Luvelo “likhono umuntfu lanalo lekuvelana nalomunye umuntfu nobe kutifaka eticatfulweni temuntfu losesimeni lesitsite.” Dr.  Rick Hanson losati sekusebenta kwengcondvo, wachaza kutsi “kuvelana nalabanye kuyintfo lesitalwa nayo.”

CABANGA NGALOKU: Kungani sinelikhono lekuvelana nalabanye, lokuyintfo lengekho etilwaneni? LiBhayibheli lachaza kutsi Nkulunkulu wadala bantfu ngemfanekiso wakhe. (Genesisi 1:26) Sidalwe ngemfanekiso waNkulunkulu, lokusenta sikhone kulingisa buntfu bakhe ngelizinga lelitsite. Luvelo lwenta bantfu bakhone kusita labanye, loku bakwentiswa kutsi basuke balingisa uMdali wabo Jehova loneluvelo.​—Taga 14:31.

Nkulunkulu uyavelana natsi futsi uva buhlungu nasihlupheka. Mayelana nesive sema-Israyeli asendvulo lesabeketelela kugcilatwa kabuhlungu eGibhithe, saphindze sabeketelela bumatima iminyaka lengu-40 ehlane, liBhayibheli litsi: “Kuko konkhe kukhatsateka kwabo naye abekhatsatekile.” (Isaya 63:9) Naka kutsi Nkulunkulu bekangati nje ngekukhatsateka kwabo kuphela kodvwa bekabuva nebuhlungu lebebabuva. Watsi: “Ngiyakwati kuhlupheka kwabo.” (Eksodusi 3:7) Nkulunkulu watsi: “Umuntfu lotsintsa nine utsintsa inhlavu yeliso” lami. (Zakhariya 2:8) Nangabe labanye basivisa buhlungu, naye uva buhlungu.

Nangabe sitiva ngatsi silahliwe futsi sicabange kutsi luvelo lwaNkulunkulu alusifaneli, liBhayibheli liyasicinisekisa ngoba litsi: “Nkulunkulu mkhulu kakhulu kunetinhlitiyo tetfu, futsi wati tonkhe tintfo.” (1 Johane 3:19, 20) Nkulunkulu usati kwendlula indlela lesitati ngayo. Ngenca yekutsi uyavelana natsi, utati tonkhe timo lesikuto, indlela lesicabanga ngayo kanye nendlela lesitiva ngayo.

 ImiBhalo iyasicinisekisa

• “Uyawumemeta, Simakadze akuphendvule, uyawukhala ucele lusito, atsi yena: ‘Ngilapha’”​—ISAYA 58:9.

• “‘Ngobe ngiyawati emasu lenginawo ngani, yebo, emasu ekuniphumelelisa, hhayi ekunilimata, emasu ekuninika litsemba nelikusasa. Niyawube seniyangibita-ke nite nitewuthandaza kimi, mine ngiyawuniva.’”​—JEREMIYA 29:11, 12.

• “Yetsa tinyembeti tami egabheni lakho, atikabhalwa yini encwadzini yakho?”​—TIHLABELELO 56:8.

Kwati kutsi Nkulunkulu uyavelana natsi kungasisita yini kutsi sikhone kulwisana netinkinga? Cabanga ngaloko lokwenteka ku-Maria:

Utsi: “Ngeva ngatsi kuphila kumatima futsi ngilahliwe ngesikhatsi ngifelwa yindvodzana yami lebeyineminyaka lengu-18 budzala ngemuva kwekushukwa sifo semdlavuza iminyaka lemibili. Ngamtfukutselela Jehova ngekutsi wangibukelela futsi wangayisiti lendvodzana yami!

Ngemuva kweminya lesitfupha, umngani wami longitsandzako lebengikanye naye ebandleni wangilalela ngesikhatsi ngimtjela kutsi Jehova akangitsandzi. Wangilalelisisa wase ucaphuna livesi lelangitsintsa kakhulu leliku-1 Johane 3:19, 20 leliltsi: “Nkulunkulu mkhulu kakhulu kunetinhlitiyo tetfu, futsi wati tonkhe tintfo.” Wachaza nekutsi Jehova uyasicondza simo lesikuso.

“Nanobe besekangichazele loko, kodvwa bengisolo ngimtfukutselele Jehova! Ngabese ngifundza Tihlabelelo 94:19 letitsi: ‘Ngesikhatsi inhlitiyo yami iphitsiteliswa yimicabango, kudvudvuta kwakho kuyawutfokotisa umphefumulo wami.’ Ngeva shengatsi lamavesi bekabhalelwe mine! Ekugcineni ngakubona kukahle kutsi ngitjele Jehova ngetinkinga tami, ngati kutsi uyangilalela nekutsi uyangicondza.”

Kuyasidvudvuta kwati kutsi Nkulunkulu uyasicondza futsi uyavelana natsi! Pho kungani kunekuhlupheka lokungaka? Kungenca yekutsi Nkulunkulu usijezisela tento tetfu letimbi yini? Kukhona yini Nkulunkulu latakwenta kute acedze konkhe kuhlupheka? Lemibuto itawuphendvulwa esihlokweni lesilandzelako.