TICABANGE ubukela lifilimu lelikhuluma ngemuntfu lodvumile nobe umhlabeleli lomtsandzako. Licala ngekumveta asemncane, asacala kufundzela kuhlabela, kanye nekutikhandla kwakhe alungiselela. Bese umbona ahamba emave ahlabela agcine asadvume umhlaba wonkhe. Ngemva kwaloko uvela sekagugile, naseliphela lelifilimu ubese uyafa.

Lelifimu alisiyo inganekwane kepha liyindzaba leyenteka mbamba, kumuntfu lowagcina afile. Nanobe lomuntfu abengumhlabeleli, angusosayensi, ayingijimi, nome lomunye nje umuntfu lowatiwako, siphetfo sendzaba besitawufana. Mhlawumbe kunyenti lokuhle lakufezile, kodvwa asewucabange kutsi ngabe kunyenti kangakanani labetakufeza ekuphileni kube bekute kuguga nekufa.

Singeva buhlungu nasikucabanga, kodvwa nguloko lokutakwenteka kitsi sonkhe. (Umshumayeli 9:5) Ngisho nome singentani, angeke sikubalekele kutsi sitawuguga siphindze sife. Ngetulu kwaloko, kuphila kungasheshe kushabalale ngengoti lengenteka singakayilindzeli noma kugula. Njengobe kuchazwe eBhayibhelini, sinjengenkhungu “leba khona sikhashana bese iyanyamalala.”—Jakobe 4:14.

Kulabanye kuphila kubonakala kute injongo, kungako babese batsi “asidleni sinatse, ngobe kusasa sitawufa.” (1 Khorinte 15:32) Kodvwa bantfu baphila ngalendlela ngobe bayati kutsi batakufa futsi bete litsemba ngelikusasa. Ngalesinye sikhatsi nasisetinkingeni singahle sitibute, ‘Kuphelela lana yini kuphila?’ Ungayitfola kuphi imphendvulo?

Bantfu labanyenti bakholelwa kutsi bososayensi ngibo labenemphendvulo. Bososayensi nabodokotela batfole likhambi lekwenta bantfu baphile sikhatsi lesidze. Labanye bososayensi bazama kutfola lelinye likhambi lekwenta kuphila kube kudze nakakhulu. Ngisho nobe bangaphumelela nobe cha, kepha solo siyatibuta kutsi: Kungani siguga futsi sifa? Likhona yini litsemba lekutsi kufa lokusitsa setfu kuyoke kuncotjwe? Letihloko letilandzelako titawucoca ngalendzaba tiphindze tiphendvule lombuto lotsi, Kuphelela lana yini kuphila?