Asijabuleni Ndzawonye!

LAMUHLA, kuya kuba matima kutfola injabulo. Kulabanyenti, kuyintfo lengeke seyenteke kutsi basho emavi lakhako kulabanye. Imphilo yalamuhla, ikakhulukati emadolobheni lamakhulu, yenta bantfu bangabanaki labanye futsi batehlukanise.

Alberto Oliverio, longuPhrofesa we-Psychobiology, utsi: “Situnge siyintfo levame kakhulu. Akungabateki kutsi imphilo yasemadolobheni lamakhulu ibangela kwehlukana. Etimeni letinyenti, isenta singabanaki bantfu lesisebenta nabo, bomakhelwane betfu kanye nebantfu lesitsenga kubo etitolo tangakitsi.” Kutehlukanisa lokunjalo kuvame kuphumela ekucindzetelekeni.

Nanobe kunjalo, emaKhristu ehlukile, kanjalo nangesimo sawo. Umphostoli Pawula wabhala: “Tfokotani njalo.” (1 Thes. 5:16) Tinyenti tintfo letingasenta sijabule ndzawonye. Sikhonta Nkulunkulu Losetikwako Konkhe, Jehova; siyawucondza umlayeto weliBhayibheli loliciniso; sinelitsemba lekusindza  kanye nelekuphila phakadze; futsi singasita nalabanye kutsi nabo batfole tibusiso letifananako.—Hla. 106:4, 5; Jer. 15:16; Rom. 12:12.

Kujabula kanye nekuhlanganyela injabulo yetfu nalabanye kutimfanelo temaKhristu eliciniso. Ngako-ke, akumangalisi kutsi Pawula wabhalela emaKhristu aseFiliphi, watsi: ‘Ngiyajabula, futsi ngijabula kanye nani nonkhe. Ngako-ke ngitsi: Nani tfokotani kanye nami.’ (Fil. 2:17, 18) Kulelivesi, Pawula ukhuluma kabili ngekujabula kanye nekujabula nalabanye.

EmaKhristu kufanele abalekele umkhuba wekutehlukanisa nalabanye. Akekho umuntfu lotehlukanisako, longajabula kanye nemakholwa lakanye nawo. Ngako-ke, singasilalela njani seluleko saPawula sekuchubeka ‘sitfokota eNkhosini’ sikanye nebazalwane betfu?—Fil. 3:1.

Jabula Nemakholwa Lokanye Nawo

Ngesikhatsi Pawula abhalela emaKhristu aseFiliphi incwadzi, kufanele kutsi bekaboshwe eRoma ngesizatfu sekushumayela kwakhe. (Fil. 1:7; 4:22) Nanobe kunjalo, kuboshwa kwakhe akuzange kuyinciphise inshisekelo labenayo ngemsebenti wekushumayela. Kunaloko, wajabulela kukhonta Jehova ngelizinga leligcwele kanye nekutsi atfululwe ‘njengemhlatjelo lonikelwa kuNkulunkulu.’ (Fil. 2:17) Simo sengcondvo saPawula siveta kutsi kujabula kwetfu akuyi ngetimo lesikuto. Nangetulu kwekuboshwa, watsi: “Ngiyawuhlala ngitfokota.”—Fil. 1:18.

Pawula wasungula libandla laseFiliphi, futsi bekanelutsandvo lolujulile ngebazalwane balapho. Bekati kutsi kuhlanganyela kwakhe injabulo labekayitfola ngekukhonta Jehova bekutabakhutsata. Kungako abhala: “Ngitsandza kutsi nati, bazalwane, kutsi loko lokwangehlela kugcine sekuvete kuchubeka kweliVangeli. Kubonakele kubalindzi bami, nakubo bonkhe labanye kutsi kuboshwa kwami kungenca yaKhristu.” (Fil. 1:12, 13) Kuhlanganyela kwaPawula nebazalwane bakhe lokuhlangenwe nako kwakhe lokukhutsatako, bekungulenye indlela labekaveta ngayo kutsi ujabula kanye nabo. Kufanele kutsi bazalwane baseFiliphi nabo bajabula kanye naPawula. Kute bente kanjalo, bekufanele bangadvunyatwa nguloko bekwenteka kuPawula. Kodvwa, bekufanele balingise sibonelo sakhe. (Fil. 1:14; 3:17) Ngetulu kwaloko, emaKhristu aseFiliphi bekangachubeka athandazela Pawula, amnikete lusito laludzingako aphindze amsekele.—Fil. 1:19; 4:14-16.

Siyajabula yini natsi njengaPawula? Siyetama  yini kubona tici letinhle etimeni tetfu tekuphila kanye nasemsebentini wetfu webuKhristu? Nasitihlanganisa nebazalwane betfu, kubalulekile kutsi sijabule ngemsebenti wetfu wekufakaza. Akukafaneli silindze kute kube ngulapho sesitfole lokuhlanganwe nako lokukhulu. Kungenteka kutsi sikhonile kuvusa inshisekelo yemuntfu ngeMbuso, sisebentisa singeniso lesiphumelelako nobe indzaba letsite lementa acabange. Mhlawumbe sicoce kahle nemnikati welikhaya ngemBhalo lotsite lesiwukhetsile. Kungenteka kutsi lotsite losensimini yetfu usibonile kutsi siboFakazi BaJehova, futsi loko kwaniketa bufakazi lobuhle. Kucoca nalabanye ngalokuhlangenwe nako lokunjalo kuyindlela lesingajabula ngayo ndzawonye.

Bantfu baJehova labanyenti bayachubeka batidzela kute bente umsebenti wekushumayela. Emahlahlandlela, babonisi labajikeletako, tikhonti taseBethel, titfunywa teliVangeli kanye netisebenti temhlaba wonkhe; bonkhe bayachubeka benta umsebenti wasikhatsi sonkhe futsi bayajabula njengobe bawenta. Sijabula nabo yini? Nangabe kunjalo, asibabonge labo “labasebentela umbuso waNkulunkulu.” (Khol. 4:11) Nasisemihlanganweni yelibandla nobe emihlanganweni lemikhulu, singabakhutsata ngenjabulo. Singaphindze silingise sibonelo sabo sekukhutsala. Singakha ‘ematfuba’ ekulalela lokuhlangenwe nako kwabo lokwakhako ngekutsi sibamemele emitini yetfu, siphindze sidle nabo.—Fil. 4:10.

Jabula Nalabo Labahlangabetana Netilingo

Kukhutsatelela lushushiso kanye nekuncoba tilingo kwacinisa Pawula kutsi ahlale atsembekile kuJehova. (Khol. 1:24; Jak. 1:2, 3) Kwati kutsi bazalwane baseFiliphi bebatawuhlangabetana netilingo letifananako kanye nekutsi bekungabakhutsata kubeketela kwakhe, kwaniketa Pawula sizatfu sekutsi ajabule kanye nabo. Kungako abhala: “Ngenca yaKhristu nine nabelwa ngemusa angisho kukholwa kuye kuphela, kepha nekuhlupheka ngenca yakhe. Nikuko kona loko kulwa lenakubona kimi, njengobe nanyalo niva kutsi ngisekuko.”—Fil. 1:29, 30.

Nalamuhla, emaKhristu ayaphikiswa ngesizatfu sekufakaza kwawo. Ngaletinye tikhatsi, lokuphikiswa kuba nebudlova, kodvwa esikhatsini lesinyenti, akubonakali. Kungase kuvele ngekutsi siphikiswe tihlubuki, sitondvwe ngemalunga emindeni yetfu, siphindze sihlekwe ngulabo lesisebenta nabo nobe lesifundza nabo esikolweni. Jesu wasecwayisa ngekutsi letilingo akukafaneli tisimangalise nobe tisicedze emandla. Kunaloko, kufanele tibe sizatfu sekujabula. Watsi: “Nibusisiwe nabanetfuka, banitingele, banihluphe, bakhulume konkhe lokubi ngani, banicalele emanga ngami. Jabulani nitfokote, ngobe umvuzo wenu mkhulu ezulwini.”—Mat. 5:11, 12.

Akukafaneli sesabe nobe setfuke nangabe siva kutsi bazalwane betfu bahlangabetana nekushushiswa lokubuhlungu kakhulu etindzaweni letitsite. Kunaloko, kufanele sijabule ngekubeketela kwabo. Singathandaza kuJehova sicele kutsi acinise kukholwa kanye nekubeketela kwabo. (Fil. 1:3, 4) Nanobe singenta lokuncane kute sisite bazalwane betfu labakuletinye tindzawo, singabasita labo labasemabandleni etfu labahlangabetana netilingo. Singabanaka futsi sibasekele. Singatinika sikhatsi sekujabula nabo ngekutsi ngaletinye tikhatsi sibameme kutsi bahlanganyele natsi ekuKhonteni Kwemndeni kwakusihlwa, sihambe nabo ensimini, siphindze sitijabulise kanye nabo.

Sinetizatfu letinyenti tekujabula ndzawonye. Ngako-ke, asiwubalekele umoya walelive wekutehlukanisa futsi sichubeke sijabula nebazalwane betfu. Ngekwenta njalo, angeke sigcine ngekulondvolota lutsandvo kanye nebunye ebandleni, kodvwa sitabujabulela ngalokugcwele buzalwane bebuKhristu. (Fil. 2:1, 2) Pawula uyasikhutsata: “Tfokotani eNkhosini njalonjalo. Ngiyaphindza futsi ngitsi: Tfokotani.”—Fil. 4:4.

[Emavi laveta Umtfombo wesitfombe ekhasini 6]

Indingilizi yemhlaba: Courtesy of Replogle Globes