Kukhonta Jehova Bekusolo Kungijabulisa

Njengobe ilandziswa ngu-Fred Rusk

Ngatibonela ngisasemncane kuba liciniso kwemavi aDavide latfolakala kuTihlabelelo 27:10, latsi: “Nome bobabe namake bangilahlile, kodvwa wena, Simakadze, utangemukela ungigcine.” Ase ngilandzise kutsi lamavi agcwaliseka njani kimi.

NGAKHULELA epulazini lamkhulu lekulima kotini, endzaweni yase-Georgia, eMelika, ngesikhatsi lesatiwa ngekutsi yi-Great Depression yeminyaka yabo-1930. Kufa kwamake kanye nekwemnaketfu lobekasandza kutalwa kwamlimata babe, wase ungishiya namkhulu, naye lobekafelwe ngumkakhe, watfutsela edolobheni lelikhashane kute ayosebenta. Ngemuva kwesikhatsi, wenta imetamo yekutsi ngiyewuhlala naye kodvwa ayiphumelelanga.

Bo-anti ngibo lebebanakekela likhaya. Nanobe mkhulu bekangasontsi, emadvodzakati akhe wona bekasontsa esontfweni lema-Baptists. Bebangiphocelela kutsi ngiye esontfweni njalo ngemaSontfo, futsi bebangitsembisa kungishaya nangingayi. Ngesizatfu saloko, kusukela ngisemncane bengingayitsandzi inkholo. Lebengikujabulela bekukuya esikolweni kanye nekudlala.

Kuvakashelwa Lokwashintja Kuphila Kwami

Ngalenye intsambama nga-1941, ngineminyaka lengu-15 budzala, lomunye mkhulu nemfati wakhe basivakashela ekhaya. Lomkhulu watsi ungu-Talmadge Rusk, bhuti wagogo. Nanobe bengicala kubabona, ngeva kutsi bebaboFakazi BaJehova. Labakuchaza ngenjongo yaNkulunkulu yekutsi bantfu baphile emhlabeni phakadze, bekwehluke kakhulu kuloko lebengikuva esontfweni. Kodvwa linyenti lebantfu basekhaya alizange libemukele, futsi lakubukela phansi naloko labebakufundzisa. Abavunyelwanga kutsi baphindze basivakashele. Nanobe kunjalo, anti wami Mary, lobekamdzala kimi ngeminyaka lemitsatfu nje kuphela, walemukela liBhayibheli kanye netincwadzi lebetilichaza.

Ngekushesha, Mary wabona kutsi besekawatfolile emaciniso eliBhayibheli, wase uyabhajatiswa nga-1942 waba ngulomunye waboFakazi BaJehova. Naye watibonela ngewakhe lokwabiketelwa nguJesu kutsi: “Titsa letinkhulu temuntfu kuyawuba bakabo.” (Mat. 10:34-36) Kuphikiswa ngumndeni kwaba kukhulu. Dzadzewabo lomdzala lobekanencenye etindzabeni telive, wahlangana nemphatsi welidolobha futsi babopha bhuti wagogo, Talmadge. Bambeka licala lekutsengisa ngaphandle kwemvume. Lelo cala lamlahla.

Liphephandzaba lasedolobheni langakitsi labika kutsi lomphatsi lidolobha lobekaphindze abe ngumehluleli washo naku enkantolo yelidolobha: “Letincwadzi letisakatwa ngulendvodza . . . tiyingoti njengebutsi.” Bhuti wagogo walendlulisela embili lelicala, futsi waliwina. Kodvwa bekasacitse emalanga lalishumi abhadla ejele.

 Indlela Anti Mary Langisita Ngayo

Ngetulu kwekukhuluma nami ngetinkholelo letinsha labetitfolile, Mary bekafakaza nakubomakhelwane. Ngamphekeletela nakayochuba sifundvo seliBhayibheli nendvodza lebeyemukele incwadzi letsi “The New World.” a Umfati walendvodza watsi beyifundze lencwadzi busuku bonkhe. Nanobe bengingafuni kuvele ngihlanganyele etintfweni letitsintsa inkholo, lebengikufundza bekungikhanga kakhulu. Ngalokuyinhloko, akusito timfundziso teliBhayibheli letangenta ngabona kutsi boFakazi babantfu baNkulunkulu, kodvwa bekuyindlela labebaphatfwa ngayo.

Sibonelo saloko ngunasi: Ngalelinye lilanga sibuya kuyohlakula ematamatisi, mine na-Mary satfola kubhunya intfutfu emgconyeni lotsite lapho bo-anti bebashise khona tincwadzi takhe, lokufaka ekhatsi igilamafoni kanye nemiculu lebeyinemilayeto yeliBhayibheli. Ngatfukutsela kakhulu ngesikhatsi anti lomdzala atsi: “Nitasibonga ngekuhamba kwesikhatsi ngaloko lesikwentile.”

Anti Mary bamcosha ekhaya nga-1943, ngesizatfu sekutsi bekala kuyekela inkholo yakhe lensha kanye nekushumayela kubomakhelwane. Ngaleso sikhatsi, ngajabula kufundza kutsi Nkulunkulu akagcini nje ngekuba nelibito lelitsi Jehova, kodvwa uphindze abe nguNkulunkulu lonelutsandvo kanye neluvelo, futsi akabashisi bantfu esihogweni. Nanobe bengingakake sengiye emihlanganweni, ngaphindze ngafundza kutsi Jehova unenhlangano lenelutsandvo.

Kwatsi ngalelinye lilanga ngisika tjani, kwachamuka imoto lebeyihamba kancane, futsi kuyo kwaphuma indvodza leyangibuta kutsi ligama lami ngu-Fred yini. Ngesikhatsi ngitfola kutsi lamadvodza bekaboFakazi, ngatsi: “Ngicela kugibela kute siye endzaweni lesitakwati kukhulumela kuyo.” Anti Mary nguye lobekahlele kutsi lamadvodza angivakashele. Lomunye wawo bekungu-Shield Toutjian, lobekasikhonti lesijikeletako, futsi wanginiketa sikhutsato kanye nesicondziso sakamoya lebesifike ngesikhatsi. Kuphikiswa ngumndeni nyalo bese kucondziswe kimi, njengobe bengetama kumelela tinkholelo taboFakazi baJehova.

Anti Mary wangibhalela incwadzi ase-Virginia, indzawo labekatfutsele kuyo. Wangitjela kutsi nangabe ngitimisele kukhonta Jehova bengingeta ngitohlala naye. Ngekushesha, ngancuma kuhamba. NgaLesihlanu ntsambama, nga-October 1943, ngatsatsa timphahla tami ngatifaka ebhokisini, ngemuva kwaloko ngalitsatsa ngayolibophela esihlahleni lebesikhashane nasekhaya. Ngakusasa, ngahamba ngayolilandza, ngase ngincamula etindlini tabomakhelwane futsi ngemuva kwaloko, ngagibela ngaya edolobheni. Nangifika edolobheni lase-Roanoke, ngatfola anti Mary ahlala endlini ya-Edna Fowlkes.

 Kutfutfuka Ngekwakamoya, Kubhajatiswa Kanye Nekuya EBethel

Edna, bekangudzadze logcotjiwe lonemusa, futsi bekafanana naLidiya waseBhayibhelini ngobe bekacashe indlu lenkhulu kute akwati kuhlalisa anti Mary, umfati wemnakabo kanye nemadvodzakati akhe lamabili. Lamantfombatana lamabili bekubo-Gladys kanye na-Grace Gregory, futsi ngekuhamba kwesikhatsi aba titfunywa teliVangeli. Nyalo, Gladys useminyakeni yabo-90, futsi usakhonta ngekwetsembeka egatjeni lase-Japan.

Ngesikhatsi ngihlala ekhaya la-Edna, bese ngihlanganyela imihlangano njalo futsi ngitfola kuceceshwa nasensimini. Njengobe bese nginenkhululeko yekufundza liVi laNkulunkulu kanye nekuhlanganyela imihlangano yebuKhristu, kulambela kwami liciniso kwanetiswa. Ngabhajatiswa nga-June 14, 1944. Mary kanye nemantfombatana aka-Gregory bacala kuba ngemahlahlandlela futsi bemukela sabelo sekuyokhonta enyakatfo Virginia. Kuleso sabelo, baba nesandla ekumisweni kwelibandla lase-Leesburg. Ekucaleni kwa-1946, ngacala kukhonta njengelihlahlandlela eveni lebelisedvute nalapho bebakhona. Ehlobo langalowo mnyaka, sahamba ndzawonye saya emhlanganweni wetive lesingeke siwukhohlwe, lowabanjelwa eCleveland, Ohio, nga-August 4-11.

Kuloyo mhlangano, Nathan Knorr, lobekahola emsebentini wenhlangano, wakhuluma ngetinhlelo lebetentiwa tekukhulisa iBethel yase-Brooklyn. Loku bekuhlanganisa kwakhiwa kwendzawo yekuhlala kanye nekukhuliswa kwetakhiwo tekushicilela. Bekudzingeka bazalwane labanyenti labasebasha. Nami ngancuma kutsi ngulapho labengifuna kukhonta Jehova khona. Ngako-ke, ngafaka sicelo sami futsi ngemuva kwetinyanga letimbalwa nga-December 1, 1946, ngamenyelwa eBethel.

Ngemuva kwemnyaka, Max Larson, lobekangumbonisi wekushicilela weta etafuleni lami eHhovisini Lekutfumela Tincwadzi. Wafike wangitjela kutsi bese ngabelwe kuyosebenta eHhovisini Lemsebenti. Kuleso sabelo, ngafundza lokunyenti mayelana nekusebentisa timiso teliBhayibheli kanye nendlela inhlangano yaJehova lesebenta ngayo, futsi loko kwenteka kakhulu ngesikhatsi ngisebenta na-T. J. (Bud) Sullivan, lobekangumbonisi walelo hhovisi.

Babe wami wangivakashela kanyenti eBethel. Njengobe sikhatsi sichubeka, besekasontsa. Ngesikhatsi angivakashela kwekugcina, nga-1965, watsi: “Wena ungeta utongivakashela, kodvwa mine angeke ngiphindze ngikuvakashele.” Ngamvakashela tikhatsi letimbalwa ngembikwekutsi ashone. Bekaciniseka ngekutsi uya ezulwini. Nginelitsemba lekutsi ukhona enkhumbulweni yaJehova, futsi nangabe loko kuliciniso, ngesikhatsi seluvuko angeke avuselwe kulendzawo labeyicabanga, kodvwa utawuvuselwa lapha emhlabeni  anelitsemba lekuphila phakadze ePharadisi lelibuyiselwe.

Leminye Imihlangano Lengiyikhumbulako Kanye Nekwakhiwa KwemaHholwa

Imihlangano beyiloku ingulenye yetintfo letingenta ngikhule ngekwakamoya. Imihlangano yetive leyaba se-New York e-Yankee Stadium, ngabo-1950 nayo yaba njalo. Kulolunye luhlelo lwemhlangano wa-1958, totimbili letindzawo i-Yankee Stadium kanye ne-Polo Grounds betigcwele bantfu labangu-253 922 labebavela emaveni langu-123. Kunentfo leyenteka kuloyo mhlangano, lengingeke ngiyikhohlwe. Njengobe bengisita ehhovisini lemhlangano, uMzalwane Knorr, wafika kimi akhefutela. Watsi: “YeFred, phela ngikhohlwe kwabela umzalwane lotawucoca nemahlahlandlela lahlangene ehholweni lelicashiwe lelisedvute nalapho sikhona. Ungakwati yini kugijima kute uyowaniketa inkhulumo lemnandzi lesekelwe kuloko lotakucabanga endleleni?” Ngembikwekutsi ngifike kuleyo ndzawo, ngathandaza kanyenti ngetfukile.

Njengobe ngabo-1950 kanye nangabo-1960, emabandla bekandza ngalokumangalisako eDolobheni lase-New York, bese kumatima kutfola tindzawo lesingaticasha kute kuchutjelwe kuto imihlangano yelibandla. Ngako-ke, kusukela nga-1970 kuya ku-1990, kwatsengwa takhiwo letintsatfu e-Manhattan, futsi talungiswa kute tibe yindzawo lekahle yekuhlanganyela. Bengingusihlalo wemakomidi ekwakhiwa kwalamahholwa, futsi nginenkhumbulo lejabulisako endleleni Jehova lawabusisa ngayo lamabandla kutsi asebente ngekubambisana ekunikeleni ngetimali kanye nasekucedzeni letakhiwo letichubeka tisebenta njengesikhungo sekukhonta kweliciniso.

Tingucuko Ekuphileni

Ngalelinye lilanga, nga-1957, ngihamba epaki laseBethel lelisemkhatsini wendzawo yekuhlala kanye netakhiwo tekushicilela, lacala kuna. Njengobe ngihamba, ngabona intfombatana lenhle lebeyisandza kufika eBethel ita ngakimi. Beyite sembulelo, ngako-ke, ngacela kuyembulelisa. Ngahlangana kanjalo-ke na-Marjorie, futsi kusukela sashada nga-1960, sichubeka sikhonta Jehova ndzawonye ngenjabulo, lina nobe lingani. Nga-September 2010 besihlanganisa iminyaka lengu-50 sashada.

Satsi nje sisafika sibuya eholidini letfu langemuva kwemshado, uMzalwane Knorr wangitjela kutsi besengabelwe kufundzisa eSikolweni saseGileyadi. Leli bekulitfuba lelihle kakhulu! Kusukela nga-1961 kuya ku-1965, emakilasi lasihlanu ngalokuyinhloko bewagcwele tisebenti taseBethel lebetifundziswa ngekunakekelwa kweligatja. Ekwindla langa-1965, emakilasi aphindze achutjwa tinyanga letisihlanu, futsi ngaleso sikhatsi besekunakwe kakhulu kuceceshwa kwetitfunywa teliVangeli.

Nga-1972, ngayekela kufundzisa eSikolweni  saseGileyadi futsi ngabelwa kutsi ngisebente eHhovisini Lekubhala Tincwadzi, futsi kulo bengikhonta njengembonisi. Kwenta lucwaningo kute ngikwati kuphendvula imibuto kanye netinkinga tebantfu kungisitile kutsi ngiticondze kancono timfundziso teliVi laNkulunkulu kanye nekutsi ngisebentise timiso taKhe kute ngisite labanye.

Nga-1987, ngaphindze ngabelwa kulelinye lihhovisi lebelisandza kuvulwa lelibitwa ngekutsi liHhovisi Lelinakekela Tindzaba Tetibhedlela. Kute kusitwe labadzala bemabandla labasemaKomidini Ekubonisana Netibhedlela kutsi bachazele bodokotela, emajaji kanye nebantfu labasita imimango mayelana nekusetjentiswa kwengati, bekuhlelwa imihlangano yekubacecesha. Inkinga lenkhulu beyikutsi bodokotela bebampompela bantfwana baboFakazi ingati ngaphandle kwekutfola imvume yebatali babo, futsi bebavame kuvunyelwa yinkantolo kutsi bente kanjalo.

Lapho bodokodela batjelwa ngetindlela tekwelapha ngaphandle kwekusebentisa ingati, bebavame kucabanga kutsi intfo lenjalo beyingeke yenteke nobe batsi idule kakhulu. Bengivame kuphendvula dokotela losho kanjalo ngekutsi ngitsi: “Ngisacela uphakamise sandla sakho.” Bekatsi nakasiphakamisa, bese ngitsi: “Phela uphetse lenye yetintfo letilusito kakhulu kute kuvinjelwe kumpontjelwa kwengati.” Lena bekuyindlela yekumncoma kanye nekumkhumbuta ngentfo lebekayati kahle—kusebentisa emathulusi akhe kute avimbele kulahleka kwengati lenyenti.

Kuleminyaka lengemashumi lababili leyendlulile, Jehova uyibusisile imetamo yekufundzisa bodokotela kanye nemajaji. Simo sabo sengcondvo sishintje kakhulu ngemuva kwekutsi sesibakhanyele kahle simo setfu. Batfolile kutsi lucwaningo kutekwelapha luniketa bufakazi bekutsi tindlela tekwelapha ngaphandle kwengati tiyasebenta kanye nekutsi banyenti bodokotela labatisebentisako kanye netibhedlela labangatfumela kuto tigulane tabo.

Kusukela nga-1996, mine naMarjorie besisolo sikhonta eSikhungweni Semfundvo se-Watchtower lesise-Patterson, e-New York, lekhashane ngemakhilomitha langu-110 nenyakatfo ye-Brooklyn. Kuleyo ndzawo, ngasebenta sikhatsi lesifishane eHhovisini Lemsebenti ngaphindze ngaba nencenye ekufundziseni tisebenti teligatja kanye nebabonisi labajikeletako. Eminyakeni lengu-12 leyendlulile, ngiphindze ngaba ngumbonisi eHhovisini Lekubhala Tincwadzi, leselisukile e-Brooklyn laya e-Patterson.

Tinkinga Letihambisana Nekuguga

Kufeza tabelo tami eBethel sekulukhuni njengobe sengendlule eminyakeni lengu-80. Sekuphele iminyaka lengetulu kwalelishumi ngiphetfwe sifo sekhensa. Ngitiva njengaHezekiya, Jehova lamengetela iminyaka yekuphila. (Isa. 38:5) Nemkami uyagula, futsi siyabambisana kute akwati kubeketelela sifo sakhe se-Alzheimer. Bekasolo asikhonti saJehova lesinelikhono, akhutsata labasha futsi angumsiti kanye nemngani wami lotsembekile. Ngaso sonkhe sikhatsi bekakutsandza kufundza liBhayibheli aphindze afundzisa labanye ngalo ngemphumelelo, futsi bantfu labanyenti lesabafundzela basachumana natsi.

Anti Mary ushone nga-March 2010 aneminyaka lengu-87. Bekanelikhono lelikhulu lekufundzisa liVi laNkulunkulu futsi usite labanyenti kutsi bemukele inkholo yeliciniso. Ucitse iminyaka leminyenti enta umsebenti wasikhatsi sonkhe. Ngiyajabula ngencenye layifeza ekungisiteni kutsi ngifundze emaciniso eliVi laNkulunkulu ngiphindze ngifanane naye ngekuba sikhonti saNkulunkulu lonelutsandvo, Jehova. Lithuna la-anti Mary liseceleni kwelendvodza yakhe leyake yakhonta njengesitfunywa seliVangeli ka-Israyeli. Nginelitsemba lekutsi basenkhumbulweni yaJehova futsi balindzele luvuko.

Njengobe ngicabanga ngeminyaka lengu-67 lengiyicitse ngikhonta Jehova, ngiyajabula ngetibusiso letinyenti lengititfolile. Bekusolo kungijabulisa kwenta intsandvo yaJehova! Kwetsemba umusa wakhe lomkhulu kungenta ngilangatelele kubona kugcwaliseka kwesetsembiso seNdvodzana yakhe lesitsi: “Wonkhe lodzele tindlu, nome bomnakabo, nome bodzadzewabo, nome uyise, nome unina, nome bantfwana, nome emasimi ngenca yami, uyakwemukela ngalokuphindvwe kanyenti, adle nelifa lekuphila lokuphakadze.”—Mat. 19:29.

[Umbhalo longentansi]

[Sitfombe ekhasini 19]

Ngisepulazini lamkhulu lekulima kotini e-Georgia, eMelika, nga-1928

[Sitfombe ekhasini 19]

Anti Mary kanye nabhuti wagogo, Talmadge

[Sitfombe ekhasini 20]

Anti Mary, Gladys, kanye na-Grace

[Sitfombe ekhasini 20]

Lilanga lengabhajatiswa ngalo nga-June 14, 1944

[Sitfombe ekhasini 20]

NgiseHhovisini Lemsebenti, eBethel

[Sitfombe ekhasini 21]

Ngina anti Mary emhlanganweni wetive wanga-1958, e-Yankee Stadium

[Sitfombe ekhasini 21]

Ngina-Marjorie ngelilanga letfu lemshado

[Sitfombe ekhasini 21]

Mine nemkami nga-2008