Nkulunkulu udale imitimba yetfu ngendlale yekutsi ikhone kutelapha. Nangabe ulimala, umtimba “ucala kwenta intfo lesimanga kute upholise silondza.” (njengekusho kwe-Johns Hopkins Medicine) Ngekushesha lomtimba wenta lokutsite kute uvimbe kopha, uvule imitsambo, kancane kancane uphotise lesilondza futsi usivale.

CABANGA NGALOKU: Nangabe uMdali adala imitimba yetfu ngendlela yekutsi ikhone kupholisa tilondza, singaciniseka kutsi utasisita selulame nangabe kunentfo lesihluphako. Umhlabeleli wabhala watsi: “Labanetinhlitiyo letephukile uyabaphilisa, abophe emanceba abo.” (Tihlabelelo 147:3) Nangabe sikhatsatwa tintfo letitsite, singaciniseka njani kutsi Jehova utasisita selulame, nyalo nasesikhatsini lesitako?

Nkulunkulu utsi: “Ngako-ke ungesabi, ngobe mine nginawe; ungajabhi, ngobe mine nginguNkulunkulu wakho. Ngitakucinisa ngikusite.” (Isaya 41:10) Nangabe umuntfu ati kutsi Jehova uyamnakekela akakhatsateki ngalutfo futsi uyakhona kumelana netinkinga letinyenti. Umphostoli Pawula watsi nawungakhatsateki ngalutfo usuke unekuthula “kwaNkulunkulu lokwendlula konkhe kucondza.” Waphindze watsi: “Ngobe nginemandla kuto tonkhe tintfo ngenca yaloyo longipha emandla.”​—Filiphi 4:4-7, 9, 13.

ImiBhalo isisita sicinise kukholwa kwetfu mayelana naloko Jehova lasetsembise kona ngelikusasa. Nasi sibonelo, Sembulo 21:4, 5 (locashunwe ekhasini lelilandzelako) usitjela loko Jehova latakwenta nekutsi kungani kufanele setsembe kutsi utawukwenta:

• “Utawesula tonkhe tinyembeti emehlweni” ebantfu. Jehova utakucedza konkhe kuhlupheka nekukhatsateka, ngisho nobe loko kungabonakala kungasho lutfo kulabanye.

• “Loyo lohleti esihlalweni sebukhosi” ezulwini, iNkhosi Lephakeme leyadala tonkhe tintfo itawusebentisa emandla ayo neligunya kute icedze kuhlupheka futsi yenetise tonkhe tidzingo tetfu.

• Jehova uyasicinisekisa kutsi tetsembiso takhe ‘tetsembekile futsi tiliciniso.’ Lokusho kutsi kwati inchazelo yelibito lakhe nekutsi ungumuntfu lonjani kusenta siciniseke kutsi utasigcina setsembiso sakhe.

“‘Utawesula tonkhe tinyembeti emehlweni abo, kufa ngeke kusaba khona, nekulila, nekukhala kanye nebuhlungu, ngeke kusaba khona. Tintfo letindzala setendlulile. Loyo lohleti esihlalweni sebukhosi watsi: ‘Buka, ngenta tonkhe tintfo tibe tinsha.’ Waphindze watsi: ‘Bhala ngobe lamavi etsembekile futsi aliciniso.’”​—Sembulo 21:4, 5.

Konkhe lokudaliwe lesikubonako kanye neliBhayibheli kokubili kuveta buntfu baBabe wetfu losezulwini. Nanobe indalo isikhutsata kutsi sibe bangani naNkulunkulu, liBhayibheli lona lisitjela ngalokucondzile nalitsi: “Sondzelani kuNkulunkulu, naye utawusondzela kini.” (Jakobe 4:8) Imisebenti 17:27 itsi: Akekho “khashane kuloyo naloyo kitsi.”

Njengobe uchubeka umati kahle Nkulunkulu, utawuciniseka kutsi ‘uyakukhatsalela.’ (1 Phetro 5:7) Ngutiphi tinzuzo lesititfolako nasetsembela kuJehova?

Cabanga ngaToru wase-Japan. Wakhuliswa ngumake longuFakazi kodvwa wajoyina licembu letigebengu lelatiwako e-Japan. Nakachaza watsi: “Bengicabanga kutsi Nkulunkulu uyangenyanya futsi bengiva shengatsi kufa kwetihlobo tami nalebengisondzelene nabo bekusijeziso lesivela kuye.” Toru uze utsi indzawo lembi lebekahlala kuyo nendlela lebekacabanga ngayo, ngiyo leyamenta “waba nelunya futsi waba bete ngisho neluvelo.” Ngenca yesifiso sakhe sekufuna kwatiwa kakhulu, nakakhumbula utsi: “Ngeva shengatsi ngingafa ngemuva kwekutsi ngibulale lomunye lobekadvume kakhulu kwendlula mine.”

 Nanobe kunjalo, ngemuva kwekutsi Toru nemfati wakhe Hannah sebafundze liBhayibheli, Toru wenta lushintjo lolukhulu ekuphileni kwakhe nasendleleni bekabukeka ngayo. Hannah utsi: “Ngatibona kahle tingucuko kumyeni wami.” Toru usho ngekuciniseka nakatsi: “Nkulunkulu usikhatsalela mbamba. Akafisi kutsi kufe ngisho namunye wetfu futsi utimisele kubacolela labo labaphendvuka ngebucotfo etonweni tabo. Ulalela ngisho netintfo lesititjela yena kuphela kanye netintfo letingeke ticondvwe ngunobe ngabe ngubani. Sekusedvute kutsi Jehova acedze tonkhe tinkinga, kuhlupheka kanye nebuhlungu. Ngisho namanje, usisita ngendlela lesingeke size siyichaze. Uyasikhatsalela futsi ufuna sihlale sijabulile.”​—Tihlabelelo 136:23.

Njengobe sifundza endzabeni yaToru, siyati kutsi ngekushesha Nkulunkulu utawucedza konkhe kuhlupheka futsi esule tinyembeti. Usiniketa nelitsemba ngelikusasa aphindze asisite siphile imphilo lencono nyalo. Nobe live ligcwele kuhlupheka, kodvwa kuyasizuzisa kutsandvwa nguNkulunkulu.