Loko Bantfu Labakushoko Ngekuthantaza
“Nangithantaza, ngiva ngatsi Nkulunkulu useceleni kwami, ungibambe ngesandla, futsi uyangicondzisa nangiva shengatsi ngilahlekile.”—MARÍA.
“Umkami washona ngemuva kweminyaka lengu-13 solo alwisana nesifo samdlavuza. Ngikhumbula ngithantaza kuNkulunkulu onkhe malanga, futsi ngiva kutsi uyayilalela imithantazo yami, nekutsi bekabuva nebuhlungu lebengibuva. Ngativa nginekuthula.”—RAÚL.
“Umthantazo usipho lesihle Nkulunkulu lasiphe bantfu.”—ARNE.
Umthantazo usipho lesiligugu kuMaría, Raúl, Arne, kanye nakulabanye labanyenti. Batsatsa umthantazo njengendlela yekukhuluma naNkulunkulu kuze bambonge futsi bacele lusito lwakhe. Ngenhlitiyo yonkhe, bayakukholelwa loko lokushiwo liBhayibheli ngekuthantaza kuNkulunkulu, nalitsi: “Siyaciniseka kutsi nobe yini lesiyicelako kuNkulunkulu, levumelana nentsandvo yakhe, yena uyasiva.”—1 Johane 5:14.
Ngakulokunye, bantfu labanyenti abakukholelwa loko lokushiwo liBhayibheli ngemthantazo. Steve uchaza indlela labekativa ngayo ngemthantazo, utsi: “Nangineminyaka lengu-17, bangani bami labatsatfu bafa etingotini letimbili letehlukene. Munye wafa engotini yemoto, lababili bamita elwandle.” Yini Steve layenta? Utsi: “Ngathantaza kuNkulunkulu kute ngati kutsi kungani loko kwenteka, kodvwa angizange ngiyitfole imphendvulo. Ngako ngatibuta kutsi, ‘Kusita ngani kuthantaza?’” Bantfu labanyenti beva shengatsi imithantazo yabo ayiphendvulwa, ngako bayatibuta kutsi kungani kufanele bathantaze.
Kunaletinye tizatfu letenta bantfu beve shengatsi akubasiti kuthantaza. Labanye batsi njengobe Nkulunkulu ati tonkhe tintfo, uyatati tidzingo tetfu netinkinga lesinato, ngako akudzingeki kutsi simtjele ngaletintfo.
Labanye bacabanga kutsi Nkulunkulu akafuni kulalela imithantazo yabo ngesizatfu semaphutsa labawenta esikhatsini lesendlulile. Jenny utsi: “Inkinga lenkhulu lenginayo kutsi ngitiva ngingakabaluleki. Ngente tintfo lengitisolako ngato, ngako ngititjela kutsi akungifaneli kulalelwa nguNkulunkulu.”
Wena utiva njani ngekuthantaza? Nangabe uke wativa ngendlela lefanako ngemthantazo, ungatfola indvudvuto ngekwati kutsi liBhayibheli linetimphendvulo letingakwenetisa. Singakwetsemba loko lokushiwo liBhayibheli ngemthantazo, * futsi lingasisita sitfole timphendvulo temibuto lenjengalena:
-
Nkulunkulu uyayiva yini imithantazo yetfu?
-
Nkulunkulu akayiphendvuli ngani leminye imithantazo?
-
Ungathantaza njani kuze uviwe nguNkulunkulu?
-
Kuthantaza kungakusita njani?
^ sig. 9 LiBhayibheli linemithantazo yetikhonti taNkulunkulu letinyenti, lokufaka ekhatsi nemithantazo yaJesu Khristu. ImiBhalo yesiHebheru leyatiwa ngekutsi Lithestamente Lelidzala, inemithantazo lengetulu kwa-150.
Lokunye Longatsandza Kukuhlola
BANTFU LABASHA BAYABUTA
Kungani Kufanele Ngithantaze?
Kukhona yini umthantazo losita ngako nobe umane nje uyindlela yekutenta utive uncono?
