka kutsi Jehova uyajabula ngatsi nangabe sisebentisa sikhatsi setfu ngekuhlakanipha kute sifundze siphindze sidadishe liBhayibheli kanye netincwadzi tetfu. (Efesu 5:15, 16) Kodvwa kunengoti lokufanele siyicaphele. Nguyiphi?

6. Yini lengasenta silahlekelwe tintfo Jehova lasifundzisa tona?

⁶ Nasingakacapheli, singatikhandza sesicabanga kutsi tincenye letitsite eBhayibhelini nobe letinye tincwadzi atisebenti kitsi. Cabanga nje nganasi sibonelo: Kutsiwani nangabe incenye letsite yeliBhayibheli ibonakala ingasebenti kahle esimeni lesikuso? Nome kutsiwani nangabe incwadzi letsite yenhlangano, ingasifaki tsine kuloko lekhuluma ngako? Siyifundza sigijima yini leyo ncwadzi nobe mhlawumbe singayifundzi kwasanhlobo? Nangabe kunjalo, sitawulahlekelwa yimininingwane leminyenti, futsi letasizuzisa. Singayibalekela njani lengoti? Kufanele sihlale sikhumbula kutsi konkhe lesikufundziswako kubuya kuJehova. LiBhayibheli litsi: “Ngingu [Jehova] Nkulunkulu wenu, longuyena anifundzisa kutsi ngukuphi lokuncono kunako konkhe kini.” (Isaya 48:17) Kulesihloko, sitawufundza ngetintfo letintsatfu letitasisita kutsi sizuze emalungiselelweni Jehova lasentela wona.

7. Kungani kufanele sibe nemcondvo lovulekile nasifundza liBhayibheli?

⁷ Lifundze unemcondvo lovulekile. Kuliciniso kutsi letinye tincenye teliBhayibheli tabhalelwa bantfu labatsite nobe licembu lelitsite lebantfu. Nobe kunjalo, liBhayibheli likubeka ngalokucacile kutsi ‘yonkhe imiBhalo iphefumulelwe nguNkulunkulu futsi ilusito.’ (2 Thimothi 3:16) Kungaleso sizatfu kufanele sibe nemcondvo lovulekile nasifundza liBhayibheli. Lomunye umzalwane uhlale akhumbula kutsi angatfola tifundvo letinyenti endzabeni yinye nje kuphela. Loko kumsita kutsi akhone kutfola tifundvo lokungasimelula kutibona. Ngako-ke, ngaphambi kwekufundza liBhayibheli, kufanele sicele Jehova asente sibe nemcondvo lovulekile, asiphe nekuhlakanipha kute sikhone kuticondza kahle tifundvo lafuna sititfole.​—Ezra 7:10; fundza Jakobe 1:5.

8, 9. (a) Nasifundza liBhayibheli, ngumiphi imibuto lesingahle sitibute yona? (b) Loko lokudzingekako kulabadzala labangemaKhristu kusitjelani ngaJehova?

⁸ Buta imibuto. Nangabe ufundza liBhayibheli, mani bese utibuta nayi imibuto  lelandzelako: ‘Loku lengikufundzako kungitjelani ngaJehova? Ngingalusebentisa njani lolwati ekuphileni kwami? Ngingalusebentisa njani lolwati kute ngisite labanye?’ Nangabe sizindla ngalemibuto, sitawuzuza kakhulu ekufundzeni kwetfu liBhayibheli. Asesicoce nganasi sibonelo. LiBhayibheli lichaza loko lokudzingekako kulabadzala labangemaKhristu. (Fundza 1 Thimothi 3:2-7.) Nobe kunjalo, labanyenti betfu abasibo labadzala, ngako singase sicabange kutsi lolwati ngeke lusisite nganobe nguyiphi indlela. Asesisebentise lemibuto lemitsatfu lesicoce ngayo kuze sibone kutsi loko lokudzingekako kulabadzala kungasisita sonkhe.

⁹ “Loku lengikufundzako kungitjelani ngaJehova?” Jehova usinikete luhla lwaloko lokudzingekako kuze umuntfu abe ngulomdzala. Ulindzele emadvodza lahola libandla kutsi aphile ngetimiso letiphakeme. Loku kukhombisa kutsi libandla liligugu kuJehova. LiBhayibheli litsi walitsenga “ngengati yeNdvodzana yakhe.” (Imisebenti 20:28) Ngako Jehova ulindzele kutsi labadzala babe tibonelo letinhle, futsi batawulandzisa kuye ngendlela laphatsa ngayo emalunga elibandla. Ufuna sitive sivikelekile ngaphansi kwabo. (Isaya 32:1, 2) Nangabe sifundza ngaloko lokudzingekako kubo, sitfola indlela Jehova lasinakekela ngayo.

10, 11. (a) Nangabe sifundza ngaloko lokudzingekako kulabadzala, singakusebentisa njani loko lesikufundzako ekuphileni kwetfu? (b) Singalusebentisa njani lolwati kuze sisite labanye?

 ¹⁰ “Ngingalusebentisa njani lolwati ekuphileni kwami?” Nangabe sewuvele ungulomdzala, kufanele ulibukete njalo loluhla lwalokudzingekako kuwe, futsi wetame kutfutfuka. Nangabe ‘ufisa kuba ngumbonisi,’ kufanele wente konkhe lokusemandleni akho kuze uhlangabetane naloko lokukuloluhla. (1 Thimothi 3:1) Kodvwa onkhe emaKhristu angafundza kuloko lokudzingekako kulabadzala. Sibonelo saloko kutsi Jehova ulindzele kutsi sonkhe sicabangelane futsi sisebentise kwehlulela lokuhle. (Filiphi 4:5; 1 Phetro 4:7) Nangabe labadzala ‘batibonelo emhlambini,’ singafundza kubo futsi ‘silingise kukholwa kwabo.’​—1 Phetro 5:3; Hebheru 13:7.

¹¹ “Ngingalusebentisa njani lolwati kute ngisite labanye?” Singalusebentisa loluhla lwaloko lokudzingekako kulabadzala labangemaKhristu kuze sisite lesifundza nabo liBhayibheli nalabanye labatsandza kufundza tincwadzi tetfu kutsi bacondze indlela labadzala labehluke ngayo kubafundisi bemasontfo. Loluhla lungaphindze lusisite natsi kutsi sikhumbule indlela labadzala labatikhandla ngayo ebandleni. Loku kungaphindze kusisite kutsi sibahloniphe labazalwane. (1 Thesalonika 5:12) Nangabe sichubeka sibahlonipha, batawujabulela kakhulu umsebenti wabo.—Hebheru 13:17.

12, 13. (a) Sisebentisa emathulusi lesinawo, nguluphi lucwaningo lesingalwenta? (b) Niketa sibonelo sendlela imininingwane lenabile lengativeta ngayo tifundvo lesingeke sisheshe sitibone.

¹² Cwaninga. Nangabe sidadisha liBhayibheli, singafuna timphendvulo tanayi imibuto lelandzelako:

• Ngubani lowabhala lencenye yeliBhayibheli?

• Yabhalwa kuphi futsi nini?

• Ngutiphi tintfo letibalulekile letenteka ngesikhatsi kubhalwa lencwadzi?

Lwati lolunjalo lungasisita kutsi sitfole tifundvo lebesingeke sisheshe sitibone.

¹³ Sibonelo saloko kutsi Hezekeli 14:13, 14 utsi: “Nangabe live lona kimi ngekungetsembeki, bese ngelula sandla sami ngimelane nalo ngekuncamula umtfombo wekudla kwalo, ngitfumele indlala kulo, ngibulale bantfu labakulo kanye netilwane, ngisho nome nalamadvodza lamatsatfu, boNowa, naDanyela, naJobe bebakulo, bebayakutisindzisa bona kuphela ngekulunga kwabo, kusho iNkhosi Simakadze.” Nangabe sicwaninga, sifundza kutsi Hezekeli wabhala lamavi eminyakeni lecishe ibe ngu-612 ngaphambi kwekuba khona kwaKhristu. Nowa naJobe besebaneminyaka lelikhulu bafile, kodvwa Jehova solo usakukhumbula kwetsembeka kwabo. Nobe kunjalo, Danyela bekasaphila. Kubonakala shengatsi bekaneminyaka lecishe ibe ngu-20 budzala ngesikhatsi Jehova atsi abelunge njengaNowa naJobe. Yini lesiyifundzako? Jehova uyatibona futsi utitsatsa njengaletiligugu  tinceku takhe letetsembekile, letifaka ekhatsi nalabasha.​—Tihlabelelo 148:12-14.

14. Tincwadzi letilungiselelwe bantfu labasha tibasita njani futsi tibazuzisa njani nalabanye? (Buka sitfombe lesisekucaleni kwalesihloko.)

¹⁴ Tincwadzi tebantfu labasha. Sifundze kutsi singazuza kuto tonkhe tincenye teliBhayibheli. Ngendlela lefanako, singazuza ngekufundza tonkhe tincwadzi tetfu. Asesicoce ngetibonelo letimbalwa. Eminyakeni leyendlulile, Jehova unikete bantfu labasha lwati lolunyenti. ^[1] (Fundza kwatiswa lokusekugcineni.) Lolwati lubasita kutsi babhekane nekucindzetelwa esikolweni kanye netinsayeya tekukhula. Kodvwa sonkhe singazuza njani ngekufundza letihloko kanye naletincwadzi? Nangabe sifundza lolwati, sifundza ngetinkinga bantfu labasha lababhekana nato futsi tiyabasita tiphindze tibakhutsate.

15. Kungani bantfu labadzala labangemaKhristu kufanele bakufundze kwatiswa lokulungiselelwe bantfu labasha?

¹⁵ Bantfu labadzala labangemaKhristu akukafaneli baticabange bancono kutsi bangafundza kwatiswa lokulungiselelwe bantfu labasha. Tinkinga letinyenti lokucocwa ngato kuletihloko, titsintsa onkhe emaKhristu. Sibonelo saloko kutsi sonkhe kudzingeka simelele kukholwa kwetfu, silawule imiva yetfu, sibalekele kucindzetelwa bontsanga futsi sigweme kutihlanganisa nebangani lababi nekutijabulisa lokungakalungi. Ngako ngisho nobe letincwadzi tibhalelwe bantfu labasha, lolwati lolukuto luvela eBhayibhelini futsi onkhe emaKhristu angazuza.

16. Yini lenye tincwadzi tetfu letiyentako kuze tisite bantfu labasha?

¹⁶ Tincwadzi letibhalelwe bantfu labasha tingaphindze tibasite kutsi bacinise bungani babo naJehova. (Fundza Umshumayeli 12:1, 13.) Nalabadzala bangazuza. Nasi sibonelo, i-Phaphama! ya-April 2009 beyinesihloko lesitsi “Intsha Iyabuza . . . Ngingakwenza Kanjani Ukufunda IBhayibheli Kujabulise?” Lesihloko besinemacebiso lalusito futsi besinelibhokisi lobongalijuba utibekele lona kute ulisebentise nawudadisha. Bantfu labadzala bazuza yini ngekufundza lesihloko? Lomunye make watsi kufundza liBhayibheli bekusolo kumatima kuye. Kodvwa wasebentisa emacebiso lakulesihloko, futsi nyalo uhlale akubuke ngalabovu kufundza liBhayibheli. Utsi uyajabula nakabona indlela tincwadzi teliBhayibheli letihlobana ngayo futsi uyengenta utsi, “Angizange sengikujabulele kangaka kufundza liBhayibheli.”

17, 18. Singazuza njani ngekufundza tincwadzi letihanjiswako? Niketa sibonelo.

¹⁷ Tincwadzi letihanjiswako. Kusukela nga-2008 besisolo sijabulela kuba ne-Sicongosekulindza lesifundvwako. Lomagazini ubhalelwe BoFakazi BaJehova,  kodvwa siphindze sibe nabomagazini labahanjiswako. Singazuza njani nakubo? Asesisebentise nasi sibonelo. Nangabe umema umuntfu kutsi ete eHholweni LeMbuso, uyajabula nakefika. Njengobe sikhulumi sibeka inkhulumo, ucabanga ngesivakashi sakho. Uyatibuta kutsi lomuntfu utiva njani ngaletintfo lativako nekutsi lolwati lungakushintja njani kuphila kwakhe. Loko kukutsintsa inhlitiyo futsi kukwenta ujabule kakhulu.

¹⁸ Kungenteka intfo lefanako nakitsi nangabe sifundza tincwadzi letihanjiswako. Sibonelo saloko kutsi Sicongosekulindza lesihanjiswako netihloko letitfolakala ku-jw.org tichaza liBhayibheli tisebentisa emagama nobe emavi lokulula kuwacondza. Nangabe sifundza ngalokwatiswa, kucondza kwetfu kanye nelutsandvo lwetfu ngemaciniso eliBhayibheli lebesivele siwati, kuyakhula. Singaphindze sifundze tindlela letinsha tekuchaza tinkholelo tetfu ensimini. Ngendlela lefanako, i-Phaphama! isenta sikukholelwe kutsi uMdali ukhona. Iphindze isisite sifundze indlela lesingakumelela ngayo kukholwa kwetfu.​—Fundza 1 Phetro 3:15.

19. Singakukhombisa njani kubonga ngemalungiselelo Jehova lasentele wona?

¹⁹ Kuyacaca kutsi Jehova usinikete imiyalo kanye neticondziso letitasizuzisa. (Matewu 5:3) Shengatsi singachubeka sifundza futsi sikusebentisa konkhe kwatiswa lasinikete kona. Nangabe senta njalo, sitawuzuza futsi sitawube sikhombisa Jehova kutsi siyabonga ngawo onkhe emalungiselelo lasentele wona.​—Isaya 48:17.