IMETAMO YEKULISHINTJA: LiBhayibheli lasindza etintfweni lebetingalona nakubantfu labebangalifuni. Kodvwa labanye babhali nebahumushi betamile kushintja umlayeto walo. Ngaletinye tikhatsi betame kwenta umlayeto weliBhayibheli kutsi uvumelane netimfundziso tabo esikhundleni sekwenta timfundziso tabo tivumelane nalokushiwo liBhayibheli. Nati tibonelo taloko:

• Indzawo yekukhontela: Ngelikhulu lesine nelesibili leminyaka B.C.E., babhali be-Samaritan Pentateuch *, ku-Eksodusi 20:17 bengeta emagama latsi “e-Aargaareezem. Kufanele wakhe lilati.” Ngekwenta njalo, emaSamariya abefise kwenta imiBhalo isekele kwakhiwa kwelithempeli ‘e-Aargaareezem’ noma eNtsabeni iGerizimu.

• Imfundziso yamutsatfu-amunye: Kungakapheli neminyaka lengu-300 liBhayibheli libhaliwe, umbhali losekela imfundziso yamtsatfu-amunye wengeta emavi embhalweni wa-1 Johane 5:7, latsi: “Ezulwini kunaBabe, kunaLivi futsi kunaMoya Longcwele: akusikutsatfu kodvwa kunye.” Lamavi abengekho sanhlobo emibhalweni yekucala. Bruce Metzger losati seliBhayibheli, utsi: “Kusukela ngelikhulu lesitfupha leminyaka kuchubeke, lamavi abevela kanyenti emibhalweni yesandla yakadzeni yelulwimi lwesiLathini naku-Vulgate [yesiLathini].”

• Ligama laNkulunkulu: Inkholelo yemaJuda yenta bahumushi labanyenti beliBhayibheli balisusa ligama laNkulunkulu emiBhalweni. Esikhundleni salo bafaka emagama lanjengalatsi “Nkulunkulu” nobe “Nkhosi.” Lamagama akhona eBhayibhelini kodvwa awasebenti kuMdali kuphela aphindze asetjentiswe nakubantfu, etithicweni ngisho nakuDeveli imbala.​—Johane 10:34, 35; 1 Khorinte 8:5, 6; 2 Khorinte 4:4. *

LASINDZA NJANI LIBHAYIBHELI?: Ekucaleni labanye babhali beliBhayibheli bebakhohlakele futsi banganaki  kodvwa labanyenti bebanelikhono futsi banakisisa. Emkhatsini welikhulu lesitfupha nelelishumi C.E., ema-Masorete abhala imbhalo leseyatiwa ngekutsi yimibhalo yema-Masorete ayisusela emiBhalweni yesiHebheru. Kutsiwa abebala emagama netinhlavu tawo kute aciniseke kutsi kute emaphutsa lawentile. Nakabona liphutsa emibhalweni yawo abelibhala phansi. Ema-Masorete awazange akushintje lokuseBhayibhelini. Professor Moshe Goshen-Gottstein wabhala watsi: “Kukushintja ngenhloso loko lokushiwo liBhayibheli bekulicala lelibovu kuma-Masorete.”

Kwesibili, imibhalo yesandla leminyenti isita tati teliBhayibheli kutsi tikhone kubona emaphutsa lakhona kulamanye emaBhayibheli. Nasi sibonelo: Bafundisi bebasolo bafundzisa kutsi lihumusho labo lesiLathini lifana ncamashi nemibhalo yekucala. Kodvwa ku-1 Johane 5:7 babese bengeta emavi laliphutsa benta shengatsi abekhona kulemibhalo kute basekele imfundziso yamtsatfu-amunye lesike sakhuluma ngayo kulesihloko. Lamavi laliphutsa afakwa ngisho naseBhayibhelini lesiNgisi i-King James Version. Yini leyavetwa nguleminye imibhalo yesandla leyatfolakala? Bruce Metzger wabhala watsi: “Lamavi lengetwe [ku-1 Johane 5:7] awatfolakali emibhalweni yesandla yakadzeni (yaseSiriya, yaseGibhithe, yase-Armenia, yaseTopiya, yase-Arabiya, yaseYurophu), ngaphandle kwaseBhayibhelini lesiLathini.” Umphumela ube kutsi lamavi laliphutsa awasatfolakali kuma-King James Version labuketiwe kanye nakulamanye emaBhayibheli.

Imibhalo yesandla yakadzeni iyakufakazela yini kutsi umlayeto weliBhayibheli wasindza kubantfu lebebafuna kuwushintja? Nakutfolakala iMiculu yaseLwandle Lolufile nga-1947, tati teliBhayibheli besetingakhona kucatsanisa lemibhalo yesiHebheru yema-Masorete naloko lokusemiculwini yeliBhayibheli lebesekuphele iminyaka lengetulu kwenkhulungwane yabhalwa. Lelinye lilunga lebahleli balemiculu leyatfolakala eLwandle Lolufile, lephetsa ngekutsi umculu munye nje “uniketa bufakazi lobungeke buphikwe bekutsi imibhalo yesandla yeliBhayibheli leyabhalwa ngemaJuda eminyakeni lecishe ibe ngetulu kwenkhulungwane leyengcile, ayibhala ngekwetsembeka nangekunakisisa.”

Umtapo wetincwadzi loseDublin, e-Ireland, i-Chester Beatty unema-papyrus lacishe abe nato tonkhe tincwadzi temiBhalo yemaKhristu yesiGriki, lefaka ekhatsi imibhalo yesandla yangelikhulu lesibili C.E. leyabhalwa eminyakeni lecishe ibe ngu-100 liBhayibheli libhaliwe. I-The Anchor Bible Dictionary, itsi: “Nanobe titinyenti tintfo letinsha letibhalwe kuma-Papyrus, umlayeto lobhalwe kuwo wetsembekile futsi uvumelana nemibhalo yasekucaleni.”

UBE YINI UMPHUMELA?: Esikhundleni sekutsi budzala kanye nebunyenti balemibhalo yesandla buwone umlayeto weliBhayibheli, buwutfutfukisile. Nakakhuluma ngemiBhalo YemaKhristu YesiGriki, uMnumzane Frederic Kenyon watsi: “Kute lenye incwadzi yakadzeni lenebufakazi lobunyenti kangaka futsi kute sati lesingaphika kutsi umlayeto weliBhayibheli lesinawo nyalo wetsembekile.” Aphawula ngemiBhalo yesiHebheru, William Henry Green losati utsi: “Kungashiwo kufanele kutsi kute lenye incwadzi lendzala kangaka lebhalwe ngekwetsembeka.”