Seluleko Lesihlakaniphile Sekungashadi Kanye Nekushada

“Loku ngikusho . . . kuze nihambe ngalokufanelekile, nibambelele eNkhosini ngalokuphelele.”—1 KHOR. 7:35.

1, 2. Kungani umuntfu kufanele ahlole seluleko seliBhayibheli mayelana nekushada kanye nekungashadi?

 TIMBALWA tintfo ekuphileni letisenta sijabule kakhulu, sitfukutsele nobe sikhatsateke, kwendlula kusebentelana nebantfu bebulili lobehlukile. Sidzingo sekubhekana nemiva lenjalo ngemphumelelo sisenta sibe nesizatfu sekufuna sicondziso lesivela eVini laNkulunkulu, kodvwa tikhona naletinye tizatfu letisibangela kutsi sente kanjalo. UmKhristu lokujabulelako kungashadi angativa shengatsi umndeni wakhe nobe bangani bakhe bamcindzetelela kutsi ashade. Lomunye kungenteka kutsi uyafuna kushada kodvwa usengakamtfoli umuntfu lomfanele. Labanye badzinga sicondziso sendlela yekulungela imitfwalo yekuba yindvodza nobe umfati. EmaKhristu langakashadi kanye nalashadile ahlangabetana netilingo letimayelana nekutiphatsa ngekwelicansi.

² Ngaphandle nje kwekutsintsa injabulo yetfu, letimo tiphindze titsintse nebuhlobo betfu naNkulunkulu Jehova. Esehlukweni 7, sencwadzi yakhe yekucala layibhalela baseKhorinte, Pawula wabaniketa sicondziso lesimayelana nekungashadi kanye nekushada. Umgomo wakhe bekukukhutsata bafundzi baleyo ncwadzi kutsi ‘bahambe ngalokufanele, babambelele eNkhosini ngalokuphelele.’ (1 Khor. 7:35) Njengobe uhlola leseluleko sakhe kulendzaba lebalulekile, yetama kubuka simo lokuso njengendlela yekukhonta Jehova ngalokugcwele, ushadile nobe ungakashadi.

Sincumo Lesibaluleke Kakhulu Umuntfu Langasenta

3, 4. (a) Ngaletinye tikhatsi, tivela njani tinkinga nangabe labanye bantfu bakhatsateka ngalokwecile ngemngani nobe sihlobo sabo lesingakashadi? (b) Seluleko saPawula singasisita njani kutsi sibe nembono lofanele ngemshado?

³ Njengasemmangweni wakaJuda wangelikhulu lekucala, emasiko lamanyenti lamuhla atsatsa kushada njengentfo lebaluleke kakhulu. Nangabe intfombi nobe lijaha selendlule iminyaka letsite lingakashadi, bangani kanye netihlobo letikhatsalelako tingase titive tiphocelelekile kutsi tilinikete teluleko. Nabacoca, bangase balitjele kutsi sekufanele licale kumfuna ngekutimisela umuntfu lelitoshada naye. Bangase balitjele ngemuntfu webulili lobehlukile labamcabangako. Bangaphindze betame kwenta bucili bekulihlanganisa naloyo muntfu. Ngaletinye tikhatsi leto tento tingase tibangele emahloni, kulimala kwebungani kanye nekuba nemiva lebuhlungu.

⁴ Pawula akakaze abacindzetele labanye kutsi bashade nobe bangashadi. (1 Khor. 7:7) Bekumenetisa kukhonta Jehova ete umfati, kodvwa bekasihlonipha sincumo labanye labebasenta sekutsi bashade. UmKhristu ngamunye lamuhla unelilungelo lekutikhetsela kutsi uyafuna yini kushada nobe cha. Akukafaneli labanye bamcindzetele kutsi enteni.

Kukusebentisa Kahle Kungashadi

5, 6. Kungani Pawula akukhutsata kungashadi?

⁵ Sici lesinakekako semavi aPawula laya kubaseKhorinte ngumbono wakhe lomuhle labekanawo ngekungashadi. (Fundza 1 Khorinte 7:8.) Nanobe Pawula bekangakashadi, akazange atente loncono kulabo labashadile, njengobe kwenta bafundisi labangakashadi beTinkholo Letitsi Tebukhristu. Kunaloko, lomphostoli wagcizelela inzuzo lejatjulelwa tikhonti letinyenti tetindzaba letinhle letingakashadi. Iyini lenzuzo?

⁶ UmKhristu longakashadi uvame kuba nenkhululeko yekwenta imisebenti yaJehova leyo bantfu labashadile labangase bangakwati  kuyenta. Pawula watfola sabelo lesibaluleke kakhulu sekuba ‘ngumphostoli kubetive.’ (Rom. 11:13) Fundza iMisebenti sehluko 13 kuya kusehluko 20, bese uhambisana naye kanye netitfunywa teliVangeli lebetikanye naye njengobe baya etindzaweni letinsha futsi bamisa emabandla lamanyenti. Pawula wakhutsatelela bumatima emsebentini wakhe, bantfu labanyenti lamuhla labangeke bahlangabetane nabo. (2 Khor. 11:23-27, 32, 33) Kodvwa injabulo labekayitfola ngekusita bantfu kutsi babe bafundzi ngiyo leyamenta wakhutsatelela lobumatima. (1 Thes. 1:2-7, 9; 2:19) Bekangakhona yini kukwenta konkhe loku kube bekashadile nobe anebantfwana? Cha, bekangeke.

7. Niketa sibonelo saboFakazi labangakashadi labasebentise timo labakuto kute batfutfukise umlayeto weMbuso.

⁷ EmaKhristu lamanyenti langakashadi asebentisa timo lakuto kute ente imisebenti lesekela uMbuso. Sara kanye na-Limbania, emahlahlandlela langakashadi ase-Bolivia, batfutsela endzaweni lokwagcinwa kushumayelwa kuyo kadzeni. Kungabi khona kwagezi kuleyo ndzawo bekutaba yinkinga yini kubo? Babika: “Kuleyo ndzawo, bekute imisakato nobe ema-TV, ngako-ke, bekute lobekungaphatamisa labantfu entfweni labebayitsandza kakhulu, kufundza.” Letinye takhamuti tatjengisa lamahlahlandlela tincwadzi taboFakazi BaJehova lebetisolo titifundza, kodvwa lebetingasashicilelwa. Ngesizatfu sekutsi labodzadze bebatfola bantfu labanenshisekelo cishe kuyo yonkhe imiti labebangena kuyo, bebakutfola kumatima kuphindze babuyele kubo bonkhe bantfu labacoce nabo. Lomunye make losakhulile watsi kubo: “Kusho kutsi kuphela sekusedvute ngobe boFakazi BaJehova sebafikile nakitsi.” Ngekushesha, labanye bantfu kulendzawo bacala kuba khona emihlanganweni yelibandla.

8, 9. (a) Bekacabanga ngani Pawula ngesikhatsi akhuluma kahle ngekungashadi? (b) Nguwaphi ematfuba emaKhristu langakashadi lanawo?

⁸ Kuliciniso kutsi nemaKhristu lashadile atfola imiphumela lemihle nawashumayela tindzaba letinhle emasimini lalukhuni. Nanobe kunjalo, tabelo letingase tifezwe ngemahlahlandlela langakashadi tingase tibe matima kubantfu labashadile nobe labanebantfwana. Pawula wacabanga ngemsebenti lobekufanele wentiwe kute kutfutfukiswe tindzaba letinhle emabandleni angakubo. Bekafuna kutsi bonkhe bajabule njengaye. Ngesizatfu saloko, wakhuluma kahle ngekukhonta Jehova njengemuntfu longakashadi.

 ⁹ Dzadze longakashadi, lolihlahlandlela eMelika, wabhala: “Labanye bantfu bakholelwa kutsi kumatima ngemuntfu longakashadi kutsi ajabule. Kodvwa ngibonile kutsi injabulo lehlala njalo itfolakala ngebungani umuntfu lanabo naJehova. Nanobe kungashadi kudzinga kutidzela, kusipho lesimangalisako nangabe kusetjentiswa kahle.” Mayelana nendlela yekutfola injabulo, wabhala: “Kungashadi akumvimbeli umuntfu kutsi ajabule, kunaloko kungaba litfuba lelihle kakhulu lekujabula. Jehova ubatsandza bonkhe bantfu bakhe, labashadile kanye nalabangakashadi.” Nyalo ukhonta ngekujabula eveni lelinesidzingo lesikhulu sebamemeteli beMbuso. Nangabe usengakashadi, ungayisebentisa yini inkhululeko lonayo kute wandzise indlela lohlanganyela ngayo ekufundziseni labanye liciniso? Nawenta njalo, kungashadi kwakho kutawuba sipho lesiligugu lesivela kuJehova.

Bantfu Labangakashadi Labafisa Kushada

10, 11. Jehova ubasekela njani labo labanesifiso sekushada kodvwa labasengakamtfoli umuntfu lokahle?

¹⁰ Ngemuva kwekucitsa sikhatsi lesitsite tingakashadi, tikhonti taJehova letinyenti letetsembekile tincuma kutfola umlingani wemshado. Ngesizatfu sekutsi basuke badzinga sicondziso, bafuna lusito kuJehova kute batfole umuntfu lofanele.—Fundza 1 Khorinte 7:36.

¹¹ Nangabe ufuna kushada nemuntfu lonesifiso lesinjengesakho sekukhonta Jehova ngemphefumulo wonkhe, thandaza kuYe umtjele ngesifiso sakho. (Fil. 4:6, 7) Ngisho nobe kungase kudzingeke kutsi ulindze sikhatsi lesidze, ungapheli emandla. Yetsembela kuNkulunkulu wetfu lonelutsandvo kute akusite, futsi utakusekela ngekuvumelana nesidzingo sakho.—Heb. 13:6.

12. Kungani umKhristu kufanele acabangisise nangabe lotsite amcela umshado?

¹² UmKhristu longakashadi kodvwa lonesifiso sekushada angase acelwe umshado ngumuntfu lotsite lote buhlobo lobuhle naNkulunkulu nobe longahlanganyeli imbala. Nangabe loko kwenteka kuwe, khumbula kutsi buhlungu lobutfolakala ngekukhetsa kabi endzabeni yemuntfu lotawushada naye bukhulu kakhulu kwendlula kuba nesifiso sekushada. Nasewushadile, ngisho nobe uyajabula nobe cha, kufanele unamatsele kumuntfu loshade naye kuphila kwakho konkhe. (1 Khor. 7:27) Ngako-ke, ungenti sincumo lotatisola ngaso ngekuhamba kwesikhatsi.—Fundza 1 Khorinte 7:39.

Walungele Emaciniso Lamayelana Nemshado

13-15. Ngutiphi tintfo letingase tibe yinkinga emshadweni bantfu labatsandzanako lokufanele bacoce ngato basengakashadi?

¹³ Nanobe Pawula akuncoma kukhonta Jehova njengemuntfu longakashadi, akazange ababukele phansi labo labebakhetsa kushada. Kunaloko, seluleko sakhe lesiphefumulelwe sisita bantfu labashadile kutsi bawati emaciniso lamayelana nemshado futsi bente umshado wabo uhlale njalo.

¹⁴ Labanye bantfu kudzingeka bashintje umbono labanawo ngelikusasa. Njengobe basatsandzana, bangase babone lutsandvo lwabo lwehlukile, lungakavami futsi lusicinisekiso sekutsi batawujabula emshadweni wabo. Bangena emshadweni banemaphupho futsi bakholelwa kutsi kute intfo lengacedza injabulo yabo. Kucabanga lokunjalo akusilo liciniso. Tikhatsi letimnandzi tekubonisana lutsandvo letiba khona emshadweni tiyajabulisa, kodvwa natitodvwa angeke timsite makoti kanye nemkhwenyane kutsi balungele bumati lobuba khona kuyo yonkhe imishado.—Fundza 1 Khorinte 7:28. a

¹⁵ Bantfu labanyenti labasandza kushada bavame kumangala baze ngisho badvumale nangabe umuntfu labashade naye aveta umbono longafanani newabo etindzabeni letibalulekile. Bangatikhandza bangavumelani ngekutsi batayisebentisa njani imali, batasicitsa njani sikhatsi sekuphumula, batawuhlala kuphi kanye nekutsi batabavakashela kangakanani batali babo. Lokunye kutsi ngamunye wabo unemaphutsa langase amphatse kabi lona lomunye. Ngesikhatsi bantfu basatsandzana, kumelula ngabo kutsi  batitsalalisele tindzaba letinjalo, bese kutsi nasebashadile tibe yinkinga lenkhulu. Ngako-ke, benta kahle ngekucoca kabanti ngaletindzaba letimcoka basengakashadi.

16. Kungani labashadile kufanele bavumelane ngekutsi bataticatulula njani tinkinga letibakhona emshadweni?

¹⁶ Kute labashadile baphumelele baphindze bajabule, kufanele bacatulule tinkinga tabo ngebunye. Kufanele bavumelane endzabeni yekutsi batabayala njani bantfwababo kanye nekutsi batabanakekela njani batali babo lasebakhulile. Tinkinga letibakhona emndenini akukafaneli tibehlukanise bantfu labashadile. Ngekusebentisa seluleko seliBhayibheli, bangaticatulula tinkinga letinyenti baphindze batibeketelele leto letingacatululeki, ngaleyo ndlela bachubeke bahlala ndzawonye ngenjabulo.—1 Khor. 7:10, 11.

17. Ngukuphi ‘kukhatsateka ngetintfo telive’ bantfu labashadile lokufanele bakulindzele?

¹⁷ Pawula waveta lelinye liciniso ngemshado emBhalweni wa-1 Khorinte 7:32-34. (Fundza.) Bantfu labashadile kufanele ‘bakhatsalele tintfo telive,’ letifaka ekhatsi kudla, kwekwembatsa, indzawo yekuhlala kanye netintfo letingahlobani nekukhonta Nkulunkulu. Kungani kunjalo? Ngesikhatsi umzalwane asengakashadi, angase abe nesikhatsi lesinyenti sekwenta imisebenti yebuKhristu. Kodvwa nasekanemfati, kufanele asebentise lesinye saleso sikhatsi kanye nemandla akhe kute anakekele umkakhe, ngaleyondlela amjabulise. Kuyintfo lefananako nangemfati endvodzeni yakhe. Ngesizatfu sekutsi Jehova uhlakaniphile, uyasicaphela lesidzingo. Uyati kutsi kute umshado uphumelele, kudzingeka indvodza kanye nemfati basebentise incenye yesikhatsi kanye nemandla abo labebawasebentisa emsebentini waKhe ngesikhatsi basengakashadi.

18. Ngutiphi tingucuko letimayelana nekutijabulisa lokungase kudzingeke labanye batente ngemuva kwekushada?

¹⁸ Sifundvo lesisitfola kulomBhalo asigcini lapha. Nangabe labashadile kudzingeka basebentise sikhatsi kanye nemandla labebawasebentisela kukhonta Nkulunkulu basengakashadi  kute banakekelane, akunangcondvo yini kutsi kufanele bente lokufananako nangetintfo labebatisebentisela kutijabulisa ngesikhatsi basengakashadi? Angativa njani umfati nangabe indvodza ichubeka iba matasatasa ngemidlalo letsite inebangani bayo? Indvodza yona ingativa njani nangabe umfati wayo acitsa sikhatsi lesinyenti enta tintfo latitsandzako anebangani bakhe? Lomlingani wemshado loshiywe yedvwa angase ative anesitunge, angajabuli futsi angatsandvwa. Loko kungabalekelwa ngekutsi labashadile bente konkhe labangakwenta kute bacinise buhlobo babo njengendvodza nemfati.—Ef. 5:31.

Jehova Ufuna Sihlanteke Ekutiphatseni

19, 20. (a) Kungani bantfu labashadile bangakakhululeki esilingweni sekutiphatsa kabi? (b) Nguyiphi ingoti bantfu labashadile labatifaka kuyo nangabe bavumela kwehlukana sikhatsi lesidze?

¹⁹ Tinceku taJehova titimisele kuhlala timsulwa ekutiphatseni. Labanye bancuma kushada kute babalekele ingoti yekungabi msulwa. Nanobe kunjalo, akutentakaleli kutsi umshado ube sivikelo ekutiphatseni kabi ngekwelicansi. Ngetikhatsi teliBhayibheli, lidolobha lelibiyelwe belisivikelo kuphela kubantfu labebangaphumi ngekhatsi kwetindvonga talo. Nakwenteka umuntfu aphume kulo futsi atfolwe titsa takhe letijangaza kuleyo ndzawo, betingamgebenga nobe timbulale. Ngalokufananako, bantfu labashadile batfola sivikelo ekutiphatseni lokubi kuphela nangabe bangatephuli tibopho tekutiphatsa labaniketwe tona nguMsunguli wemshado.

²⁰ Pawula wachaza leto tibopho ku-1 Khorinte 7:2-5. Umfati nguye kuphela lonelilungelo lekuya ecansini nendvodza yakhe, nendvodza nayo inelilungelo lelifananako kumkayo. Ngamunye wabo kulindzeleke kutsi ‘amenetise’ ngekwelicansi umuntfu lashade naye njengobe loko kuyintfo lemfanele. Nanobe kunjalo, kuyaphawuleka kutsi lamanye emadvodza kanye nebafati bacitsa sikhatsi lesidze bangekho ndzawonye—batsatsa tikhatsi tekuphumula ngekwehlukana nobe bahlale ngekwehlukana ngesizatfu semsebenti wekutiphilisa, ngaleyo ndlela, behluleke ‘kwenetisana’ ngekwelicansi. Cabanga ngenhlekelele lengavela nangabe umuntfu ehluleka ‘kutibamba’; ancotjwe kucindzetela kwaSathane bese aphinga. Jehova uyatibusisa tinhloko temindeni letondla imindeni yato ngaphandle kwekufaka imishado yato engotini.—Hla. 37:25.

Tinzuzo Tekulalela Seluleko SeliBhayibheli

21. (a) Kungani kulukhuni kwenta tincumo letimayelana nekushada kanye nekungashadi? (b) Kungani seluleko lesiku-1 Khorinte sehluko 7 silusito?

²¹ Tincumo letihlanganisa kungashadi kanye nekushada, tisekhatsi kwetincumo letilukhuni umuntfu langatenta. Kuba nesono, lokungumtfombo wetinkinga ebuhlotjeni bebantfu, kusitsintsa sonkhe. Ngako-ke, ngisho nalabo labatsandvwa baphindze babusiswe nguJehova angeke bakubalekele ngalokuphelele kudvumateka, bashadile nobe bangakashadi. Nangabe usebentisa seluleko lesihlakaniphile lesitfolakala ku-1 Khorinte sehluko 7, ungatinciphisa tinkinga letinjalo. Emehlweni aJehova ‘utawenta kahle,’ ushadile nobe ungakashadi. (Fundza 1 Khorinte 7:37, 38.) Kwemukelwa nguNkulunkulu kungumgomo lomkhulu longawufinyelela. Nawemukelwa nguye, utawuchubeka utfutfukela ekuphileni emhlabeni wakhe lomusha. Kuloyo mhlaba, buhlobo emkhatsini wemadvodza kanye nebafati butawuba bete tinkinga letivame kakhulu lamuhla.

[Umbhalo longentansi]

Ungaphendvula Yini?

• Kungani kungakafaneli kube nemuntfu locindzetela lomunye kutsi ashade?

• Ungasisebentisa njani ngendlela lencono sikhatsi sakho njengesikhonti saJehova lesingakashadi?

• Bantfu labatsandzanako bangatilungela njani tinkinga temshado?

• Kungani kungatentakaleli kutsi umshado usivikele ekutiphatseni kabi ngekwelicansi?

[Imibuto Yesihloko Lesifundvwako]

[Titfombe ekhasini 14]

EmaKhristu langakashadi lasebentisa sikhatsi sawo kute atfutfukise umsebenti lawentela Jehova, atfola injabulo

[Sitfombe ekhasini 16]

Ngutiphi tingucuko lokungadzingeka labanye batente ngemuva kwekushada?