Kufanele siwacondze njani emanani embiko wemnyaka wemsebenti wekushumayela?

Umnyaka ngamunye silangatelela kutfola umbiko wemsebenti wekushumayela lovela encwadzini yemnyaka. Siyajabula nasibona loko bantfu baJehova labakufeza njengelicembu kulomsebenti wekushumayela kanye newekufundzisa ngeMbuso emhlabeni wonkhe. Nanobe kunjalo, kute sizuze kakhulu kulombiko kufanele silucondze kahle luhla lolukuwo kanye nemanani lavetiwe. Cabanga ngetibonelo letimbalwa.

Umnyaka wemsebenti. Ucala nga-September ute uphele nga-August wemnyaka lolandzelako. Incwadzi yemnyaka iveta umbiko wemnyaka wemsebenti losandza kwendlula. Ngesizatfu saloko, incwadzi yemnyaka ya-2011 inembiko wemnyaka wemsebenti wa-2010, locala nga-September 1, 2009, uphele nga-August 31, 2010.

Linani lebamemeteli kanye nesilinganiso sebamemeteli. ‘Bamemeteli’ bahlanganisa boFakazi BaJehova lababhajatisiwe kanye nebamemeteli labangakabhajatiswa labashumayela ngeMbuso. “Linani lebamemeteli,” linani lelisetulu lelibikwe kunobe nguyiphi inyanga emnyakeni wemsebenti, futsi lingahlanganisa nemibiko lefika sekwephutile yenyanga leyendlulile. Ngesizatfu saloko, labanye bamemeteli bangabalwa kabili ngenyanga yinye. Nanobe kunjalo, lelinani alihlanganisi bamemeteli labayile ensimini kodvwa labangazange bayiletse imibiko yabo. Loku kugcizelela kubaluleka kwekutsi ummemeteli ngamunye abike ngekushesha inyanga ngayinye. ‘Silinganiso sebamemeteli,’ linani lebamemeteli labaletsa umbiko wabo inyanga ngayinye.

Ingcikitsi yema-awa. Ngekusho kwencwadzi yemnyaka ya-2011, boFakazi BaJehova bacitse ema-awa langetulu kwetigidzigidzi letingu-1.6 basensimini. Nanobe kunjalo, lengcikitsi yema-awa ayihlanganisi sonkhe sikhatsi lesisicitsa senta imisebenti lehlobene nekukhonta kwetfu, njengemsebenti wekwelusa, kuba khona emihlanganweni, kuba nesifundvo lotichubela sona kanye nekuzindla.

Imali lesetjentisiwe. Ngemnyaka wemsebenti wa-2010, boFakazi BaJehova basebentise imali lengetulu kwa-R1 billion ekunakekeleni emahlahlandlela lakhetsekile, titfunywa telivangeli kanye nebabonisi labajikeletako etabelweni tabo tasensimini. Nanobe kunjalo, lemali ayihlanganisi tindleko tekushicilela tincwadzi letisekelwe eBhayibhelini, futsi ayiyihlanganisi nemali lecitfwa kunakekelwa tikhonti taseBethel letingetulu kwa-20 000 letisebenta emagatjeni lasemhlabeni wonkhe.

Labadlako eSikhumbutweni. Leli linani lebamemeteli lababhatjatisiwe labadla tifanekiselo teSikhumbuto emhlabeni wonkhe. Lelinani limelela ingcikitsi yalabagcotjiwe labasemhlabeni yini? Hhayi ngaso sonkhe sikhatsi. Loku kubangelwa kutsi tici letifanana netinkholelo umuntfu labekanato asengakakholwa nobe kungaphili kahle engcondvweni nobe ngekwemivelo, tingamenta acabange kutsi ugcotjiwe. Ngesizatfu saloko, site indlela yekulati ngalokucondzile linani lalabagcotjiwe labasemhlabeni futsi site nesidzingo sekulati. Sigungu Lesibusako asilugcini luhla lwemagama abo bonkhe labadlako eSikhumbutweni. a

Lesikwatiko kutsi nakukhululwa imimoya yembubhiso yekuhlupheka lokukhulu, batawube basekhona labanye labagcotjiwe, ‘labatisebenti taNkulunkulu wetfu.’ (Semb. 7:1-3) Kute kufike leso sikhatsi, labagcotjiwe batawuhola kulomsebenti lofakazelwa kahle ngumbiko wetfu wemnyaka wemsebenti—lokungumsebenti wekushumayela kanye nekufundzisa lomkhulu kuyendlula yonkhe leke yentiwa emhlabeni.

[Umbhalo longentansi]