‘Kuhlala Silindzele’ Kungani Kubaluleke Kangaka?

‘KUYAKWENTEKANI letakuba [“sibonakaliso,” NW] sekutsi sesikhatsi sekubuya kwakho nekutsi sekuphela kwetikhatsi?’ (Mat. 24:3) Nakaphendvula lombuto, Jesu waniketa bafundzi bakhe sibonakaliso lesicacile, lesinemininingwane futsi lokumelula kusibona, njengobe sivetiwe kuMatewu sehluko 24, kuMakho sehluko 13, kanye nakuLukha sehluko 21. Wachubeka watsi: “Hlalani nilindzele.”—Mat. 24:44.

Nangabe lesibonakaliso bekutawuba melula kusibona, kungani secwayiswa ngaso kangaka? Ase sihlole tintfo letimbili letibangela loku. Kwekucala, tiphatamiso tingase tente umuntfu angasinaki lesibonakaliso, ekugcineni aphelelwe buhlobo bakhe naNkulunkulu futsi ayekele kulindza. Kwesibili, umKhristu angase aticaphele tincenye talesibonakaliso, kodvwa ngesizatfu sendlela laphila ngayo angase abone shengatsi atimtsintsi yena. Angaphindze acabange kutsi “kuhlupheka lokukhulu” Jesu lakhuluma ngako esiphrofethweni sakhe, angeke kwenteke ngekushesha futsi kute sizatfu sekutsi ‘ahlale alindzele.’—Mat. 24:21.

“Abazange Banake”

Jesu wakhumbuta balandzeli bakhe ngebantfu labebaphila esikhatsini saNowa. Kushumayela kwaNowa, kwakha kwakhe umkhumbi kanye nebudlova bangesikhatsi sakhe bekubonakala ngalokucacile. Nanobe kunjalo, bantfu labanyenti “abazange banake.” (Mat. 24:37-39) Nalamuhla, bantfu banesimo sengcondvo lesifananako ngetecwayiso. Sibonelo saloko kutsi timphawu temgwaco tinemilayeto lecacile, kodvwa bantfu labanyenti abatinaki. Betemtsetfo bavame kutiva baphocelelekile kutsi bafake tintfo letivimbela bashayeli kutsi bagijime emigwacweni lephitsitelako. Ngendlela lefananako, emaKhristu angase asibone sibonakaliso semalanga ekugcina, kodvwa angase achubeke ahlanganyela etintfweni letingaveti kutsi ayasibona. Arielle, losemusha waseNshonalanga Africa, wahlangabetana nesimo lesifananako.

Bekakujabulela kubukela ibhola yetandla lebeyidlalwa bantfu besifazane ku-TV. Ngesikhatsi sikolwa sakhe sihlela licembu lekudlala lomdlalo, sifiso sakhe sekudlala nalelicembu samenta wangatinaki timphawu lebetitawufaka buhlobo bakhe naNkulunkulu engotini. Ngako-ke, waba ngunozinti walelicembu. Yini leyenteka ngemuva kwaloko? Uyachaza: “Labanye lebengidlala nabo bebatsandzana nebafana labadla tidzakamiva futsi lababhemako. Bebangihleka ngekutsi mine ngehlukile kubo, kodvwa bengititjela kutsi ngitawukwati kusibeketelela lesimo. Ngingakacapheli, lomdlalo wacala kulimata buhlobo bami naNkulunkulu. Besekunguwo losengcondvweni yami kanye nasenhlitiyweni. Nangisemihlanganweni yebuKhristu, bengitikhandza sengicabanga ngawo. Buntfu bami bebuKhristu nabo balimala. Lutsandvo lwami ngalomdlalo lwashintja lwaba sifiso sekuncoba. Bengiticecesha kamatima kute ngenetise umoya wami wekuncintisana. Ngacala kucindzeteleka. Ngaze ngalahlekelwa bangani bami ngesizatfu salomdlalo webhola yetandla.

“Lokukhulu kunako konkhe kwenteka ngalesikhatsi licembu lebesidlala nalo liniketwa i-penalty. Kwacelwa mine kutsi ngibe ngunozinti.  Ngingakanaki, ngatitfola sengithandaza kuJehova ngicela kutsi angisite ngiyivimbe lebhola. Loku kwangenta ngabona kutsi buhlobo bami naJehova besebulimele kangakanani. Ngabuvusetela njani?

“Bengike ngayibukela i-DVD letsi “Young People Ask—What Will I Do With My Life?” a Kodvwa ngancuma kutsi ngiphindze ngiyibukele, futsi nyalo ngiyinakisise kute ngizuze kuyo. Simo sami besifanana nesa-André, umzalwane losemusha lokule-drama. Ngakunaka kakhulu loko lomdzala welibandla lakutjela André kutsi akwente—kufundza kanye nekucabangisisa ngaFiliphi 3:8. Loko kwangisita kakhulu, ngobe ngayekela kudlala nalelicembu.

“Loku kwakushintja kakhulu kuphila kwami! Umoya wekuncintisana lebesenginawo kanye nekucindzeteleka lobekuhambisana nawo, kwaphela. Ngacala kujabula kakhulu ngaphindze ngasondzelana nebangani bami labamaKhristu. Imisebenti yebuKhristu yaba ngulebaluleke kakhulu kimi. Besengilalelisisa emihlanganweni yelibandla, futsi ngikujabulela kuba kuyo. Indlela lengihlanganyela ngayo emsebentini wekushumayela nayo yatfutfuka. Nyalo, sengivame kukhonta njengelihlahlandlela lelisitako.”

Nangabe tiphatamiso tikwenta kutsi ungasinaki sibonakaliso lesashiwo nguJesu, tsatsa tinyatselo letidzingekile njengobe na-Arielle enta. Naku longase ukwente: Fundza i-“Watch Tower Publications Index,” lebeyibitwa ngekutsi “libalave lelinemagugu lafihliwe.” Kuyo utawutfola teluleko letisebentako tendlela labanye bantfu labahlangabetane ngayo netilingo. Zuza ngalokugcwele emihlanganweni yebuKhristu ngekutsi ulungiselele kahle futsi ubhale nemaphuzu lapho sewukuyo. Labanye batfole kutsi kuhlala etihlalweni letingembili eHholweni kulusito kakhulu. Nangabe sekusikhatsi sekutsi tilaleli tihlanganyele ngetimphendvulo, yetama kuphendvula ekucaleni. Ngetulu kwaloko, tigcine uphapheme ngekwakamoya ngekutsi ubuke kutsi tindzaba takamuva tihlangana njani nesibonakaliso lesashiwo nguJesu kanye naletinye tici ‘temalanga ekugcina.’—2 Thim. 3:1-5; 2 Phet. 3:3, 4; Semb. 6:1-8.

“Banini Ngulabakulungele”

Sibonakaliso lesimayelana nemalanga ekugcina sitsintsa ‘umhlaba wonkhe.’ (Mat. 24:7, 14) Tigidzi tebantfu tiphila emaveni lahlaselwa tifo, kusweleka kwekudla, kutamatama kwemhlaba kanye naletinye tehlakalo letabiketelwa. Ngalokwehlukile kuloko, linyenti lebantfu liphila etindzaweni letibonakala tinekuthula. Nangabe bewungakake wahlangabentana naletinye tici tesibonakaliso, kufanele yini ucabange kutsi kuhlupheka lokukhulu kusekhashane? Kwenta kanjalo bekungeke kube kuhlakanipha.

Nasi sibonelo: Cabanga ngaloko Jesu lakubiketela mayelana ‘nendlala netifo letingelapheki naletitsatselwanako.’ (Luk. 21:11) Kwekucala, akazange atsi loku bekutakwenteka kuto tonkhe tindzawo, ngesikhatsi lesifananako nobe ngelizinga lelilinganako. Kunaloko, watsi loku bekutakwenteka “etindzaweni letinyenti.” Ngako-ke, angeke silindzele kutsi tehlakalo letifananako tenteke emhlabeni wonkhe kanyekanye. Kwesibili, ngemuva kwekutsi Jesu akhulume ngendlala, watsi balandzeli bakhe bekufanele bagadze ingoti yekudla kakhulu. Watsi: “Ticaphelisiseni! Ningatifaki kakhulu emadzilini” nobe ekudleni kakhulu. (Luk. 21:34) Ngako-ke, emaKhristu akukafaneli  alindzele kutsi atibone tenteka kuwo tonkhe tici tesibonakaliso. Kunaloko, Jesu watsi: “Nanibona letintfo tenteka, nibokwati kutsi umbuso waNkulunkulu sewutawufika.” (Luk. 21:31) Tekuchumana talamuhla tisisita kutsi sitibone tonkhe tici tesibonakaliso, ngisho nobe kungutiphi letenteka endzaweni yakitsi.

Khumbula kutsi Jehova sewuvele ulibekile ‘lilanga nemzuzu’ kuhlupheka lokukhulu lokutawucala ngalo. (Mat. 24:36) Indlela tibonakaliso letenteka ngayo emhlabeni angeke tilishintje lelilanga.

Jesu wakhutsata onkhe emaKhristu: “Banini ngulabakulungele.” (Mat. 24:44, NW.) Ngako-ke, kufanele sihlale sikulungele. Kuliciniso kutsi angeke kwenteke kutsi sihlanganyele emisebentini yebuKhristu lilanga lonkhe nobe malanga onkhe. Ngetulu kwaloko, kute lowatiko kutsi utabe entani nakucala kuhlupheka lokukhulu. Kungenteka kutsi labanye batawube basebenta emasimini nobe benta imisebenti yasekhaya. (Mat. 24:40, 41) Ngako-ke, yini lesingayenta kute sibe ngulabakulungele?

Emmanuel naVictorine kanye nemadvodzakati abo lasitfupha, bahlala eveni lase-Afrika, futsi abatiboni ngalokugcwele tehlakalo letigcwalisa kuba khona kwesibonakaliso. Ngako-ke, bancuma kucoca ngetintfo takamoya malanga onkhe, kute babe ngulabakulungele. Emmanuel uyachaza: “Ekucaleni bekumatima kutfola sikhatsi lesisivumela sonkhe. Kodvwa sagcine sesikhetse kuhlangana kusukela nga-6:00 ekuseni kuya ku-6:30. Ngemuva kwekucoca ngemBhalo welusuku, silungiselela tigaba letimbalwa tencwadzi letawufundvwa esifundvweni selibandla ngalelo viki.” Lendlela yekufundza ibasitile yini kutsi bahlale baphapheme? Yebo ibasitile! Emmanuel ungumchumanisi wesigungu salabadzala ebandleni lakubo. Victorine uvame kukhonta njengelihlahlandlela lelisitako, futsi sewusite bantfu labanyenti kutsi bemukele liciniso. Emadvodzakati abo achuba kahle ngekwakamoya.

Jesu uyasiyala: “Caphelani nilindze.” (Mak. 13:33) Ungativumeli tiphatamiso kutsi tehlise kuphaphama kwakho ngekwakamoya. Kunaloko, njenga-Arielle, naka teluleko letilusito letitfolakala etincwadzini tetfu kanye nasemihlanganweni yelibandla. Njengemndeni wa-Emmanuel, yetama kwenta lokutsite malanga onkhe kute ube ngulokulungele futsi ‘uhlale ulindzele.’

[Umbhalo longentansi]

[Sitfombe ekhasini 4]

Kucoca ngetintfo takamoya malanga onkhe kusita Emmanuel kanye nemndeni wakhe kutsi ‘babe ngulabakulungele’