1, 2. Bantfu labasha lamuhla bahlangabetana nakuphi kucindzetelwa, futsi ngutiphi tinyatselo labangatitsatsa kuze balwisane nako?

LOMUNYE lobekafundza nadzadze losemusha esikolweni saseNgilandi watsi kuye: “Uyati uhlakaniphe kakhulu kutsi ungakholelwa kuNkulunkulu.” Lomunye umzalwane eJalimane wabhala watsi: “Bothishela bami batsi loko lokushiwo liBhayibheli ngendalo kuyinganekwane, futsi abanankinga ngekutsi bafundzi bakholelwa ekutigucukeleni kwemvelo.” Lomunye dzadze losemusha eFrance watsi: “Kuyabamangalisa bothishela bami esikolweni kutsi kusenebafundzi labasakholelwa eBhayibhelini.”

² Njengalosemusha loyinceku yaJehova noma ungulomunye walabasafundza ngaye, utiva uphocelelekile yini kutsi ukholelwe etimfundzisweni letivamile njengeyekutiphendvukela kwemvelo kunekutsi ukholelwe kuMdali? Nangabe kunjalo, kunetinyatselo longatitsatsa kute ucinise kukholwa kwakho. Lesinye sato kusebentisa likhono lekucabanga Nkulunkulu lakuphe lona, lelikhono leli ‘litakugadza.’ Litakuvikela kutsi ungalimati kukholwa kwakho ngetimfundziso letingemanga.​—Fundza Taga 2:10-12.

3. Sitawucoca ngani kulesihloko?

³ Kukholwa sibili kusekelwe elwatini lolungulonalona ngaNkulunkulu.  (1 Thim. 2:4) Njengoba utadisha liVi laNkulukulu kanye netincwadzi letisekelwe eBhayibhelini, ungamane nje uhambise emehlo, kunaloko sebentisa likhono lakho lekucabanga kuze ‘ukucondze’ kahle loko lokufundzako. (Mat. 13:23) Uma udadisha ngalendlela, utawutfola bufakazi bekutsi Jehova ungumdali wetfu nekutsi liBhayibheli livela kuye.​—Heb. 11:1.

4. Kungani kukholelwa kuNkulunkulu kanye nasekudalweni kwetintfo kuhlale kufaka ekhatsi kukholwa lokutsite, futsi yini lokufanele siyente kuze sifinyelele siphetfo lesingiso?

⁴ Uke wabeva yini bantfu batsi bakholelwa ekutigucukeleni kwemvelo ngoba nje kusekelwe kusayensi, kube kukholelwa kuNkulunkulu kona kudzinga kukholwa? Labanyenti banembono lonjalo. Kubalulekile kuhlale sikhumbula kutsi: Kungakhatsaliseki kutsi umuntfu ukholelwa kuNkulunkulu noma ekutigucukeleni kwemvelo, lokusalako unako kukholwa lokutsite. Kwenteka njani loku? Kute kitsi loke wabona Nkulunkulu nome wabona lapho kudalwa tintfo. (Johane 1:18) Futsi kute umuntfu​—kungakhatsaliseki kutsi ungusosayensi nome akasuye—​loke wabona lokutsite kugucuka kuba ngulokunye. Nasi sibonelo, kute loke wabona umgololo ugucuka uba ngumuntfu. (Job 38:1, 4) Nome kunjalo sonkhe kufanele sitfole bufakazi siphindze sisebentise nelikhono letfu lekucabanga kuze sifinyelele tiphetfo letingito. Nakakhuluma ngendalo, umphostoli Pawula watsi: “Bunguye bakhe lobungabonakali buvetwe ngalokucacile kusukela ekudalweni kwelive kuchubeke, ngobe bubonakala etintfweni letidaliwe, futsi emandla akhe langapheli nebuNkulunkulu bakhe buyabonakala, kangangekutsi bete taba.”​—Rom 1:20.

5. Njengetinceku taNkulunkulu, ngumaphi emathulusi langasisita kuze siwasebentise kahle emandla etfu ekucondza?

⁵ “Kucondza” kusho kubona tintfo letisengakabonakali. (Heb 11:3) Ngako ke bantfu labanekucondza basebentisa tingcondvo, hhayi emehlo kanye netindlebe tabo kuphela. Inhlangano yaJehova isinikete emathulusi lamanyenti lacwaningwe kahle kuze asisite kutsi sikhone ‘kubona’ uMdali wetfu ngemehlo ekukholwa. (Heb 11:27) Lamathulusi afaka ekhatsi i-video letsi “The Wonders of Creation Reveal God’s Glory,” tincwajana letitsi “Was Life Created?” kanye naletsi “The Origin of Life—Five Questions Worth Asking” bese  kuba nencwadzi letsi “Is There a Creator Who Cares About You?” Siphindze sibe nabomagazini labasisita kutsi sicabangisise. Magazini iPhaphama uvamise kuba netincociswano nabososayensi kanye nalabanye labaye bachaza kutsi kungani sebakholelwa kuNkulunkulu. Luchungechunge lwetihloko letitsi “Ingabe Kwaklanywa?” letitfolakala ngesiZulu, lunetibonelo letinhle temidvwebo lesiyibona endalweni. Bososayensi baye batama kamatima kulingisa indalo.

6. Ungaba yini umphumela wekusebentisa lamathulusi lesinawo, futsi akusite njani wena?

⁶ Mayelana naletincwajana lesikhulume ngato ekucaleni, lomunye umzalwane loneminyaka lengu-19 waseMelika watsi: “Letincwajana tiligugu kimi. Sengitifundze tikhatsi letinyenti.” Lomunye dzadze waseFrance wabhala watsi: “Letihloko letititsi ‘Ingabe kwaklanywa?’ tingijabulisa kakhulu. Tikhombisa kutsi bonjiniyela labakhulu bangetama kulingisa imidvwebo yendalo kodvwa ngeke bayilingise ngalokuphelele.” Batali labanemnfwana loneminyaka lengu-15 budzala baseNingizimu Africa batsi: “Intfo yekucala indvodzakati yetfu levama kuyifundza kuPhaphama kuba sihloko ‘seTincociswano.’” Kutsiwani ngawe? Uyatifundza yini letihloko? Tingacinisa kukholwa kwakho njengesihlahla lesinetimphandze letindze. Kukholwa kwakho kungakusita ukhone kumelana netimfundziso temanga letandze yonkhe indzawo.​—Jer. 17:5-8.

7. Kungani Nkulunkulu afuna usebentise emandla akho ekucabanga?

⁷ Kubi yini kubuta imibuto lenengcondvo ngeliBhayibheli? Cha! Jehova ufuna usebentise “emandla akho ekucabanga” kuze utitfolele wena liciniso. Akafuni ube nekukholwa ngobe nje ulingisa labanye. Ngako sebentisa likhono lakho lekucabanga kuze utitfolele lwati lolungulonalona. Lolo lwati lungaba sizatfu lesicinile sekukholwa sibili. (Fundza Roma 12:1, 2; 1 Thimothi 2:4.) Lenye indlela yekutfola lolwati kutadisha tihloko letimbalwa teliBhayibheli lotikhetsele tona.

8, 9. (a) Ngutiphi tihloko labanye labatsandza kufundza ngato? (b) Kubasite njani labanye kuzindla ngaloko labakufundzako?

⁸ Labanye bakhetse kutadisha tihloko letifaka ekhatsi tiprofetho teliBhayibheli, umlandvo weliBhayibheli, kutadisha ngebacwaningi bemlandvo walo kanye nangekunemba kwalo kutesayensi. Lesinye siphrofetho lesijabulisako lesingafundza ngaso sikuGenesisi 3:15. Lelivesi liveta sihloko lesibalulekile seliBhayibheli, lesikulwela bukhosi baNkulunkulu kanye nekungcweliswa kweligama lakhe asebentisa uMbuso wakhe. Lelivesi lisebentisa inkhulumo lengumfanekiso, liveta kutsi Jehova utakucedza njani kuhlupheka kwebantfu lokwacala ensimini yase-Edeni. Singayitadisha njani lencwadzi yaGenesisi 3:15 kuze siyicondze kahle? Lokunye lesingakwenta kungaba kutakhela luhla lwemiBhalo leyinhloko lebonisa indlela Nkulunkulu labembulele ngayo bantfu labatsite ngalelivesi kanye nako konkhe lokumayelana nalo lokukhombisa indlela lesiphrotho lesitawufezeka ngayo. Njengoba ubona indlela imibhalo levumelana ngayo, utawubona kutsi nembala baphrofethi beliBhayibheli kanye nebabhali balo “bebachutjwa ngumoya longcwele.”​—2 Phet. 1:21.

⁹ Lomunye umzalwane waseJalimane wabhala watsi: “UMbuso usihloko lokukhulunywa ngaso kulo lonkhe liBhayibheli ngisho nome labhalwa madvodza langu-40 labephila ngetikhatsi letehlukene futsi lamanye bekangatani.” Dzadze wase-Australia wakhutsatwa sihloko seSicongosekulindza saDecember 15, 2013 lebesikhuluma ngekubaluleka kweliPhasika. Lomkhosi lobalulekile uhlobene nalombhalo waGenesisi 3:15 kanye nekufika kwaMesiya. Lodzadze wabhala watsi:  “Lesihloko sangisita ngabona buhle baJehova, indlela lakhulula ngayo ema-Israyeli kanye nendlela lelilungiselelo lelagcwaliseka ngayo kuJesu, loko kwangijabulisa kakhulu. Kwadzingeka ngizindle ngalesiphrofetho, ngibone kutsi belibaluleke ngani liPhasika.” Kungani lodzadze ativa ngalendlela? Wazindla ngaloko lebekakufundzile futsi ‘wakucondza.’ Loku kwamsita wacinisa kukholwa kwakhe futsi wasondzelana naJehova.​—Mat. 13:23.

10. Kwetsembeka kwebabhali beliBhayibheli kukucinisa njani kukholwa kwetfu?

¹⁰ Lenye indlela yekucinisa kukholwa kwetfu kucabanga ngesibindzi lesaboniswa ngemadvodza labhala liBhayibheli kanye nekwetsembeka kwawo. Babhali labanyenti basendvulo bebabhala lokuhle kuphela ngebaholi babo kanye nangesive sabo. Ngalokungafani nalababhali, baphrofethi baJehova babhala lokuliciniso. Babhala ngemaphutsa ebantfu bakubo kanye newemakhosi abo. (2 Khr. 16:9, 10; 24:18-22) Lababhali beliBhayibheli babhala nangemaphutsa abo kanye newaletinye tinceku taJehova. (2 Sam. 12:1-14; Mak. 14:50) Lomunye umzalwane losemusha waseNgilandi watsi: “Kwetsembeka lokunjena kulivela kancane. Loku kusenta setsembe kutsi liBhayibheli livela kuJehova.”

11. Yini lengasita bantfu labasebasha bacaphele kubaluleka kwetimiso teliBhayibheli?

¹¹ Ngenca yetimiso talo letisicondzisako, labanyenti bayakholelwa kutsi liBhayibheli liphefumulelwe nguNkulunkulu. (Fundza Tihlabelelo 19:7-11) Dzadze losemusha waseJapane wabhala watsi: “Nangabe umndeni wakitsi usebentisa loko lokufundziswa liBhayibheli, besijabula kakhulu. Besiba nekuthula, bunye futsi sitsandzana.” Timiso teliBhayibheli tiyasivikela etimfundzisweni temanga kanye nasetinkholelweni letilite letigcilate bantfu labanyenti. (Hla. 115:3-8) Timfundziso temafilosofi letitsi Nkulunkulu akekho tiyabatsintsa yini bantfu? Timfundziso letifaka ekhatsi kutigucukela kwemvelo tenta indalo kube shengatsi ngunkulunkulu, tiyinike ludvumo lolulwaJehova kuphela. Labo labatsi Nkulunkulu akekho batitjela kutsi lonkhe likusasa lisetandleni tetfu. Nanobe kunjalo, abaciniseki ngelikusasa lelihle.​—Hla. 146:3, 4.

12, 13. Nguyiphi indlela lekahle kakhulu yekubonisana nalabanye ngendalo nangeliBhayibheli?

¹² Yini lengakusita kutsi ubonisane nalabanye ngendalo nangeliBhayibheli ngendlela lephumelelako? Kwekucala, ungasheshi ucabange kutsi uyakwati loko labakukholelwako. Labanye bantfu bayasho kutsi bayakholelwa ekutigucukeleni kwemvelo, kodvwa baphindze basho kutsi kungenteka kutsi Nkulunkulu ukhona. Bacabanga kutsi Nkulunkulu wasebentisa kutigucukela kwemvelo kute adale tintfo letehlukehlukene. Labanye batsi bakholelwa ekutigucukeleni kwemvelo ngobe kube lemfundziso beyingasilo liciniso bekungeke kufundziswe ngayo etikolweni. Labanye baye bayekela kukholelwa kutsi Nkulunkulu ukhona ngenca yekutsi inkholo ibadvumatile. Ngako-ke nawucoca nemuntfu ngekudalwa kwetintfo, kuhle kutsi ucale ngekumbuta imibuto. Tfola loko lakukholelwako. Nangabe umlalela nakakhuluma futsi ubonisana naye kahle, angakujabulela kukulalela nawe.​—Thit. 3:2.

¹³ Nangabe umuntfu atsi kubulima kukholelwa kutsi tintfo tadalwa, bonisana naye ngekuhlakanipha usebentisa imibuto. Ungamcela akuchazele kutsi nangabe uMdali angekho, kuphila kwaba khona njani. Ungasho nekutsi nangabe kuphila kwavele kwaba khona-nje, bekufanele kube khona indalo yekucala lebeyitawukhicita tintfo letifana nayo. Lesinye sati sesayensi sitsi letinye tintfo lebetitawudzingeka bekutawuba (1) yi-membrane lebeyitawuvikela lomkhicito, (2) ngemandla lavumela kutsi lomkhicito  wenteke, (3) imininingwane yekwakheka kwaleyontfo kanye  (4) nelikhono lekukhicita leyo mininingwane. Wengeta watsi: “Umuntfu ukhangwa kuba yinkimbinkimbi kwencenye lencane yendalo.”

14. Yini longayenta nangabe ucabanga kutsi ute indlela lekahle yekucoca nemuntfu ngekutigucukela kwemvelo nobe ngendalo?

¹⁴ Nangabe ucabanga kutsi ute indlela yekucoca nemuntfu ngekutigucukela kwemvelo nobe ngendalo, yetama kusebentisa indlela lelula yekubonisana nebantfu leyasetjentiswa nguPawula. Wabhala watsi: “Nguleyo naleyondlu inemakhi wayo, kodvwa loyo lowakhe tonkhe tintfo nguNkulunkulu.” (Heb. 3:4) Lendlela inengcondvo futsi isebenta kahle. Ecinisweni, yonkhe intfo leyinkimbinkimbi yadalwa ngumuntfu lohlakaniphile. Ungasebentisa ngisho nencwadzi lekhuluma ngaleyondzaba. Lomunye dzadze wasebentisa letincwajana letimbili lesikhulume ngato ekucaleni ngalesikhatsi acoca nelijaha lebelitsi alikholelwa kutsi Nkulunkulu ukhona futsi liyayemukela imfundziso yekutigucukela kwemvelo. Ngemuva kweliviki, lelijaha labese liyavuma kutsi Nkulunkulu ukhona. Lendzaba yaholela ekucaliseni kwesifundvo seliBhayibheli, futsi nyalo selingulomunye webazalwane betfu.

15, 16. Nguyiphi indlela longayisebentisa nawucoca nalotsite ngeliBhayibheli, futsi ngumuphi umgomo lokufanele ube nawo?

¹⁵ Ungaphindze usebentise lendlela nawucoca nemuntfu longaletsembi liBhayibheli. Yetama kutfola kutsi yini kahlekahle layikholelwako nekutsi ngutiphi tihloko langatsandza kucoca ngato. (Taga 18:13) Nangabe atsandza tintfo letiphatselene nesayensi, angajabula nangabe ucaphuna emaphuzu lakhombisa kunemba kweliBhayibheli kutesayensi. Labanye bangakhutsatwa kubona kunemba kwetiphrofetho teliBhayibheli kanye nemlandvo walo loliciniso. Mhlawumbe ungaveta netimiso teliBhayibheli letilusito njengaleto letitfolakala eNshumayelweni yaseNtsabeni.

¹⁶ Khumbula kutsi umgomo wakho ukutsintsa inhlitiyo yemuntfu hhayi kuphikisana naye. Ngako-ke, mlalelisise. Buta imibuto lemihle, khuluma ngendlela lenemusa nalenenhlonipho, ikakhulu nawukhuluma nebantfu labadzala. Kungenteka nabo batayihlonipha imibono yakho. Batawubona kutsi ucabangisisile ngaloko lokukholelwako. Lena yintfo bantfu labasha labangakase batihluphe ngayo. Kuhle kwati kutsi awukaphoceleleki kutsi uphendvule labo labafuna nje kukuphikisa nobe bahlekise ngaloko lokukholelwako.​—Taga 26:4.

17, 18. (a) Yini lengakusita kutsi ucinise kukholwa kwakho? (b) Ngumuphi umbuto lesitawucoca ngawo esihlokweni lesilandzelako?

¹⁷ Kukholwa lokucinile kusekelwe elwatini lolujulile loluseBhayibhelini. Ngako-ke lifundze liVi laNkulunkulu, wetame kufunisisa lwati, kube shengatsi ufuna umcebo lofihliwe. (Taga 2:3-6) Wasebentise kahle nalamanye emathulusi lesinawo lafaka ekhatsi i-Watchtower Library, Umtapo WETINCWADZI we-Watchtower ku-INTERNET, sebentisa neWatch Tower Publications Index nobe Lithulusi Lekucwaninga LaBoFakazi BaJehova. Tibekele umgomo wekulifundza lonkhe liBhayibheli. Ungetama kucedza kulifundza ngetinyanga letingu-12 nje kuphela. Kufundza liVi laNkulunkulu ngiko lokungacinisa kukholwa kwetfu. Akhumbula ngalesikhatsi asesemusha, lomunye umbonisi wesigodzi watsi: “Lenye intfo leyangisita ngabona kutsi liBhayibheli liliVi laNkulunkulu kulifundza lonkhe. Ngacala kutiva kahle tindzaba teliBhayibheli lengatifundza ngesikhatsi ngisemncane. Ngulapho langacala khona kutfutfuka.”

¹⁸ Nine batali ninendzima lebalulekile ekutfutfukeni kwebantfwana benu. Ningabasita njani kutsi bacinise kukholwa kwabo? Sihloko lesilandzelako sitawucoca ngalendzaba.