SIHLOKO LESIFUNDVWAKO 38
“Kotani kimi, . . . Ngitaniphumuta”
“Kotani kimi nonkhe nine lenikhatsele nalenisindvwako, ngitaniphumuta.”—MAT. 11:28.
INGOMA 17 “Ngiyatsandza”
LOKUTAWUCOCWA NGAKO KULESIHLOKO *
1. Ngekusho kwembhalo waMatewu 11:28-30, ngusiphi setsembiso Jesu lasenta?
JESU wenta setsembiso lesijabulisa kakhulu kubantfu lebebamlalele. Watsi: “Kotani kimi, . . . ngitaniphumuta.” (Fundza Matewu 11:28-30.) Lesi bekungasiso nje setsembiso lesingasho lutfo. Ase ucabange ngaloko lakwenta kumfati lobekanesifo lesibuhlungu.
2. Yini Jesu layentela umfati lobekagula?
2 Lomfati bekaludzinga mbamba lusito. Besekahambe bodokotela labanyenti, anelitsemba lekutsi utawelashwa. Besekuphele iminyaka lengu-12 anelisifo lesibuhlungu, kodvwa kute lobekakhona kumsita. Ngekusho kweMtsetfo, lomfati bekangcolile. (Lev. 15:25) Ngako weva kutsi Jesu uyabelapha labagulako, wase uyahamba uyomfuna. Watsi nakamtfola, watsintsa umphetfo wengubo yakhe yangetulu, futsi ngekushesha welapheka! Jesu akagcinanga nje ngekumelapha, kodvwa indlela lamphatsa ngayo yakhombisa kutsi uyamtsandza lomfati futsi uyamhlonipha. Sibonelo saloko kutsi nakakhuluma naye wasebentisa ligama lelikhombisa inhlonipho lelitsi “ndvodzakati.” Lomfati watfola kuphumula mbamba futsi wativa acinile!—Luk. 8:43-48.
3. Sitawuphendvula miphi imibuto?
3 Naka kutsi ngulomfati lowaya kuJesu. Nguye lowenta imetamo yekuya kuye. Nalamuhla kwenteka lokufanako, ngitsi lokufanele sente imetamo ‘yekuya’ kuJesu. Lamuhla,
Jesu akakwelaphi ngalokusimangaliso kugula kwalabo ‘labeta’ kuye. Kodvwa uyachubeka nekusimema, utsi: “Kotani kimi, . . . ngitaniphumuta.” Kulesihloko, sitawuphendvula imibuto lesihlanu: Kufanele senteni kuze ‘siye’ kuJesu? Bekasho kutsini Jesu nakatsi: “Bekani lijoka lami kini”? Yini lesingayifundza kuJesu? Kungani umsebenti lasinika wona usiniketa kuphumula? Singenta njani kuze sichubeke sitfola kuphumula ngephansi kwelijoka laJesu?“KOTANI KIMI”
4-5. Ngutiphi letinye tindlela ‘lesingaya’ ngato kuJesu?
4 Lenye indlela ‘yekuya’ kuJesu kutsi sifundze lokunyenti ngetintfo latenta nalatisho. (Luk. 1:1-4) Kungumsebenti wetfu kutsi sidadishe loko liBhayibheli lelikushoko ngaye. Siphindze ‘siye’ kuJesu nasitsatsa sincumo sekubhajatiswa futsi sibe balandzeli baKhristu.
5 Lenye indlela ‘lesiya’ ngayo kuJesu kutsi siye kulabadzala belibandla nasidzinga lusito. Jesu usebentisa ‘letipho letibantfu’ kuze anakekele timvu takhe. (Ef. 4:7, 8, 11; Joh. 21:16; 1 Phet. 5:1-3) Kufanele sente imetamo yekufuna lusito lwabo. Ngeke silindzele kutsi labadzala bavele bakwati loko lesikucabangako nalesikudzingako. Ase ucabange nganaku lokushiwo ngumzalwane Julian, utsi: “Kwadzingeka kutsi ngishiye umsebenti lebengiwenta eBethel ngobe bengigula, futsi lomunye umngani wami watsi angicele labadzala kutsi bangivakashele kuze bangikhutsate. Ekucaleni bengiva ngatsi angikudzingi kukhutsatwa. Kodvwa ngekuhamba kwesikhatsi ngalucela lusito lwabo, futsi kungivakashela kwabo kwangisita kakhulu.” Labadzala labetsembekile labafana nalaba labavakashela Julian, bangasisita sikhone kuyati “imicabango yaKhristu,” lokusho kuyicondza indlela lacabanga ngayo nalenta ngayo, futsi simlingise. (1 Khor. 2:16; 1 Phet. 2:21) Nabasisita ngalendlela, loko kuba sipho lesincono kakhulu labangasipha sona.
“BEKANI LIJOKA LAMI KINI”
6. Jesu bekasho kutsini nakatsi: “Bekani lijoka lami kini”?
6 Ngesikhatsi Jesu atsi: “Bekani lijoka lami kini,” kungenteka bekasho kutsi “Semukele ligunya lakhe.” Kungenteka bekasho nekutsi “Setfwale lijoka kanye naye futsi sonkhe sisebentele Jehova.” Kunobe ngukuphi, bekasho kutsi kufanele sisebente.
7. Ngekusho kwembhalo waMatewu 28:18-20, ngumuphi umsebenti lesinikwe wona, futsi yini lesiciniseka ngayo?
7 Sisuke semukela simemo saJesu nangabe sinikela kuphila kwetfu kuJehova futsi sibhajatiswa. Jesu umema bonkhe bantfu kutsi bete kuye, futsi utawuhlale emukela nobe ngubani lotimisele kukhonta Nkulunkulu. (Joh. 6:37, 38) Bonkhe balandzeli baKhristu baniketwe lilungelo lekwenta umsebenti Jehova lacela Jesu kutsi awente. Siyaciniseka kutsi Jesu utawuhlale anatsi kuze asisite sente lomsebenti.—Fundza Matewu 28:18-20.
“NIFUNDZE KIMI”
Phumuta labanye njengobe kwenta Jesu (Buka tigaba 8-11) *
8-9. Kungani bantfu labatfobekile bebasondzela kuJesu, futsi ngumiphi imibuto lokufanele sitibuta yona?
8 Bantfu labatfobekile lebebasondzela kuJesu. (Mat. 19:13, 14; Luk. 7:37, 38) Kungani? Cabanga ngemehluko lobewukhona emkhatsini waJesu nebaFarisi. Labaholi benkholo bebete lutsandvo futsi bebatigcabha. (Mat. 12:9-14) Jesu bekanelutsandvo futsi atfobekile. BaFarisi bebatsandza kwatiwa bantfu futsi bebatikhandza babalulekile. Jesu watsi bekungasiko kahle loko. Wafundzisa bafundzi bakhe kutsi batfobeke futsi basite labanye. (Mat. 23:2, 6-11) BaFarisi bebacindzetela bantfu kuze babente besabe loko lokutawenteka kubo nangabe bangabalaleli. (Joh. 9:13, 22) Jesu bekabaphumuta labanye ngekubentela tento telutsandvo nangekubakhulumisa ngemusa.
9 Kukhona yini lokufundzako kuJesu? Tibute: ‘Labanye bantfu bangitsatsa njengemuntfu lonemoya lophansi nalotfobekile yini? Ngiyayenta yini imisebenti lebukeleka phansi kuze ngisite labanye? Nginemusa yini kulabanye?’
10. Jesu bekabaphatsa njani bantfu lebekasebenta nabo?
10 Jesu bekabaphatsa kahle bantfu lebekasebenta nabo futsi bekajabula nakabasita. (Luk. 10:1, 19-21) Bekabakhutsata bafundzi bakhe kutsi babute imibuto futsi bekafuna kuyiva imibono yabo. (Mat. 16:13-16) Njengetitjalo letisengadzeni leniselwako, bafundzi bakhe bebatfutfuka. Bebakunaka loko Jesu bekakufundzisa futsi bebatsela titselo ngemisebenti yabo lemihle.
Bani ngumuntfu longenekako nalonebungani
Khutsala futsi utimisele
Tfobeka futsi utimisele nawusebenta *
11. Ngumiphi imibuto lokufanele sitibute yona?
11 Likhona yini ligunya lonalo? Nangabe kunjalo, tibute: ‘Ngibaphatsa njani bantfu emsebentini nobe ekhaya? Ngenta kutsi kube nekuthula yini? Ngiyabakhutsata yini labanye kutsi babute imibuto? Ngiyafuna yini kuva loko labakucabangako?’ Asifuni kufana nebaFarisi lebebatfukutsela nangabe bantfu bangakulaleli loko lebebakusho, futsi lebebabaphatsa kabi bantfu labanemibono leyehlukile kuneyabo.—Mak. 3:1-6; Joh. 9:29-34.
“NITAWUTFOLELA IMIPHEFUMULO YENU KUPHUMULA”
12-14. Kungani umsebenti Jesu lasiniketa wona usinika kuphumula?
12 Kungani sitfola kuphumula nasenta umsebenti Jesu lasiniketa wona? Sinetizatfu letinyenti, kodvwa sitawucoca nje ngaletimbalwa.
13 Sinebazalwane labaholako labakahle kakhulu. Jehova Lophakeme Kakhulu, akasiyo inkhosi lenelunya futsi lengabongi ngemsebenti wetinceku tayo. Uyajabula ngemsebenti lesiwentako. (Heb. 6:10) Usipha emandla ekwenta lomsebenti lasinika wona. (2 Khor. 4:7; Gal. 6:5) Jesu loyiNkhosi yetfu usibekela sibonelo sekutsi singabaphatsa njani labanye. (Joh. 13:15) Labadzala labaselusako bayetama kulingisa Jesu ‘longumelusi lomkhulu.’ (Heb. 13:20; 1 Phet. 5:2) Benta konkhe lokusemandleni abo kuze babe nemusa, basikhutsate futsi babe nesibindzi sekusifundzisa nekusivikela.
14 Sinebangani labakahle kakhulu. Kute umuntfu lonebangani labanelutsandvo kwendlula lesinabo kanye nemsebenti lobaluleke kwengca lowetfu. Cabanga nje: Sisebenta nebazalwane nabodzadze labanebuntfu lobuhle kodvwa labangacabangi kutsi bancono kunalabanye. Banemakhono lamanyenti, kodvwa abatigcabhi ngawo futsi batsatsa labanye njengalabakhulu kunabo. Abagcini nje ngekusitsatsa njengebantfu labasebenta nabo kodvwa basitsatsa njengebangani. Basitsandza kakhulu kangangekutsi batimisele kusifela!
15. Kufanele sitive njani ngemsebenti lesiwentako?
15 Sinemsebenti lobaluleke kakhulu. Sifundzisa bantfu liciniso ngaJehova futsi siwabeka ebaleni emanga aDeveli. (Joh. 8:44) Sathane ucindzetela bantfu ngemanga labenta baphelelwe litsemba. Sibonelo saloko kutsi ufuna kusenta sikholelwe kutsi Jehova angeke asicolele tono tetfu nekutsi akasitsandzi. Lamanga enta bantfu badvumateke futsi baphelelwe litsemba! ‘Nasiya’ kuKhristu, tono tetfu tiyatsetselelwa, futsi liciniso likutsi sonkhe Jehova usitsandza kakhulu. (Rom. 8:32, 38, 39) Kujabulisa kakhulu kubona bantfu bafundza kwetsembela kuJehova nekubabona batfutfuka ekuphileni!
CHUBEKANI NITFOLA KUPHUMULA NGEPHANSI KWELIJOKA LAJESU
16. Umtfwalo Jesu lasicela kutsi siwetfwale wehluke ngani kuleminye imitfwalo?
16 Umtfwalo Jesu lasicela kutsi siwetfwale wehlukile kuleminye imitfwalo. Nasi sibonelo: Bantfu labanyenti bavame kutsi nabashayisa emsebentini bative badziniwe futsi bangakajabuli. Ngalokwehlukile kitsi, ngemuva kwekwenta umsebenti Jehova naKhristu labasinikete wona, sitiva senetisekile. Ngaletinye tikhatsi sibuya sidziniwe emsebentini, futsi kudzingeke sitikhandle kuze siye emihlanganweni yelibandla. Kodvwa nasibuya emihlanganweni, sisuke sijabulile futsi sinemandla. Kwenteka lokufanako nanasishumayela nalapho sitifundzela liBhayibheli. Nasenta imetamo yekwenta loku, siyajabula futsi siba nemandla!
17. Yini lokufanele siyikhumbule, futsi yini lokufanele siyicaphele?
17 Kufanele sikhumbule kutsi ngamunye wetfu unemandla latsite langawasebentisa. Ngako kufanele sicabangisise kutsi sentani ngawo. Sibonelo saloko kutsi singacitsa emandla etfu setama kutfola umcebo. Naka naku lokwashiwo nguJesu kulenye indvodza lebeyinjingile leyambuta yatsi: “Yini lokufanele ngiyente kute ngitfole kuphila lokuphakadze?” Lendvodza beyiwugcina uMtsetfo, futsi kungenteka beyilungile ngobe Kulandzisa kwaMakho kutsi Jesu ‘wayitsandza.’ Jesu wayimema kutsi ite kuye. Watsi kuyo: “Hamba utsengise konkhe lonako, . . . bese uyeta uba ngumlandzeli wami.” Lendvodza yeva buhlungu ngobe beyifuna kulandzela Jesu kepha ayikhonanga kushiya ‘umcebo’ wayo. (Mak. 10:17-22) Ngenca yaloko, yala kwetfwala lijoka laJesu, futsi yachubeka nekusebentela ‘umcebo.’ (Mat. 6:24) Wena bewungenta njani?
18. Yini lokufanele sihle siyenta, futsi leni?
18 Ngaletinye tikhatsi, kubalulekile kutsi sicabange ngalesikubeka kucala ekuphileni kwetfu. Leni? Kuze siciniseke kutsi siwasebentisa kahle emandla etfu. Cabanga ngalokushiwo ngulelinye lijaha lokutsiwa nguMark, litsi: “Kwaphela iminyaka leminyenti ngicabanga kutsi ngiphila imphilo lemelula. Bengilihlahlandlela, kodvwa bengihlale ngicabanga ngekutsi ngingayakha njani imali nekutsi ngingenta njani kuze ngiphile kahle. Bengitibuta kutsi kwentiwa yini kutsi kuphila kwami kube matima. Ngase ngiyabona kutsi bengisebentisa sikhatsi sami nemandla ami lamanyenti ngenta tintfo letitawuzuzisa mine futsi Jehova bengimniketa lokusele.” Mark wayishintja indlela lebekacabanga ngayo nendlela lebekaphila ngayo kuze ente lokunyenti emsebentini waJehova. Utsi: “Ngaletinye tikhatsi ngikhatsateka ngemali kodvwa ngekusitwa nguJehova nangekusekelwa nguJesu, ngikhonile kuyincoba lenkinga.”
19. Kubaluleke ngani kuba nembono lokahle?
19 Sitawuchubeka sitfola kuphumula ngephansi kwelijoka laJesu nasenta nati tintfo letintsatfu. Kwekucala, kufanele sihlale sinembono lokahle. Senta umsebenti waJehova, ngako kufanele siwente ngendlela lafuna ngayo. Sitisebenti futsi Jehova uyiNkhosi yetfu. (Luk. 17:10) Nasetama kwenta lomsebenti wakhe ngendlela yetfu, kutawuba matima kwetfwala lelijoka. Ngisho nenkunzi lenemandla ingalimala futsi idzinwe nangabe ichubeka iya lapho ifuna kuya khona futsi ilwisana nelijoka lemelusi wayo. Kodvwa nasenta umsebenti waJehova ngendlela lafuna ngayo sitawukhona kwenta tintfo lebesingeke sikhone kutenta, futsi sitawuncoba tinkinga lebesingeke sikhone kutincoba. Kufanele sikhumbule kutsi kute longavimba intsandvo yaJehova kutsi yenteke!—Rom. 8:31; 1 Joh. 4:4.
20. Ngusiphi sisusa lokufanele sibe naso nasetfwala lijoka laJesu?
20 Kwesibili, kufanele sisebente sinetisusa letinhle. Umgomo wetfu kudvumisa Jehova, longuBabe wetfu lonelutsandvo. Ngemalanga aJesu, bantfu lebebanetisusa tebugovu futsi lebebatifunela bona tintfo, basheshe baphelelwa yinjabulo futsi balishiya lijoka laJesu. (Joh. 6:25-27, 51, 60, 66; Fil. 3:18, 19) Kodvwa labo lebebanetisusa letinhle futsi lebebamtsandza mbamba Nkulunkulu kanye nabomakhelwane, baletfwala bajabulile lelijoka kuphila kwabo konkhe lamhlabeni banelitsemba lekuyophila naKhristu ezulwini. Njengabo, natsi sitawujabula nangabe siletfwala sinetisusa letinhle lijoka laJesu.
21. Ngekusho kwembhalo waMatewu 6:31-33, yini lesilindzele Jehova kutsi ayente?
21 Kwesitsatfu, kufanele sibe nembono lokahle ngalesikulindzele. Sakhetsa imphilo yekutidzela nekusebenta kamatima. Jesu wasecwayisa kutsi sitawuphatfwa kabi. Kodvwa singalindzela kutsi Jehova utasipha emandla ekubeketelela nobe ngutiphi tinkinga. Nasichubeka sibeketela siba nemandla kakhulu. (Jak. 1:2-4) Kufanele silindzele kutsi Jehova utasipha tintfo lesitidzingako, kutsi Jesu utaselusa, nekutsi bazalwane nabodzadzewetfu batasikhutsata. (Fundza Matewu 6:31-33; Joh. 10:14; 1 Thes. 5:11) Sinako konkhe lesikudzingako kuze sikhone kubeketelela nobe nguyiphi inkinga!
22. Yini lokufanele sijabule ngayo?
22 Lomfati lowelashwa nguJesu watfola kuphumula ngalelilanga lamelapha ngalo. Kodvwa utawutfola kuphumula kwaphakadze nangabe achubeka angumlandzeli waKhristu lowetsembekile. Ucabanga kutsi wenta njani? Cabanga ngemvuzo latawutfola nangabe akhetsa kwetfwala lijoka laJesu, utawusebenta naJesu ezulwini! Ngeke atisole ngetintfo latishiya kuze alandzele Khristu. Ngisho nobe sinelitsemba lekuphila ezulwini nobe lekuphila emhlabeni phakadze, siyajabula ngekutsi sasemukela simemo saJesu lesitsi: “Kotani kimi!”
INGOMA 13 Khristu Usibonelo Setfu
^ sig. 5 Jesu usimema kutsi site kuye. Kufanele senteni kuze semukele lesimemo sakhe? Lesihloko sitawuphendvula lombuto futsi sitasikhumbuta kutsi singakutfola njani kuphumula nasisebenta naKhristu.