1-2. (a) Ngekusho kweTaga 16:31, kufanele sibatsatse njani lasebakhulile futsi labetsembekile? (b) Ngumiphi imibuto lesitayiphendvula kulesihloko?

KULENYE i-park lese-Arkansas, eMelika, kungenteka kutsi nawuhamba kuyo utfole emadayimane. Nobe kunjalo, lamadayimane asuke agcwele umhlabatsi futsi angakalungiswa kahle. Ngenca yaloko labanyenti ababoni kutsi ngemadayimane futsi bayawengca.

² Njengalamadayimane, bazalwane betfu nabodzadze lasebakhulile baligugu. LiVi laNkulunkulu lifananisa timvu tabo enhloko nemchele. (Fundza Taga 16:31; 20:29) Kodvwa kungaba melula kutsi singanaki kutsi baligugu. Labasebasha lababonako kutsi lasebakhulile baligugu bangatfola lokubaluleke kakhulu kwendlula umcebo. Kulesihloko, sitawuphendvula nayi imibuto lemitsatfu: Kungani Jehova abatsatsa njengalabaligugu lasebakhulile futsi labetsembekile? Kungani lasebakhulile babalulekile enhlanganweni yaJehova? Yini lesingayenta kuze sifundze esibonelweni sabo?

3. Ngekuvumelana neTihlabelelo 92:12-15, yini leyenta lasebakhulile babe ligugu kuJehova?

³ Lasebakhulile futsi labetsembekile baligugu kuJehova Nkulunkulu. Uyati kutsi babantfu labanjani futsi uyabutsandza buntfu babo lobuhle. Uyajabula nabendlulisela kuhlakanipha labakutfolile kuleminyaka leminyenti bamkhonta ngekwetsembeka. (Jobe 12:12; Taga 1:1-4) Jehova ukutsatsa njengalokuligugu nekucinisela kwabo. (Mal. 3:16) Babe nato tinkinga ekuphileni, kodvwa bachubekile banekukholwa lokucinile kuJehova.  Litsemba labo ngelikusasa licine kakhulu kunangesikhatsi bacala kufundza liciniso. Jehova uyabatsandza ngobe bayachubeka bamemetela ngeligama lakhe “ngisho nobe sebakhulile.”—Fundza Tihlabelelo 92:12-15.

4. Yini lengakhutsata bazalwane nabodzadze lasebakhulile?

⁴ Nangabe sewukhulile ngeminyaka, ciniseka kutsi Jehova uyawukhumbula umsebenti lowentile esikhatsini lesendlulile. (Heb. 6:10) Uwente ngekutimisela umsebenti wekushumayela futsi loko kumjabulisa kakhulu Babe wetfu losezulwini. Ucinisele nawubhekene netinkinga ngisho naleto letikuvise buhlungu kakhulu, utilalele timiso letilungile letiseBhayibhelini futsi wente imisebenti lebalulekile enhlanganweni yaJehova waphindze wacecesha labanye. Wente konkhe lokusemandleni akho kuze uhambisane nenhlangano yaJehova lehamba ngesivinini lesisetulu. Ubasekele labo labasemsebentini wasikhatsi sonkhe waphindze wabakhutsata. Jehova Nkulunkulu ukutsandza kakhulu ngobe wetsembekile. Wetsembisa kutsi “angeke abalahle labetsembekile kuye”! (Hla. 37:28) Uyakucinisekisa utsi: “Utawuze ube netimvu enhloko solo ngikwetfwele.” (Isa. 46:4) Ngako ungacabangi kutsi njengobe sewukhulile ngeminyaka awusasiligugu enhlanganweni yaJehova. Ubaluleke kakhulu!

5. Yini lasebakhulile lokufanele bahlale bayikhumbula?

⁵ Kunyenti lokungentiwa ngulasebakhulile enhlanganweni yaJehova. Nanobe kungenteka kutsi sebete emandla lebebanawo, kodvwa banelwati lolunyenti labalutfole kuleminyaka leyendlulile. Jehova usengachubeka abasebentisa ngetindlela letehlukahlukene njengobe sitawubona kuletibonelo takadzeni netasesikhatsini salamuhla.

6-7. Niketa tibonelo letiseBhayibhelini talabo labakhulile lababusiswa ngenca yekwetsembeka kwabo.

⁶ Singatfola tibonelo letinhle eBhayibhelini talabo labachubeka benta umsebenti waJehova ngekwetsembeka ngisho sebakhulile ngeminyaka. Nasi sibonelo, Mosi bekaneminyaka lecishe ibe ngu-80 ngesikhatsi acala kuba ngumphrofethi waJehova futsi aba ngumholi wesive saka-Israyeli. Ngesikhatsi  Danyela aneminyaka lengaba ngu-90, Jehova wachubeka amsebentisa njengemphrofethi wakhe. Kungenteka nemphostoli Johane bekaneminyaka lengaba ngu-90 ngesikhatsi aphefumlelwa kutsi abhale incwadzi yeSembulo.

⁷ Labanyenti labetsembekile bebangakadvumi futsi kungenteka bantfu bebangabanaki. Nobe kunjalo, Jehova wabanaka futsi wababusisa ngenca yekwetsembeka kwabo. Nasi sibonelo, Simeyoni lobekayindvodza “lebeyilungile futsi yesaba Nkulunkulu” kukhulunywa ngaye kancane eBhayibhelini kodvwa Jehova bekati kutsi ungubani, wamnika nelilungelo lekubona Jesu aseluswane nelekuphrofetha ngalomntfwana namake wakhe. (Luk. 2:22, 25-35) Cabanga nanga-Ana lobekangumfelokati longumphrofethikati. Bekaneminyaka lengu-84 kodvwa “bekaba khona njalo ethempelini.” Jehova wambusisa ngobe bekabakhona njalo ethempelini futsi wamvumela naye kutsi abone Jesu aseluswane. BoSimeyoni na-Ana bebaligugu kuJehova.—Luk. 2:36-38.

8-9. Yini leyentiwa ngulomunye dzadze enhlanganweni yaJehova ngesikhatsi angumfelokati?

⁸ Etikhatsini talamuhla, banyenti labakhulile futsi labetsembekile labatibonelo letinhle kulabasebasha. Cabanga ngaloko lokwenteka kuDzadze Lois Didur. Bekaneminyaka lengu-21 ngesikhatsi acala kuba lihlahlandlela lelikhetsekile eCanada. Ngemuva kwaloko, yena naJohn umyeni wakhe bacitsa iminyaka leminyenti basemsebentini wekujikeleta. Ngemuva kwaloko, basebenta eBethel yaseCanada iminyaka lengetulu kwalengu-20. Ngesikhatsi Lois aneminyaka lengu-58, yena naJohn bacelwa kutsi bayokhonta e-Ukraine. Bebatawenta njani? Bebatawucabanga kutsi sebakhule kakhulu yini kutsi bangakhonta kulelinye live? Basemukela lesabelo futsi John wacelwa kutsi abe lilunga leKomidi Yeligatja. Ngemuva kweminyaka lengu-7 John washona, futsi Lois wancuma kuchubeka akulesabelo. Nyalo Lois uneminyaka lengu-81, uyachubeka akhonta Jehova ngekwetsembeka akanye nemndeni waseBethel e-Ukraine futsi bonkhe bamtsandza kakhulu.

⁹ Bafelokati labanjengaLois kungenteka banganakwa ngendlela lebebanakwa ngayo ngesikhatsi emadvodza abo asaphila, kodvwa solo baligugu. Bodzadze lesekuphele iminyaka basekela emadvodza abo futsi nyalo labachubeka bakhonta Jehova ngekwetsembeka baligugu kakhulu kuye. (1 Thim. 5:3) Ngetulu kwaloko, bayabakhutsata nalabasebasha.

10. Ngusiphi sibonelo lesihle kakhulu lesabekwa nguTony?

¹⁰ Linyenti lalasebakhulile futsi labetsembekile labahlala lapho kunakekelwa khona lasebakhulile nabo baligugu. Nasi sibonelo, lomunye umzalwane lokutsiwa nguTony uhlala lakunakekelwa khona lasebakhulile. Wabhajatiswa ePennsylvania, eMelika, nga-August 1942 aneminyaka lengu-20. Ngekushesha nje ngemuva  kwaloko waphocelelwa kutsi abelisotja futsi ngenca yekutsi wala, wavalelwa ejele iminyaka lemibili nehhafu. Yena nemkakhe Hilda bafundzisa bantfwana babo lababili liciniso. Kuyo yonkhe leminyaka, ube semabandleni lamatsatfu lapho khona bekangumbonisi lowengamele (nyalo losekabitwa ngekutsi ngumchumanisi wesigungu salabadzala) futsi waba ngumbonisi wemhlangano wesigodzi. Bekavakashela emajele futsi achuba imihlangano aphindze adadishe nebantfu liBhayibheli. Ngisho nobe Tony sekaneminyaka lengu-98, akatimiseli kuyekela kwenta umsebenti waJehova. Uyachubeka enta konkhe langakwenta kuze akhonte Jehova akanye nebazalwane nabodzadze ebandleni lakulo!

11. Singakhombisa njani kutsi baligugu kitsi labo labahlala etindzaweni letinakekela lasebakhulile?

¹¹ Singakhombisa njani kutsi babalulekile lasebakhulile labahlala lapho banakekelwa khona? Nakungenteka, labadzala bangabasita ngekutsi babekhona emihlanganweni nobe bayilalele futsi bashumayele. Singakhombisa kutsi siyabanaka ngekutsi sibavakashele nobe sibashayele lucingo. Sifuna kubanaka kakhulu lasebakhulile labanakekelwa etindzaweni letikhashane kakhulu nelibandla labakulo. Nasingakanaki, singahle sibakhohlwe laba lasebakhulile. Labanye babo kungenteka bakutfole kumatima nobe bacabange kutsi akusikahle kukhuluma ngalokwenteke kubo. Kodvwa sitawuzuza kakhulu nasitinika sikhatsi sekucoca nabo futsi sibalalele nabasitjela ngenjabulo labayitfolile ngekuba senhlanganweni yaJehova.

12. Singatfola bazalwane nabodzadze labanjani emabandleni etfu?

¹² Singamangala kutfola kutsi sinato tibonelo letinhle talasebakhulile futsi labetsembekile emabandleni etfu. Lomunye dzadze lokutsiwa nguHarriette wakhonta Jehova ngekwetsembeka iminyaka leminyenti ebandleni lakhe leliseNew Jersey, eMelika. Wabese uyatfutsa wayohlala nendvodzakati yakhe. Bazalwane bakulelibandla lelisha batinika sikhatsi sekumati kancono futsi babona kutsi uligugu kakhulu. Wabakhutsata ngekubacocela ngaloko lebekwenteka emsebentini wekushumayela ngesikhatsi asandza kufundza liciniso ngabo-1920. Ngaleto tikhatsi, bekahlale ahamba nesicubho sakhe nakayoshumayela kuze angabi nenkinga nakwenteka bambopha. Ecinisweni, nga-1933 wavalelwa liviki ejele emahlandla lamabili. Indvodza yakhe lebeyingasuye Fakazi beyimsekela. Beyinakekela bantfwana babo labancane labatsatfu ngesikhatsi asejele. Lasebakhulile futsi labetsembekile njengaHarriette kubafanela mbamba kuhlonishwa!

13. Sifundze kutsi babaluleke ngani lasebakhulile enhlanganweni yaJehova?

¹³ Bazalwane betfu nabodzadze lasebakhulile babaluleke kakhulu kuJehova nasenhlanganweni yakhe. Bayibonile indlela Jehova labusise ngayo inhlangano yakhe ngetindlela letinyenti, nalababusise ngayo. Bafundze tifundvo letinyenti emaphutseni abo. Batsatse njengemtfombo wekuhlakanipha, futsi ufundze kubo. (Taga 18:4) Nawutinika sikhatsi sekubati, kukholwa kwakho kutawucina futsi utawufundza lokunyenti kubo!

14. Dutheronomi 32:7 ukhutsata labasebasha kutsi benteni?

¹⁴ Akube nguwe lotsatsa sinyatselo kucala sekucoca nalasebakhulile. (Fundza Dutheronomi 32:7.) Kungenteka abasaboni kahle emehlweni, sebahamba kancane futsi sebakhulumela phasi kodvwa solo bayafuna kwentela Jehova lokunyenti futsi batakhele “ligama lelihle” naye. (Shu. 7:1) Khumbula kutsi kungani baligugu kuJehova. Chubeka  ubahlonipha. Lingisa Elisha. Wetama ngato tonkhe tindlela kuze abe na-Elija ngelilanga labo lekugcina bandzawonye. Elisha washo tikhatsi letintsatfu watsi: “Angeke ngikushiye.”—2 Khos. 2:2, 4, 6.

15. Ngumiphi imibuto lesingayibuta lasebakhulile?

¹⁵ Khombisa kutsi unendzaba mbamba nalasebakhulile ngekutsi ubabute imibuto ngemusa. (Taga 1:5; 20:5; 1 Thim. 5:1, 2) Babute imibuto lenjenganayi: “Ngesikhatsi usemncane, yini leyakwenta waciniseka kutsi sewulitfolile liciniso?” “Tintfo letenteke kuwe tikusite njani kutsi usondzelane naJehova?” “Yini lekusitile kutsi uhlale ujabulile ekukhonteni Jehova?” (1 Thim. 6:6-8) Ngemuva kwaloko, balalele njengobe bakucocela.

16. Losakhulile nalosemusha bangazuza njani nangabe bacoca?

¹⁶ Nangabe losakhulile nalosemusha bacoca, bobabili bayakhutsatana. (Rom. 1:12) Nine labasha, nitawuciniseka kakhulu kutsi Jehova uyabanakekela bantfu bakhe futsi lona losakhulile utawutiva atsandvwa. Utakujabulela kukucocela ngendlela Jehova lambusise ngayo.

17. Kungani singatsi lasebakhulile futsi labetsembekile baba bahle kakhulu njengobe iminyaka ihamba?

¹⁷ Ngalokuvamile buhle buyaphela njengobe iminyaka ihamba, kodvwa labo labetsembekile kuJehova baba bahle kakhulu umnyaka ngemnyaka. (1 Thes. 1:2, 3) Kungani kunjalo? Kungobe njengobe iminyaka ihamba, bavumele umoya waNkulunkulu kutsi ubaceceshe futsi ubasite babe nebuntfu lobuhle. Njengobe sichubeka sibati bazalwane betfu nabodzadze lasebakhulile sibahlonipha futsi sifundza kubo, sitawubatsatsa njengalabaligugu kakhulu!

18. Sitawucoca ngani esihlokweni lesilandzelako?

¹⁸ Libandla aligcini nje ngekucina nangabe labasebasha babatsatsa njengalabaligugu lasebakhulile, kodvwa liyacina nalapho lasebakhulile babatsatsa njengalababalulekile labasebasha. Esihlokweni lesilandzelako, sitawucoca ngekutsi lasebakhulile bangakhombisa njani kutsi babatsatsa njengalababalulekile labasebasha ebandleni.