“NGABHAJATISWA ngineminyaka lengu-15 budzala futsi ngemuva kwetinyanga letisitfupha, ngacala kuba lihlahlandlela lelisitako. Ngemuva kwemnyaka, ngafaka sicelo sekuba lihlahlandlela lelivamile. Ngatsi nangicedza sikolwa, ngacela kuya lapho kunesidzingo lesikhulu khona sebamemeteli beMbuso. Bengifuna kusuka edolobheni lakitsi, ngishiye nagogo wami lebengihlala naye, lobekangasuye Fakazi WaJehova. Ngeva buhlungu kakhulu ngesikhatsi umbonisi lojikeletako angitjela kutsi sabelo sami kushumayela kulo lona lelidolobha lengatalelwa kulo. Ngetama kuyifihla indlela lebengitiva ngayo. Ngasuka lapho ngijabhe kakhulu, ngahamba ngayocabangisisa ngaloko lebekushiwo ngulombonisi. Ngatsi kulona lebengitawuba naye kulesabelo: ‘Ngibona shengatsi sengilingisa Jona. Kepha-ke Jona wagcine ayile eNineve. Ngako-ke, nami ngitakuya lapho ngabelwe khona.’

“Sekuphele iminyaka lemine ngilihlahlandlela edolobheni lakitsi futsi ngiyabona kutsi kwaba sincumo lesihlakaniphe kangakanani kulandzela sicondziso lenganiketwa sona. Inkinga yami lenkhulu beyikutsi indlela lebengicabanga ngayo beyingakalungi. Nyalo sengijabula kakhulu. Ngenyanga yinye nje vo, ngakhona kuchuba tifundvo teliBhayibheli letingu-24. Ngimbonga kakhulu Jehova ngobe sengifundza nagogo wami lobekaphikisa esikhatsini lesendlulile.”

Lomunye make lobekafundzelwa liBhayibheli eFiji kwadzingeka akhetse emkhatsini wekuya emhlanganweni wesifundza nekuhamba nendvodza yakhe baye emcimbini wekugubha lilanga lekutalwa lesihlobo sabo. Indvodza yakhe yamvumela kutsi aye kulomhlangano. Wayitjela kutsi utawufika kulomcimbi nasabuya emhlanganweni. Kodvwa watsi nakabuya emhlanganweni, wakubona kuncono kutsi angatifaki esimeni lesingalimata buhlobo bakhe naNkulunkulu, ngako akazange asaya.

Ngesikhatsi indvodza yakhe itjela tihlobo tayo kutsi umfati wayo utakuta kulomcimbi ngemuva “kwalomhlangano waBoFakazi BaJehova” njengobe beyimcelile, taphendvula tatsi: “Ungabona emehlo esibungu nakangefika ngobe BoFakazi BaJehova abatigubhi tinsuku tekutalwa!” *

Ngenca yaloko, lendvodza yajabula kakhulu ngekutsi umkayo utimelele tintfo latikholelwako waphindze walalela nembeza wakhe. Kwetsembeka kwakhe ngiko lokwamsita kutsi agcine ashumayele umyeni wakhe kanye nalabanye. Waba yini umphumela? Umyeni wakhe wavuma kuchutjelwa sifundvo seliBhayibheli futsi wacala kuya naye emihlanganweni yebuKhristu.