Letinye tipho tibaluleke kakhulu ngobe satiphiwa ngumuntfu losesikhundleni noma lesimhlonipha kakhulu. Letinye tipho tiba ligugu kitsi ngisho nome tishiphile, ngobe satinikwa lilunga lemndeni noma umngani wetfu lesimetsembako. Nguloko lokwenteka ngesipho Russell lasipha Jordan, lokukhulunywe ngaye esihlokweni lesendlulile. Loku kungasebenta njani kulesipho senhlawulo?

Kwekucala, liBhayibheli litsi: “Nkulunkulu wayitfumela eveni iNdvodzana yakhe lekuphela kwayo kuze sitfole kuphila ngayo.” (1 Johane 4:9) Loko kwenta lesipho sibaluleke kakhulu. Kute umuntfu lophakeme kwendlula Nkulunkulu. Umhlabeleli longumHebheru wabhala watsi: “Shangatsi bangati kutsi nguwe wedvwa lolibito lakhe linguSimakadze, nguwe Losetikwako Konkhe, lophakeme abuse umhlaba wonkhe.” (Tihlabelelo 83:18) Kute lesinye sipho lesingasitfola kumuntfu lophakeme kwendlula Jehova.

Kwesibili, Nkulunkulu “unguBabe wetfu.” (Isaya 63:16) Sikusho ngani loku? Nguye lowasipha kuphila. Ngetulu kwaloko usinakekela ngekwetsembeka njengoba babe enta kubantfwana bakhe. Nakakhuluma ngaletinye tinceku takhe tasendvulo njenga-Efrayimu, Jehova wabuta watsi: “Efrayimu akasiyo yini indvodzana yami letsandzekako, umntfwana lengijabulako ngaye? . . . Inhlitiyo yami iyamlangatelela; nginesihawu lesikhulu ngaye.” (Jeremiya 31:20) Nkulunkulu utiva ngendlela lefanako nangetinceku takhe lamuhla. Akagcini nje ngekuba nguMdali wetfu lophakeme kepha uphindze abe nguBabe lowetsembekile  kanye neMngani sibili. Loku akwenti yini noma ngabe ngusiphi sipho lesibuya kuye sibe ligugu?

Letinye tipho tiligugu ngobe tivela kumuntfu lositsandza mbamba, hhayi kumuntfu losinika tona ngoba ativa aphocelelekile. Umuntfu lopha ngalokukhululekile akalindzeli kubhadalwa ngenca yesento semusa lasentile.

Nkulunkulu wanikela ngendvodzana yakhe kutsi isifele ngoba uyasitsandza. LiBhayibheli litsi: “Lutsandvo lwaNkulunkulu lwavetwa ngaloku kitsi, ngobe Nkulunkulu wayitfumela eveni iNdvodzana yakhe lekuphela kwayo.” Wakwentelani loko? “Kuze sitfole kuphila ngayo.” (1 Johane 4:9) Abephocelelekile yini Nkulunkulu kutsi ente loku? Cha, abengakaphoceleleki! “Inhlawulo leyakhokhwa nguKhristu Jesu” ikhombisa “umusa lomkhulu” waNkulunkulu.—Roma 3:24.

Yini leyenta sipho saNkulunkulu sibe sento lesikhombisa “umusa wakhe lomkhulu”? LiBhayibheli lichaza kutsi: “Nkulunkulu ukhombisa lutsandvo lwakhe kitsi, ngobe ngesikhatsi sisetoni, Khristu wasifela.” (Roma 5:8) Lutsandvo lolute bugovu ngilo lolwakhutsata Nkulunkulu kutsi asite bantfu labanesono, lababutsakatsaka nalabebete longabasita. Besingalufaneli lutsandvo lwaNkulunkulu futsi ngeke sikhone nekulutsenga. Lesipho lasiphe sona sisento lesikhombisa lutsandvo lolukhulu.

Letinye tipho tiba ligugu nangabe loyo losinikete tona adzele lokutsite kuze sititfole. Nangabe umuntfu kudzingeke ahlukane nentfo letsite lebalulekile kute asinike yona, leso sipho siba ligugu kakhulu kitsi ngenca yekutsi udzele lokutsite kute asiphe sona.

Nkulunkulu “wanikela ngeNdvodzana yakhe lekuphela kwayo.” (Johane 3:16) Kute lomunye Nkulunkulu labemtsandza labenganikela ngaye. Kuleminyaka leminyenti Nkulunkulu labedala ngayo indzawo yonkhe, Jesu abesebenta naye, futsi Nkulunkulu abejabula ngaye. (Taga 8:30) Jesu ‘uyiNdvodzana yakhe layitsandzako’ futsi ‘ungumfanekiso waNkulunkulu longabonakali.’ (Kholose 1:13-15) Kute bantfu labahlakaniphile labake basondzelana kakhulu ngaphandle kwaJehova naJesu.

Noma kunjalo, Nkulunkulu ‘akayigodlanga iNdvodzana yakhe.’ (Roma 8:32) Jehova wasipha lokuncono kakhulu. Kute lesinye sipho latidzela kuso kwendlula sipho senhlawulo.

Letinye tipho tiligugu ngoba tenetisa sidzingo setfu lesikhulu, mhlawumbe nalesiphutfumako. Nasi sibonelo, bewungeke yini ujabule nangabe lotsite abengakubhadalela tindleko takho tekwelashwa lokudzingako kute uphile? Lesi bekungaba sipho lesikhulu kakhulu kuwe!

“Njengobe ku-Adamu bonkhe bayafa, nakuKhristu bonkhe batawutfola kuphila.” (1 Khorinte 15:22) Njengobe siyintalelwane ya-Adamu sonkhe siyafa, futsi asikhoni kubalekela buhlungu lobuletfwa kugula nekufa. Ngetulu kwaloko, ngaphandle kwenhlawulo yaJesu besingeke sikhone kubuyisana naNkulunkulu siphindze sitsetselelwe tono. Ngesizatfu sekutsi sibantfu labangasilutfo, angeke sikhone kutihlenga tsine noma sihlenge labanye. LiBhayibheli litsi: “Kute umuntfu longahlenga umnakabo, nome-ke anike Nkulunkulu intsengo yemphilo yakhe . . . Kute intsengo lengakwenela.” (Tihlabelelo 49:7, 8) Siludzinga mbamba lusito ngobe ngeke sikhone kutikhokhela linani lenhlawulo. Vele siyamdzinga umuntfu longasisita ngobe ngeke sikhone kutisita.

Ngenca yekutsi Jehova usitsandza kakhulu, wasikhokhela inhlawulo lesiyidzingako kute ‘sonkhe  sitfole kuphila’ ngaJesu. Inhlawulo ikwenta njani loku? “Ingati yaJesu iNdvodzana yakhe iyasihlanta kuto tonkhe tono.” Kukholwa engatini yaJesu leyacitseka kusenta sikhone kutsetselelwa tono futsi sitfole kuphila lokuphakadze. (1 Johane 1:7; 5:13) Inhlawulo itawubasita njani bantfu lesibatsandzako labafile? “Njengobe kufa kwavela ngemuntfu, nekuvuswa kwalabafile nako kuvela ngemuntfu [Jesu].”—1 Khorinte 15:21. *

Kute sipho lesake savela kumuntfu lophakeme noma kumuntfu lebekachutjwa lutsandvo kwendlula sipho senhlawulo yaJesu. Kute umuntfu loke wasipha sipho lesikhulu kangaka ngaphandle kwaJehova Nkulunkulu. Ngaphandle kwenhlawulo lesikhulula esonweni nasekufeni, kute lesinye sipho lesinetisa sidzingo setfu lesikhulu. Empeleni kute lesinye sipho lesifana nalesipho senhlawulo lesingachazeki.