Ngatalelwa ePaddington, lidolobha laseLondon, eNgilandi lokuyindzawo lenebantfu labanyenti kakhulu. Bengihlala namake kanye nabosisi bami labatsatfu labadzala. Babe abengasinaki kangako ngenca yenkinga labenayo yetjwala.

Nangisemncane, make abengifundzise kuthantaza njalo ebusuku. BengineliBhayibheli lelincane lebelinencwadzi yeTihlabelelo kuphela futsi bengitenta tibe tingoma kute ngitihlabele. Ngikhumbula ngalelinye lilanga ngifundza umusho kulenye yetincwadzi tami letivamile, bewutsi: “Ngalelinye lilanga kutawuba bete lilanga lelilandzelako.” Lomusho lona wahlala engcondvweni yami futsi lawo mavi abengenta ngingalali ebusuku, ngihlale ngicabanga ngelikusasa. Ngacabanga: ‘Nakanjani kufanele kube khona lokunyenti ekuphileni. Ngabe vele umuntfu utawuphetselaphi?’ Bengikwesaba kufa!

Ngaba nesifiso sekwati kabanti ngekusebentisa imimoya. Bengetama kukhuluma nalabafile nekubavakashela emathuneni nginebangani bami lengifundza nabo esikolweni futsi besibukela nemafilimi letfusako emimoya. Besiwakhandza amnandzi kodvwa futsi aphindze asetfusa.

Ngatsi nangineminyaka lelishumi budzala, ngacala kuba lihlongandlebe. Ngacala kubhema lugwayi futsi ngaba ngumlutsa walo. Ngemuva kwesikhatsi ngatfutfukela ekubhemeni insangu. Nasengineminyaka lelishumi nakunye, ngacala kunatsa tjwala. Ngisho nobe bengingayitsandzi indlela lobunambitseka ngayo, bengijatjuliswa kutsi buyangidzaka. Lokunye lebengikutsandza ngumculo nekudansa. Bengihamba emaphathi nema-nightclubs nome ngukuphi lapho akhona. Ebusuku bengivele ngiphume ngingakatjeli muntfu ngibuye ngentsatsakusa. Njengobe bengikhatsele ngelilanga lelilandzelako, bengivame kubaleka esikolweni. Nakwentekile ngaba khona, bengivame kunatsa tjwala.

Ngemnyaka wami wekugcina esikolweni imiphumela yami beyingasimihle. Njengobe make bekangati kutsi ngilihlongandlebe kangaka, watfukutsela kakhulu futsi wadvumela. Sahhwilitisana kakhulu ngase ngiyabaleka ekhaya. Ngahamba ngayohlala sikhashana naTony lobekasingani sami lesiliRasta. Bekatsengisa tidzakamiva, atiwa kakhulu ngekuba sidlova lesiyingoti bese kuba nebugebengu lobuncane labebenta. Ngemuva kwesikhashana ngatetfwala, futsi nangineminyaka lengu-16 ngabeleka umntfwana wemfana.

Nangicala kuhlangana naBoFakazi BaJehova bengihlala ehostela lebeyakhelwe bomake labangakashadi kanye netinswane tabo. Nami baphatsi bebanginike likamelo lekutsi ngihlale kulo. Bomake lababili labaBoFakazi bebavame kuvakashela labanye balabomake labasebasha. Ngalelinye lilanga nami ngaba khona nabacoca. Inhloso yami beyikuphikisana naBoFakazi. Nanobe kunjalo, bona nje bebayiphendvula yonkhe imibuto yami ngekutfobeka, ngemusa nangendlela lecacile basebentisa liBhayibheli. Bebanemusa futsi bebanesineke lokuyintfo leyangitsintsa kakhulu. Ngabese ngiyavuma kufundza nabo liBhayibheli.

Ngekushesha nje kukhona lengakufundza eBhayibhelini lokwashintja kuphila kwami. Kusukela ngisemncane bengikwesaba kufa. Kodvwa nyalo sengiyivile imfundziso yaJesu lemayelana nekuvuka kwalabafile! (Johane 5:28, 29) Ngetulu kwaloko, ngafundza nekutsi Nkulunkulu uyangikhatsalela mine nginguYvonne. (1 Phetro 5:7) Emavi langitsintsa kakhulu ngulawa aJeremiya 29:11 latsi: “Ngobe ngiyawati emasu lenginawo ngani, yebo, emasu ekuniphumelelisa, hhayi ekunilimata, emasu ekuninika litsemba nelikusasa.” Nami ngabese ngicala kuba nalo litsemba lekuphila phakadze ePharadesi emhlabeni.​—Tihlabelelo 37:29.

BoFakazi BaJehova bakhombisa kutsi bangitsandza mbamba. Ngelilanga lami lekucala lekuba khona emhlanganweni wabo, simo besisihle kumnandzi futsi wonkhe umuntfu abenebungani! (Johane 13:34, 35) Indlela lengaphatfwa ngayo lapho beyehluke kakhulu endleleni lebengiphatfwa ngayo esontfweni lebengiya kulo. BoFakazi bangemukela ngato totimbili nangetulu kwetimo lebengikuto. Bebanginaka, bakhombisa kungikhatsalela futsi bangisita nangaletinye tindlela letiphatsekako. Ngativa ngatsi vele sengililunga lalomndeni wabo lomkhulu.

Nangisadadisha nabo liBhayibheli, kwangikhanyela kutsi kufanele ngente tingucuko letitsite ekuphileni kwami kute kuhambisane netimfuneko taNkulunkulu letiphakeme tekutiphatsa. Bekulukhuni kutsi ngiyekele kubhema. Ngetulu kwaloko ngabona kutsi lomunye umculo lebengiwulalela bewuvusetela lesifiso sekubhema insangu, ngako ngabese ngiyayekela kulalela lowo mculo. Ngenca yesifiso sami sekuhlala ngingakadzakwa, ngayekela kuhamba emaphathi nema-nightclubs ngobe ngulapho bengingalingeka khona kutsi ngiphindze ngidzakwe. Ngabese ngitifunela bangani labasha labebatawungisita kutsi ngihlale kulendlela lensha yekuphila.​—Taga 13:20.

Ngaso leso sikhatsi naTony abesacale kufundza liBhayibheli naBoFakazi BaJehova. Njengobe BoFakazi bebasebentisa liBhayibheli kute baphendvule yonkhe imibuto yakhe, wabese uyaciniseka kutsi loko labekakufundza bekuliciniso. Wenta tingucuko letinkhulu ekuphileni kwakhe: wabashiya bangani bakhe labebatidlova, wayiyekela imikhutjana yekwenta bugebengu waphindze wayekela nekubhema insangu. Kuze sikhone kujabulisa Jehova ngalokugcwele, sobabili sasibona sidzingo sekushintja indlela lesitiphatsa ngayo kute umntfwana wetfu atokhulela esimeni lesikahle. Sabese siyashada nga-1982.

Ngikhumbula ngicwaninga kumagazini Sicongosekulindza kanye ne-“Phaphama!” * ngebantfu labenta tingucuko ekuphileni kwabo ngendlela lephumelelako lokuyintfo nami lebengifuna kuyenta. Tibonelo tabo tangikhutsata kakhulu! Loko kwangipha emandla ekutsi ngichubeke ngetama futsi ngingalilahli litsemba. Bengisolo ngithantaza kuJehova kutsi naye angangilahli. Mine naTony sabhajatiswa saba BoFakazi BaJehova ngaJuly 1982.

Kuba nebungani naNkulunkulu Jehova kukusindzisile kuphila kwami. Mine naTony sikubonile kusekelwa nguJehova etikhatsini letimatima kakhulu. Sifundze kutsi njalo kufanele setsembele kuJehova etikhatsini letimatima futsi sicabanga kutsi Jehova abesolo awusekela umndeni wetfu.​—Tihlabelelo 55:22.

Ngikujabulele kakhulu kusita bantfwana betfu kutsi bamati Jehova njengobe nami sengimati. Manje ngitiva ngijabule kakhulu nangibona nebatukulu bami bakhula bamati Jehova.

Sengilala behle ebusuku, angisakhatsateki ngelikusasa nangekufa. Mine naTony siphishaneke kakhulu ngekuvakashela emabandla aBoFakazi BaJehova liviki neliviki siwakhutsata. Sihlanganyela nawo ekufundziseni labanye kutsi nabo babe nekukholwa kuJesu kuze batawutfola kuphila lokuphakadze.