1. Jehova utiva njani ngebantfu labatfobekile? Chaza.

JEHOVA uyabatsandza bantfu labatfobekile, futsi ngulabatfobeke mbamba labangaba nebuhlobo lobuhle naye. Kodvwa “labatiphakamisako ubabukela khashane.” (Hla. 138:6) Sonkhe siyafuna kujabulisa Jehova futsi siyafuna kusondzelana naye, ngako sinetizatfu letivakalako tekufuna kutfobeka.

2. Sitawucoca ngani kulesihloko?

² Kulesihloko, sitawuphendvula imibuto lemitsatfu: (1) Kuyini kutfobeka? (2) Kungani kufanele sihlale sitfobekile? (3) Yini lengenta kube matima kutsi sihlale sitfobekile? Njengobe sitawubona, nasichubeka sibantfu labatfobekile sijabulisa Jehova futsi natsi siyazuza.—Taga 27:11; Isa. 48:17.

3. Kuyini kutfobeka?

³ Kutfobeka kusho kuba nemoya lophansi, kungatigcabhi nekungatiphakamisi. Umuntfu lotfobekile utsatsa Jehova njengalomkhulu kunaye futsi nalabanye bantfu ubatsatsa njengalabakhulu kunaye. Umuntfu lotfobekile uyati kutsi labanye bantfu bancono kunaye.—Fil. 2:3, 4.

4-5. Kungani lomunye umuntfu angabonakala atfobekile kepha abe angakatfobeki?

⁴ Labanye bantfu babonakala batfobekile kantsi abakatfobeki. Mhlawumbe basuke banemahloni. Kungenteka bayahlonipha nobe banemusa kulabanye ngesizatfu sekutsi bakhuliswe kanjalo, kodvwa ungatfola kutsi bayatiphakamisa. Ngekuhamba  kwesikhatsi babese bayativeta kutsi babantfu labanjani.—Luk. 6:45.

⁵ Labanye bantfu banesibindzi futsi bete emahloni ekusho loko labakucabangako, kodvwa loko akusho kutsi bayatiphakamisa. (Joh. 1:46, 47) Nanobe kunjalo, bantfu labanesibindzi kufanele bacaphele kutsi bangetsembeli emakhonweni abo. Ngisho sinesibindzi nobe site, sonkhe kufanele setame kamatima kutsi sitfobeke.

6. Ngekusho kwa-1 Khorinte 15:10, yini lesingayifundza esibonelweni semphostoli Pawula?

⁶ Cabanga ngesibonelo semphostoli Pawula. Jehova wamsebentisa kakhulu kuze asungule emabandla lamasha emadolobheni lehlukahlukene. Kungenteka kutsi kunyenti lakufeza emsebentini wekushumayela nakacatsaniswa nalabanye baphostoli baJesu Khristu. Nanobe kunjalo, Pawula akazange acabange kutsi uncono kunebazalwane bakhe. Ngekutfobeka watsi: “Ngingulomncane kubaphostoli, futsi akungifaneli kubitwa ngekutsi ngingumphostoli, ngobe ngahlupha libandla laNkulunkulu.” (1 Khor. 15:9) Pawula wachaza kutsi bekanebuhlobo lobuhle naJehova ngobe Jehova bekanemusa lomkhulu kuye, hhayi ngobe bekancono kunalabanye nobe ngenca yekutsi ufeze tintfo letinyenti. (Fundza 1 Khorinte 15:10.) Pawula bekasibonelo lesihle semuntfu lotfobekile. Nakabhala incwadzi leya ebandleni laseKhorinte, akazange atikhukhumete ngisho nobe labanye kulelibandla bebambukela phansi.—2 Khor. 10:10.

7. Lomunye umzalwane lowatiwa kakhulu wakhombisa njani kutsi utfobekile?

⁷ Umlandvo wekuphila weMzalwane Karl F. Klein, lobekalilunga leSigungu Lesibusako ubakhutsate kakhulu bantfu baJehova labanyenti. Kulomlandvo wakhe wekuphila, uMzalwane Klein uvuma ngekutfobeka lokukhulu  kutsi wake waba nebutsakatsaka kanye netinkinga ekuphileni kwakhe. Sibonelo saloko kutsi ngesikhatsi acala ngca kushumayela emutini ngemuti nga-1922, wakutfola kulukhuni kushumayela kangangekutsi akazange aphindze akwente iminyaka lengaba mibili leyalandzela. Ngekuhamba kwesikhatsi, nakaseBethel, lomunye umzalwane wameluleka futsi kwaphela sikhatsi solo amtfukutselele. Bekaphindze abe nesifo lesibangwa kucindzeteleka kakhulu, lesaphela ngekuhamba kwesikhatsi. Nanobe kunjalo, bekenta letinye tabelo letijabulisako futsi letibalulekile. Kuyacaca kutsi uMzalwane Klein bekatfobekile ngobe wakhuluma ngebutsakatsaka bakhe ngisho nobe bekatiwa kakhulu. Bazalwane nabodzadze labanyenti bayamkhumbula uMzalwane Klein kanye nemlandvo wakhe wekuphila loliciniso futsi lojabulisako. *

8. 1 Phetro 5:6 usisita njani sibone kutsi kutfobeka kuyamjabulisa Jehova?

⁸ Sizatfu lesibalulekile lesisenta sihlale sitfobekile kutsi sifuna kujabulisa Jehova. Umphostoli Phetro wakucacisa loku. (Fundza 1 Phetro 5:6.) Incwadzi letsi “Woza Ube Ngumlandeli Wami,” isho naku nayikhuluma ngalamavi aPhetro: “Kutigcabha kufana nashevu. Umphumela uba buhlungu. Ngisho nobe umuntfu angaba nemakhono lamahle, kepha nangabe angakatfobeki akasilutfo kuNkulunkulu. Kodvwa kutfobeka kwenta umuntfu longasilutfo kutsi abe ngumuntfu lobalulekile kuJehova. . . . Jehova kuyamjabulisa kubusisa bantfu labatfobekile.” * Intfo lencono kakhulu lesingayenta kutsi sijabulise Jehova!—Taga 23:15.

9. Kungani bantfu bafuna kusondzelana natsi nangabe sitfobekile?

⁹ Asigcini nje ngekujabulisa Jehova, kodvwa sitfola netinzuzo letinyenti nasichubeka sitfobekile. Nasitfobekile, labanye bantfu batawusondzelana natsi. Kungani kunjalo? Cabanga ngeluhlobo lwebantfu lotsandza kutihlanganisa nalo. (Mat. 7:12) Linyenti letfu alitsandzi kutihlanganisa nemuntfu lohlale afuna kutsi tintfo tenteke ngendlela yakhe nalongafuni kulalela imibono yalabanye. Kodvwa kumnandzi kuba nebazalwane betfu nabodzadzewetfu nangabe ‘baneluvelo, batsandzana njengebazalwane, banesihawu, futsi batfobekile.’ (1 Phet. 3:8) Nasitihlanganisa nebantfu labanjalo siyajabula futsi nabo bayajabula kuba natsi, kuphela nje nasitfobekile.

10. Kungani kumelula ngebantfu labatfobekile kutsi babeketelele tinkinga ekuphileni?

 ¹⁰ Kutfobeka kwenta kuphila kwetfu kube melula. Ngaletinye tikhatsi sitawubona shengatsi tintfo atenteki ngendlela lelungile. INkhosi Solomoni lebeyihlakaniphile yatsi: “Ngibone tigcili tigibele emahhashi, kwatsi bantfu labakhulu bahamba phansi ngetinyawo njengetigcili.” (Shu. 10:7) Ngaletinye tikhatsi bantfu labanemakhono abalutfoli ludvumo. Kodvwa labo labanemakhono lamancane batfola ludvumo lolunyenti. Nobe kunjalo, Solomoni wabona kutsi kufanele semukele kuphila njengobe kunjalo futsi singadvumateki ngenca yekutsi tintfo atenteki ngendlela lebesifuna tenteke ngayo. (Shu. 6:9) Nasitfobekile sitawukhona kwemukela kuphila njengobe kunjalo, futsi kutawuba melula kutsi semukele tintfo lesingatitsandzi.

11. Kufanele sente njani nasitfola seluleko?

¹¹ Onkhe malanga, singakhombisa kutsi sitfobekile. Ase sicoce nganati tibonelo. Nasitfola seluleko. Kufanele sihlale sikhumbula kutsi nangabe umuntfu enta imetamo kuze aseluleke, kungenteka sisuke sente liphutsa lelikhulu. Nangabe umuntfu asiniketa seluleko, lokusheshe kufike engcondvweni kutsi singasemukeli. Singanyembenya lomuntfu losinike leseluleko nobe sinyembenye indlela lakhulume ngayo. Kodvwa nangabe sitfobekile sitawukhona kutibamba.

12. Ngekusho kwe-Taga 27:5, 6, kungani kufanele sibonge nangabe umuntfu aseluleka? Fanekisa.

¹² Umuntfu lotfobekile uyajabula nakelulekwa. Ase sifanekise: Ticabange usemihlanganweni yebuKhristu. Ngemuva kwekutsi sococe nebantfu labanyenti, munye wabo ukubitela eceleni, akutjele kutsi unekudla ematinyweni. Kusebaleni kutsi utativa unemahloni. Kodvwa utawujabula ngekutsi ukutjelile. Ecinisweni utawufisa shengatsi ngabe kukhona losheshe wakutjela! Ngendlela lefanako, kufanele sitfobeke futsi sibonge nangabe umzalwane nobe dzadze asiniketa seluleko lesisidzingako. Loyo muntfu kufanele simtsatse njengemngani wetfu hhayi sitsa setfu.—Fundza Taga 27:5, 6; Gal. 4:16.

13. Singakhombisa njani kutsi sitfobekile nangabe labanye batfola emalungelo ebandleni?

¹³ Nangabe labanye batfola emalungelo. Jason longulomdzala ebandleni utsi: “Nangibona labanye batfola emalungelo, ngaletinye tikhatsi ngiyatibuta kutsi kungani angakatfolwa ngimi.” Kuyenteka yini kutsi utive ngalendlela? Kuhle ‘kufisa’ kwentela Jehova  lokunyenti. (1 Thim. 3:1) Kodvwa kufanele sikunake loko lesikucabangako. Nasingakanaki, singatikhandza sesitikhukhumeta. Nasi sibonelo, umzalwane angacala kucabanga kutsi nguye longakhona kusenta kancono sabelo lesitsite. Nobe dzadze angacabanga atsi: ‘Indvodza yami ingasenta kahle kakhulu lesabelo kunalomzalwane loniketwe sona!’ Kodvwa nangabe sitfobeke mbamba, angeke sicabange ngalendlela.

14. Sifundzani endleleni Mosi lenta ngayo ngesikhatsi labanye batfola emalungelo?

¹⁴ Singafundza endleleni Mosi lenta ngayo ngesikhatsi labanye batfola emalungelo. Mosi bekasitsandza sabelo sakhe sekuhola sive sema-Israyeli. Wenta njani ngesikhatsi Jehova aniketa labanye lilungelo lekutsi bamsite kuleminye imisebenti yakhe? Akazange abe nemona. (Num. 11:24-29) Watfobeka futsi wavumela labanye kutsi bamsite ekwenteni umsebenti wekwehlulela bantfu. (Eks. 18:13-24) Ema-Israyeli aba nemadvodza lamanyenti lebekatawuba behluleli bawo, ngako bekungeke kudzingeke kutsi alindze sikhatsi lesidze kuze atfole tehlulelo tawo. Loku kuyakhombisa kutsi Mosi bekanendzaba kakhulu ngekusita bantfu kunekutsi abe nemalungelo lamanyenti. Lesi sibonelo lesihle kakhulu lesingasilingisa! Kufanele sihlale sati kutsi kuze sisetjentiswe nguJehova, kubaluleke kakhulu kutsi sitfobeke kunekutsi sibe nemakhono lamanyenti. Ngisho nobe “[Jehova] aphakeme kangaka, uyabanakekela labatitfobako.”—Hla. 138:6.

15. Tishintje njani timo tebazalwane nabodzadze labanyenti?

¹⁵ Nangabe timo tetfu tishintja. Bazalwane nabodzadze labanyenti labakhonte Jehova iminyaka leminyenti batfole tabelo letinsha. Sibonelo saloko kutsi ngemuva kwa-2014, babonisi betifundza nebafati babo bacelwa kutsi bente letinye tabelo. Kuwo wona lowo mnyaka, inhlangano yatsi babonisi betigodzi kufanele bayekele etabelweni tabo nasebaneminyaka lengu-70. Nebazalwane labaneminyaka  lengu-80 kuya etulu bekufanele bayekele kuba bachumanisi besigungu salabadzala belibandla. Ngetulu kwaloko, eminyakeni lembalwa leyengcile, labanyenti eBethel bacelwa kutsi babe ngemahlahlandlela lavamile. Labanye kwadzingeka kutsi bayekele kuba tisebenti tasikhatsi sonkhe ngenca yekugula, nobe kuze basite imindeni yabo nangenca yaletinye tizatfu.

16. Bazalwane nabodzadze bakhombise njani kutsi batfobekile nakushintja timo tabo?

¹⁶ Kwenta lolushintjo kwaba matima kulabazalwane nabodzadze. Bebatitsandza kakhulu tabelo tabo lebebatishiyile futsi lebebatente iminyaka leminyenti. Labanye ‘bebasebuhlungwini lobukhulu’ njengobe bebetama kwetayelana netabelo tabo letinsha. Kodvwa ngekuhamba kwesikhatsi batitjwayela letabelo tabo letinsha. Kungani? Sizatfu lesihamba embili kutsi batsandza Jehova. Bebati kutsi batinikele kuNkulunkulu, hhayi esabelweni sabo, nobe emalungelweni abo. (Khol. 3:23) Ngekutitfoba, bayakujabulela kuchubeka bakhonta Jehova kunobe ngusiphi sabelo. ‘Baphonsa konkhe kukhatsateka kwabo kuye,’ ngobe bayati kutsi uyabakhatsalela.—1 Phet. 5:6, 7.

17. Kungani sijabula ngekutsi liVi laNkulunkulu lisikhutsata kutsi sichubeke sitfobekile?

¹⁷ Sijabula kakhulu ngekutsi liVi laNkulunkulu lisikhutsata kutsi sitfobeke. Nasitfobekile, labanye bantfu bayajabula kuba natsi futsi siyazuza. Siyakhona nekubeketelela tinkinga ekuphileni. Lokubaluleke kakhulu kutsi sisondzelana naBabe wetfu losezulwini. Sijabula kakhulu kwati kutsi nanobe ‘anguLophakeme Losetulu,’ uyatitsandza tinceku takhe letitfobekile!—Isa. 57:15.