Wugijime Ngekucinisela Lomncintiswano

“Asigijime ngekucinisela kulomncintiswano losembikwetfu.”—HEB. 12:1.

1, 2. Umphostoli Pawula wayifananisa nani imphilo yebuKhristu?

 UMNYAKA ngamunye, kuba nemijako etindzaweni letinyenti. Tingijimi lokutsiwa tinelikhono tingenela lemincintiswano tinemgomo wekuncoba. Kodvwa labanye labangenela lemincintiswano basuke bete umgomo lonjalo. Intfo lebaluleke kakhulu kubo kufika entsanjeni.

² EBhayibhelini, imphilo yebuKhristu ifananiswa nemncintiswano wekugijima. Umphostoli Pawula wakhuluma ngaloluhlobo lwemjako encwadzini yakhe yekucala lebeyiya kumaKhristu aseKhorinte. Wabhala: “Anati yini kutsi labagijima ngekuncintisana bagijima bonkhe, kodvwa munye lowemukela umklomelo? Nani-ke gijimani, khona nitewutfola lomklomelo.”—1 Khor. 9:24.

3. Kungani Pawula atsi yingijimi leyodvwa kuphela letfola umklomelo?

³ KulomBhalo, Pawula bekasho kutsi ngumKhristu munye yini lobekatawutfola umklomelo wekuphila, bese kutsi tsine labanye singatfoli lutfo? Cha, bekangasho njalo. Tingijimi letingenela umncintiswano tiyaceceshwa futsi tiyatimisela kute ekugcineni tincobe. Ngako kulelivesi, Pawula bekafuna kukhutsata emaKhristu labekanye nawo kutsi atimisele ngendlela lefananako ekufuneni kuphila lokuphakadze. Kwenta kanjalo bekutawasita kutsi abe nelitsemba lekutfola umklomelo wekuphila. Kulomncintiswano wemaKhristu, bonkhe labafika entsanjeni bayawutfola umklomelo.

4. Yini lokufanele sicabangisise ngayo mayelana nemncintiswano lesiwugijimako?

⁴ Lamavi ayasikhutsata, kodvwa ngesikhatsi lesifananako asenta sicabangisise. Kungani kunjalo? Kungobe lomklomelo lesitawutfola mkhulu kakhulu, ngisho nobe sinelitsemba lekuphila ezulwini nobe lekuphila emhlabeni loliPharadisi. Kuliciniso kutsi lomncintiswano lesikuwo utsatsa libanga lelidze futsi umatima; unetiphatamiso letinyenti, tintfo letisivimbako, futsi unetingoti. (Mat. 7:13, 14) Lokubuhlungu kutsi njengobe sigijima kulomncintiswano wekuphila, labanye behlisa emandla kantsi labanye bayayekela kukhonta Jehova. Ngubuphi bumatima kanye netingoti letikhona kulomncintiswano wekuphila? Ungatibalekela ngayiphi indlela letintfo? Yini longayenta kute uwucedze lomncintiswano futsi uncobe?

Kufanele Sicinisele Kute Sincobe

5. Njengobe kuvetiwe kumaHebheru 12:1, yini Pawula layisho ngemncintiswano?

⁵ Encwadzini yakhe layibhalela emaKhristu langemaHebheru, aseJerusalema kanye newaseJudiya, Pawula waphindze wakhuluma ngemncintiswano wekugijima. (Fundza Hebheru 12:1.) Akazange agcine ngekukhuluma ngekutsi kungani kufanele siwungenele, kodvwa waphindze waveta naloko lokufanele sikwente kute sincobe. Ngembikwekutsi sihlole tifundvo lesititfola eselulekweni saPawula lesiya kumaKhristu langemaHebheru, ase sihlole sizatfu lesenta Pawula wabhala lencwadzi kanye nekutsi bekafuna kukhutsata bafundzi bayo kutsi benteni.

6. Baholi benkholo bebawacindzetela ngayiphi indlela emaKhristu?

⁶ EmaKhristu angelikhulu lekucala leminyaka, ikakhulukati lawo labekahlala eJerusalema kanye naseJudiya, bekahlangabetana netilingo kanye nebumatima lobunyenti. Bewabhekene nebulukhuni, ngobe baholi benkholo labangemaJuda bebawacindzetela kutsi abalalele. Ngembikwekutsi  kwenteke loko, labaholi baphumelela ngesikhatsi banikela ngaJesu Khristu kutsi alahlwe ngelicala lekuba livukela mbuso aphindze abulawe njengesigebengu. Kuyacaca kutsi bebatimisele kuchubeka bashushisa emaKhristu. Encwadzini yeMisebenti, sifundza kulandzisa lokunyenti lokuveta kutsi baholi benkholo bebahlasela emaKhristu kute bawayekelise kushumayela, futsi loko kwenteka ngemuva nje kwetentakalo letimangalisako tangeliPhentekhoste la-33 C.E. Kuyacaca kutsi loluvivinyo beluwacindzetela emaKhristu angaleso sikhatsi.—Imis. 4:1-3; 5:17, 18; 6:8-12; 7:59; 8:1, 3.

7. EmaKhristu Pawula lawabhalela incwadzi bekaphila ngaphansi kwasiphi sikhatsi lesimatima?

⁷ LawomaKhristu bewaphila ngesikhatsi umbuso wemaJuda sewutawubhujiswa. Jesu bekawatjelile ngalembubhiso lebeyitakwehlela onkhe emaJuda langamhloniphi Jehova. Waphindze watjela balandzeli bakhe nangetehlakalo lebetitakwenteka ngembikwekutsi kufike kuphela, wabaniketa neticondziso leticacile taloko lobekufanele bakwente kute basindze. (Fundza Lukha 21:20-22.) Bekufanele benteni? Jesu wabecwayisa: “Ticaphelisiseni! Ningatifaki kakhulu emadzilini nasekunatseni lokudzakanako, nasekunakeni tintfo talomhlaba, funa lelo langa linitume.”—Luk. 21:34.

8. Yini lokungenteka kutsi yenta lamanye emaKhristu ehlisa emandla nobe ayekela kukhonta Jehova?

⁸ Ngesikhatsi Pawula abhala incwadzi yakhe leya kumaHebheru, besekuphele iminyaka lecishe ibe ngu-30 Jesu asho lesecwayiso. Yini leyenteka kulamaKhristu ngaleyo minyaka? Lamanye ancotjwa tinkinga kanye netiphatamiso tekuphila, futsi ehluleka kwenta intfutfuko yakamoya lebeyitawasita kutsi akwati kucinisa buhlobo bawo naJehova. (Heb. 5:11-14) Labanye kuwo, bebacabanga kutsi kuphila kwabo bekutawuba melula nabebangavele baphile njengemaJuda angaleso sikhatsi. Kungenteka bebacabanga kutsi loko bekungasiyo ingoti, ngobe lamaJuda abengakamlahli ngalokuphelele Nkulunkulu, futsi bekasayigcina leminye yeMitsetfo yakhe. Lamanye emaKhristu ayengwa ngulabanye ebandleni labebaphocelela bantfu kutsi bagcine uMtsetfo waMosi kanye nemasiko emaJuda. Yini Pawula labengayisho lebeyingasita bazalwane bakhe kutsi bahlale baphapheme ngekwakamoya futsi bacinisele kulomncintiswano?

9, 10. (a) Ngusiphi sikhutsato saPawula lesisifundza ngasekupheleni kwaHebheru sehluko 10? (b) Kungani Pawula abhala ngetento tekwetsembeka tabofakazi basendvulo?

⁹ Njengobe Pawula bekaphefumulelwe nguNkulunkulu, bekafisa kuwacinisa emaKhristu langemaHebheru. Esehlukweni 10 sencwadzi yakhe, waveta kutsi uMtsetfo bewumane “usitfunti setintfo letinhle letatitawufika,” futsi wakucacisa kubaluleka kwemhlatjelo wesihlengo saKhristu. Ngasekupheleni kwaleso sehluko, Pawula wabayala: “Nidzinga kucinisela kuze kutsi nase nente intsandvo yaNkulunkulu, nitekwemukela loko lokwatsenjiswa nguye. UmBhalo utsi: ‘Kusasele sikhashana nje kutsi lowo lotako afike, angeke alibale.’”—Heb. 10:1, 36, 37.

¹⁰ KumaHebheru sehluko 11, Pawula uchaza loko lobekushiwo kuba nekukholwa kweliciniso kuNkulunkulu. Loku wakuchaza asebentisa tibonelo tasendvulo temadvodza kanye nebafati labebanekukholwa. Bekubalulekile yini loko lakusho? Yebo, bekubalulekile. Lomphostoli bekati kutsi emakholwa lakanye nawo bekufanele acaphele kutsi kute abe nekukholwa, bekufanele abe nesibindzi kanye nekubeketela. Lesibonelo lesihle lesabekwa nguletinceku taJehova tasendvulo, besitawacinisa lamaHebheru kutsi akwati kuhlangabetana netilingo kanye nebumatima lobuvelako. Ngemuva kwekubala tento tekukholwa taletinceku taJehova tasendvulo, Pawula watsi: “Njengobe situngeletwe sicumbi lesikhulu kangaka sabofakazi, asilahle konkhe lokusindzako, nesono lesigigelana njengelwanca. Asigijime ngekucinisela kulomncintiswano losembikwetfu.”—Heb. 12:1.

‘Sicumbi Lesikhulu Sabofakazi’

11. Kungasitsintsa njani kucabanga ‘ngesicumbi lesikhulu sabofakazi’?

¹¹ ‘Sicumbi lesikhulu sabofakazi,’ besingasibo nje bantfu labebetele kutobukela umncintiswano  nobe kutewubona tingijimi labatitsandzako tincoba. Kunaloko, bebahlanganyela kulomncintiswano. Bawugijima ngemphumelelo lomncintiswano, futsi bawucedza. Ngisho nobe sebafa, kodvwa basengatikhutsata tingijimi letisandza kucala kulomncintiswano. Asewucabange nje kutsi ingijimi lengenele umncintiswano beyingativa njani nangabe beyingati kutsi emkhatsini webantfu labayibukele kukhona nalabatsite labake baba tingijimi letiphumelelako. Beyingeke yini ifune kwenta konkhe lokusemandleni ayo nobe yente kancono kwendlula labanye? Labofakazi basendvulo bebangayicinisekisa ngekutsi nanobe lomncintiswano longekwemfanekiso umatima, kodvwa ingawuncoba. Ngako-ke, ngekucabangisisa ngetibonelo ‘tesicumbi lesikhulu sabofakazi,’ emaKhristu langemaHebheru angelikhulu lekucala bewangaba nesibindzi, futsi ‘awugijime ngekucinisela lomncintiswano.’ Natsi lamuhla singenta lokufananako.

12. Tibonelo Pawula lakhuluma ngato tibaluleke ngani kitsi?

¹² Linyenti laletinceku letetsembekile Pawula lakhuluma ngato, belihlangabetana netimo letifanana netetfu. Nasi sibonelo: Nowa waphila ngesikhatsi live langembikwaZamcolo selitawuphela. Natsi siphila ngasekupheleni kwalelive laSathane. Bo-Abrahama naSara batjelwa kutsi bashiye live lakubo kute bayewukhonta Jehova futsi balindze kugcwaliseka kwesetsembiso sakhe. Natsi siyalwa kutsi siyekele kutiphilela tsine, kodvwa siphilele Jehova kute sitfole tibusiso lasigcinele tona. Mosi wahamba libanga lelidze ehlane leletfusako, ngobe bekafuna kufika eVeni Lesetsembiso. Natsi siphila kulelive lelibi, futsi silindzele umhlaba lomusha Jehova lasetsembise wona. Kutasizuzisa kucabangisisa ngetintfo letehlela labofakazi, kuphumelela kwabo, emaphutsa, emandla kanye nebutsakatsaka babo.—Rom. 15:4; 1 Khor. 10:11.

Baphumelela Njani?

13. Ngutiphi tinsayeya Nowa lahlangabetana nato, futsi yini leyamsita wakwati kutincoba?

¹³ Yini leyasita letinceku taJehova kutsi ticinisele futsi tiphumelele kulomncintiswano? Naka loko Pawula lakubhala ngaNowa. (Fundza Hebheru 11:7.) ‘Zamcolo lobewutawufike ubulale yonkhe inyama lenemoya wekuphila’ bewuyintfo Nowa ‘labengakaze ayibone.’ (Gen. 6:17) Bewuyintfo lebeyingakaze seyenteke emlandvweni, futsi uyintfo lebeyingacatjangwa. Nanobe kunjalo, Nowa akazange awutsatse njengentfo lebeyingeke yenteke nobe lengemanga. Kungani? Kungobe abekholwa kutsi konkhe Jehova lakushilo, utakwenta. Nowa akazange akutsatse njengalokumatima loko Jehova bekamtjele kutsi akwente. Kunaloko, “wakwenta konkhe.” (Gen. 6:22) Nasicabanga ngetintfo Nowa lobekufanele atente—kwakha umkhumbi, kubutsela tilwane ndzawonye, kufaka kudla lokutawudliwa ngibo kanye netilwane, kushumayela umlayeto wekwecwayisa bantfu, kanye nekugcina umndeni wakhe wondlekile ngekwakamoya—siyabona kutsi lona bekungasiwo nani umsebenti lomelula lobewungamane ‘uwente wonkhe.’ Nanobe kunjalo, kukholwa Nowa labenako kanye nekucinisela kwakhe kwaphumela ekusindzeni kanye nasetibusisweni takhe kanye netemndeni wakhe.

14. Nguluphi luvivinyo bo-Abrahama kanye naSara lokwadzingeka kutsi balubeketelele, futsi loko kusiniketa siphi sifundvo?

¹⁴ Abrahama naSara basibonelo sesibili eluhlwini lwaPawula ‘lwesicumbi lesikhulu sabofakazi.’ Bashiya likhaya labo lelihle lebelise-Uri, futsi ngaleso sikhatsi bebangalati nelikusasa labo. Baba sibonelo lesihle sekuba nekukholwa lokucinile kanye nekulalela ngetikhatsi letimatima. Njengobe Abrahama bekatimisele kutidzela ngesizatfu sekukhonta kweliciniso, bekakufanelekela kubitwa ngekutsi “nguyise wabo bonkhe labakholwa nguNkulunkulu.” (Rom. 4:11) Ngesizatfu sekutsi lamaKhristu labekawabhalele bekati lokunyenti ngemphilo ya-Abrahama, Pawula wakhetsa kusho emaphuzu lasemcoka kuphela. Ngetulu kwaloko, sifundvo lesibalulekile Pawula labefuna kusiveta ngunasi: “Bonkhe laba bafa [lokufaka ekhatsi Abrahama kanye nemndeni wakhe] bakholiwe  bangakwemukeli loko lababetsenjiswe kona, kodvwa bakubona bakwemukela kusekhashane, bavuma kutsi lapha emhlabeni babafokati netihambi.” (Heb. 11:13) Kuyacaca kutsi kukholwa kwabo kuNkulunkulu kanye nebuhlobo labebanabo naye kwabasita bagijima lomncintiswano ngekucinisela.

15. Kungani Mosi akhetsa kuphila ngalendlela laphila ngayo?

¹⁵ Mosi ungulenye yetinceku taJehova letisibonelo letibalwa kanye ‘nesicumbi lesikhulu sabofakazi.’ Washiya imphilo lentofontofo kanye nalencono, “wakhetsa kuhlupheka nesive saNkulunkulu.” Kungani akhetsa kwenta kanjalo? Pawula uyaphendvula: “Abebheke umvuzo. . . . wacinisela kwaba shangatsi uyambona longabonwa.” (Fundza Hebheru 11:24-27.) Mosi akazange aphatanyiswe ‘kutijabulisa esonweni kwesikhashana.’ Nkulunkulu bekangumuntfu mbamba kuye, futsi bekati kutsi tonkhe tetsembiso taKhe titawuphumelela. Watinikela ngalokuphelele, wakhipha ema-Israyeli eGibhithe, wawaholela eVeni Lesetsembiso.

16. Kungani Mosi angazange aphatseke kabi ngesikhatsi atfola kutsi abengeke angene eVeni Lesetsembiso?

¹⁶ Njenga-Abrahama, Mosi wafa singakagcwaliseki setsembiso saNkulunkulu. Ngembikwekutsi ema-Israyeli angene eVeni Lesetsembiso, Nkulunkulu watsi kuMosi: “Lelive utalibonela khashane; ngeke usangena kulelive lengilipha sive saka-Israyeli.” Loku kwabangelwa kutsi ekucaleni, boMosi kanye na-Aroni batfukutseliswa kuvukela kwebantfu, ngesizatfu saloko ‘bangetsembeki [kuNkulunkulu] embikwesive saka-Israyeli emantini aseMeribha.’ (Dut. 32:51, 52) Waphatseka kabi yini Mosi futsi watfukutsela? Cha. Wacela Jehova kutsi ababusise labantfu, futsi waphetsa ngalamavi: “Ubusisiwe wena, Israyeli! Ngubani lofanana nawe, sive lesisindziswe nguSimakadze? Nguye losihlangu sakho nemsiti wakho, nenkemba yakho yeludvumo.”—Dut. 33:29.

 Tifundvo Lesititfolako

17, 18. (a) Yini lesingayifundza ‘esicumbini lesikhulu sabofakazi’ mayelana nemncintiswano wekuphila? (b) Yini lokutawucocwa ngayo esihlokweni lesilandzelako?

¹⁷ Njengobe sesihlole indlela labanye bantfu labayincenye ‘yesicumbi lesikhulu sabofakazi’ labebaphila ngayo, kuyacaca kutsi kute natsi sigijime lomncintiswano kute kube sekugcineni, kufanele sibe nekukholwa lokucinile kuNkulunkulu kanye nasetetsembisweni takhe. (Heb. 11:6) Lokukholwa kufanele kutsintse indlela lesiphila ngayo ngisho nanyalo. Ngalokwehlukile kulabo labete kukholwa, tinceku taJehova tiyalati likusasa. Siyakwati kumbona “longabonwa,” ngaleyo ndlela, sikhone kuwugijima ngekucinisela umncintiswano.—2 Khor. 5:7.

¹⁸ Umncintiswano webuKhristu awusimelula. Nanobe kunjalo, singakwati kuwucedza ngemphumelelo. Esihlokweni lesilandzelako, sitawucoca ngalokunye lokungasisita kutsi siwucedze lomncintiswano.

Ungachaza?

• Kungani Pawula abhala ngetento tabofakazi basendvulo?

• Kuhlola sibonelo ‘sesicumbi lesikhulu sabofakazi’ kutasikhutsata njani kutsi sigijime umncintiswano ngekucinisela?

• Yini loyifundzile esibonelweni sabofakazi labetsembekile, labanjengaNowa, Abrahama, Sara kanye naMosi?

[Imibuto Yesihloko Lesifundvwako]

[Sitfombe ekhasini 19]

Bo-Abrahama naSara bebatimisele kushiya imphilo lentofontofo lebebayiphila e-Uri