Lokuhle Nalokubi: Lokungasisita Sikhetse Kahle
LiBhayibheli lisite tigidzi tebantfu kuletintfo letine letilandzelako.
1. Umshado
Bantfu banemibono leyehlukahlukene mayelana nemshado kanye nekutsi yini lengenta bantfu babe nemshado lojabulisako.
LIBHAYIBHELI LITSI: “Nguloyo naloyo kini akatsandze umkakhe njengobe atitsandza yena; nemfati kufanele abe nenhlonipho lenkhulu ngendvodza yakhe.”—Kubase-Efesu 5:33.
LOKUKUSHOKO: NguNkulunkulu lowacalisa umshado, ngako nguye lowatiko kutsi yini labashadile lokudzingeka bayente kuze bajabule. (Makho 10:6-9) Bantfu labashadile bayajabula nangabe babeka tidzingo taloyo labashade naye kucala kunetabo. Nangabe indvodza imtsandza umkayo, itawukhombisa ngendlela lemphatsa ngayo. Umfati loyihloniphako indvodza yakhe utawukhuluma nayo ngemusa futsi ayiphatse kahle.
LOKUSHIWO LIBHAYIBHELI KUYASEBENTA: Quang naThi, labahlala eVietnam, bebangajabuli emshadweni wabo. Quang bekangamphatsi kahle umkakhe. Utsi: “Bengingenandzaba nekutsi Thi utiva njani, futsi bengivame kumvisa buhlungu.” Thi besekafuna badivose. Utsi: “Besengingasametsembi futsi ngingasamhloniphi Quang.”
Ngekuhamba kwesikhatsi, Quang naThi bafundza loko lokushiwo liBhayibheli futsi basebentisa loko lokushiwo ngumbhalo waKubase-Efesu 5:33 emshadweni wabo. Quang utsi: “Lelivesi langenta ngabona kutsi kudzingeka ngibe nemusa futsi ngente Thi ative atsandvwa futsi anakekelekile ngato tonkhe tindlela. Nangenta njalo, bekangitsandza futsi angihlonipha.” Thi utsi: “Quang indvodza yami ungenta ngitive ngitsandvwa, ngivikelekile futsi nginekuthula nangisebentisa loko lokushiwo ngumbhalo waKubase-Efesu 5:33 futsi ngikhombisa kutsi ngiyamhlonipha.”
Kuze ufundze lokunyenti ngemshado, hlola i-Phaphama! No. 2 2018, lenesihloko lesitsi “Izinto Ezingu-12 Ezenza Imindeni Iphumelele,” letfolakala ngesiZulu ku-website letsi jw.org.
2. Indlela Yekuphatsa Labanye
Ngalokuvamile, bantfu babaphatsa kabi labanye ngenca yekutsi basive sini, babukeka njani, bakuyiphi inkholo, baluphi luhlanga nobe ngenca yekutsi batitabane yini nobe cha.
LIBHAYIBHELI LITSI: “Hloniphani tonkhe tinhlobo tebantfu.”—1 Phetro 2:17.
LOKUKUSHOKO: LiBhayibheli alikukhutsati kubandlulula labanye bantfu ngenca yekutsi basive sini, baluphi luhlanga nobe ngenca yekutsi batitabane yini nobe cha. Kunaloko, lisikhutsata kutsi sibahloniphe bonkhe bantfu ngisho nobe babaluphi luhlanga, basive sini, banjingile nobe baphuyile. (Imisebenti 10:34) Kufanele siphatse bonkhe bantfu ngemusa nangenhlonipho ngisho nobe singavumelani naloko labakukholelwako nobe indlela labaphila ngayo.—Matewu 7:12.
LOKUSHIWO LIBHAYIBHELI KUYASEBENTA: Daniel wafundziswa kutsi atsatse bantfu labachamuka e-Asia njenalabayingoti eveni lakubo. Bekabazonda bantfu labachamuka e-Asia futsi bekavamise kubetfuka embikwebantfu. Daniel utsi: “Bengicabanga kutsi ngisekela live lakitsi ngaloko lebengikwenta. Bengingacabangi ngisho nekucabanga kutsi loko lebengikwenta bekukubi.”
Ngekuhamba kwesikhatsi Daniel wase ufundza loko lokushiwo liBhayibheli. Utsi: “Kwadzingeka ngiyishintje ngalokuphelele indlela lebengicabanga ngayo, ngibone bantfu ngendlela Nkulunkulu lababuka ngayo, ngobe kuNkulunkulu sonkhe siyafana ngisho nobe sichamuka kuphi.” Daniel uchaza indlela lativa ngayo nakahlangana nebantfu labehlukahlukene. Utsi: “Nyalo angisakucabangi nekukucabanga kutsi bachamukaphi. Sengibatsandza bonkhe bantfu futsi nginebangani emaveni lamanyenti.”
Kuze ufundze lokunyenti, hlola i-Phaphama! No. 3 2020, lenesihloko lesitsi “Likhona Yini Ikhambi Lobandlululo?,” letfolakala ngesiZulu ku-website letsi jw.org.
3. Imali
Bantfu labanyenti balwela kunjinga kuze bajabule futsi babe nelikusasa lelihle.
LIBHAYIBHELI LITSI: “Kuhlakanipha kusivikelo njengobe nje nemali isivikelo, kodvwa lokuhle ngelwati nangekuhlakanipha kutsi kulondvolota kuphila kwalabo labanako.”—Umshumayeli 7:12.
LOKUKUSHOKO: Siyayidzinga imali, kodvwa kuba nayo angeke kusente sijabule nobe sibe nelikusasa lelihle. (Taga 18:11; 23:4, 5) Kunaloko, kuze sijabule futsi sibe nelikusasa lelihle kufanele sisebentise kuhlakanipha kwaNkulunkulu lokutfolakala eBhayibhelini.—1 KuThimothi 6:17-19.
LOKUSHIWO LIBHAYIBHELI KUYASEBENTA: Cardo, lenye indvodza yase-Indonesia, bekanake kakhulu kunjinga. Utsi: “Benginato tonkhe tintfo bantfu labafisa kuba nato. Bengivakasha emaveni lehlukahlukene, ngitsenga timoto takanokusho, tindlu letidulile kanye naletinye tintfo.” Kodvwa konkhe loku kwashintja. Cardo utsi: “Ngekucwabita kweliso, ngadliwa yonkhe imali yami lebengiyisebentele kamatima. Ngacitsa sikhatsi sami lesinyenti ngilwela kunjinga, kodvwa ekugcineni kwako konkhe ngadvumateka ngobe ngasala ngingenalutfo futsi ngitiva ngingenamsebenti.”
Cardo wacala kulalela loko lokushiwo liBhayibheli ngendlela yekusebentisa kahle imali. Nyalo akasacitsi sikhatsi sakhe lesinyenti kanye nemandla akhe alwela kunjinga, kodvwa sewuphila imphilo lemelula. Utsi: “Nyalo sengitiva nginjinge mbamba ngobe nginebuhlobo lobuhle naNkulunkulu. Ebusuku ngilala behle, futsi sengijabule sibili.”
Kuze ufundze lokunyenti ngaloko loushiwo liBhayibheli ngemali, hlola sihloko lesitsi “Imfundvo Nemali Kungasenta Siciniseke Yini Kutsi Sitawuba Nelikusasa Lelijabulisako?,” lesiku-Sicongosekulindza No. 3 2021, ku-website letsi jw.org.
4. Kuya Ecansini
Bantfu banemibono leyehlukahlukene mayelana naloko lokwemukelekile ngekuya ecansini.
LIBHAYIBHELI LITSI: “Nibubalekele bugwadla. Ngamunye wenu kufanele akwati kulawula umtimba wakhe ngebungcwele nangeludvumo, hhayi ngekuba nenkhanuko lenemandla njengetive letingamati Nkulunkulu.”—1 KubaseThesalonika 4:3-5.
LOKUKUSHOKO: LiBhayibheli alisivumeli kutsi sisenetise nganobe nguyiphi indlela sifiso setfu sekuya ecansini. Ligama lelitsi ‘bugwadla’ lifaka ekhatsi kuphinga, kutsengisa ngemtimba, kuya ecansini kwebantfu labangakashadi, butabane kanye nekulala nesilwane. (1 KubaseKhorinte 6:9, 10) Kuya ecansini kusipho Nkulunkulu lasiniketa kuphela indvodza nemfati labashadene.—Taga 5:18, 19.
LOKUSHIWO LIBHAYIBHELI KUYASEBENTA: Lomunye wesifazane wase-Australia lokutsiwa nguKylie utsi: “Ngesikhatsi ngisekangashadi, bengicabanga kutsi nangiya ecansini ngitawutiva ngitsandvwa futsi ngivikelekile. Kodvwa kwenteka lokwehlukile kunaloko, ngativa ngidvumatekile futsi ngingakavikeleki.”
Ngekuhamba kwesikhatsi Kylie wasebentisa loko lakufundza eBhayibhelini mayelana nekuya ecansini. Utsi: “Sengiyabona kutsi timiso taNkulunkulu tiyasivikela kuze singalimali. Nyalo ngitiva ngivikelekile futsi ngitsandvwa ngobe ngenta tintfo ngendlela Jehova lafuna ngayo. Kusebentisa sicondziso seliBhayibheli kungivikele etintfweni lebetitangivisa buhlungu!”
Kuze utfole lokunyenti, fundza sihloko lesitsi “Litsini LiBhayibheli Ngekuhlala Ndzawonye Kwebantfu Labangakashadi?” ku-website letsi jw.org.
UMdali wetfu uyasisita sati kutsi yini lenhle nalembi. Ngisho nobe kungasimelula kwenta loko lakushoko ngaso sonkhe sikhatsi, kodvwa nasikwenta angeke sitisole. Singaciniseka kutsi kutasenta sihlale sijabulile.
