Delphine, lesikhulume ngaye esihlokweni lesisuka kuso, watsi kucindzeteleka kwakhe bekumenta anatse kakhulu tjwala futsi ahlale adzakiwe. LiBhayibheli alikwali kunatsa tjwala, kodvwa litsi: “Ungabi ngumngani wetidzakwa nome timiti.” (Taga 23:20) Kunatsa kakhulu tjwala ngiko lokubangela tinkinga letinyenti temphilo, kubhidlite nemindeni kuphindze kubangele tigidzi tebantfu kutsi tisheshe tife njalo ngemnyaka. Letinyenti taletinkinga tingagwemeka nangabe bantfu balandzela seluleko lesihlakaniphile lesiseBhayibhelini.

Delphine wakwenta loku. Utsi: “Ngabona kutsi lotjwala bebungakucedzi kukhatsateka kwami. Ngasebentisa emavi ekuhlakanipha laku-Filiphi 4:6, 7, latsi: ‘Ningakhatsateki ngalutfo, kodvwa kuko konkhe ticelo tenu atatiwe nguNkulunkulu.’ Njalo ebusuku nangifikelwa yimicabango kanye nekucindzeteleka, bengivele ngitjele Jehova. Bengimchazela indlela lebengitiva ngayo, intfukutselo yami, buhlungu kanye nekuphelwa litsemba futsi bengimcela kutsi angisite ngitfole tindlela lebetingangijabulisa. Ekuseni bengiciniseka kutsi angisaticabangi leto tinkinga. Kuthantaza njalo kuJehova kwangenta nganaka loko benginako kunekutsi nginake loko bengite kona. Ngakhetsa kungaphindzi nginatse tjwala. Kuthula lengakutfola bekubaluleke kakhulu, bengingeke ngivume kulahlekelwa ngiko.”

Kutiphatsa kabi kungumkhuba lohamba embili lobangela kudvumateka nekungajabuli. Timiso letiseBhayibhelini tingasisita sikhone kugwema tinkinga letifana naleti ngekutsi lisitjele loko lokutibangelako​—sibonelo saloku, kungaba kudlala ngelutsandvo nobe kubukela titfombe letikhombisa kugcola. Samuel loselijaha utsi “Bekumelula kakhulu kudlala ngelutsandvo. Ngaletinye tikhatsi bengisuke ngingamtsandzi lowesifazane, kodvwa bengibona kutsi yena uyatifela ngami​—loko bekubese kungenta ngiyakujabulela kudlala ngelutsandvo.” Samuel bekasolwa kanyenti ngekutsi udlala ngelutsandvo ngisho nobe abengakahlosi kwenta njalo futsi wagcine sekancume kutsi salo achubeka adlala ngelutsandvo ngemabomu. Kodvwa lomkhuba lomubi bowumcindzetela. Nyalo utsi: “Loku bekuyingoti kakhulu ngoba bekungenta ngibe ngumuntfu loticabangela yena.”

Samuel wafundza sihloko lebesikhuluma ngebantfu labasha ku-jw.org. Waphindze wacabanga nge-Taga 20:11, letitsi: “Ngisho nemntfwana wembula similo sakhe ngendlela latiphetse ngayo; tento takhe tikhombisa kutsi similo sakhe sihle yini nome sibi.” Kwamsita njani loko? Samuel wabona kutsi kudlala ngelutsandvo bekungasiyo intfo lenhle futsi bekungumkhuba lomubi. Nyalo utsi, “Ngacala kucabanga kutsi umuntfu lengitoshada naye bekangativa njani nakangangibona kutsi ngidlala ngelutsandvo nalomunye wesifazane. Loko kwangenta ngabona kutsi lomkhuba mubi futsi uyingoti. Lokutsi kube melula kudlala ngelutsandvo akukwenti kube yintfo lenhle.” Samuel washintja. Kugwema kudlala ngelutsandvo kwamsita kutsi agweme kutiphatsa kabi.

Antonio bekasengotini yekutiphatsa kabi ngekwelicansi: Bekabukela kakhulu titfombe letikhombisa kungcola. Nanobe bekashade wesifazane lebekamtsandza kakhulu, kodvwa wachubeka nalomkhuba wakhe wekubuka titfombe letikhombisa kungcola. Utsi kwamsita kakhulu kucabanga ngemBhalo wa-1 Phetro 5:8 lotsi: “Hlalani nisangulukile niphindze nicaphele. Sitsa senu Develi, sihambahamba njengelibhubesi lelibhodlako, lelifuna lotsite lelingamshwabadzela.” Antonio utsi: “Titfombe letikhombisa kungcola tigcwele umhlaba wonkhe futsi tingahlala sikhatsi lesidze engcondvweni. Lelivesi langisita kakhulu kutsi ngicabange ngemtfombo waletilingo. Kwadzingeka kutsi ngifundze kukhumbula ngekushesha kutsi letitfombe tivela kuDeveli. Nyalo sengiyati kutsi nguJehova longangisita ngihlale ngisangulukile ngiphindze ngicaphele kute ngilwisane naletilingo engcondvweni yami, enhlitiyweni yami kanye nasemshadvweni wami.” Antonio walutfola lusito bekaludzinga futsi wagcine akhonile kulwisana nalomkhuba lomubi. Loko kwaphindze kwamsita kutsi akhone kugwema naletinye tinkinga.

Ecinisweni liBhayibheli lisiniketa teluleko letingasisita kutsi sikhone kugwema tinkinga letinyenti. Kutsiwani ngetinkinga lesesibe nato sikhatsi lesidze futsi letibonakala tichubeka? Asesibone kutsi liVi laNkulunkulu lingasisita kanjani kutsi sikhone kulungisa tinkinga letimatima.