Sadalwa Kutsi Siphile Phakadze
BONKHE bantfu bafuna kuphila sikhatsi lesidze futsi bahlale bajabulile. Cabanga kutsi bekutawuba mnandzi njani kube bantfu bebaphila phakadze, bangasaguli futsi sebahlala bajabulile. Besitawucitsa sikhatsi lesinyenti nebantfu lesibatsandzako, siye noma kuphi lapho sitsandza khona, sifundze emakhono lamasha, sati tintfo letinyenti futsi sente noma ngabe yini lesiyitsandzako.
Yintfo lengakavami yini kutiva ngalendlela? Kungani bantfu bafuna kuphila phakadze? ImiBhalo isitjela kutsi Nkulunkulu ufake leso sifiso etinhlitiyweni tetfu. (Umshumayeli 3:11) Iphindze itsi “Nkulunkulu ulutsandvo.” (1 Johane 4:8) Kunengcondvo yini kutsi Nkulunkulu lonelutsandvo angasidala sinesifiso sekuphila phakadze bese wenta leso sifiso singasafezeki?
Liciniso, kute lofuna kufa. Ngetulu kwaloko, liBhayibheli lichaza kufa “njengesitsa.” (1 Khorinte 15:26) Labanye bafa babancane, labanye bafa babadzala, kodvwa ekugcineni wonkhe muntfu uyafa. Bantfu labanyenti bayesaba nabacabanga ngekufa. Lesitsa siyoke sincotjwe yini? Kungenteka yini loko?
BUFAKAZI LOBUNIKETA LITSEMBA
Akukumangalisi yini kwati kutsi bekungasiyo injongo yaNkulunkulu kutsi bantfu bafe? Incwadzi yaGenesisi iniketa bufakazi bekutsi bekuyinjongo yaNkulunkulu kutsi bantfu baphile phakadze. Jehova Nkulunkulu wadala umhlaba unako konkhe lobekutawudzingwa bantfu kute baphile futsi bajabule. Wabese udala umuntfu wekucala, lokungu-Adamu, wambeka engadzeni yase-Edeni, lebeyilipharadisi. Ngemuva kwaloko “Nkulunkulu wakubona konkhe labesakwentile, kutsi kuhle kakhulu.”—Genesisi 1:26, 31.
Adamu wadalwa ete sono, angumfanekiso waNkulunkulu. (Dutheronomi 32:4) Nemfati wa-Adamu, lokungu-Eva, bekangenasici futsi ete sono. Jehova watsi kubo: “Talanani, nandze, nigcwalise umhlaba, niwuncobe. Nibuse etikwetinhlanti taselwandle, nasetikwetinyoni tasemoyeni, nasetikwato tonkhe tilwane letihamba emhlabeni.”—Genesisi 1:28.
Isaya 45:18) Kunengcondvo yini kucabanga kutsi Jehova abenganika bo-Adamu na-Eva lelotsemba, kube abefuna baphile sikhashana nje, kuze babone bantfwana babo kanye nebatukulu bese kuphelela lapho?
Bekutabatsatsa sikhatsi kugcwalisa umhlaba ngentalelwane yabo. Eva abetawutala bantfwana, nalabantfwana bakhe batale bantfwana kuze kube ngulapho umhlaba sewugcwele bantfu njengobe Nkulunkulu abehlosile. (Cabanga nangekutsi bekufanele batfotjelwe natilwane. Adamu watjelwa kutsi etse tilwane emagama, futsi loko bekutamtsatsa sikhatsi lesidze. (Genesisi 2:19) Kuze timtfobele bekufanele adadishe indlela yato yekuphila, atewukwati kutsi angatinakekela njani. Loko bekutawutsatsa sikhatsi lesidze kakhulu.
Lemiyalo yaNkulunkulu yekutsi bagcwalise umhlaba futsi batfotjelwe natilwane ibufakazi bekutsi bantfu bekucala bebadalwe ngendlela yekutsi baphile sikhatsi lesidze. Ecinisweni, Adamu waphila sikhatsi lesidze kakhulu.
NKULUNKULU UFUNA KUTSI BANTFU BAPHILE PHAKADZE EMHLABENI LOLIPHARADISI
BAPHILA SIKHATSI LESIDZE
Adamu, waphila iminyaka lengu-930
Methusela, waphila iminyaka lengu-969
Nowa, waphila iminyaka lengu-950
Lamuhla, siphila iminyaka lengu-70 kuya kulengu-80
LiBhayibheli liveta kutsi bantfu bebaphila sikhatsi lesidze kunaleso lesisiphila lamuhla. Litsi: “Adamu wafa asaneminyaka lengema-930.” Liphindze livete lamanye emadvodza lasitfupha laphila iminyaka lengetulu kwa-900. Lamadvodza bekuboSethi, Enoshi, Khenani, Jaredi, Methusela naNowa. Bonkhe baphila ngaphambi kwaZamcolo, futsi Nowa besekaphile iminyaka lengu-600 ngaphambi kwekutsi kufike Zamcolo. (Genesisi 5:5-27; 7:6; 9:29) Yini leyabenta baphila sikhatsi lesidze kangaka?
Onkhe lamadvodza atalwa kungakapheli sikhatsi lesidze bo-Adamu na-Eva basaphila bete sono. Kungenteka nguleso sizatfu lesabenta baphila sikhatsi lesidze. Kuba bete sono kuhlobana njani nekuphila imphilo lendze? Kutawuncotjwa njani kufa? Kute sitfole timphendvulo, kufanele sicale sicondze kutsi kungani sifa.