Kubuka kuma kwetinkhanyeti kuluhlobo lolutsite lwekufuna kwati likusasa usebentisa tikhanyeti, inyanga, kanye nemaplanethi lokukholelwa kutsi tiyakutsintsa kuphila kwebantfu emhlabeni. Labo lababuka kuma kwetinkhanyeti bacabanga kutsi indlela tinkhanyeti letisuke time ngayo nakutalwa umuntfu, tiyabutsintsa buntfu bakhe kanye nelikusasa lakhe.

Nanobe kubuka kuma kwetinkhayeti kwacala eBhabhulona lasendvulo, kodvwa kusentiwa nalamuhla. Ngekwelucwaningo lwanga-2012 emaphesenti langu-33 ebantfu lababutwa, batsi kubuka kuma kwetinkhanyeti “kuyisayensi,” futsi emaphesenti langu-10 atsi “kuphatselene kakhulu netesayensi.” Kuliciniso yini loku? Cha. Kungani sisho njalo?

• Emaplanethi kanye netinkhanyeti atikutsintsi kuphila kwebantfu ngendlela labo lababuka kuma kwetinkhanyeti labacabanga ngayo.

• Esikhatsini lesinyenti loko labakushoko kuvame kwenteka ngendlela yekutsi kungasebenta kunobe ngangubani.

• Kubuka kuma kwetinkhanyeti lamuhla kwentiwe ngendlela yakadzeni yekukholelwa kutsi emaplanethi ahamba atungelete umhlaba. Ecinisweni, emaplanethi atungeleta lilanga.

• Labo lababuka kuma kwetinkhanyeti abakhulumi intfo lefanako ngentfo letsite.

• Kubuka kuma kwetinkhanyeti kwehlukanisa bantfu ngetincenye nobe ngetimphawu letingu-12 tetinkhanyeti, kuye ngekutsi batalwa nini. Ngenca yekutsi umhlaba solo awukemi ndzawonye kusukela emakhulwini eminyaka lendlulile, emalanga lahambisana naletimphawu abese awasahambisani naletinkhanyeti letsiwa ngato.

Lucwaningo lutsi letimphawu ngito letichaza kutsi butawuba njani buntfu bakhe. Ecinisweni, bantfu labatalwa ngelilanga lelifanako bete buntfu lobufanako; lusuku lwemuntfu lwekutalwa alichazi kutsi buntfu bakhe butawuba njani. Esikhundleni sekubuka loko bantfu labangiko mbamba, lababuka kuma kwetinkhanyeti behlulela indlela umuntfu lenta ngayo tintfo nobe buntfu bakhe ngekucombelela. Loku akusiko yini kubukela umuntfu phansi?

Endvulo, bantfu bebasolo babuta kulabaphengulako. Labanye labaphengulako bebatfola inchazelo ngekubuka indlela tilwane nebantfu labaphila ngayo nobe indlela lichudze lelidla ngayo. Labanye bebacombelela ngekubuka indlela emacembe elitiya labekakheke ngayo nobe indlela likhofi lebelisileke ngayo. Lamuhla basebentisa emakhadi ekubhula, emabhola lacwebetelako, emadayisi, naletinye tindlela tekufundza likusasa lemuntfu. Kuphengula kuyindlela lesingayetsemba yini lengasenta sati kutsi likusasa litawuba njani? Cha, akunjalo. Asesichaze kutsi sisho ngani.

Cabanga ngekushintjashintja kwaloko labakushoko. Tindlela letehlukahlukene tekucombelela letisetjentiswa ngulabo labaphengulako tichubeka tibadida bantfu. Ngisho nalapho basebentisa indlela lefanako yekuphengula, kodvwa loko labakushoko akufanani. Nasi sibonelo, nangabe umuntfu abuta bantfu labaphengulako lababili umbuto munye lomayelana nelikusasa futsi basebentisa indlela yekufundza emakhadi lafanako, ngalokujwayelekile sigadze kutsi timphendvulo tabo tifanane. Kodvwa timphendvulo tihlale tingafani.

Tindlela letisetjentiswa ngulabo labaphengulako tiyasolisa. Labo labamelene nekuphengula batsi abawatsembi lamakhadi kanye nemabhola lacwebetelako labawasebentisako. Nasi sibonelo, umphenguli lonelikhono angabuta loyo lofuna kuphengulwa imibuto letsite kute abone kutsi yini langayitjela loyo lotofuna lusito. Lomphenguli angabese asebentisa lolwati lalutfole kulomuntfu lofuna lusito kute amtjele tintfo langatati letitamjabulisa. Baphenguli batfola imali lenyenti kulabantfu labete kutofuna lusito kubo ngoba bayabona kutsi bayabetsemba.

Loko lokwentiwa ngulabo lababuka kuma kwetinkhanyeti kanye nebaphenguli kwenta bantfu bacabange kutsi likusasa lebantfu selivele lihleliwe. Kunjalo yini vele? LiBhayibheli lisitjela kutsi singatikhetsela kutsi yini lesifuna kuyikholelwa nobe lesifuna kuyenta nekutsi likusasa letfu lisetandleni tetfu.​—Joshuwa 24:15.

Tikhonti taNkulunkulu tinetizatfu etivakalako tekungafuni lusito kubantfu lababuka kuma kwetinkhanyeti nakulabo labaphengulako ngoba Nkulunkulu utenyanya ngalokuphelele tonkhe tindlela tekubhula. Naku lesikutfola eBhayibhelini: “Kubete emkhatsini wenu . . . lobhulako nome losangoma, nome lohumusha tigameko, angenele butsi, nome alumbe, nome wemimoya lemibi, nome lophengulako, nome lokhuluma nalabafile. Wonkhe umuntfu lowenta letintfo usinengiso kuJehova.” a​—Dutheronomi 18:10-12