Nkulunkulu watsi ku-Adamu: “Mhlazana usidla, uyakufa nekufa.” (Genesisi 2:17) Lomyalo bewungeke udzingeke kube Adamu bekadalwe ngendlela yekutsi abetawuguga aphindze afe. Adamu bekati kutsi nakangasidli lesitselo salesihlahla, abengeke afe.

Bo-Adamu na-Eva bebangadzingi kudla kulesihlahla kute bachubeke baphila, ngobe lensimu beyinetihlahla letinyenti lebetitsela titselo. (Genesisi 2:9) Ngekungadli kwabo kulesihlahla, labantfu bekucala bebatawukhombisa kutsi bayamlalela Loyo lowabanika kuphila. Bekutawuphindze kukhombise kutsi bayavuma kucondziswa nguNkulunkulu.

Kuze sicondze kutsi kungani bo-Adamu na-Eva bafa, kudzingeka sihlole incociswano lesitsintsa sonkhe. Sathane Develi wasebentisa inyoka kute endlulisele umlayeto longemanga lamabi. Kulandzisa kweliBhayibheli kutsi: “Inyoka yayinebucili kwendlula tonkhe tilwane tesiganga labetentile Nkulunkulu Simakadze. Yatsi kumfati: Kodvwa ngempela Nkulunkulu ushito yini kutsi: ‘Ningadli nome ngusinye nje sitselo setihlahla letisensimini?’”—Genesisi 3:1.

Eva wayiphendvula watsi: “Singatidla titselo tetihlahla letisensimini, ngaphandle kwesitselo sesihlahla lesisekhatsi nensimi; Nkulunkulu utsite: ‘Ningasidli sitselo sesihlahla lesisekhatsi nensimi, ningasitsintsi nekusitsintsa, kuze ningafi.’” Inyoka yatsi kuye: “Ningeke nife. Kepha Nkulunkulu uyati kutsi mhlazana nisidla, emehlo enu ayawuvuleka, bese nifanana naNkulunkulu nikwati lokuhle nalokubi.” Ngekusho njalo, Sathane abetsi Jehova ungumcambimanga lobekafihlela bo-Adamu na-Eva lokuhle.—Genesisi 3:2-5.

Eva wakukholelwa loko. Wasibuka lesihlahla. Wasibona sisihle futsi sihawukeleka! Wase ukha sitselo, wasidla. LiBhayibheli lichubeka litsi: “Wanika nendvodza yakhe, nayo yadla.”—Genesisi 3:6.

Cabanga nje kutsi kwamvisa buhlungu kangakanani Nkulunkulu kubona bantfwabakhe bangamlaleli ngemabomu! Yini layenta? Ku-Adamu Jehova watsi: Utawubuyela “emhlabatsini, ngobe vele watsatfwa kuwo; njengobe ulutfuli, uyawubuyela elutfulini.” (Genesisi 3:17-19) Ngenca yaloko, “Adamu wafa asaneminyaka lengema-930.” (Genesisi 5:5) Adamu akazange aye ezulwini noma kulenye indzawo yemoya. Abengekho ngaphambi kwekutsi Jehova amdale ngemhlabatsi. Ngako nakafa, wagucuka waba ngulolutfuli lakhiwa ngalo. Wavele wangasabi khona. Loko kwaba buhlungu!

Ngenca yekungalaleli kwabo ngemabomu, bo-Adamu na-Eva balahlekelwa kuba bete sono kanye nelitsemba lekuphila phakadze. Umtimba wabo washintja; baba bantfu labanesono. Kodvwa sono sabo sekungalaleli asigcinanga ngekutsintsa bona bodvwa. Lesono basendlulisela nasentalelwaneni yabo. Umbhalo waRoma 5:12 utsi: “Ngako-ke ngemuntfu munye [Adamu] sono sangena eveni, nekufa kwangena ngesono, ngenca yaloko kufa kwasakatekela kubo bonkhe bantfu ngobe bonkhe bonile.”

LiBhayibheli lichaza sono nekufa njengesimbonyo “lesisibekele tonkhe tive, nalendvwangu lembonye tonkhe tive.” (Isaya 25:7) Lesimbonyo sisibekele bonkhe bantfu njengenkhungu lengushevu lesingeke sikhone kuyibalekela. Kuliciniso kutsi “ku-Adamu bonkhe bayafa.” (1 Khorinte 15:22) Kuphakama umbuto, lowabutwa nangumphostoli Pawula lotsi: “Ngubani lotangikhulula kulomtimba lofako?” Ukhona yini vele lotasikhulula?—Roma 7:24.