Jesu waphrofetha kutsi letindzaba letimnandzi teMbuso titawushunyayelwa emhlabeni wonkhe. (Matewu 24:14) Incwadzi yaDanyela isitjela kutsi lombuso unguhulumende waNkulunkulu. Sehluko 2 salencwadzi sinesiphrofetho lesisitjela ngaloko lokwentiwe bohulumende noma imibuso kusukela eBhabhulona yasendvulo kute kube ngulamuhla. Livesi 44, nalisitjela ngaloko bekutawenteka litsi:

“Nkulunkulu welizulu uyawumisa umbuso longasoze wabhujiswa lutfo, futsi ngeke unikwe labanye bantfu. Uyawupitjita yonkhe leminye imibuso uyicedze, kodvwa wona uyawukuma kuze kube phakadze.”

Lesiphrofetho kanye naletinye letiseBhayibhelini tisitjela kutsi Nkulunkulu utawususa bohulumende bebantfu futsi aletse kuthula nekuhleleka emhlabeni. Kutawuba njani kuphila ngaphansi kwaloMbuso? Nati letinye tetsembiso letijabulisako letitawufezeka.

 Loko kusho kutsi bantfu nasebaphila phakadze emhlabeni lolipharadisi batawube sebete sono. Nguloko lesikwetsenjiswe nguMdali wetfu lonelutsandvo longuNkulunkulu Jehova.

• TIMPHI NGEKE TISABA KHONA

  Tihlabelelo 46:9: “[Nkulunkulu] Uvimba acedze timphi kutsi tichubeke emhlabeni wonkhe jikelele. Ufohlota butjoki, ephule sikhali, tincola atishise ngemlilo.”

  Asewucabange kutsi bekungaba njani emhlabeni nangabe tonkhe letimali letisetjentiswa ekwakheni tikhali betingasetjentiswa kutsi tente tintfo letitawuzuzisa bantfu kunekutsi kwentiwe tintfo letitababulala! Leso setsembiso sitawufezeka ngaphansi kweMbuso waNkulunkulu.

• KUGULA KUTAWUPHELA

  Isaya 33:24: “Kute lohlala eSiyoni loyakutsi: ‘Ngiyagula.’”

  Cabanga ngemhlaba lapho khona kutawuba bete lonesifo senhlitiyo, umdlavuza, malaleveva, noma lesinye sifo. Bantfu ngeke basatidzinga tibhedlela nemitsi. Bantfu labatawuhlala emhlabeni batawuba yimicemane.

• INDLALA ITAWUPHELA

  Tihlabelelo 72:16: ‘Kutawuba nenala emasimini, lenala isibekele ticongo tetintsaba.’

  Lomhlaba utawukhicita kudla lokutabenela bonkhe bantfu. Ngeke bantfu basaphatfwa yindlala futsi ngeke bakweswele kudla.

• BUHLUNGU, LUSIZI NEKUFA NGEKE KUSABA KHONA

  Sembulo 21:4: “[Nkulunkulu] uyakwesula tonkhe tinyembeti emehlweni abo, sekuyawubate kufa, nekulila, nekukhala, nebuhlungu, ngobe kwakucala sekwendlulile.”

Kuvakala njengeliphupho yini loku? Kuliciso kutsi bantfu labaningi bayakufisa lokuphila lokukhulunywa ngako eBhayibhelini. Nanobe kunjalo, kunetizatfu letinyenti letenta kutsi kube matima ngabo kukholwa kutsi batawuphila phakadze. Loko akumangilisi ngoba kute umuntfu loke waphila phakadze longasicocela ngako.

Sekuphele sikhatsi lesidze solo banfu bagcilatwa sono nekufa, futsi bacindzetelwa tinkinga, kuhlupheka nebuhlungu kangangekutsi baze bacabanga kutsi kuphila kwadalwa kutsi kube njalo vele. Leyo bekungasiyo injongo yaNkulunkulu Jehova nakadala bantfu.

Kute asisite sikukholwe loko lasetsembise kona, nakakhuluma ngelivi lakhe, wagcizelela watsi: “Lingeke libuye kimi yabayaba, kodvwa liyawukwenta loko lengikuhlosile, liwufeze umgomo walo lengilikhiphele wona.”​—Isaya 55:11.

LiBhayibheli lichaza Jehova ngekutsi “nguNkulunkulu longawacali emanga.” (Thithusi 1:2) Njengoba asetsembise tonkhe letintfo letinhle kangaka, kukuhlakanipha ngatsi kutsi sitibute naku: Vele kungenteka yini kutsi bantfu baphile phakadze kulomhlaba lolipharadisi lesetsenjiswe wona? Yini lokufanele siyente kute sizuze kulesetsembiso saNkululnkulu? Kulamakhasi lalandzelako alomagazini, utawutfola timphendvulo talemibuto.