Sitawuncotjwa Njani Sitsa Lesikufa?
NGISHO nome kungalaleli kwebatali betfu bekucala kwabangela bantfu kutsi babe nesono futsi bafe, loko akuzange kuyishintje injongo yaNkulunkulu ngebantfu. EVini lakhe liBhayibheli, Nkulunkulu uyasicinisekisa kutsi injongo yakhe ayikashintji.
-
“Labalungile bayawudla lifa lemhlaba, bahlale kulo kuze kube phakadze.”—Tihlabelelo 37:29.
-
“Amite kufa phakadze naphakadze. Somandla longuSimakadze uyawukwesula tinyembeti kubo bonkhe buso.”—Isaya 25:8.
-
“Njengesitsa sekugcina, kufa kutawukwentiwa lite.”—1 Khorinte 15:26.
-
“Kufa ngeke kusaba khona, nekulila, nekukhala kanye nebuhlungu, ngeke kusaba khona.”—Sembulo 21:4.
Nkulunkulu ‘utakumita njani kufa’ ente lesitsa lesikufa sibe “lite”? LiBhayibheli likubeka ngalokucacile kutsi ‘labalungile. . . batawuhlala kuze kube phakadze.’ Kodvwa liphindze litsi, “kute nome munye umuntfu lolungile emhlabeni lowenta lokuhle kuphela, kubete lakonako.” (Umshumayeli 7:20) Kuze ancobe kufa, Nkulunkulu kutawudzingeka kutsi angasatinaki yini timiso takhe? Loko ngeke kuze kwenteke! Akayuze akwente loko, ngoba ‘Nkulunkulu angeke acale emanga.’ (Thithusi 1:2) Yini Nkulunkulu latayenta kute afeze injongo yakhe yekudala bantfu?
NKULUNKULU “UTAWUMITA KUFA PHAKADZE.”—ISAYA 25:8
KUFA KUTAWUNCOTJWA NGEKUKHOKHA INHLAWULO
Jehova Nkulunkulu wenta lilungiselelo lekukhulula bantfu ekufeni, ngekutsi akhokhe inhlawulo. Inhlawulo yintfo lekhokhwako kute kwenanwe lokutsite kwelinani lelilingana naleyo nhlawulo. Njengobe bonkhe bantfu batoni futsi bangaphasi kwesigwebo sekufa, liBhayibheli litsi: “Impela kute umuntfu longahlenga umnakabo, nome-ke anike Nkulunkulu intsengo yemphilo yakhe. Ngobe phela kuhlengwa kwemphefumulo wakhe kubita kakhulu, kute intsengo lengakwenela.”—Tihlabelelo 49:7, 8.
Umuntfu nakafa, uyakhululwa etonweni takhe; akakhoni kutihlawulela tono takhe futsi angeke atihlawulele netalomunye umuntfu. (Roma 6:7) Sasidzinga umuntfu lote sono kutsi anikele ngekuphila kwakhe, kute ahlawulele tono tetfu hhayi tono takhe.—Hebheru 10:1-4.
Nguloko kanye Nkulunkulu lakuhlela. Watfumela iNdvodzana yakhe, Jesu, leyasuka ezulwini yeta emhlabeni yatalwa njengemuntfu lote sono. (1 Phetro 2:22) Jesu watsi ‘wetela kutewuba yinceku nekunikela ngemphefumulo wakhe kutsi ube yinhlawulo yalabanyenti.’ (Makho 10:45) Wafa kute ancobe lesitsa lesikufa, kuze sitfole kuphila.—Johane 3:16.
KUTAWUNCOTJWA NINI KUFA?
Lamuhla kugcwaliseka tiphrofetho teliBhayibheli, ngobe siphila etikhatsini “letibucayi lokumatima kubhekana nato,” lokubufakazi bekutsi siphila “emalangeni ekugcina” alelive lelibi lelibuswa nguSathane. (2 Thimothi 3:1) Lamalanga ekugcina atawuphela ngelilanga “lekwehlulelwa nelekubhujiswa kwebantfu labangamesabi Nkulunkulu.” (2 Phetro 3:3, 7) Kodvwa bantfu labatsandza Nkulunkulu batawusindza kulembhubhiso, babusiswe ‘ngekuphila lokuphakadze.’—Matewu 25:46.
Jesu wetela ‘kutewunikela ngemphefumulo wakhe kutsi ube yinhlawulo yalabanyenti.’—Makho 10:45
Tigidzi tebantfu titawujabulela kutfola kuphila lokuphakadze nasetivusiwe ekufeni. Jesu wavusa Lukha 7:11-15) Umphostoli Pawula wabhala watsi: “Nginelitsemba kuNkulunkulu . . . lekutsi kutawuba neluvuko lwalabalungile nalabangakalungi.” Lelitsemba liyiveta ngalokucacile indlela Nkulunkulu lasitsandza ngayo.—Imisebenti 24:15.
umuntfu lotsite ekufeni ngesikhatsi avakashele eNayini. Umfelokati lotsite abefelwe yindvodzana yakhe lekuphela kwayo, ngako Jesu, ‘wamhawukela’, wavusa lendvodzana yakhe. (Tigidzi tebantfu tingakubuka ngalabovu kuphila phakadze. LiBhayibheli litsi: “Labalungile bayawudla lifa lemhlaba, bahlale kulo kuze kube phakadze.” (Tihlabelelo 37:29) Ngaleso sikhatsi bayawujabula kakhulu futsi bakhutsateke ngenca yekufezeka kwemavi emphostoli Pawula lawabhala eminyakeni lengu-2 000 leyengcile latsi: “Kufa, kuphi kuncoba kwakho? Kufa, luphi ludvonsi lwakho?” (1 Khorinte 15:55) Kufa lokusitsa lesikhulu sebantfu, kutawube sekuncontjiwe!