STEPHEN LETT, lolilunga leSigungu Lesibusako saboFakazi BaJehova wakhulisa lilukuluku letilaleli takhe ngekutsi atsi: “Nasewuphelile lomhlangano, nonkhe nitawutsi: ‘Lona bekungumhlangano wemnyaka lodle lubhedvu emlandvweni!’” Bebahlangene kute bajabulele umhlangano wemnyaka wesi-126 we-Watch Tower Bible and Tract Society of Pennsylvania, lobewubanjwe nga-October 2, 2010, eHholweni Lemhlangano laboFakazi BaJehova eJersey City, New Jersey, eMelika. Ngumaphi lamanye emaphuzu lahamba embili lavetwa kulomhlangano lobaluleke kangaka?

Inkhulumo yekuvula leyetfulwa nguMzalwane Lett beyidzingidza inkalishi yaJehova lechazwe encwadzini yaHezekeli. Lenkalishi lenkhulu futsi lenebukhatikhati ifanekisela inhlangano yaNkulunkulu, lecondziswa nguYe. Luhlangotsi lolusezulwini lwalenhlangano lwakhiwa tidalwa temoya letihamba ngesivinini lesikhulu, futsi uMzalwane Lett watsi lesi sivinini semicabango yaJehova. Luhlangotsi lolusemhlabeni lwenhlangano yaJehova nalo luhamba ngesivinini lesifananako. UMzalwane Lett wakhuluma ngentfutfuko leyenteke eluhlangotsini lolubonakalako lwenhlangano yaNkulunkulu kuleminyaka yakamuva.

Nasi sibonelo: Emagatja lamanyenti asahlanganisiwe, futsi loku kutawusita labo labebakhonta eBethel kulawo mave kutsi bakwati kuhlanganyela emsebentini wekushumayela ngalokugcwele. Lolushintjo lwenta tisebenti letinyenti tikwati kunaka kakhulu umsebenti wekushumayela. UMzalwane Lett wacela tilaleli kutsi tichubeke tithandazela kutsi Sigungu Lesibusako, lesibameleli besigaba sesisebenti, singagcini ngekwetsembeka kodvwa siphindze sihlakaniphe.​—Mat. 24:45-47.

Imibiko Lekhutsatako Kanye Nemicocandzaba Letsintsa Inhlitiyo

Tab Honsberger, lokhonta njengelilunga leKomidi yeLigatja eHaiti, wetfula umbiko lotsintsa inhlitiyo lomayelana nekutamatama kwemhlaba lokwenteka nga-January 12, 2010, futsi lokwabulala bantfu labangaba ngu-300 000. Watsi bafundisi bebatjela bantfu kutsi Nkulunkulu bekajezisa labo labangamlaleli futsi avikela labamlalelako. Nanobe kunjalo, tinkhulungwane tetiboshwa teca ngesikhatsi tindvonga telijele tiwiswa kutamatama kwemhlaba. Linyenti lebantfu labacotfo baseHaiti litfola indvudvuto ngekufundza liciniso lekutsi kungani sikhatsi lesiphila kuso sigcwele tinkinga. UMzalwane Honsberger wacaphuna lomunye umzalwane waseHaiti lowafelwa ngumfati wakhe kulesehlakalo, watsi: “Nanyalo ngisalila. Futsi angati nekutsi ngitawukhala kuze kube ngunini, kodvwa ngiyajabula ngesizatfu selutsandvo lengilutfola enhlanganweni yaJehova.  Nginelitsemba, futsi ngitimisele kusita nalabanye kutsi nabo babe nalo.”

Mark Sanderson, lolilunga lemndeni waseBethel eBrooklyn, wetfula umbiko lomayelana nePhilippines. Njengobe bekake wakhonta njengelilunga leKomidi yeLigatja kulelo live, wajabula ngesikhatsi akhuluma ngemanani lasetulu langu-32 labakhona, lokulinani lebamemeteli beMbuso kanye nendlela linani letifundvo teliBhayibheli lelilendlula ngayo linani lebamemeteli. Wakhuluma ngemzalwane lotsite libito lakhe lokungu-Miguel, umtukulu wakhe lowabulawa. Miguel wenta konkhe lokusemandleni akhe kute aciniseke kutsi lombulali uyaboshwa. Ngalelinye lilanga ashumayela ejele, wahlangana nalombulali. Nanobe abetfukile, Miguel wakhuluma naye ngemoya lopholile nangemusa. Ngekuhamba kwesikhatsi, wafundza liBhayibheli nalendvodza, futsi yasabela kahle, ekugcineni yacala kumtsandza Jehova. Nyalo seyibhajatisiwe. Miguel sewungumngani wayo lomkhulu, futsi wetama kuyisita kute isheshe ikhululwe ejele. a

Inkhulumo leyalandzela lebeyetfulwa ngu-Mark Noumair, lofundzisa eHhovisi Letikolwa TebuKhristu, beyinemicocandzaba. Lomzalwane wacoca nemindeni lemitsatfu—Alex na-Sarah Reinmueller, David na-Krista Schafer, kanye na-Robert na-Ketra Ciranko. Alex Reinmueller, longumsiti eKomidini Yekushicilela, wachaza indlela lalenta ngayo liciniso laba lakhe ngesikhatsi alihlahlandlela eCanada aneminyaka lengu-15 budzala, futsi avame kusebenta yedvwa ensimini. Ngesikhatsi abutwa kutsi bobani labebamkhutsata kakhulu eBethel, lomzalwane wabala emadvodza lamatsatfu letsembekile, futsi wachaza nekutsi ngamunye wabo wamsita njani kutsi akhule ngekwakamoya. Sarah, umkakhe, wakhuluma ngebungani labekanabo nalomunye dzadze lowakhutsatela emashumi eminyaka asejele laseChina, aboshwe ngesizatfu sekukholwa kwakhe. Sarah watsi bekafundze kwetsembela kuJehova ngemthandazo.

David Schafer, longumsiti eKomidini Yekufundzisa, wabonga make wakhe ngekukholwa kwakhe lokucinile kanye nebazalwane labebenta umsebenti wekugawula tihlahla, labamsita kutsi abe lihlahlandlela lelisitako asesemusha. Krista, umkakhe, wakhuluma kahle kakhulu ngesikhutsato lasitfola kumalunga lasakhulile aseBethel ‘labekatsembekile etintfweni letincane,’ njengobe Jesu asiyala.​—Luk. 16:10.

Robert Ciranko, longumsiti eKomidini Yekubhala, wakhuluma ngebatali bababe wakhe kanye nebamake wakhe, labebasuka eHungary futsi bangemaKhristu lagcotjiwe. Ngesikhatsi asengumfana, abejabula kakhulu nabaya emihlanganweni lemikhulu ngabo-1950, futsi abebona kutsi inhlangano yaJehova beyiyinkhulu  kakhulu kwendlula libandla lakubo. Ketra, umkakhe, walandzisa indlela lafundza ngayo kwetsembeka ngesikhatsi aselihlahlandlela ebandleni lebelihlaselwa kuhlubuka kanye naletinye tinkinga. Wabeketela futsi ekugcineni wacelwa kutsi ayewukhonta njengelihlahlandlela lelikhetsekile ebandleni lebelinebunye.

Ngemuva kwaloko, Manfred Tonak wetfula umbiko lomayelana neTopiya. Lelive lisukela endvulo etikhatsini tekubhalwa kweliBhayibheli, futsi nyalo selibusiswe ngebamemeteli betindzaba letinhle labangetulu kwa-9 000. Linyenti labo lihlala edolobheni lelikhulu i-Addis Ababa, nobe edvute nalo. Tindzawo letikhashane nalo tinesidzingo sebamemeteli labengetiwe. Ngako-ke, kute kulungiswe lenkinga kwacelwa boFakazi labangemaTopiya labahlala kulamanye emave kutsi bavakashele lendzawo kute batewukwati kushumayela kuletinye tincenye talelive letikhashane. Labanye bazalwane beta, bakhutsata laboFakazi labahlala kuleyondzawo futsi batfola nebantfu labalalelako.

Kuloluhlelo, inkhulumo leyahamba embili kwaba luchungechunge lobelukhuluma ngaboFakazi BaJehova baseRashiya kanye nemacala abo lasatekwa. Aulis Bergdahl, lolilunga leKomidi yeLigatja laseRashiya wakhuluma ngemlandvo wekushushiswa kwaboFakazi eRashiya, kakhulu labo baseMoscow. Philip Brumley, losebenta eHhovisini Letemtsetfo leligatja laseMelika, wakhuluma ngetindzaba letijabulisako letenteke etinyangeni letisandza kwendlula ngesikhatsi iNkantolo yaseYurophu Yemalungelo Ebantfu (ECHR) ilalela emacala layimfica labetfweswe boFakazi. Inkantolo yatfola kutsi boFakazi bete licala kuto tonkhe letinsolo letiyimfica, futsi yaze yachaza nekutsi kungani letinsolo betingemanga. Nanobe kusalindzelwe imiphumela, uMzalwane Brumley wakhuluma ngekuciniseka kutsi sincumo senkantolo ngalelicala singawaniketa litsemba nalamanye emave.

Ngemuva kwaletindzaba letimnandzi, uMzalwane Lett wamemetela kutsi i-ECHR ivumile kulilalela lelicala lemtselo lesekunesikhatsi lichubeka, lelitsintsa hulumende waseFrance kanye naboFakazi baJehova. LeNkantolo lehlonishwa kakhulu ivame kuteka emacala lambalwa kakhulu kulawo lasuke aletfwe kuyo. Kwanyalo, i-ECHR iteke emacala langu-39 latsintsa boFakazi BaJehova, futsi baphumelele emacaleni langu-37 kulawo labebawaletsile. UMzalwane Lett wabakhutsata bonkhe bantfu baNkulunkulu kutsi babeke lendzaba kuJehova ngemthandazo.

Umbiko wekugcina wetfulwa ngu-Richard Morlan, lofundzisa Esikolweni Salabadzala Belibandla. Wakhuluma ngalesikolwa ngemdlandla futsi nangekubonga lokuvetwe ngulabadzala labebakuso.

 Letinye Tinkhulumo Letetfulwa Ngemalunga ESigungu Lesibusako

Guy Pierce, lolilunga leSigungu Lesibusako wetfula inkhulumo letsintsa inhlitiyo lebeyikhuluma ngemBhalo wemnyaka wa-2011, lotsi: ‘Yenta libito laJehova libe siphephelo sakho.’ (Zef. 3:12) Waveta kutsi njengobe lesi kusikhatsi lesimnandzi kuboFakazi BaJehova, siphindze sibe ngulesibalulekile. Lilanga laJehova lelikhulu lisedvute; nanobe kunjalo, bantfu bachubeka bafuna siphephelo enkholweni yemanga, etinhlanganweni tetembusave, etintfweni labanato, ekunganakini kanye nakulokunye lokufanana naloku. Kute sitfole siphephelo lokungusonasona, kufanele sibite libito laJehova, lokufaka ekhatsi kulati, kulihlonipha ngalokujulile, kwetsemba Loyo lomelelwa ngilo, kanye nekumtsandza ngako konkhe lesinako.

David Splane, lolilunga leSigungu Lesibusako, waniketa inkhulumo lekhutsatako lenesihloko lesitsi “Sewungenile Yini Ekuphumuleni KwaNkulunkulu?” Waveta kutsi kungena ekuphumuleni kwaNkulunkulu akusho kutsi kufanele sihlale singenti lutfo, ngobe Jehova kanye neNdvodzana yakhe bebasolo ‘basebenta’ kulelilanga lekuphumula kute injongo yaNkulunkulu ngetintfo latidalile iphumelele. (Joh. 5:17) Ngako-ke, singangena njani ekuphumeleni kwaNkulunkulu? Ngekungenti sono kanye nemisebenti lebonakala imihle emehlweni etfu. Kufanele sibe nekukholwa, sihlale sikhumbula injongo yaNkulunkulu, futsi sente nobe ngabe yini kute siyisekele. Ngaletinye tikhatsi, kungaba matima kukwenta loku, kodvwa kufanele semukele seluleko saJehova futsi sibambisane nesicondziso lesivela enhlanganweni yaKhe. UMzalwane Splane wacela tilaleli kutsi tente konkhe lokusemandleni ato kute tingene ekuphumuleni kwaNkulunkulu.

Anthony Morris, lolilunga leSigungu Lesibusako wetfula inkhulumo yekuphetsa lenesihloko lesitsi “Yini Lesiyilindzele?” Ngemdlandla, uMzalwane Morris wakhumbuta tilaleli ngetiphrofetho letisatawugcwaliseka, lokutentakalo letilindzelwe ngibo bonkhe bantfu labetsembekile. Tifaka ekhatsi kukhalela ‘kuthula nenhlalakahle’ kanye nekubhujiswa kwenkholo yemanga. (1 Thes. 5:2, 3; Semb. 17:15-17) UMzalwane Morris wase ubecwayisa mayelana nekusho emavi latsi: “Seyifikile i-Amagedoni,” nangabe bebabukele tindzaba letingagcwalisi leto tiphrofetho. Wabancoma ngekuba nenjabulo, kubeketela kanye nesimo sengcondvo sekulindza lesichazwe kuMikha 7:7. Waphindze wancenga bonkhe kutsi “babambisane” neSigungu Lesibusako, baphindze babemunye njengemasotja naseyishuba imphi. Watsi: “Cinani, tinhlitiyo tenu tibe nesibindzi, nonkhe nine lenilindzele Simakadze.”​—Hla. 31:24.

Ekwephetseni, kwaba netimemetelo letijabulisako kanye naletidla lubhedvu. Geoffrey Jackson, weSigungu Lesibusako, wamemetela tinhlelo letentiwe tekuba ne-Sicongosekulindza lesifundvwako lesentiwe sabamelula, salabo labanelwati lolulinganiselwe ngesiNgisi. Ngemuva kwaloko, Stephen Lett wamemetela kutsi Sigungu Lesibusako sesitawukwenta luhlelo lwekutsi babonisi besigodzi labaseMelika kanye nebafati babo, bentelwe kuhanjelwa kwekwelusa. Wamemetela nekutsi Sikolwa Sekuceceshelwa Imisebenti YebuKhristu sesitawubitwa ngekutsi Sikolwa Lesisekelwe EBhayibhelini Sebazalwane Labangakashadi. Waphindze wamemetela nesikolwa lesisha lesitawubitwa ngekutsi Sikolwa Lesisekelwe EBhayibhelini SemaKhristu Lashadene. Lesikolwa sitawuniketa bantfu labashadile kuceceshwa lokwengetiwe kute babe lusito enhlanganweni yaJehova. UMzalwane Lett waphindze watsi Sikolwa Sebabonisi Labajikeletako Kanye Nemakhosikati Abo, kanye neSikolwa Semalunga EKomidi Yeligatja Kanye Nemakhosikati Awo, sesitawuchutjwa tikhatsi letimbili umnyaka ngamunye ePatterson, futsi loku kutawuhlanganisa nalabo labake baya kuso.

John E. Barr, loneminyaka lengu-97 budzala futsi losabe lilunga leSigungu Lesibusako sikhatsi lesidze, wenta umthandazo wekuphetsa lobewutsintsa inhlitiyo. b Ekupheleni kwalomhlangano, bonkhe labebakhona batibonela ngewabo kutsi lona bekungumhlangano lodla lubhedvu emlandvweni.

[Imibhalo lengentansi]

[Emavi lahambisana nesitfombe ekhasini 19]

Kwaba nemicocandzaba leyajatjulelwa ngibo bonkhe labebakhona

[Emavi lahambisana nesitfombe ekhasini 20]

Jehova uwubusisile umsebenti wekushumayela eTopiya