SIHLOKO LESIFUNDVWAKO 37
Titfobeni Ngekutitsandzela KuJehova—Kanjani futsi Leni?
“Akukafaneli yini sititfobe kakhulu kuBabe?”—HEB. 12:9.
INGOMA 9 Jehova UyiNkhosi Yetfu!
LOKUTAWUCOCWA NGAKO KULESIHLOKO *
1. Kungani kufanele sititfobe kuJehova?
KUFANELE sititfobe * kuJehova ngobe unguMdali wetfu. Ngenca yaloko, unelilungelo lekusitjela loko lokufanele sikwente. (Semb. 4:11) Kodvwa lesinye sizatfu lesisiphocelela kutsi simlalele kutsi indlela yakhe yekubusa ikahle kakhulu. Emlandvweni, banyenti bantfu lababuse labanye bantfu futsi nabacatsaniswa naJehova, siyabona kutsi Jehova unguMbusi lohlakaniphile, lonelutsandvo, lonemusa futsi lonesihawu kunabo bonkhe.—Eks. 34:6; Rom. 16:27; 1 Joh. 4:8.
2. Umbhalo waHebheru 12:9-11 usiniketa tiphi tizatfu tekutsi sititfobe kuJehova?
2 Jehova ufuna kutsi simlalele, hhayi ngobe simesaba kodvwa ngobe simtsandza futsi simtsatsa njengaBabe wetfu lonelutsandvo. Encwadzini layibhalela emaHebheru, Pawula wachaza kutsi kufanele “sititfobe kakhulu kuBabe” ngobe uyasiyala “kuze kusitakale tsine.”—Fundza Hebheru 12:9-11.
3. (a) Sikhombisa njani kutsi siyatitfoba kuJehova? (b) Ngumiphi imibuto lesitayiphendvula?
3 Sititfoba kuJehova ngekutsi sente konkhe lokusemandleni etfu kuze simlalele kuto tonkhe tintfo, nangekutsi silwisane nesifiso sekufuna kutikhetsela kutsi yini lekahle nalekabi. (Taga 3:5) Kuba melula ngatsi kutsi sititfobe kuJehova nasifundza ngebuntfu bakhe lobuhle. Leni? Ngobe lobuntfu bakhe bubonakala kuto tonkhe tintfo latentako. (Hla. 145:9) Nasichubeka sifundza ngaJehova, lutsandvo lwetfu ngaye luyakhula. Nangabe simtsandza Jehova, asidzingi luhla lwemitsetfo leminyenti lolusitjela loko lokufanele sikwente nalokungakafaneli sikwente. Siyetama kucabanga ngendlela Jehova lafuna sicabange ngayo nekutiva ngendlela lafuna sitive ngayo futsi sigweme lokubi. (Hla. 97:10) Kodvwa ngaletinye tikhatsi kungaba matima kulalela Jehova. Kungani? Labadzala belibandla, bobabe kanye nabomake bangafundzani esibonelweni seMbusi Nehemiya; seNkhosi Davide kanye nesaMariya make waJesu? Lesihloko sitayiphendvula lemibuto.
KUNGANI KUNGABA MATIMA KUTITFOBA KUJEHOVA?
4-5. Ngekusho kwembhalo waRoma 7:21-23, kungani kungaba matima kutitfoba kuJehova?
4 Lesinye sizatfu lesingenta kube matima kutitfoba kuJehova kutsi sonkhe sinesono. Ngaletinye tikhatsi sihle singafuni kumlalela Nkulunkulu. Ngemuva kwekutsi bo-Adamu na-Eva sebavukele Nkulunkulu futsi badla sitselo lokwatsiwa bangasidli, babese batikhetsela bona lokuhle nalokubi. (Gen. 3:22) Nalamuhla, bantfu labanyenti bakhetsa kungamlaleli Jehova futsi batikhetsela bona kutsi yini lekahle nalekabi.
5 Ngisho nalabo labamatiko Jehova futsi labamtsandzako, bangakutfola kumatima kutitfoba ngalokuphelele kuye. Umphostoli Pawula wake wahlangabetana nalenkinga. (Fundza Roma 7:21-23.) NjengaPawula, natsi sifuna kwenta lokuhle kuJehova. Kodvwa kufanele sichubeke silwisana nesifiso sekwenta tintfo letimbi.
6-7. Ngusiphi lesinye sizatfu lesingenta kube matima kutsi sititfobe kuJehova? Shano sibonelo.
6 Lesinye sizatfu lesingenta kube matima kutsi sititfobe kuJehova kungaba ngemasiko ebantfu basendzaweni lesikhulele kuyo kanye nendlela yabo yekucabanga. Bantfu labanyenti basitjela tintfo letehlukile kuloko Jehova lakufunako. Ngako kufanele sichubeke setama kamatima kutsi singacabangi njengabo. Cabanga nganasi sibonelo.
7 Kuyintfo levamile etindzaweni letinyenti kutsi labasha baphocelelwe kutsi bakhe imali lenyenti. Dzadze lokutsiwa nguMary * wake wahlangabetana nalenkinga. Ngaphambi kwekutsi afundze ngaJehova, bekafundza esikolweni lesihamba embili kuletikhona eveni lakhe. Mary bekacindzetelwa ngumndeni wakubo kutsi atfole umsebenti loholela kakhulu futsi atfole nesikhundla lesitamenta ahlonishwe bantfu. Nguloko naye bekakufuna. Nobe kunjalo, nasekafundzile ngaJehova futsi wamtsandza, wabese uyayishintja imigomo yakhe. Kodvwa bekungasimelula, uze utsi: “Ngaletinye tikhatsi ngiyawatfola ematfuba ekwenta imali lenyenti, kodvwa angaluphatamisa luhlelo lwami lwekukhonta Nkulunkulu. Ngenca yendlela lengakhuliswa ngayo, kuba lukhuni kuwayekela. Kufanele bese ngicela Jehova kutsi angisite ngilwisane nalesilingo sekufuna kwemukela umsebenti longangivimbela kutsi ngente lokunyenti emsebentini wakhe.”—Mat. 6:24.
8. Yini lesitawucoca ngayo nyalo?
8 Siyazuza nangabe sititfoba kuJehova. Kodvwa nangabe labo labanemagunya latsite, njengalabadzala belibandla, bobabe nabomake, batitfoba kuNkulunkulu, bangabasita labanye bantfu. Nyalo sitawucoca ngetibonelo letiseBhayibhelini letisifundzisa kutsi singawasebentisa njani emagunya lesinawo ngendlela lejabulisa Jehova.
EMADVODZA LAMADZALA ANGAFUNDZANI KUNEHEMIYA?
Labadzala belibandla bayasita emsebentini lowentiwa eHholweni leMbuso, njengobe naNehemiya asita nakwakhiwa kabusha iJerusalema (Buka tigaba 9-11) *
9. Ngutiphi tinkinga Nehemiya lahlangabetana nato?
9 Jehova unikete labadzala belibandla umsebenti lobalulekile wekunakekela bantfu bakhe. (1 Phet. 5:2) Labadzala bangafundza lokunyenti nabahlolisisa indlela Nehemiya labaphatsa ngayo bantfu baJehova. Njengobe bekangumbusi wakaJuda, Nehemiya bekasegunyeni lelisetulu. (Neh. 1:11; 2:7, 8; 5:14) Asewucabange ngaletinye tinkinga Nehemiya lahlangabetana nato. Wakhandza kutsi emaJuda bekasebentisa lithempeli ngendlela lebeyikhombisa kungakuhloniphi kukhonta Jehova futsi bekangawasekeli ngetimali emaLevi kantsi uMtsetfo bewutsi akawasekele. EmaJuda bekangawuhloniphi umtsetfo waJehova ngeliSabatha, futsi lamanye emadvodza langemaJuda bekashade nebafati betive lebetingamkhonti Jehova. UMbusi Nehemiya bekufanele ente lokutsite ngalesimo.—Neh. 13:4-30.
10. Yini Nehemiya layenta kuletinkinga lebekabhekene nato?
10 Nehemiya akazange alisebentise kabi ligunya lakhe ngekutsi aphocelele bantfu baNkulunkulu kutsi balandzele imibono yakhe. Esikhundleni saloko, wathantaza ngalokujulile kuJehova wacela kusitwa nguye, futsi wafundzisa labantfu uMtsetfo waJehova. (Neh. 1:4-10; 13:1-3) Ngekutitfoba, Nehemiya wasebenta nalabantfu, wabasita ngisho nalapho kwakhiwa kabusha tindvonga taseJerusalema.—Neh. 4:15.
11. Ngekusho kwa-1 Thesalonika 2:7, 8, labadzala kufanele bawaphatse njani emalunga elibandla?
11 Kungenteka labadzala bangabhekani netinkinga letifana netaNehemiya, kodvwa bangamlingisa ngetindlela letinyenti. Nasi sibonelo, basebenta kamatima kuze basite bazalwane babo nabodzadzewabo. Abavumeli nekutsi emalungelo labanawo abente bative babakhulu. Esikhundleni saloko, baliphatsa kahle libandla. (Fundza 1 Thesalonika 2:7, 8.) Ngenca yekutsi batfobekile futsi babatsandza mbamba labanye, bakhuluma nabo ngemusa. Andrew, losekaneminyaka leminyenti angulomdzala utsi: “Ngibonile kutsi bazalwane nabodzadze bavame kumlalela lomdzala welibandla lonemusa futsi lonebungani. Lobuntfu lobu buyalikhutsata libandla kutsi lisebentisane nalabadzala.” Tony losekanesikhatsi lesidze angulomdzala utsi: “Ngiyetama kusisebentisa seluleko lesikuFiliphi 2:3 futsi ngiyetama kutsatsa labanye njengalabakhulu kunami. Loku kuyangisita kuze ngingetami kuphocelela labanye kutsi bangilalele.”
12. Kungani kubalulekile kutsi labadzala batfobeke?
12 Labadzala kufanele batfobeke njengobe naJehova atfobekile. Ngisho nobe Jehova anguMbusi Lophakeme Kakhulu, ‘uyatehlisa kuze aphakamise luphuya elutfulini.’ (Hla. 18:35; 113:6, 7) Liciniso likutsi Jehova uyabenyanya labo labatigcabhako futsi labangakatfobeki.—Taga 16:5.
13. Kungani lomdzala welibandla kufanele ‘alawule lulwimi lwakhe’?
13 Lomdzala welibandla lotitfobako kuJehova kufanele ‘alawule lulwimi lwakhe.’ Nangabe angakwenti loko, angatitfola sekamkhulumisa kabi umuntfu longamhloniphi. (Jak. 1:26; Gal. 5:14, 15) Andrew lesike sakhuluma ngaye, utsi: “Ngihle ngifuna kumphendvula kabi umzalwane nobe dzadze lengibona ngatsi akangihloniphi. Kodvwa kuzindla ngetibonelo tebantfu labetsembekile lokukhulunywa ngabo eBhayibhelini kungisite ngabona kubaluleka kwekutfobeka nekuba nemusa.” Lomdzala welibandla ukhombisa kutsi utfobela Jehova ngekutsi abakhulumise ngemusa nangelutsandvo bazalwane nabodzadze kanye nalabanye labadzala belibandla.—Khol. 4:6.
LOKO BOBABE LABANGAKUFUNDZA ENKHOSINI DAVIDE
14. Ngumuphi umsebenti Jehova lawunikete bobabe, futsi yini layilindzele kubo?
14 Jehova unikete bobabe umsebenti wekuhola imindeni, futsi ulindzele kutsi baceceshe bantfwana babo futsi babayale. (1 Khor. 11:3; Ef. 6:4) Kodvwa loko akusho kutsi kufanele basebentise ligunya labo sinome kanjani. NguJehova uMsunguli wemindeni, ngako bobabe batawulandzisa kuye ngendlela labaphatsa ngayo imindeni yabo. (Ef. 3:14, 15) Bobabe bakhombisa kutsi batfobekile kuJehova nabasebentisa ligunya labo ngendlela lejabulisa Nkulunkulu. Bangafundza lokunyenti nabadadisha ngekuphila kweNkhosi Davide.
Indlela babe lathantaza ngayo kufanele iwukhombise umndeni wakhe kutsi utfobekile (Buka tigaba 15-16) *
15. Kungani iNkhosi Davide isibonelo lesihle lesingalingiswa bobabe?
15 Jehova waniketa Davide umsebenti wekuhola umndeni wakhe kanye naso sonkhe sive saka-Israyeli. Njengobe bekayinkhosi, Davide bekaneligunya leliphakeme kakhulu. Ngalesinye sikhatsi walisebentisa kabi ligunya lakhe futsi wenta emaphutsa lamakhulu. (2 Sam. 11:14, 15) Kodvwa wakhombisa kutsi utfobekile kuJehova ngekutsi emukele siyalo. Watfulula inhlitiyo yakhe kuJehova ngemthantazo. Wenta konkhe lokusemandleni akhe kuze emukele seluleko saJehova. (Hla. 51:1-4) Ngetulu kwaloko, bekatfobeke kakhulu kangangekutsi bekangagcini nje ngekwemukela seluleko lebekasinikwa ngemadvodza kodvwa bekasemukela nalebakasinikwa bafati. (1 Sam. 19:11, 12; 25:32, 33) Davide wafundza emaphutseni akhe, futsi kukhonta Jehova wakwenta kwaba yintfo lebaluleke kakhulu ekuphileni kwakhe.
16. Ngutiphi tifundvo bobabe labangatifundza kuDavide?
16 Nati tifundvo bobabe labangatifundza eNkhosini Davide: Ningalisebentisi kabi ligunya lenilinikwe nguJehova. Wavumeni emaphutsa enu, futsi semukeleni seluleko lesivela eBhayibhelini lenisinikwa ngulabanye. Nanenta njalo, imindeni yenu itanihlonipha ngenca yekutfobeka kwenu. Nanithantaza nemindeni yenu, tfululani tinhlitiyo tenu kuJehova, futsi imindeni yenu itawubona kutsi netsembele kakhulu kuye. Ngetulu kwako konkhe, imisebenti leniyentela Jehova yenteni ibe yintfo lebaluleke kakhulu ekuphileni kwenu. (Dut. 6:6-9) Sibonelo lesihle lenisibekela imindeni yenu singaba sipho lesiligugu leningayipha sona.
LOKO BOMAKE LABANGAKUFUNDZA KUMARIYA
17. Ngumuphi umsebenti Jehova lawunikete bomake?
17 Jehova unikete bomake umsebenti lobalulekile emndenini, futsi ubanikete neligunya kubantfwana babo. (Taga 6:20) Loko make lakwentako nalakushoko kungabatsintsa bantfwana bakhe kuphila kwabo konkhe. (Taga 22:6) Naka loko bomake labangakufundza kuMariya, longumake waJesu.
18-19. Yini bomake labangayifundza esibonelweni saMariya?
18 Mariya bekayati kahle imiBhalo. Bekamhlonipha ngalokujulile Jehova futsi besekangumngani wakhe lomkhulu. Bekatimisele kwenta nobe ngabe yini Jehova lebekayifuna, ngisho nobe bekutawudzingeka kutsi kushintje tintfo letinyenti ekuphileni kwakhe.—Luk. 1:35-38, 46-55.
Nangabe make akhatsele futsi acansukile, kufanele ente konkhe lokusemandleni akhe kuze awukhombise lutsandvo umndeni wakhe (Buka sigaba 19) *
19 Nine bomake, ningamlingisa ngetindlela letinyenti Mariya. Kanjani? Kwekucala, kufanele nihlale nicinisa bungani benu naJehova ngekutsi nidadishe liBhayibheli niphindze nithantaze kuye. Kwesibili, kufanele nitimisele kwenta lushintjo ekuphileni kwenu kuze nijabulise Jehova. Nasi sibonelo, kungenteka nakhuliswa batali lebebasheshe batfukutsele futsi lebebabakhulumisa kabi bantfwana babo. Mhlawumbe nikhule nicabanga kutsi lena yindlela lekahle yekukhulisa bantfwana. Ngisho nobe senifundzile ngetimiso taJehova, kungenteka nisakutfola kumatima kuba nekuthula kanye nekubeketelela bantfwana benu, ikakhulukati nabanganilaleli nibe nikhatsele. (Ef. 4:31) Nanitiva ngaleyo ndlela, kubalulekile kutsi nicele lusito lwaJehova ngemthantazo. Make lokutsiwa nguLydia utsi: “Ngaletinye tikhatsi, bekudzingeka kutsi ngithantaze ngalokujulile kuze ngingakhulumi kabi nangabe indvodzana yami ingangilaleli. Bengivame kuyekela kukhuluma nasengicalile, futsi bengibese ngiyathantaza ngicele lusito kuJehova. Umthantazo ungenta ngibe nekuthula.”—Hla. 37:5.
20. Nguyiphi inkinga labanye bomake labahlangabetana nayo, futsi bangayincoba njani?
20 Bomake bahlangabetana nalenye inkinga—inkinga yekukhombisa bantfwana babo kutsi bayabatsandza. (Thit. 2:3, 4) Bomake labanyenti bakhule emakhaya lapho batali babo bebete buhlobo lobukahle nebantfwana babo. Nangabe wakhuliswa ngaleyo ndlela, akukafaneli wente liphutsa lelifanako nalelo lelentiwa batali bakho. Make lotitfobako futsi ente intsandvo yaJehova kufanele afundze indlela yekukhombisa bantfwana bakhe lutsandvo. Kungaba matima ngaye kutsi ashintje indlela lacabanga ngayo, lativa ngayo nalenta ngayo tintfo. Kodvwa loko kungenteka, futsi lolushintjo lutawusita yena kanye nemndeni wakhe.
CHUBEKANI NITITFOBA KUJEHOVA
21-22. Ngekusho kwembhalo wa-Isaya 65:13, 14, ngutiphi tinzuzo lesititfolako nasititfoba kuJehova?
21 INkhosi Davide beyati kutsi kuzuzisa ngani kutitfoba kuJehova. Yabhala yatsi: “Imitsetfo yaSimakadze icondzile, ingumtfombo wekujabula wenhlitiyo. Umyalo waSimakadze umsulwa, uvula emehlo engcondvo. Impela, inceku yakho iyalwa ngato, lowo lotigcinako unemvuzo lomkhulu.” (Hla. 19:8, 11) Lamuhla, siyawubona umehluko emkhatsini walabo labatitfobako kuJehova nalabo labangafuni kulalela seluleko sakhe selutsandvo. Labo labatitfobako kuJehova ‘bayawuhlabela ngenca yekujabula lokuphuma etinhlitiyweni tabo.’—Fundza Isaya 65:13, 14.
22 Nangabe labadzala belibandla, bobabe kanye nabomake batitfoba kuJehova, kuphila kwabo kuyatfutfuka, imindeni yabo iyajabula futsi nelibandla liba nebunye. Lokubaluleke kakhulu kutsi bajabulisa Jehova. (Taga 27:11) Leyo yinjabulo lesingeke siyacatsanise nalutfo!
INGOMA 123 “Ukuzithoba Ngobuqotho”
^ sig. 5 Kulesihloko sitawucoca ngekutsi kungani kufanele sititfobe kuJehova. Sitawucoca nangekutsi labadzala belibandla, bobabe kanye nabomake bangalisebentisa njani ligunya Jehova labanikete lona, nangaloko labangakufundza esibonelweni seMbusi Nehemiya; seNkhosi Davide kanye nakuMariya make waJesu.
^ sig. 1 TINCHAZELO TEMAGAMA: Ligama lelitsi kutitfoba linenchazelo lekabi kulabo labaphoceleleke kutsi balalele lotsite. Nobe kunjalo, bantfu baNkulunkulu bakhetsa kumlalela, ngako leligama lekutitfoba abalicondzi ngendlela lekabi.
^ sig. 7 Lamanye emabito kulesihloko ashintjiwe.
^ sig. 62 KUCHAZWA KWETITFOMBE: Lomdzala welibandla usebenta nendvodzana yakhe kuze banakekele liHholwa leMbuso, njengobe nje naNehemiya asita nakwakhiwa kabusha tindvonga taseJerusalema.
^ sig. 64 KUCHAZWA KWETITFOMBE: Babe uthantaza ngalokujulile nemndeni wakhe.
^ sig. 66 KUCHAZWA KWETITFOMBE: Umfana lomncane ucitsa ema-awa lamanyenti adlala imidlalo yema-video futsi akakacedzi kwenta imisebenti yasekhaya neyesikolwa. Make wakhe ubuya emsebentini futsi ukhatsele, umyala ngemusa futsi ukhuluma naye kahle.