Singakwati yini kusho ngalokucondzile kutsi tingakhi tiphrofetho letimayelana naMesiya letisemiBhalweni yesiHebheru?

Kuyifundza ngekucaphelisisa imiBhalo yesiHebheru kusisita sibone tiphrofetho letinyenti letagcwaliseka kuJesu Khristu. Letiphrofetho tabiketela imininingwane lemayelana nemvelaphi yaMesiya, sikhatsi labekatawuvela ngaso, loko bekatawukwenta, indlela bekatawuphatfwa ngayo kanye nesikhundla labekatawuba naso eluhlelweni lwaNkulunkulu Jehova. Setitonkhe letiphrofetho tisisita sibone kutsi Jesu unguMesiya mbamba. Nanobe kunjalo, kufanele sinakisise nasetama kutfola kutsi tingakhi tiphrofetho letimayelana naMesiya letisemiBhalweni yesiHebheru.

Akusibo bonkhe bantfu labavumelanako nakutiwa endzabeni yekutsi ngukuphi lokusiphrofetho lesimayelana naMesiya nalokungasiso. Encwadzini yakhe letsi The Life and Times of Jesus the Messiah, Alfred Edersheim watsi imibhalo yaboRabi beyinetiphrofetho letingu-456 letivela emiBhalweni yesiHebheru letimayelana naMesiya, nanobe nje letinye tato tingaliveti libito laMesiya. Kunakisisa letiphrofetho letingu-456, kuphakamisa imibuto lenjengekutsi tonkhe letiphrofetho timayelana naJesu Khristu yini. Sibonelo saloko kutsi Edersheim watsi emaJuda bekatsatsa umBhalo waGenesisi 8:11 njengalosiphrofetho lesimayelana naMesiya. Bekacabanga kutsi “licembe lesihlahla semncumo lebeliphetfwe ngulelituba, belitsetfwe eNtsabeni yaMesiya.” Lombhali waphindze wakhuluma nanga-Eksodusi 12:42. Achaza indlela emaJuda labekangawacondzi ngayo lamavi, wabhala: “Njengobe Mosi aphuma ehlane, naMesiya abetawuphuma eRoma.” Asingabati kutsi tati letinyenti kanye nalabanye bantfu bebangakutfola kumatima kuhlobanisa lemibhalo lemibili kanye naloko lokwenteka kuJesu Khristu.

Ngisho nalapho setama kunakisisa tiphrofetho letagcwaliseka kuJesu Khristu, sikutfola kumatima kuvumelana ngelinani lelicondzile lato. Nasi sibonelo: Cabanga nga-Isaya sehluko 53, locuketse tiphrofetho letinyenti letimayelana naMesiya. Isaya 53:2-7, waphrofetha: “Yayite buhle . . . Yedzelelwa yaliwa bantfu, . . . Yabetfwala butsakatsaka betfu, . . . Yagwazwa ngenca yetiphambuko tetfu, . . . Yaba njengelizinyane lemvu leliyiswa ekuhlatjweni.” Onkhe lamavesi laku-Isaya sehluko 53 kufanele atsatfwe njengesiphrofetho lesisodvwa lesimayelana naMesiya yini, nobe sici ngasinye saloko Mesiya bekatawukwenta kufanele sitsatfwe njengesiphrofetho lesehlukile?

Cabanga nanga-Isaya 11:1, lotsi: “Kuyawuhluma lihlumela esiphuntini sakaJese; ligala lelimila etimphandzeni takhe liyawutsela titselo.” Emavi lafanana nalesiphrofetho aphindze avele nasevesini 10 lalomBhalo. Kufanele sitsi lamavesi anetiphrofetho letimbili letehlukene yini nobe asiphrofetho lesisodvwa lesiphindziwe? Siphetfo lesifinyelela kuso nasifundza Isaya sehluko 53 kanye na-11, siyayitsintsa ingcikitsi yetiphrofetho letimayelana naMesiya.

Ngako-ke, senta kahle ngekungasho ngalokucondzile ingcikitsi yetiphrofetho taMesiya letitfolakala emiBhalweni yesiHebheru. Inhlangano yaJehova ishicilele luhla lolunyenti lwetiphrofetho letimayelana naJesu kanye nekugcwaliseka kwato. a Loluhla lungasisita luphindze lusikhutsate esifundvweni lesitichubela sona, semndeni kanye nasensimini. Ngetulu kwaloko, ngisho nobe ngabe tingakhi tiphrofetho letimayelana naMesiya, tonkhe tisiniketa bufakazi lobucinile bekutsi Jesu unguKhristu nobe unguMesiya.

[Umbhalo longentansi]