EKUCALENI kwa-2009, emabandla aboFakazi BaJehova emhlabeni wonkhe ashintja tikhatsi tawo temhlangano. Imihlangano lemibili lebeyiba semkhatsini neliviki yahlanganiswa, futsi bonkhe bakhutsatwa kutsi bachube kukhonta kwemndeni kwakusihlwa nobe sifundvo lotichubela sono ngalelilanga leselikhululekile. Besewucalile yini kulusebentisa loluhlelo lolusha? Uyazuza yini kulo?

Labanyenti bayatibuta kutsi ngukuphi kwatiswa labangakusebentisa ngesikhatsi sekukhonta kwemndeni. Akusiyo injongo yeSigungu Lesibusako kutsi yonkhe imindeni yente intfo lefananako. Njengobe timo temindeni tingafanani, kungaba kuhlakanipha ngenhloko yemndeni nobe ngemuntfu ngamunye kutsi ahlatiye indlela lencono lokungachutjwa ngayo liviki ngeliviki.

Labanye basebentisa lesikhatsi kute balungiselele imihlangano yelibandla, kodvwa kunyenti lokunye lokungentiwa ngalesikhatsi. Labanye bebavame kufundza, kucoca kanye nekulingisa tindzaba letitsite letiseBhayibhelini, kute ngalokukhetsekile kuzuze bantfwababo labasebancane. Kungase kungabi yintfo ledzingekile nobe lefiselekako kutsi ngaso sonkhe sikhatsi kukhonta kwemndeni kube yimibuto netimphendvulo, njengasemihlanganweni yebuKhristu. Simo lesikhululekile sincono kakhulu ngobe senta kucoca kanye nekuveta imibono kube melula. Simo lesinjalo senta umuntfu acabange ngalokukhululekile, lokungabangela kutsi angasikhohlwa lesikhatsi futsi sijabulise kuwonkhe wonkhe.

Lomunye babe lonebantfwana labatsatfu watsi: “Lebesikwenta kakhulu kufundza liBhayibheli. Ngamunye wetfu ufundza tehluko letitsite ngembikwekutsi sihlangane, bantfwana bakhetsa emaphuzu labatawucwaninga ngawo bese baveta loko labakutfolile. Michael [loneminyaka lesikhombisa] uvame kudvweba sitfombe ngaloko lakufundzile nobe abhale indzinyana ngako. David kanye naKaitlyn [labaneminyaka lengu-13 na-15] bavame kubhala ngendzaba letsite leseBhayibhelini, kube shengatsi bebakhona ngesikhatsi yenteka. Sibonelo saloko kutsi nasifundza indzima lekhuluma ngekuchaza kwaJosefa liphupho lendvuna yebatseli beliwayini kanye neyabogadzi baFaro, Kaitlyn wabhala indzaba kwaba shengatsi bekasiboshwa lebesibukele nakwenteka loko.”—Gen., sehl. 40.

Kuyintfo levamile kutsi timo tetfu tingafanani. Liphuzu lelisebenta kahle kulomunye umuntfu nobe emndenini lotsite kungenteka lingasebenti kulomunye. Libhokisi lelilandzelako linemasu lamanyenti langasetjentiswa ngesikhatsi sekukhonta kwemndeni nobe sesifundvo umuntfu latichubela sona. Nawe kungenteka ucabange ngalamanye emasu langasetjentiswa.

[Libhokisi/Sitfombe emakhasini 6, 7]

 Imindeni lenebantfwana labasandza kutfomba:

• Fundzani niphindze nicoce ngencwadzi letsi “INtsha Iyabuza—Izimpendulo Ezisebenzayo.”

• Cocani ngetimo letingase tivele. (Fundza Sicongosekulindza sa-May 15, 1996, likhasi 14, tigaba 17-18, ngesiZulu.)

• Cocani ngemigomo yesikhatsi lesifishane kanye neyesikhatsi lesidze.

• Ngaletinye tikhatsi, bukelani niphindze nicoce ngema-video lasekelwe eBhayibhelini.

• Fundzani ndzawonye incenye leku-Sicongosekulindza letsi “Ezentsha.”

Labashadile labete bantfwana:

• Cocani ngetehluko 1, 3, 11-16 tencwadzi letsi Indlela Yekutfola Injabulo Emndenini.

• Cocani ngaloko lenikutfole ngesikhatsi nicwaninga ngemaphuzu ekufundvwa kweliBhayibheli.

• Lungiselelani ndzawonye sifundvo seliBhayibheli selibandla nobe sifundvo se-Sicongosekulindza.

• Cocani ngetindlela leningawukhulisa ngato umsebentini wenu wekushumayela njengebantfu labashadene.

Bazalwane nabodzadze labangakashadi nobe labo labasemindenini leyehlukene ngekwenkholo:

• Fundzani tincwadzi letinsha lenititfole emhlanganweni wesigodzi.

• Fundzani incwadzi yemnyaka yakamuva kanye neteminyaka leyendlulile.

• Cwaningani ngemibuto levame kubutwa ensimini yakini.

• Lungiselelani tinshumayelo lenitawutisebentisa emsebentini wekushumayela.

Imindeni lenebantfwana labancane:

• Lingisani tindzaba letiseBhayibhelini.

• Dlalani imidlalo yekuhlola lizinga lekukhumbula, njengaleyo lesemakhasini 30 kanye na-31 ku-“Phaphama!”

• Ngaletinye tikhatsi, yentani lokutsite lokujabulisako. (Fundza sihloko lesitsi “Ukufunda IBhayibheli—E-Zoo!” ku-“Phaphama!” ya-March 8, 1996, emakhasi 16-19, ngesiZulu.)

• Cocani ngetihloko te-Sicongosekulindza letitsi “Fundisa Izingane Zakho.”