“Ngabona sihlalo sebukhosi sisendzaweni yaso ezulwini, kunalohleti kuso. Loyo lohleti kuso ufanana nelitje lejasiphi, nelitje lelibovu leliligugu, futsi sihlalo sebukhosi situngeletwe ngumushi wenkosazana lonjengesimaragidu.”​—Sembulo 4:2, 3.

“Abetungeletwe kukhanya lokumanyatelako. Lokukhanya kwakumtungeletile njengemushi wenkosazana ubonakala emafini, ngelilanga lekuna kwemvula. Loku bekukubonakala lokwakubonakalisa bukhosi baSimakadze.”​—Hezekeli 1:27, 28.

Lemibono leyabonwa ngumphostoli Johane kanye nemphrofethi Hezekiya ibuchaza kahle buhle lobumangalisako baNkulunkulu Losetikwako Konkhe, longuJehova. Lobuhle bakhe buchazwa ngetintfo lesingakhona kuticabanga​—ematje lacwebetelako, umushi wenkosazana kanye nesihlalo sebukhosi. Lemibono isitjela ngebuhle lobumangalisako baJehova nangekukhatimula kwakhe.

Lendlela Nkulunkulu lachazwa ngayo ivumelana kahle nemavi emhlabeleli latsi: “Simakadze mkhulu, ufanele kudvunyiswa kakhulu, ufanele kwesatjwa kunabo bonkhe bonkulunkulu. Ngobe bonkhe bonkulunkulu betive batithico, kantsi nguSimakadze lowenta emazulu. Ludvumo nebukhosi kusembikwakhe, emandla nenkhatimulo kusendlini yakhe lengcwele.”​—Tihlabelelo 96:4-6.

Nanobe Jehova anguLongetulu Kwako Konkhe, usicela kutsi sikhulumisane naye ngemthantazo futsi uyasicinisekisa kutsi utasilalela. (Tihlabelelo 65:2) Nkulunkulu uyasitsandza futsi usikhatsalela kakhulu kangangekutsi umphostoli Johane abecinisile nakabhala kutsi, “Nkulunkulu ulutsandvo.”​—1 Johane 4:8.

“[Stefano, umfundzi longumKhristu] agcwele umoya longcwele, wabuka ezulwini wabona inkhatimulo yaNkulunkulu, naJesu eme ngesekudla saKhe, wase utsi: ‘Bukani! Ngibona emazulu avulekile, neNdvodzana yemuntfu ime ngesekudla saNkulunkulu.’”​—Imisebenti 7:55, 56.

Ngaphambi nje kwekutsi Stefano abone lombono, abekhuluma nebaholi bemaJuda, lokungibo lababulala Jesu. Lombono wakufakazela kutsi Jesu abesavusiwe futsi asatfole umvuzo wakhe. Mayelana  naloku umphostoli Pawula wabhala watsi, Jehova ‘wavusa [Jesu] Khristu ekufeni, wamhlalisa ngesekudla sakhe ezulwini, ngetulu kwabo bonkhe bohulumende, emagunya, emandla, bukhosi, nawo onkhe emabito langase acanjwe, hhayi kulelive kuphela, kodvwa nakulelo lelitako.’​—Efesu 1:20, 21.

Ngetulu nje kwekuchaza sikhundla sakhe lesiphakeme, liBhayibheli liphindze litsi Jesu ubakhatsalela kakhulu bantfu njengobe naJehova enta. Ngesikhatsi Jesu asemhlabeni welapha labagulako waphindze wavusa nalabafile. Ngekusifela, Jesu wakhombisa kutsi umtsandza kakhulu Nkulunkulu kanye nebantfu. (Efesu 2:4, 5) Njengobe Jesu angesekudla saNkulunkulu, masinyane utawusebentisa emandla akhe kute aletsele bonkhe bantfu labalaleko tibusiso.

Naku lokwashiwo ngumphrofethi Danyela: “Ngatsi ngisabukile, tihlalo tebukhosi tabekwa ngabolonina, Lophila Phakadze Naphakadze [Jehova] wahlala kusakhe. . . . Tinkhulungwane tetinkhulungwane [tatimkhonta]. Tinkhulungwane letilishumi tiphindvwe katinkhulungwane letilishumi tatime embikwakhe.”​—Danyela 7:9, 10.

Kulombono welizulu, Danyela akazange nje abone ingilosi yinye, kepha wabona tigidzigidzi tato. Lona kwaba ngumbono lomangalisa kakhulu! Tingilosi titidalwa temoya letikhatimulako, letihlakaniphile kanye naletinemandla. Tigaba tato tifaka ekhatsi emakherubi nemaserafi. LiBhayibheli likhuluma ngetingilosi tikhatsi letingetulu kwa-250.

Tingilosi atisibo bantfu labake baphila emhlabeni. Nkulunkulu wadala tingilosi kusesele sikhatsi lesidze kutsi adale bantfu. Tingilosi betikhona nakusadalwa umhlaba, tibona futsi tihlabelela ngenjabulo.​—Jobe 38:4-7.

Lenye indlela tingilosi letetsembekile letikhonta ngayo Nkulunkulu, kuhlanganyela emsebentini lobalulekile lowentiwa emhlabeni namuhla​—umsebenti wekushumayela tindzaba letimnandzi teMbuso waNkulunkulu. (Matewu 24:14) Indlela letikwenta ngayo loku ichazwe embonweni lowabonwa ngumphostoli Johane, watsi: “Ngabona lenye ingilosi indiza emoyeni, inetindzaba letimnandzi taphakadze lokwakufanele itimemetele kulabo labahlala emhlabeni, kuto tonkhe tive, tinhlanga,  tilwimi, nebantfu.” (Sembulo 14:6) Namuhla, tingilosi atisakhulumi nebantfu njengobe betenta esikhatsini lesengcile. Noma kunjalo, tisita labo labashumayela tindzaba letimnandzi ngekutsi tibacondzise kubantfu labatfobekile.

“Kwesuka imphi ezulwini: Mikhayeli [Jesu Khristu] netingilosi takhe balwa nadrago, drago anetingilosi takhe naye walwa, kodvwa drago akancobanga, futsi abazange basaba nendzawo ezulwini. Ngako wajikijelwa phansi drago lomkhulu, inyoka yekucala, lobitwa ngekutsi nguDeveli nangekutsi nguSathane, lodukisa umhlaba wonkhe; wajikijelwa phansi emhlabeni, netingilosi takhe nato tajikijelwa phansi kanye naye.”​—Sembulo 12:7-9.

Kunesikhatsi lapho bekute khona kuthula ezulwini. Ngesikhatsi sekudalwa kwebantfu, lenye yetingilosi yehlulwa sifiso sekukhontwa, yavukela Jehova yase ibitwa ngekutsi nguSathane lokusho “Umphikisi.” Letinye tingilosi tahlanganyela nayo kulokuvukela tase tibitwa ngekutsi tingemadimoni. Ngenca yekukhohlakala kwato, timphikisa kabuhlungu Jehova futsi tenta bantfu labanyenti bangasilaleli sicondziso sakhe selutsandvo.

Sathane netingilosi takhe babi futsi banelunya. Batitsa tebantfu futsi ngibo lababangela kutsi kube nekuhlupheka lokungaka emhlabeni. Khumbula kutsi nguSathane lowabulala imfuyo netinceku taJobe lobekayindvodza leyetsembekile. Waphindze wabulala bantfwana baJobe labalishumi ngekubangela kutsi “umoya lomkhulu” ubhidlite indlu labebakuyo. Ngemuva kwaloko, Sathane wahlasela Jobe “ngematfumba labutfukako, kusukela ngaphansi kwelunyawo lwakhe kuze kuyewufika etulu elunweleni lwakhe.”​—Jobe 1:7-19; 2:7.

Noma kunjalo, Sathane utawubhujiswa madvutane. Njengobe ajikijelwa emhlabeni, Sathane uyati kutsi “unesikhatsi lesincane.” (Sembulo 12:12) Sathane utawubhujiswa, futsi leto tindzaba letimnandzi!

“[Wena Jesu] watsengela Nkulunkulu bantfu kuto tonkhe tinhlanga, tilwimi, bantfu, netive, wabenta baba ngumbuso nebaphristi kuNkulunkulu wetfu, futsi batawubusa njengemakhosi etikwemhlaba.”​—Sembulo 5:9, 10.

NjengaJesu, kukhona labatawuvuselwa ekuphileni kwasezulwini. Naku lakusho kubaphostoli bakhe labetsembekile: “Ngiyahamba kuze ngiyonilungisela indzawo. . . . Ngitawuphindze ngite futsi  nginemukele, kuze lapho ngikhona khona nani nibe khona.”​—Johane 14:2, 3.

Bantfu labaya ezulwini bayela injongo letsite. Bakanye naJesu, batawakha hulumende wasezulwini lotawubusa bantfu labasemhlabeni wonkhe futsi ubaletsele tibusiso. Lona ngiwo loMbuso Jesu latjela balandzeli bakhe kutsi bawuthantazele, nakabafundzisa kuthantaza watsi: “Babe wetfu losezulwini, alingcweliswe libito lakho. UMbuso wakho awute. Intsandvo yakho ayentiwe emhlabeni njengasezulwini.”​—Matewu 6:9, 10.

Umphostoli Johane watsi: “Ngeva livi lelikhulu livela esihlalweni sebukhosi litsi: ‘Buka, lithende laNkulunkulu likanye nebantfu, . . . Utawesula tonkhe tinyembeti emehlweni abo, kufa ngeke kusaba khona, nekulila, nekukhala kanye nebuhlungu, ngeke kusaba khona. Tintfo letindzala setendlulile.’”​—Sembulo 21:3, 4.

Lombono losiphrofetho usitjela kutsi uMbuso waNkulunkulu lobuswa nguJesu kanye nalabatsengwe emhlabeni utakucedza kubusa kwaSathane. Utawuphindze wente lomhlaba ube lipharadesi, sekuyawubate tintfo letibangela bantfu lusizi kanye nekuhlupheka. Kuyawubate ngisho nekufa imbala.

Kodvwa yini letawenteka ngetigidzigidzi tebantfu lasebafa futsi labangeke bavuselwe ekuphileni kwasezulwini? Esikhatsini lesitako nabo batawuvuswa sebanelitsemba lekuphila phakadze emhlabeni loliPharadesi.​—Lukha 23:43.