Ngendlela lefanako, sonkhe siphila esikhatsini lapho kutawugadla khona “siphepho lesibi” leso Jesu latsi ‘sikuhlupheka lokukhulu.’ (Matewu 24:21) Angeke nje simane sikubalekele lokuhlupheka. Kepha kukhona lesingakwenta kuze sitivikele. Singentani?

ENshumayelweni yakhe yaseNtsabeni, Jesu Khristu waniketa nasi sicondziso: “Chubekani nifuna kucala uMbuso waNkulunkulu nekulunga kwakhe.” (Matewu 6:33) Sikwenta kanjani loko?

Funa uMbuso waNkulunkulu kucala. Loku kusho kutsi kufanele sitsatse uMbuso waNkulunkulu njengalobaluleke kwendlula nobe ngabe yini lenye. (Matewu 6:25, 32, 33) Leni? Ngobe bantfu bayehluleka kucatulula tinkinga letikhona emhlabeni. NguMbuso waNkulunkulu kuphela longakhona kukwenta loko.

Funa kulunga kwakhe. Kufanele sente konkhe lokusemandleni etfu kute siphile ngemitsetfo nangetimiso taNkulunkulu. Leni? Ngobe nasitikhetsela lokulungile nalokungakalungi, umphumela ungaba mubi kakhulu. (Taga 16:25) Kepha nasiphila ngetimiso taNkulunkulu, sisuke singajabulisi yena kuphela, kodvwa natsi siyazuza.​—Isaya 48:17, 18.

Chubeka ufuna kucala uMbuso waNkulunkulu nekulunga kwakhe. Jesu wecwayisa ngekutsi labanye bangase baphatamiseke, bese bacabanga kutsi bangasindza nabangaba nemali lenyenti. Labanye bangase bavumele tintfo lebakhatsatako  ekuphileni kutsi tibacindzetele kakhulu batikhandze sebete sikhatsi sekufuna uMbuso waNkulunkulu kucala.​—Matewu 6:19-21, 25-32.

Kunaloko, Jesu wetsembisa kutsi labo labasekela uMbuso waNkulunkulu batawutfola labakudzingako nyalo futsi bajabulele tibusiso letingapheli esikhatsini lesitako.​—Matewu 6:33.

Ngisho noma bafundzi baJesu bangelikhulu lekucala bafuna uMbuso waNkulunkulu kucala kanye nekulunga kwakhe, Buhlungu nekuhlupheka akuzange kuphele basaphila. Kodvwa bebavikelekile. Kanjani?

Bebaphila ngetimiso taNkulunkulu letilungile, futsi loko kwabavikela etinkingeni letehlela labo labangazange bakulalele loko lokwashiwo nguNkulunkulu. Kukholwa kwabo lokucinile kutsi loMbuso utawuta, kwabasita bakhona kumelana netinkinga letimatima kakhulu ekuphileni kwabo. Nkulunkulu waphindze wabanika “emandla lamakhulu kakhulu” kuze bakhone kubeketela.​—2 KubaseKhorinte 4:7-9.

EmaKhristu angelikhulu lekucala awulalela umyalo waJesu wekufuna uMbuso kucala. Amemetela tindzaba letimnandzi teMbuso endzaweni labehlala kuyo ngaleso sikhatsi. (KubaseKholose 1:23) Bakhona yini labakwentako loko lamuhla?

Yebo! BoFakazi BaJehova bayabona kutsi sesincane sikhatsi lesesisele sekutsi uMbuso waNkulunkulu ucedze lelive laSathane. Ngako benta konkhe lokusemandleni abo kute baphile ngemavi aJesu latsi: “Letindzaba letimnandzi teMbuso tiyawushunyayelwa emhlabeni wonkhe, kuze tiviwe ngito tonkhe tive, bese-ke kuphela kuyefika.”​—Matewu 24:14.

Utawusabela njani kuletindzaba letimnandzi? Sicela ulingise bantfu bangelikhulu lekucala baseMasedoniya leseBheriya. Batsi nabeva tindzaba letimnandzi teMbuso kumphostoli Pawula, batemukela ‘ngekulangatelela lokukhulu.’ “Bahlolisisa imiBhalo” kute bacinisekise lebebakuvile, futsi base benta njengobe bafundzile.​—Imisebenti 17:11, 12.

Nawe ungenta lokufanako. Ngekufuna uMbuso waNkulunkulu kucala kanye nekulunga kwakhe, ungavikeleka kwanyalo uphindze ujabulele kuthula nekulondzeka kwaphakadze esikhatsini lesitako.