Jehova Usabelo Sami

“Ngimi lengisabelo sakho nelifa lakho esiveni sonkhe sema-Israyeli.”—NUM. 18:20.

1, 2. (a) EmaLevi aba kusiphi simo nakutiwa endzabeni yekwabelana live? (b) Ngusiphi sicinisekiso Jehova lasiniketa emaLevi?

 NGEMUVA kwekutsi ema-Israyeli sekancobe incenye lenkhulu yeliVe Lesetsembiso, Joshuwa wacala kwehlukanisa lelive ngenkatho. Nakenta loko, abesebenta neMphristi Lomkhulu Eleyazare, kanye netinhloko taletive. (Num. 34:13-29) Kodvwa ngalokucondzene nemaLevi, wona akazange awutfole umhlaba njengelifa lawo njengaleti letinye tive. (Josh. 14:1-5) Kungani emaLevi angazange abe nendzawo yawo nobe sabelo sawo eVeni Lesetsembiso? Ashiyelwa ngephandle yini wona?

² Imphendvulo siyitfola kuloko Jehova lakutjela emaLevi. Agcizelela liphuzu lekutsi abengakawalahli, Jehova watsi: “Ngimi lengisabelo sakho nelifa lakho esiveni sonkhe sema-Israyeli.” (Num. 18:20) Lamavi latsi “ngimi lengisabelo sakho,” asicinisekiso lesikhulu! Bewungativa njani wena kube Jehova bekangasho lamavi kuwe? Kwekucala, bekungenteka utibute nayi imibuto: ‘Ngibaluleke kakhulu yini kutsi ngingaze ngitfole sicinisekiso lesinjalo lesivela kuSomandla? Jehova angaba yini sabelo sanobe ngabe ngumuphi umKhristu lonesono lamuhla?’ Lemibuto itsintsa wena kanye nalabo lobatsandzako. Ngako-ke, ase sihlole kutsi lamavi lavela kuNkulunkulu asho kutsini. Loko kutasisita sicondze kutsi Jehova angaba njani sabelo semaKhristu lamuhla. Lokubaluleke kakhulu kutsi angaba sabelo sakho, ngisho nobe unelitsemba lekuphila ezulwini nobe lekuphila emhlabeni lolipharadisi.

Jehova Wawanakekela EmaLevi

3. Yini leyenta Nkulunkulu wakhetsa emaLevi kutsi ente umsebenti wakhe?

³ Ngembikwekutsi Jehova anike ema-Israyeli uMtsetfo, tinhloko temindeni betikhonta njengebaphristi emkhatsini wawo. Ngesikhatsi Nkulunkulu sekawanikete uMtsetfo, wahlela baphristi labebatawusebenta ngaso sonkhe sikhatsi kanye nebasiti babo labavela esiveni semaLevi. Wakwenta njani loko? Ngesikhatsi Nkulunkulu abhubhisa ematubulo aseGibhithe, wangcwelisa ematubulo aka-Israyeli, wawakhetsa aba yimphahla yakhe. Ngemuva kwaloko, wenta nalu lushintjo lolubalulekile: “Sive semaLevi ngisikhetse . . . esikhundleni sawo onkhe ematubulo esive sema-Israyeli.” Lubalo lwaveta kutsi ematubulo esive sema-Israyeli bekawendlula emaLevi ngelinani, ngako-ke kwakhokhwa linani lesihlengo kute kulungiswe lomehluko. (Num. 3:11-13, 41, 46, 47) Ngaleso sizatfu, emaLevi abengakhona kwenta sabelo sawo ekukhonteni Nkulunkulu wema-Israyeli.

4, 5. (a) Kwakusho kutsini ngemaLevi kutsi Nkulunkulu usabelo sawo? (b) Nkulunkulu wawanakekela njani emaLevi?

⁴ Lomsebenti bewudzinga kutsi emaLevi enteni? Jehova watsi kunekutsi atfole lifa lelive, yena bekatawuba  sabelo sawo, futsi awaphatsise umsebenti lobaluleke kakhulu. ‘Kukhonta kwawo kwebuphristi embikwaSimakadze’ bekulifa lawo. (Josh. 18:7) Lokucuketfwe nguNumeri 18:20 kuveta kutsi loko akuzange kuwente aphuye. (Fundza Numeri 18:19, 21, 24.) EmaLevi bekatawuniketwa ‘konkhe kwelishumi kwaka-Israyeli, kutsi kube lifa lawo kulowo msebenti.’ Bekatawutfola kwelishumi kuloko ema-Israyeli labekakulimile kanye nemfuyo yawo, kuye ngekwandza kwayo. EmaLevi bekufanele anikele kwelishumi kwaloko lakutfolile, “kube nguloko lokuhle kakhulu,” kute kunakekelwe baphristi. a (Num. 18:25-29) Baphristi bebaphindze batfole ‘iminikelo lengcwele,’ leyo ema-Israyeli labeyiletsa endlini yaNkulunkulu yekukhonta. Emalunga ebuphristi abenesizatfu lesivakalako sekwetsemba kutsi Jehova abetawanakekela.

⁵ Kungenteka kutsi uMtsetfo waMosi bewuphindze utsi kukhishwe lokunye kwelishumi, lobekubekelwa eceleni kute kunakekelwe kuphindze kujatjuliswe imindeni emihlanganweni lemikhulu yaminyaka yonkhe. (Dut. 14:22-27) Ekupheleni kwemnyaka wesitsatfu kanye newesitfupha wesikhatsi seminyaka lesikhombisa, ema-Israyeli abesebentisa kwelishumi kute asite labaphuyile kanye nemaLevi. Kungani emaLevi abefakwa kulabo labebakwemukela? Kungobe ‘bekete lifa’ ka-Israyeli.—Dut. 14:28, 29.

6. Njengobe emaLevi bekete live lelilifa ka-Israyeli, abetawuhlala kuphi?

⁶ Ungase utibute: ‘Nangabe emaLevi bekete live labekaphiwe lona, bekatawuhlala kuphi?’ Nkulunkulu wawalungiselela indzawo yekuhlala. Wawanika emadolobha langu-48 kanye nemadlelo awo. Loku bekufaka ekhatsi emadolobha lasitfupha ekukhosela. (Num. 35:6-8) Ngako-ke, emaLevi bekanendzawo labehlala kuyo nawangekho esabelweni sawo sekukhonta Nkulunkulu. Jehova bekabanakekela kakhulu labo labatinikele kuye kute bente umsebenti wakhe. Kuyacaca kutsi emaLevi akhona kuveta kutsi Jehova usabelo sawo ngekumetsemba kanye nekwati sifiso sakhe nemandla lanawo ekubanakekela.

7. Yini lobekufanele emaLevi ayente kute Jehova abe sabelo sawo?

⁷ NgekwaloMtsetfo, bekute sijeziso lebesiniketwa ema-Israyeli labehluleka kukhipha kwelishumi. Ngesikhatsi bantfu sebangawulaleli uMtsetfo wekukhipha kwelishumi, baphristi kanye nemaLevi ngibo labebatsintseka. Loko kwenteka ngemalanga aNehemiya. Umphumela waba kutsi, emaLevi bekufanele acale asebente emasimini awo, angasawunaki umsebenti labeniketwe wona nguNkulunkulu. (Fundza Nehemiya 13:10.) Kuyacaca-ke kutsi kute emaLevi akwati kutinakekela, bekufanele sive sigcine uMtsetfo waJehova. Ngetulu kwaloko, baphristi kanye nemaLevi bekufanele babe nekukholwa kuJehova kanye nasetindleleni takhe latisebentisako tekubanakekela.

Bantfu Labenta Jehova Sabelo Sabo

8. Chaza inkinga umLevi longu-Asafa lahlangabetana nayo.

⁸ Njengesive, emaLevi bekufanele ente Jehova sabelo sawo. Nanobe kunjalo, lamanye emaLevi bekasebentisa lamavi latsi “Simakadze usabelo sami” kute avete kutinikela kwawo kuNkulunkulu kanye nekwetsembela kuye. (Sil. 3:24) Lomunye wemaLevi lanjalo abengumhlabeli aphindze abe ngumbhali wetingoma. Sitambita ngekutsi ngu-Asafa, nanobe kungenteka kutsi abelilunga lemndeni wa-Asafa, umLevi lobekangumcondzisi webahlabeli emalangeni eNkhosi Davide. (1 Khr. 6:31-43) Encwadzini yeTihlabelelo 73, sifundza ngekutsi Asafa (nobe  lomunye wentalo yakhe) wacala kukhatsateka. Waba nemona ngalababi labebaphila imphilo lemnandzi, waze watsi: “Impela ngiyihlantele lite inhlitiyo yami, ngageza tandla tami njengalote licala.” Kungenteka kutsi besekalahlekelwe ngumbono ngekubaluleka kwemsebenti labekawenta; wehluleka nekuveta kubonga kwakhe ngekutsi Jehova usabelo sakhe. Abesagula ngekwakamoya, kwate kwaba ngulapho ‘angena endlini lengcwele yaNkulunkulu.’—Hla. 73:2, 3, 12, 13, 17.

9, 10. Kungani Asafa atsi Nkulunkulu ‘usabelo selifa lakhe ingunaphakadze’?

⁹ Ngesikhatsi Asafa asendlini lengcwele, wacala kuba nembono lofanana newaNkulunkulu ngetintfo. Kungenteka kutsi nawe wake wahlangabetana nesimo lesinjalo. Mhlawumbe ngesikhatsi lesitsite walahlekelwa ngumbono wekubaluleka kwemsebenti lowentela Jehova, wabese ucala kunaka tintfo tenyama lotidzingako. Kodvwa ngekutadisha liVi laNkulunkulu kanye nangekuya emihlanganweni yebuKhristu, waphindze waba nembono lofanana newaJehova. Asafa wakucaphela loko bekutawehlela bantfu lababi ekugcineni. Wacabanga ngetintfo letinhle labekatitfole ngekuba sikhonti saNkulunkulu, futsi ngaleyo ndlela wabona kutsi Jehova bekatambamba ngesandla sakhe sekudla futsi amhole. Ngesizatfu saloko, Asafa watsi kuJehova: “Nanginawe, kute lengikufunako la emhlabeni.” (Hla. 73:23, 25) Ngemuva kwaloko, wabita Nkulunkulu ngekutsi usabelo sakhe. (Fundza Tihlabelelo 73:26.) Ngisho nalapho ‘umtimba nemphefumulo wakhe bewungase wehluleke,’ Nkulunkulu abetawuba ‘sabelo selifa lakhe ingunaphakadze.’ Umhlabeli abeciniseka ngekutsi Jehova abetawumkhumbula njengemngani wakhe. Abengeke awukhohlwe umsebenti wakhe wekwetsembeka. (Shu. 7:1) Loko kwaba sicinisekiso lesikhulu ku-Asafa. Wahlabela: “Kodvwa mine kungilungele kusondzela kuNkulunkulu, Simakadze, iNkhosi, ngimente waba siphephelo sami.”—Hla. 73:28.

¹⁰ Kuba kwaJehova sabelo sakhe, bekubaluleke kakhulu ku-Asafa kwendlula tintfo tenyama labekatitfola njengemLevi. Intfo labeyinaka kakhulu bekungumsebenti wakhe labekawentela Jehova kanye nebuhlobo labenabo naLosetikwako Konkhe. (Jak. 2:21-23) Kute lomhlabeli alondvolote lobuhlobo, bekufanele achubeke anekukholwa kuJehova futsi etsembele kuye. Asafa bekufanele aciniseke kutsi nangabe achubeka aphila ngekuvumelana netimiso taJehova, abetawutfola umvuzo lojabulisako. Nawe ungaciniseka kutsi Somandla utakwenta lokufananako nakuwe.

11. Ngumuphi umbuto Jeremiya lawubuta, futsi waphendvulwa njani?

¹¹ Lomunye umLevi lowatsi Jehova usabelo sakhe, ngumphrofethi Jeremiya. Ase sihlole kutsi abesho kutsini ngalamavi. Abehlala e-Anathothi, lidolobha lemaLevi lebelisedvute neJerusalema. (Jer. 1:1) Ngalesinye sikhatsi, Jeremiya wafikelwa kudideka, wate watsi: Kungani bantfu lababi bahluma kantsi labalungile bona bayahlupheka? (Jer. 12:1) Ngemuva kwekubona tintfo lebetenteka eJerusalema kanye nakaJuda, wativa aphocelelekile kutsi ‘akhonone.’ Jeremiya bekati kutsi Jehova ulungile. Loko Jehova lakutjela lomphrofethi kutsi akubiketele, kanye nendlela lokwagcwaliseka ngayo,  kwaniketa Jeremiya imphendvulo yembuto wakhe. Ngekuvumelana netiphrofetho lebetivela kuNkulunkulu, labo labasilalela sicondziso saJehova ‘basindzisa kuphila kwabo,’ kantsi lababi labebabonakala bachuma, abazange batinake letecwayiso futsi bafa.—Jer. 21:9.

12, 13. (a) Yini leyashukumisa Jeremiya kutsi atsi “Simakadze usabelo sami,” futsi ngusiphi simo sengcondvo labekanaso? (b) Kungani tonkhe tive taka-Israyeli bekufanele tibe nesimo sengcondvo sekulindza?

¹² Ngemuva kwesikhatsi, lapho Jeremiya abuka lelive lakubo futsi abona kutsi bese lilahliwe, kwaba shengatsi abehamba ebumnyameni. Wabona shengatsi Jehova umente wafanana ‘nebantfu lasebalala kadzeni emadlizeni.’ (Sil. 1:1, 16; 3:6) Jeremiya bekasitjelile lesive lesingalaleli kutsi sibuyele kuBabe waso wasezulwini, kodvwa bubi baso bese bubukhulu kangangekutsi Jehova wakhetsa kubhubhisa iJerusalema kanye nelive lakaJuda. Loko kwamvisa buhlungu lobukhulu Jeremiya, ngisho nobe yena bekete liphutsa. Nangetulu kwaloko, lomphrofethi wasikhumbula sihawu saNkulunkulu. Watsi: “Asikadliwa sacedvwa.” Wacaphela kutsi sihawu saJehova siba sisha malanga onkhe! Ngemuva kwaloko, watsi: “Simakadze usabelo sami.” Wachubeka awenta kahle umsebenti wakhe wekukhonta Jehova njengemphrofethi.—Fundza Sililo 3:22-24.

¹³ Bekutawuphela iminyaka lengu-70, solo ema-Israyeli angekho eveni lakubo. Live lawo belitawuhlala lite muntfu. (Jer. 25:11) Emavi lashiwo nguJeremiya latsi “Simakadze usabelo sami,” aveta litsemba lomphrofethi labekanalo ngemusa lovela kuNkulunkulu futsi amniketa nesizatfu sekuba nesimo sengcondvo ‘sekulindza.’ Tonkhe tive taka-Israyeli besetilahlekelwe lifa lato, ngako-ke, kwakufanele tibe nesimo sengcondvo lesifanana nesalomphrofethi. Litsemba lato belikuJehova kuphela. Ngemuva kweminyaka lengu-70, Nkulunkulu wabuyisela kabusha live labo, baphindze bajabulela kumkhonta kuleyondzawo.—2 Khr. 36:20-23.

Nalabanye Bangamenta Jehova Sabelo Sabo

14, 15. Ngaphandle kwema-Levi, ngubani lomunye lowenta Jehova sabelo sakhe, futsi kungani enta njalo?

¹⁴ Asafa kanye naJeremiya bebavela esiveni semaLevi, kodvwa ngemaLevi kuphela yini labengajabulela kukhonta Jehova? Cha. Davide, lobekatawugcina ayinkhosi yaka-Israyeli, wabita Nkulunkulu ngekutsi ‘sabelo sakhe nakasaphila.’ (Fundza Tihlabelelo 142:1, 5.) Ngesikhatsi abhala letihlabelelo, bekangekho esigodlweni nobe endlini yakhe. Bekasemgedzeni, abhacele titsa takhe. Cishe emahlandla lamabili, wakhosela emigedzeni—lomunye bewusedvute nase-Adulamu bese kutsi lolomunye usehlane lase-Eni Gedi. Kungenteka kutsi wacamba Tihlabelelo 142 akulomunye walemigedze.

¹⁵ Nangabe simo sasinjalo, kusho kutsi yiNkhosi Sawula lebeyimtingela futsi ifuna kumbulala. Davide wabalekela emgedzeni lobekulukhuni kufika kuwo. (1 Sam. 22:1, 4) Kuleyondzawo lebeyisehlane, bekungabonakala shengatsi besekute umngani lobekaseluhlangotsini lwakhe kute amvikele. (Hla. 142:4) Kwakungaleso sikhatsi lapho akhalela khona lusito lwaNkulunkulu.

16, 17. (a) Ngutiphi tintfo letenta Davide wativa aphelelwa litsemba? (b) Davide abengatsembela kubani kute atfole lusito?

¹⁶ Ngesikhatsi Davide abhala Tihlabelelo 142, kungenta kutsi bese akwati loko lobekwehlele uMphristi Lomkhulu Ahimeleki, longadzinwanga kumlekelela ngesikhatsi abalekela Sawula. INkhosi Sawula lebeyinemona, yenta kutsi Ahimeleki kanye nemndeni wakhe wonkhe babulawe. (1 Sam. 22:11, 18, 19) Davide wativa anelicala  ngesizatfu sekufa kwabo. Wativa shengatsi nguye lobulele lomphristi lowamsita. Kube bewunguDavide, bewutawutiva unelicala njengaye yini? Kuchubeka kwaSawula amcosha, kwakhulisa kucindzeteleka kuye.

¹⁷ Ngekushesha ngemuva kwaloko, kwafa umphrofethi Samuweli lobekagcobe Davide kute abeyinkhosi esikhatsini lesitako. (1 Sam. 25:1) Kungenteka kutsi loko kwajulisa imiva yekuphelelwa litsemba kuDavide. Nanobe kunjalo, bekati kamhlophe kutsi angalutfola kubani lusito. Bekangalutfola kuJehova. Nanobe Davide bekangayenti imisebenti lebeyentiwa ngemaLevi, kodvwa bekunemsebenti labeniketwe wona, wekutsi abe yinkhosi yebantfu baNkulunkulu. (1 Sam. 16:1, 13) Ngaleso sizatfu, Davide watfululela sifuba sakhe kuJehova futsi wachubeka etsembele kuYe kute atfole sicondziso. Nawe ungamenta Jehova sabelo kanye nesiphephelo sakho njengobe uchubeka utimisela emsebentini wakhe.

18. Labo lesesicoce ngabo kulesihloko bakhombisa njani kutsi Jehova usabelo sabo?

¹⁸ Bonkhe labo lesesicoce ngabo, benta Jehova sabelo sabo ngesizatfu sekutsi bawemukela umsebenti lovela kuye. Bebatsembele kakhulu ekusekelweni nguNkulunkulu njengobe bamkhonta. EmaLevi kanye naletinye tive taka-Israyeli, bewangamenta Nkulunkulu sabelo sawo, njengobe nje naDavide enta. Wena ungamenta njani Jehova sabelo sakho? Loko sitawucoca ngako esihlokweni lesilandzelako.

[Umbhalo longentansi]

Ungaphendvula Njani?

• Jehova bekasabelo semaLevi ngamuphi umcondvo?

• Yini leyentiwa ngu-Asafa, Jeremiya kanye naDavide, lebeyikhombisa kutsi Jehova usabelo sabo?

• Nguyiphi imfanelo lokufanele ubenayo nawufuna kutsi Nkulunkulu abe sabelo sakho?

[Imibuto Yesihloko Lesifundvwako]

[Emavi lahambisana nesitfombe ekhasini 8]

EmaLevi awazange awutfole umhlaba njengelifa lawo. Kunaloko, Jehova waba sabelo sawo, ngobe bekanemsebenti lokhetsekile wekumkhonta

[Sitfombe ekhasini 7]

Jehova waba njani sabelo sebaphristi kanye nemaLevi?

[Sitfombe ekhasini 9]

Yini leyasita Asafa kutsi achubeke enta Jehova sabelo sakhe?