Imibuto Levela Kubafundzi

Singakhona yini kusisho ngalokucondzile sikhatsi Jesu Khristu labetselwa ngaso?

Lombuto uyaphakama ngesizatfu semehluko lokhona emkhatsini wekulandzisa lokumayelana nekufa kwaJesu lokwabhalwa nguMakho, umvangeli kanye naloko lokwabhalwa ngumphostoli Johane. Makho utsi: “Bekuli-awa lemfica ekuseni nababetsela Jesu.” (Mak. 15:25) Ngekusho kwaJohane, ‘bekuli-awa lelishumi nakubili emini’ ngesikhatsi Philatu anikela ngaJesu kutsi abetselwe ngemaJuda. (Joh. 19:14-16) Bahlatiyi beliBhayibheli banikete tinchazelo letehlukehlukene kute bachaze loko lokubonakala kungumehluko. Nanobe kunjalo, akukho kwatiswa lokwenele lokutfolakala emiBhalweni lokuchaza lokwehluka kwalokulandzisa lokubili. Nangetulu kwaloko, kungasisita kuhlola indlela bantfu labebasibala ngayo sikhatsi kulawo malanga.

Ngelikhulu lekucala leminyaka, emaJuda bekahlukanisa lilanga libe ngema-awa lalishumi nakubili, abala kusukela ekuphumeni kwelilanga. (Joh. 11:9) Ngako-ke, ‘li-awa lemfica’ belicala kusukela ngensimbi yesiphohlongo kute kube yinsimbi yemfica ekuseni, kantsi ‘li-awa lelishumi nakubili’ belicala ngensimbi yelishumi nakunye lite liphele emini. Kuliciniso kutsi lilanga beliphuma futsi lishone ngetikhatsi letingafanani emnyakeni. Ngesizatfu saloko, budze besikhatsi sasemini besehluka kuye ngenkhatsi yemnyaka labakuyo. Ngetulu kwaloko, kute bati kutsi ngubani sikhatsi, bebabuka kuma kwelilanga. Kungako tinchazelo tesikhatsi betilinganiselwa. ImiBhalo yemaKhristu yesiGriki beyivame kuchaza tentakalo letenteka ngeli-awa lemfica, lelishumi nakubili nobe lesitsatfu ntsambama—ngekutsi tenteka “cishe” ngaleso sikhatsi. (Mat. 20:3, 5; Imis. 10:3, 9, 30, NW.) Inkhulumo lecondzile lenjengekutsi ‘insimbi yekucala,’ beyishiwo kuphela nangabe leso sikhatsi sibalulekile endzabeni lebeyilandziswa.—Joh. 4:52.

Kulandzisa kwemaVangeli kuyavumelana ngesikhatsi letenteka ngaso tentakalo telilanga lekugcina lekuphila kwaJesu emhlabeni. Bobane labavangeli baveta kutsi baphristi kanye nemadvodza lamadzala bahlangana ngemuva kwekushona kwelilanga futsi bahlela kutsi Jesu ayiswe kuPhontiyusi Philatu, uMbusi wemaRoma. (Mat. 27:1; Mak. 15:1; Luk. 22:66; Joh. 18:28) BoMatewu, Makho kanye naLukha babika kutsi ngeli-awa lelishumi nakubili emini ngesikhatsi Jesu sekabetselwe elugodvweni, kwaba mnyama emhlabeni wonkhe “kwaze kwaba li-awa lesitsatfu.”—Mat. 27:45, 46; Mak. 15:33, 34; Luk. 23:44.

Lesinye sici lesibalulekile lokungenteka kutsi sitsintsa sikhatsi Jesu labetselwa ngaso ngunasi: Kubhambabulwa nobe kushaywa bekutsatfwa njengencenye yesigwebo sekubetselwa. Ngaletinye tikhatsi kubhambabulwa bekuba kubi kakhulu kangangekutsi kuze kumbulale umuntfu. Esimeni saJesu, kungenteka kutsi wabhambabulwa kakhulu kangangekutsi kwadzingeka kutsi kufunwe lomunye umuntfu lobekatamtfwalisa sigodvo sekuhlushwa. (Luk. 23:26; Joh. 19:17) Nangabe kubhambabulwa bekutsatfwa njengekucala kwekusigwebo sekubetselwa, kufanele kutsi kwendlula sikhatsi ngembikwekutsi Jesu abetselwe elugodvweni lwekuhlushwa. Ngako-ke, bantfu labehlukene bebangasho tikhatsi letingafanani tekubetselwa, kuye ngekutsi ngusiphi sikhatsi ngamunye wabo lasinaka kakhulu.

Umphostoli Johane wabhala kulandzisa kwakhe emashumini eminyaka ngemuva kwalaba labanye babhali bemaVangeli. Lokusho kutsi bekangakhona kufundza kulandzisa kwabo. Kuliciniso kutsi Johane wakhuluma ngesikhatsi lesehlukile kuleso Makho lakhuluma ngaso. Nanobe kunjalo, loku kusiniketa bufakazi lobucacile bekutsi Johane akazange akukope kulandzisa kwaMakho. Bobabili, boJohane naMakho bebaphefumulelwe nguNkulunkulu. Nanobe kungekho kwatiswa lokwenele kwemiBhalo lokuchaza lomehluko, singakwetsemba lokulandzisa kwemaVangeli.