LUZIA LOWACHWALA UMLENTE WANGASENCELE. Waba navendle kusukela sesemncane, lokusifo lesitsatselwanako lesihlasela imisipha lesemtimbeni. Nakaneminyaka lengu-16, lomunye make lobekasetjentelwa ngu-Luzia watsi: “Nkulunkulu ukujezise ngekuchwala ngobe bewungamhloniphi make wakho futsi wenta tintfo letingamjabulisi.” Ngekuhamba kweminyaka, Luzia abesolo ayikhumbula indlela lativa ngayo.

NGESIKHATSI DAMARIS ATFOLA KUTSI UNESIFO SEMDLAVUZA WEBUCOPHO, babe wakhe wambuta watsi: “Wenteni uze ube nje? Kungenteka wente intfo lembi kakhulu. Kungako Nkulunkulu akujezisa.” Damaris weva buhlungu kakhulu ngalamavi.

Eminyakeni leminyenti leyendlulile, bantfu bebavele bacabanga kutsi bajeziswa nguNkulunkulu. Incwadzi i-Manners and Customs of Bible Lands itsi bantfu labanyenti ngesikhatsi Jesu aseselamhlabeni, bebakholelwa kutsi kugula bekubangelwa sono umuntfu logulako lasentile nekutsi bekuyindlela lajeziswa ngayo.” Eminyakeni yabo-1000 AD kuya ku-1400 AD, i-Medieval Medicine and the Plague yatsi “labanye bantfu bakholelwa kutsi Nkulunkulu wasebentisa tifo kute abajezise ngetono tabo.” Nkulunkulu bekajezisa bantfu lababi yini ngesikhatsi kufa tigidzi tebantfu, tibulawa sifo lesingumashaya bhuce eYurophu ngelikhulu lesi-14 leminyaka? Kungenteka yini kutsi lesifo sabangelwa ligciwane lelitsite, njengobe kusho bacwaningi betekwelapha? Labanye bayatibuta kutsi Nkulunkulu usebentisa kugula yini kute ajezise bantfu ngenca yetono labatentile? a

CABANGA NGALOKU: Nangabe kugula nekuhlupheka bekusijeziso lesifanele lesivela kuNkulunkulu, pho kungani Jesu iNdvodzana yakhe elapha bantfu labagulako? Loko bekungeke yini kusho kutsi ukubukela phansi kulunga kwaNkulunkulu? (Matewu 4:23, 24) Jesu bekangeke amelane netento taNkulunkulu. Watsi: “Ngihlale ngenta tintfo letimjabulisako” futsi “ngenta njengobe nje Babe angiyalile.”​—Johane 8:29; 14:31.

Loko lokushiwo liBhayibheli kuyacaca nakutsi Nkulunkulu Jehova ‘akakwenti lokubi.’ (Dutheronomi 32:4) Nasi sibonelo, Nkulunkulu bekangeke ente kutsi indiza iphihlike futsi ibulale emakhulu ebantfu labangenacala ngobe nje afuna kujezisa umuntfu munye logibele kuyo. Ngenca yekutsi Nkulunkulu ulungile, inceku yakhe lebeyetsembekile Abrahama yatsi, Nkulunkulu angeke ‘abhubhise labalungile kanye nalababi.’ Waze watsi: Loko akube “khashane” naye. (Genesisi 18:23, 25) LiBhayibheli liphindze litsi ‘Nkulunkulu akasuye umenti walokubi.’​—Jobe 34:10-12.

Nasihlupheka akusho kutsi Nkulunkulu usuke asijezisa. Jesu naye wayicacisa kahle lendzaba ngesikhatsi yena nebafundzi bakhe babona indvodza leyatalwa ingaboni emehlweni. “Bafundzi bakhe bambuta batsi: ‘Mfundzisi, ngubani lowona, ngiyo yini nobe batali bayo, kutsi ingaze italwe iyimphumphutse?’ Jesu watsi: ‘Lendvodza ayonanga, nebatali bayo nabo abonanga, kodvwa loku kwenteka khona bantfu batewubona imisebenti yaNkulunkulu.’”​—Johane 9:1-3.

Bafundzi baJesu kungenteka bamangala ngesikhatsi Jesu abetjela kutsi lendvodza kanye nebatali  bayo abazange sebone ngendlela lengabenta babe kulesimo. Jesu akazange elaphe lendvodza lengaboni nje kuphela, kodvwa waphindze walungisa tinkholelo letingemanga tekutsi Nkulunkulu ujezisa bantfu ngekuhlupheka. (Johane 9:6, 7) Bantfu labagula kamatima lamuhla bangatfola in-dvudvuto ngekwati kutsi Nkulunkulu akusuye lobabangela kutsi bagule.

ImiBhalo Iyasicinisekisa

• “Ngobe Nkulunkulu ngeke alingwe ngalokubi kantsi naye akalingi muntfu.” (JAKOBE 1:13) Ecinisweni tintfo letimbi letibangele bantfu kuhlupheka sikhatsi lesidze lokufaka ekhatsi kugula, buhlungu nekufa, kutawuphela kudze madvute.

• Jesu Khristu “welapha bonkhe lebebagula.” (MATEWU 8:16) Ngesikhatsi iNdvodzana yaNkulunkulu yelapha bonkhe labagulako, yakhombisa loko uMbuso waNkulunkulu lotakufeza emhlabeni wonkhe.

• “[Nkulunkulu] utawesula tonkhe tinyembeti emehlweni abo, kufa ngeke kusaba khona, nekulila, nekukhala kanye nebuhlungu, ngeke kusaba khona. Tintfo letindzala setendlulile.”​—SEMBULO 21:3-5.

Pho kungani bantfu beva buhlungu futsi bahlupheka? Bantfu sebanesikhatsi lesidze solo batibuta lombuto. Nangabe kungasuye Nkulunkulu, pho ngubani? Timphendvulo talemibuto titawuphendvulwa esihlokweni lesilandzelako.