“Ngikhubatekile Kwanyalo, Kodvwa Hhayi Phakadze!”

Njengobe ilandziswa ngu-Sara van der Monde

Bantfu bavame kutsi kimi: “Sara, awati kutsi umuhle kwani nawumoyitela. Kantsi kungani vele uhlala ujabulile?” Ngiyabatjela kutsi nginelitsemba lelikhetsekile. Lelitsemba lami ngiligoca ngemavi latsi: “Ngikhubatekile kwanyalo, kodvwa hhayi phakadze!”

NGATALWA nga-1974 eParis, eFulansi. Make waba nenkinga ngesikhatsi angibeleka, futsi ngekuhamba kwesikhatsi kwatfolakala kutsi nginesifo sekukhubateka ebuchosheni, i-cerebral palsy. Bengingakwati kunyakatisa imikhono kanye nemilente, futsi bekumatima nekutsi ungive nangikhuluma. Ngaphindze ngangenwa sifo sekuwa, futsi bekumelula nekutsi ngingenwe nanguletinye tifo.

Ngesikhatsi ngineminyaka lemibili budzala, umndeni wakitsi watfutsela eMelbourne, e-Australia. Ngemuva kweminyaka lemibili, Babe wavele wasishiya. Leso sikhatsi sekucala lengisikhumbulako lengativa ngisondzelene ngaso naNkulunkulu. Njengobe Make abengulomunye waboFakazi BaJehova, bekavame kuhamba nami emihlanganweni yebuKhristu, lapho lengafundza khona kutsi Nkulunkulu uyangitsandza futsi unendzaba nami. Lolo lwati, lutsandvo lwaMake kanye nekungicinisekisa labekanginika kona, kwangenta ngativa ngilondzekile nangetulu kwetimo tetfu lebesetishintjile.

Make waphindze wangifundzisa nendlela yekuthandaza kuJehova. Ecinisweni, kuthandaza ngikutfola kumelula kwendlula kukhuluma. Nangithandaza, angikhatsateki ngekuphumisela emagama, kodvwa kuba shengatsi ngiweva akheka engcondvweni yami. Njengobe kumatima kungiva nangikhuluma, kuyangicinisa kwati kutsi Jehova uyakucondza konkhe lengikushoko, ngisho nobe ngikusho engcondvweni nobe ngelivi lelingavakali kahle.—Hla. 65:2.

Kubeketelela Bumatima

Ngesikhatsi sengineminyaka lesihlanu, sifo sami sekukhubateka ebuchosheni saba sibi kakhulu, kangangekutsi bese kudzingeka ngisebentise tinsimbi letisindzako kute ngikwati kuhamba. Bengichachatela kakhulu nangihamba. Ngesikhatsi sengineminyaka lengi-11 budzala, bengingasakwati sanhlobo kuhamba. Ngekuhamba kwesikhatsi, besengehluleka ngisho nekugibela embhedzeni nobe kwehla nangabe ngingatfwalwa ngumshini wagezi longibeka esihlalweni salabakhubatekile lesitihambelako, futsi lengisicondzisa ngeligiya lesandla.

Ngiyavuma kutsi ngaletinye tikhatsi kukhubateka kwami kungenta ngidvumale. Kodvwa nakwenteka loko, ngikhumbula sisho semndeni wakitsi lesitsi: “Ungakhatsateki ngetintfo longakhoni kutenta. Kunaloko, chubeka wenta leto lokwati kutenta.” Loku kungisitile kutsi ngikwati kwenta tintfo letinjengekugibela lihhashi, umkhubi, sikebhe, kukhempa kanye nekushayela imoto endzaweni levalekile. Ngiveta likhono lami lekwenta imisebenti yetandla, ngekutsi  ngipende, ngitfunge, ngigcushe tinsiba etindvwangwini, ngifake imihlobiso etimphahleni futsi ngente tintfo tengilasi.

Ngesizatfu sekukhubateka kwami lokukhulu, labanye bantfu bebavame kutsi bekungakafaneli ngente sincumo sekukhonta Nkulunkulu. Ngesikhatsi ngineminyaka lengu-18 budzala, thishela wami wangincenga kutsi ngihambe ekhaya kute ngibalekele inkholo yamake. Waze wangitsembisa nekungitfolela indzawo yekuhlala. Nangetulu kwaloko, ngamtjela kutsi bengingeke ngiyishiye inkholo yami futsi ekhaya bengitawuhamba kuphela nasekufanele.

Ngekushesha nje ngemuva kwaloku, ngabhajatiswa njengalomunye waboFakazi BaJehova. Eminyakeni lemibili leyalandzela, ngatfutsela emtini wami lomncane. Kuwo, ngiyajabula ngobe ngitfola lusito lengiludzingako futsi ngitentela tintfo lengitifunako.

Sicelo Lesingakalindzeleki

Njengobe iminyaka ichubeka, ngihlangabetane nalokunye kuvivinywa kwekukholwa kwami. Ngalelinye lilanga ngetfuka kakhulu ngesikhatsi lomunye webafana lengifundza nabo esikolweni—naye lokhubatekile—angicela kutsi ngishade naye. Ngacale ngajabula. Phela njengabo bonkhe bantfu besifazane labasebasha, nami ngiyafisa kushada. Nanobe kunjalo, kutsi sobabili sikhubatekile, bekungasiso sicinisekiso sekujabula emshadweni. Ngetulu kwaloko, lelijaha belite tinkholelo letifanana netami. Tinkholelo tetfu, imikhuba kanye nemigomo yetfu bekwehluke kakhulu. Ngako-ke, besingahlala njani ndzawonye? Bengitimisele kulalela sicondziso saNkulunkulu lesicacile sekushada kuphela nemuntfu lengikholwa naye. (1 Khor. 7:39) Ngako-ke, ngalitjela ngemusa lelijaha kutsi bengingeke ngikwati kusemukela lesicelo salo.

Kute kube ngunyalo, ngiyati kutsi ngenta sincumo lesihle. Angingabati kutsi ngitawujabula emhlabeni lomusha Nkulunkulu lasetsembisa wona. (Hla. 145:16; 2 Phet. 3:13) Kwanyalo, ngitimisele kuhlala ngetsembekile kuJehova futsi ngenetiseka ngesimo lengikuso.

Ngilangatelela lilanga lengiyokwati ngalo kugcuma ngisuke kulesihlalo sami salabakhubatekile, bese ngigijima ngekukhululeka. Ngaleso sikhatsi, ngiyomemeta ngitsi: “Bengikhubatekile, kodvwa nyalo sengiphile saka—kute kube phakadze!”