1. Labanye bativa njani nangabe lilunga lemndeni liyekeliswa kuba nguFakazi?

UKHONA yini umuntfu lomtsandzako loyekelisiwe kuba nguFakazi? Loko kungakuvisa buhlungu kakhulu! Lomunye dzadze lokutsiwa nguHilda, utsi: “Ngesikhatsi umyeni wami ashona ngemuva kweminyaka lengu-41 sishadile, bengicabanga kutsi kute lobunye buhlungu lengiyoke ngibuve lobendlula lobu. * Kodvwa ngesikhatsi indvodzana yami ishiya Jehova, ishiya umkayo nebantfwana bayo, ngeva buhlungu lobungetulu kwalobo.”

2-3. Ngekusho kweTihlabelelo 78:40, 41, Jehova utiva njani nangabe tikhonti takhe timshiya?

² Cabanga kutsi Jehova weva buhlungu kangakanani ngesikhatsi letinye tingilosi lebetingemalunga emndeni wakhe timshiya! (Juda 6) Cabanga nangebuhlungu labuva nakabona bantfu bakhe labatsandzako, lokungema-Israyeli, bamvukela tikhatsi letinyenti. (Fundza Tihlabelelo 78:40, 41.) Ciniseka kutsi Babe wetfu wasezulwini lonelutsandvo naye uva buhlungu nangabe umuntfu lomtsandzako ayekela kumkhonta. Uyabucondza buhlungu lobuvako. Ngemusa, utokukhutsata aphindze akusekele njengobe ukudzinga loko.

³ Kulesihloko, sitawucoca ngaloko lesingakwenta kuze Jehova asisite nangabe umuntfu lesimtsandzako ayekela kumkhonta. Sitawuphindze sicoce ngaloko lesingakwenta kuze sisite labanye ebandleni labanesihlobo lesiyekelisiwe kuba nguFakazi. Kodvwa kwekucala, asesicoce ngemicabango lengakalungi lokufanele siyigweme.

4. Batali labanyenti bativa njani nangabe indvodzana nobe indvodzakati yabo ishiya Jehova?

⁴ Kuvamile kutsi nangabe indvodzana nobe indvodzakati ishiya Jehova, batali bacabange kutsi kufanele ngabe bente lokunyenti kuze basite umntfwana wabo achubeke akhonta Jehova. Ngemuva kwekutsi indvodzana yakhe iyekeliswe kuba nguFakazi, Luke utsi: “Bengitisola. Bekungibangela emaphupho lamabi. Ngaletinye tikhatsi bengikhala futsi inhlitiyo yami beyibuhlungu kakhulu.” Elizabeth, naye lobekasesimeni lesifanako bekavame kucabanga: “Yini lengingakayenti kahle njengamake? Ngeva shengatsi ngehlulekile kunamatselisa liciniso endvodzaneni yami.”

5. Ngubani lokufanele asolwe nangabe umuntfu ashiya Jehova?

⁵ Kufanele sikhumbule kutsi Jehova unike ngamunye wetfu inkhululeko yekutikhetsela. Loko kusho kutsi singakhetsa kutsi sitamlalela yini nobe cha. Labanye batali bebangasiso sibonelo lesihle kubantfwana babo, kodvwa labantfwana bancume kukhonta Jehova futsi bahlala betsembekile kuye. Labanye batali basebente kamatima kuze bafundzise bantfwana babo kutsandza Jehova, kodvwa labantfwana babese bayamshiya nasebakhulile. Ngako ngamunye wetfu kufanele atikhetsele kutsi utamkhonta yini Jehova. (Josh. 24:15) Nine batali lelinemntfwana loyekele kukhonta Jehova, ningacabangi kutsi loko liphutsa lenu!

6. Umuntfu lomusha angativa njani nangabe umtali wakhe ashiye Nkulunkulu?

⁶ Ngaletinye tikhatsi, umtali uyalishiya liciniso futsi ashiye nemndeni wakhe. (Hla. 27:10) Loko kungabavisa buhlungu kakhulu bantfwana lebebamhlonipha umtali wabo futsi bamtsandza. Babe wa-Esther wayekeliswa kuba nguFakazi, Esther utsi: “Bengivame kukhala ngobe ngabona kutsi bekungasiko nje kutsi ulishiya kancane kancane liciniso, kodvwa bekente sincumo sekuyela kukhonta Jehova. Ngiyamtsandza babe, ngako ngesikhatsi ayekeliswa kuba nguFakazi, bengihlale ngikhatsatekile ngaye. Besengihlale ngishaywa luvalo.”

7. Jehova utiva njani ngemuntfu lomusha lonemtali loyekelisiwe kuba nguFakazi?

⁷ Nine lenisebasha, nangabe umtali wenu ayekelisiwe kuba nguFakazi, sinivela kakhulu! Sicela niciniseke kutsi Jehova uyabati buhlungu lenibuvako. Uyanitsandza futsi uyajabula ngekutsi niyachubeka nimkhonta ngekwetsembeka, natsi bazalwane benu nabodzadze siyajabula ngaloko. Nani khumbulani kutsi akusilo liphutsa lenu. Njengobe sekuke kwavetwa, Jehova unikete bonkhe bantfu inkhululeko yekutikhetsela. Nguloyo naloyo lotinikele futsi wabhajatiswa kufanele ‘atetfwalele umtfwalo wakhe.’—Gal. 6:5.

8. Yini lengentiwa ngemalunga emndeni njengobe alindzele umuntfu lamtsandzako kutsi abuyele kuJehova? (Buka nelibhokisi lelitsi “ Buyela KuJehova.”)

⁸ Nangabe umuntfu lomtsandzako ayekela kukhonta Jehova, uba nelitsemba lekutsi ngalelinye lilanga utawubuyela kuye. Yini longayenta njengobe usemlindzele kutsi abuye kuJehova? Ungenta konkhe longakwenta kuze uhlale unekukholwa lokucinile. Nawenta njalo, utawabekela sibonelo lesihle lamanye emalunga emndeni, mhlawumbe nalomuntfu loyekelisiwe kuba nguFakazi. Utawuphindze utfole emandla lowadzingako kuze ukhone  kubeketelela lobuhlungu lobhekene nabo. Asesicoce ngaletinye tintfo longatenta.

9. Yini longayenta kuze uchubeke unekukholwa lokucinile? (Buka nelibhokisi lelitsi “ ImiBhalo Lengakudvudvuta Nangabe Umuntfu Lomtsandzako Ashiye Jehova.”)

⁹ Yenta konkhe longakwenta kuze uhlale unekukholwa lokucinile. Kubaluleke kakhulu kutsi uchubeke ucinisa kukholwa kwakho nekwemalunga emndeni wakho. Ungakwenta njani loko? Tfola emandla kuJehova ngekutsi uchubeke ufundza liVi lakhe futsi uzindla ngalo nangekuba khona emihlanganweni yelibandla. Babe waJoanna nasisi wakhe bayekela kukhonta Jehova, Joanna utsi: “Ngitiva ngincono nangifundza nga-Abigayili, nga-Esta, ngaJobe, ngaJosefa nangaJesu, lokukhulunywa ngabo eBhayibhelini. Tibonelo tabo tiyangikhutsata futsi tingenta ngihlale nginembono lokahle. Netingoma teMsakato we-JW tingikhutsata kakhulu.”

10. Tihlabelelo 32:6-8 titsi yini lokufanele siyente kuze sibhekane nesimo lesibuhlungu?

¹⁰ Tjela Jehova konkhe lokukukhatsatako. Nawutiva ucindzetelekile, ungayekeli kuthantaza. Ncenga Nkulunkulu wetfu lonelutsandvo kutsi akusite ubuke tintfo ngendlela latibuka ngayo, nekutsi ‘akunike kucondza futsi akukhombise indlela lokufanele uhambe ngayo.’ (Fundza Tihlabelelo 32:6-8.) Kuliciniso kutsi kungahle kube buhlungu kakhulu njengobe utjela Jehova indlela lotiva ngayo. Kodvwa Jehova uyabucondza buhlungu lobuvako. Ukutsandza kakhulu futsi uyakuncenga kutsi umtjele konkhe lokusenhlitiyweni yakho.—Eks. 34:6; Hla. 62:7, 8.

11. Ngekusho kwembhalo waKumaHebheru 12:11, kungani kufanele sibambisane nesijeziso saJehova lesinelutsandvo? (Buka nelibhokisi lelitsi “ Kuyekelisa Umuntfu Kuba NguFakazi Kukhombisa Kutsi Jehova Uyasitsandza.”)

¹¹ Sekela sincumo lesentiwe ngulabadzala belibandla.  Kuyekelisa umuntfu kuba nguFakazi kuyincenye yelilungiselelo laJehova. Lesijeziso sakhe lesinelutsandvo sisita wonkhe muntfu, lokufaka ekhatsi nalona lowonile. (Fundza KumaHebheru 12:11.) Labanye ebandleni bangahle batsi labadzala belibandla abakenti sincumo lesikahle ngekuyekelisa umuntfu kuba nguFakazi. Kodvwa khumbula kutsi bantfu labakanjalo abakavami kukusho lokubi lokwentiwe ngulomuntfu lowonile. Kalula nje, site onkhe emaciniso ngalendzaba. Kukuhlakanipha kubetsemba labadzala belibandla labente lesincumo njengobe bente konkhe labangakwenta kuze basebentise timiso letiseBhayibhelini futsi bamelele Jehova nabehlulela.—2 Khr. 19:6.

12. Ngumiphi imiphumela lemihle labanye labayitfolile ngekubambisana nelilungiselelo laJehova?

¹² Kusekela sincumo salabadzala belibandla sekuyekelisa umuntfu lomtsandzako kuba nguFakazi kungamsita kutsi abuyele kuJehova. Elizabeth, lesike sakhuluma ngaye utsi: “Bekumatima kakhulu kungachumani nendvodzana yetfu lendzala. Kodvwa ngemuva kwekutsi seyibuyele kuJehova, yavuma kutsi bekusincumo lesihle kutsi iyekeliswe kuba nguFakazi. Ngekuhamba kwesikhatsi, yatsi ifundze tifundvo letinyenti letinhle. Ngafundza kutsi sijeziso saJehova sihlale sikahle.” Indvodza yakhe, Mark, yona yatsi: “Ngemuva kwesikhatsi, indvodzana yetfu yangitjela kutsi lokunye lokwayenta yafuna kubuya kutsi senta loko bekufanele sikwente. Ngiyajabula kutsi Jehova wasisita salalela.”

13. Yini lengakusita nawuva buhlungu?

¹³ Coca nebangani labayicondzako indlela lotiva ngayo. Citsa sikhatsi nemaKhristu lavutsiwe langakusita kutsi ungaphelelwa litsemba. (Taga 12:25; 17:17) Joanna, lesike sakhuluma ngaye, utsi: “Bengitiva ngingedvwa. Kodvwa kukhuluma nebangani lengibetsembako kwangisita kakhulu.” Yini longayenta nangabe labanye ebandleni basho tintfo letikwenta uve buhlungu kakhulu?

14. Kungani kufanele ‘sichubeke sibeketelelana futsi sitsetselelana ngekukhululeka’?

¹⁴ Babeketelele bazalwane bakho nabodzadze. Asikalindzeli kutsi bonkhe bahlale basho tintfo letikahle. (Jak. 3:2) Sonkhe sinesono, ngako ungamangali nangabe labanye bangati kutsi batsini nobe nabasho tintfo letikuvisa buhlungu bangakacondzi. Khumbula seluleko semphostoli Pawula lesitsi: “Chubekani nibeketelelana futsi nitsetselelana ngekukhululeka ngisho nobe umuntfu anesizatfu sekukhonona ngalomunye.” (Khol. 3:13) Lomunye dzadze unesihlobo lesayekeliswa kuba nguFakazi, utsi: “Jehova ungisitile kutsi ngitsetselele bazalwane lebebetama kungikhutsata kodvwa bagcine bangivisa buhlungu.” Yini libandla lelingayenta kuze lisite emalunga emndeni letsembekile?

15. Yini lesingayenta kuze sisite emalunga emndeni lanelilunga lelisandza kuyekeliswa kuba nguFakazi?

¹⁵ Bani nemusa futsi ube nebungani kumalunga emndeni letsembekile. Lomunye dzadze lokutsiwa nguMiriam utsi bekesaba  kuya emihlanganweni ngemuva kwekutsi bhuti wakhe ayekeliswe kuba nguFakazi. Utsi: “Bengesaba kutsi bantfu batawutsini. Kodvwa bazalwane nabodzadze labanyenti nabo bebeva buhlungu ngaloko bekwentekile futsi bebangakamtfukutseleli bhuti wami. Ngibabonga kakhulu, angizange ngitive ngingedvwa.” Lomunye dzadze utsi: “Ngemuva kwekutsi indvodzana yetfu iyekeliswe kuba nguFakazi, bangani betfu beta batosidvudvuta. Labanye bavuma kutsi bebangati kutsi batsini. Labanye bebakhala kanye nami nobe bangibhalele imilayeto. Loko labakwenta kwangisita kakhulu!”

16. Yini libandla lelingayenta kuze lichubeke lidvudvuta futsi lisita tihlobo taloyo loyekelisiwe kuba nguFakazi?

¹⁶ Chubeka usekela emalunga emndeni letsembekile. Aludzinga kakhulu lutsandvo lwakho nesikhutsato. (Heb. 10:24, 25) Ngaletinye tikhatsi, emalunga emndeni aloyo loyekelisiwe kuba nguFakazi ayanaka kutsi labanye ebandleni abasabakhulumisi, kube shengatsi nawo ayekelisiwe kuba boFakazi. Asifuni kubenta bative ngalendlela! Labasebasha labanebatali labayekele kukhonta Jehova bakudzinga kakhulu kunconywa nekukhutsatwa. Indvodza yaMaria yayekeliswa kuba nguFakazi futsi yawushiya umndeni wayo, Maria utsi: “Labanye bangani bami beta ekhaya, basiphekela futsi basisita ekukhonteni kwemndeni. Bebayicondza indlela lebengitiva ngayo futsi bakhala kanye nami. Bangivikela ngesikhatsi labanye bakhuluma tintfo letingemanga ngami. Bangikhutsata kakhulu!”—Rom. 12:13, 15.

17. Yini labadzala belibandla labangayenta kuze badvudvute labo labacindzetelekile?

¹⁷ Nine labadzala belibandla, sebentisani onkhe ematfuba leniwatfolako kuze nikhutsate emalunga emndeni letsembekile. Ninemsebenti lobalulekile wekudvudvuta tihlobo talabo labashiye Jehova. (1 Thes. 5:14) Kuze nibakhutsate, khulumani nabo ngaphambi kwekutsi kucale imihlangano nangemuva kwayo. Bavakasheleni emakhaya abo futsi nithantaze kanye nabo. Shumayelani nabo nobe nihle nibamema ekukhonteni kwenu kwemndeni. Labadzala belibandla kufanele babanakekele labo labacindzetelekile futsi bavelane nabo baphindze babatsandze.—1 Thes. 2:7, 8.

18. Ngekusho kwa-2 Phetro 3:9, yini Nkulunkulu lafisa kutsi bayente labo labamshiyile?

¹⁸ Jehova “akafisi kutsi kubhubhe ngisho namunye, kepha ufisa kutsi bonkhe bantfu baphendvuke.” (Fundza 2 Phetro 3:9.) Ngisho nobe umuntfu angenta sono lesikhulu, kuphila kwakhe kuseligugu kuNkulunkulu. Khumbula kutsi Jehova wasitsenga ngelinani lelisetulu, lokukuphila kweNdvodzana yakhe layitsandzako. Ngemusa, Jehova wetama kusita labo labamshiyile kutsi babuyele kuye. Unelitsemba lekutsi batawubuya, njengobe sibona emfanekisweni waJesu lomayelana nendvodzana layahamba ekhaya. (Luk. 15:11-32) Labanyenti labamshiyile Jehova baphindze babuyela kuBabe wetfu wasezulwini lonelutsandvo. Bazalwane nabodzadze babemukela ngenjabulo. Elizabeth, lesike sakhuluma ngaye, wajabula kakhulu ngesikhatsi indvodzana yakhe ibuya. Utsi: “Ngibonga kakhulu ngekutsi labanyenti basikhutsata kutsi singaphelelwa litsemba.”

19. Kungani kufanele sihlale setsembela kuJehova?

¹⁹ Kufanele sihlale setsembela kuJehova. Sicondziso sakhe sitawuhlale sisisita. UnguBabe lonemusa nalonesihawu, lobatsandza kakhulu bonkhe labamtsandzako nalabamkhontako. Ciniseka kutsi Jehova angeke akushiye nakwenteka uva buhlungu. (Heb. 13:5, 6) Mark, lesike sakhuluma ngaye utsi: “Jehova akazange asishiye. Utawuhlale asisita nasibhekene netimo letimatima.” Jehova utawuchubeka akuniketa “emandla lamakhulu kakhulu.” (2 Khor. 4:7) Ungahlala wetsembekile futsi unelitsemba ngisho nobe umuntfu lomtsandzako ashiya Jehova.