Sita Bantfu Batfutfuke Ngekwakamoya

“Kusukela nyalo senitawudweba bantfu.”—LUK. 5:10.

1, 2. (a) Bekasabela njani emadvodza ekushumayeleni kwaJesu? (b) Yini lesitawucoca ngayo kulesihloko?

 NGESIKHATSI baseluhambweni lwekuyoshumayela eGalile, Jesu kanye nebafundzi bakhe bagibela sikebhe kute baye endzaweni lete muntfu. Kodvwa ticuku tebantfu tabalandzela. Bantfu labefika ngalelolanga ‘kwakungemadvodza labengacishe abe tinkhulungwane letinhlanu ngaphandle kwebafati nebantfwana.’ (Mat. 14:21) Ngalesinye sikhatsi, sicuku sebantfu seta kuJesu sifuna kutsi aselaphe futsi sifuna nekumuva akhuluma. Emkhatsini waso ‘bekunemadvodza latinkhulungwane letine ngaphandle kwebafati nebantfwana.’ (Mat. 15:38) Kuyacaca kutsi emkhatsini webantfu labeta kuJesu bekunemadvodza futsi aba nenshisekelo kuloko bekakufundzisa. Ecinisweni, Jesu bekalindzele kutsi nebantfu labanye basabele etimfundzisweni takhe, ngobe ngemuva kwekubangela kutsi bafundzi bakhe babambe tinhlanti ngalokusimangaliso, watsi kuSimoni: “Kusukela nyalo sewutawudweba bantfu.” (Luk. 5:10) Bafundzi bakhe bekufanele baphonse emanethi abo kubantfu futsi bebangalindzela ‘kudweba’ tonkhe tinhlobo tebantfu, kuhlanganise nemadvodza lamanyenti.

² Lamuhla, emadvodza aveta inshisekelo lefananako ngemlayeto weliBhayibheli lesiwushumayelako, futsi ayasabela kuwo. (Mat. 5:3) Nanobe kunjalo, lamanyenti awo ahudvula tinyawo futsi awatfutfuki ngekwakamoya. Singawasita njani? Nanobe Jesu angazange acalise umkhankaso lokhetsekile wekufuna bantfu labadvuna, kodvwa wakhuluma ngetindzaba lebetikhatsata emadvodza angesikhatsi sakhe. Njengobe silingisa sibonelo sakhe, ase sihlole indlela lesingawasita ngayo emadvodza kutsi ahlangabetane netintfo letintsatfu letikhatsata bantfu lamuhla; letihlanganisa (1) umsebenti wekutiphilisa, (2) kwesaba bantfu, kanye (3) nekungatetsembi.

Umsebenti Wekutiphilisa

3, 4. (a) Emadvodza lamanyenti akhatsateka ngani? (b) Kungani lamanye emadvodza akubeka endzaweni yekucala kutfola umsebenti kwendlula buhlobo bawo naJehova?

³ Lesinye sati semtsetfo satsi kuJesu: “Mfundzisi, ngitakulandzela, ngisho nome uyaphi.” Nanobe kunjalo, ngesikhatsi Jesu asitjela kutsi “iNdvodzana yemuntfu ite indzawo yekulala iphumule,” savele sashintja ingcondvo yaso. Kungenteka kutsi kungaciniseki ngekutsi besitawudlani nobe kutsi besitawuhlalaphi kwasetfusa lesati, ngobe kute lokuveta kutsi saba ngumlandzeli waKhristu.—Mat. 8:19, 20.

⁴ Ngalokuvamile, emadvodza akhatsateka kakhulu ngekulondzeka ngekwetimali kwendlula buhlobo bawo naJehova. Kutfola imfundvo lephakeme kanye nekuba nemsebenti loholela kahle kutintfo letibalulekile kulamanyenti kuwo. Ngekucabanga kwawo, inzuzo leletfwa yimali ibaluleke kakhulu kwendlula nobe ngabe nguyiphi letfolakala ngekutadisha imiBhalo kanye nekuba nebuhlobo lobusedvute naNkulunkulu. Tintfo letifundziswa liBhayibheli tingase titsandzeke kuwo, kodvwa tinkhatsato ‘tasemhlabeni nekujabulela umcebo’ kungaminyetela nobe nguyiphi inshisekelo lokungenteka bewanayo. (Mak. 4:18, 19) Cabanga ngendlela Jesu labasita ngayo bafundzi bakhe kutsi batikhetse kahle tintfo letita kucala kubo.

5, 6. Yini leyenta bo-Andreya, Phetro, Jakobe kanye naJohane bagucula umbono wabo mayelana nekutsi ngumuphi umsebenti lobaluleke kakhulu?

⁵ Bo-Andreya kanye naSimoni Phetro umnakabo, bebasebenta ndzawonye ebhizinisini lekudweba tinhlanti. Kunjalo nangaJohane, naJakobe umnakabo kanye nababe wabo Zebedi. Emabhizinisi abo bewachuma ngobe bekuze kudzingeke kutsi bacashe netisebenti. (Mak. 1:16-20) Ngesikhatsi  Andreya kanye naJohane bacala kuva ngaJesu njengobe bebatjelwa nguJohane uMbhabhatisi, baciniseka ngekutsi bese bamtfolile Mesiya. Andreya wacocela Simoni Phetro umnakabo ngaletindzaba, futsi kufanele kutsi naJohane wenta lokufananako nakuJakobe umnakabo. (Joh. 1:29, 35-41) Etinyangeni letalandzela, bobane bacitsa sikhatsi naJesu njengobe bekashumayela eGalile, eJudiya kanye naseSamariya. Ngemuva kwaloko, labafundzi labane baphindze babuyela ebhizinisini labo lekudweba. Bebamtsandza Nkulunkulu, kodvwa umsebenti wekushumayela bewungekho endzaweni yekucala ekuphileni kwabo.

⁶ Ngekuhamba kwesikhatsi, Jesu wamema boPhetro kanye na-Andreya kutsi bamlandzele futsi babe ‘badwebi bebantfu.’ Basabela njani kulesimemo? “Bashiya emanetha abo masinyane, bamlandzela.” NaJakobe kanye naJohane benta lokufananako. “Masinyane bamshiya uyise kanye nesikebhe, balandzela Jesu.” (Mat. 4:18-22) Yini leyasita lamadvodza kutsi angenele umsebenti wasikhatsi sonkhe? Lesincumo sawo besihambisana nemivelo yini kanye nekutsatseka? Cha! Etinyangeni letendlulile, lamadvodza amlalela Jesu nakafundzisa, ambona nakenta timangaliso, abona inshisekelo labekanayo ngekulunga futsi atibonela ngewawo umphumela lowaba khona ekushumayeleni kwakhe. Ngesizatfu saloko, kukholwa kwawo kuJehova kanye nekwetsembela kwawo kuye, kwacina.

7. Singabasita njani bantfu lesifundza nabo liBhayibheli kutsi betsembele ekhonweni laJehova lekunakekela bantfu bakhe?

⁷ Singamlingisa njani Jesu nasisita bantfu lesifundza nabo liBhayibheli kutsi bafundze kwetsembela kuJehova? (Taga 3:5, 6) Indlela lesifundzisa ngayo inencenye lenkhulu kuloku. Nasifundzisa, kufanele sigcizelele setsembiso saNkulunkulu sekutsi utasibusisa nasibeka uMbuso wakhe kucala. (Fundza Malakhi 3:10; Matewu 6:33.) Nanobe singayisebentisa imibhalo leyehlukehlukene kute sigcizelele indlela Jehova labanakekela ngayo bantfu bakhe, kufanele singakukhohlwa kubaluleka kwesibonelo tsine lesisibekako. Kucocela umuntfu lesifundza naye lokuhlangenwe nako kwetfu, kungamsita kutsi etsembele kuJehova. Singaphindze simcocele lokuhlangenwe nako lokukhutsatako lesifundza ngako etincwadzini tetfu. a

8. (a) Kungani kubalulekile kutsi umuntfu lesifundza naye liBhayibheli ‘anambitse abone kutsi Simakadze muhle’? (b) Singamsita njani umuntfu lesifundza naye liBhayibheli kutsi atibonele ngewakhe kutsi Jehova muhle?

⁸ Kuba nekukholwa lokucinile kudzinga lokungetulu kwekufundza kanye nekuva indlela Nkulunkulu lababusise ngayo labanye. Umuntfu lofundza naye liBhayibheli udzinga nekutibonela ngewakhe buhle baJehova. Umhlabeli watsi: “Ase ninambitse nibone kutsi Simakadze muhle unemusa! Ubusisiwe lowo lokhosela kuye!” (Hla. 34:8) Singamsita njani umuntfu lesifundza naye abone kutsi Jehova muhle? Ase sitsi umuntfu lesifundza naye unetinkinga tetimali futsi wetama nekulwisana nemikhuba yakhe lemibi lenjengekubhema, kugembula nobe kudzakwa. (Taga 23:20, 21; 2 Khor. 7:1; 1 Thim. 6:10) Kumfundzisa kuthandaza kuNkulunkulu kute acele lusito lwekuncoba lemikhuba yakhe lemibi, bekungeke yini kumsite abone buhle baJehova? Cabanga nangaloko lokungenteka nangabe sikhutsata umuntfu lesifundza naye kutsi abeke tintfo takamoya  endzaweni yekucala, ngekutsi akhe sikhatsi sekutadisha liBhayibheli maviki onkhe, alungiselele imihlangano yebuKhristu futsi abe khona kuyo. Njengobe atibonela yena sibusiso saJehova emetameni layentako, kukholwa kwakhe kutawukhula.

Kwesaba Bantfu

9, 10. (a) Kungani boNikhodemu kanye naJosefa wase-Arimathiya bakugcina kuyimfihlo kuba kwabo nenshisekelo kuJesu? (b) Kungani lamanye emadvodza lamuhla akungabata kulandzela Khristu?

⁹ Ngesizatfu sekucindzetelwa bontsanga, lamanye emadvodza angase akungabate kumlandzela ngalokugcwele Khristu. BoNikhodemu kanye naJosefa wase-Arimathiya bakugcina kuyimfihlo kuba kwabo nenshisekelo kuJesu, ngobe bebasaba loko lamanye emaJuda labekangase akusho nobe akwente nawatfola. (Joh. 3:1, 2; 19:38) Lokwesaba kwabo bekunesizatfu lesiphatsekako. Inzondo baholi benkholo labebanayo ngaJesu beseyikhule kakhulu, kangangekutsi nobe ngubani lobekavuma kutsi unekukholwa kuye bekacoshwa esinagogeni.—Joh. 9:22.

¹⁰ Kuletinye tindzawo lamuhla, nangabe indvodza imtsandza Nkulunkulu, liBhayibheli nobe inkholo, ingahlushwa bantfu lesebenta nabo, bangani nobe tihlobo. Kuletinye tindzawo, kungase kube yingoti ngisho nekukhuluma ngekushintja inkholo yakho. Kucindzetelwa bontsanga kungaba matima kakhulu nangabe indvodza ilisotja, inencenye kutembusave nobe inesikhundla lesibalulekile emmangweni. Sibonelo saloko kutsi lenye indvodza lehlala eJalimane yavuma yatsi: “Loko nine boFakazi lenikufundzisako mayelana neliBhayibheli kuliciniso. Kodvwa nangingaba nguFakazi lamuhla, kusasa bonkhe bantfu batabe bakhuluma ngaleyo ndzaba. Batawutsini bantfu lengisebenta nabo, bomakhelwane kanye nebantfu labati mine nemndeni wami? Angeke ngikwati kukubeketelela loko.”

11. Jesu wabasita njani bafundzi bakhe kutsi bamelane nekwesaba bantfu?

¹¹ Nanobe baphostoli baJesu bebangasiwo emagwala, bonkhe bebahlushwa kwesaba bantfu. (Mak. 14:50, 66-72) Wabasita njani Jesu kutsi batfutfuke nangetulu kwekucindzetelwa bontsanga? Jesu watsatsa tinyatselo kute ente bafundzi bakhe balungele kuphikiswa labebatawuhlangabetana nako esikhatsini lesitako. Watsi: “Nibusisiwe, bantfu nabanitondza banishalatela ngekuninyembenya, banetfuka banigceke batsi anikalungi, ngenca yeNdvodzana yeMuntfu.” (Luk. 6:22) Jesu watjela balandzeli bakhe kutsi bekufanele balindzele kuhlanjalatwa. Konkhe kuhlanjalatwa labebatawuhlangabetana nako ‘bekungenca yeNdvodzana yemuntfu.’ Jesu waphindze wabacinisekisa ngekutsi Nkulunkulu bekatabasekela nangabe betsembela kuYe kute batfole lusito nemandla. (Luk. 12:4-12) Ngetulu kwaloko, Jesu wakhutsata labo labebasandza kucala kumlandzela kutsi batihlanganise nebafundzi bakhe futsi babe bangani babo.—Mak. 10:29, 30.

12. Singabasita ngatiphi tindlela bantfu lesifundza nabo kutsi bancobe kwesaba bantfu?

¹² Natsi kufanele sisite bantfu lesifundza nabo liBhayibheli kutsi bancobe kwesaba bantfu. Kumelula kuhlangabetana nenkinga letsite nangabe sicabanga ngayo kusengembili. (Joh. 15:19)  Nasi sibonelo: Kungani ungasiti umuntfu lofundza naye kutsi alungiselele timphendvulo letimelula letisekelwe eBhayibhelini temibuto kanye nekuphikiswa lokungase kuvetwe bantfu lasebenta nabo nobe labanye? Ngetulu kwekutsi tsine sibe bangani bakhe, singametfula nakulamanye emalunga elibandla ikakhulukati kulawo lanalokutsite lokufanana nekwakhe. Ngetulu kwaloko, kufanele simfundzise kutsi athandaze njalo ngalokusuka enhlitiyweni. Kwenta kanjalo kutamsita kutsi asondzele kuNkulunkulu futsi amente Siphephelo kanye neLidvwala lakhe.—Fundza Tihlabelelo 94:21-23; Jakobe 4:8.

Kungatetsembi

13. Imiva yekungatetsembi ingabavimbela njani labanye kutsi bahlanganyele etintfweni takamoya?

¹³ Lamanye emadvodza ayesaba kuhlanganyela etintfweni takamoya ngesizatfu sekutsi awakwati kufundza kahle, kuveta imiva yawo ngendlela lecacile nobe kutsi anemahloni. Lamanye ayesaba kuveta imibono nobe imiva yawo embikwebantfu. Kulukhuni ngawo kutsi achutjelwe sifundvo seliBhayibheli, aphendvule emihlanganweni yebuKhristu nobe afakaze kulabanye bantfu. Lomunye umzalwane wavuma: “Ngesikhatsi ngisemncane, bengiya emnyango ngifike ngente shengatsi ngiyanconcotsa, bese ngikhwesha ngekushesha nginelitsemba lekutsi kute lotangiva nobe angibone. . . . Kucabanga ngekuya emsebentini wemuti ngemuti bekungigulisa.”

14. Kungani bafundzi baJesu behluleka kwelapha umfana lobekanelidimoni?

¹⁴ Cabanga ngekungatetsembi lokungenteka kutsi bafundzi baJesu babanako ngesikhatsi behluleka kwelapha umfana lobekahlaselwe lidimoni. Babe walomfana waya kuJesu wafike watsi: “[Indvodzana yami] inesitfutfwane, ihlupheka kabi, iwela futsi emlilweni nasemantini. Ngiyiletse kubafundzi bakho kodvwa behluleka kuyiphilisa.” Jesu walicosha lelidimoni, futsi lomfana waphila. Ngekuhamba kwesikhatsi, bafundzi beta kuJesu bafike bambuta batsi: “Kwentiwe yini kutsi tsine sehluleke kulikhipha lelidimoni?” Jesu wabaphendvula watsi: “Kwentiwe kutsi nine ninekukholwa lokuncane, ngobe ngicinisile, ngitsi kini: Naningaba nekukholwa lokuncane lokungangenhlavu yendlulamitsi, ningatsi kulentsaba: ‘Suka la, uye lapha,’ ivele isuke. Kute lokungete kwenteka kini.” (Mat. 17:14-20) Kute sikwati kuncoba tinkinga letibonakala titinkhulu kakhulu, kudzingeka sibe nekukholwa kuJehova. Kutsiwani lapho umuntfu angasakunaki loku kodvwa asacala kunaka emakhono akhe? Kwehluleka kwakhe kwetsembela kuJehova kutawumenta ehluleke.

15, 16. Singamsita njani umuntfu lesifundza naye liBhayibheli kutsi ancobe kungatetsembi?

¹⁵ Indlela lencono kakhulu yekusita umuntfu longatetsembi, kumkhutsata kutsi anake Jehova kunekutsi atinake yena. Phetro wabhala: “Titfobeni ngephansi kwesandla lesinemandla saNkulunkulu, kuze ateniphakamisa ngesikhatsi lesifanele. Lahlelani kuye konkhe kukhatsateka kwenu.” (1 Phet. 5:6, 7) Kute sente loku, kufanele sisite bantfu lesifundza nabo liBhayibheli kutsi bakhe buhlobo lobuhle naJehova. Umuntfu lonebuhlobo lubuhle naJehova utitsatsa njengaletibalulekile tintfo takamoya. Uyalitsandza liVi laNkulunkulu futsi uveta ‘titselo temoya’ ekuphileni kwakhe. (Gal. 5:22, 23) Uthandaza ngaso sonkhe sikhatsi. (Fil. 4:6, 7) Ngetulu kwaloko, wetsembela kuNkulunkulu kute atfole sibindzi kanye nemandla lawadzingako ekuhlangabetana nanobe ngusiphi simo nobe afeze tabelo takhe ngemphumelelo.—Fundza 2 Thimothi 1:7, 8.

¹⁶ Labanye bantfu lesifundza nabo bangase badzinge lusito ekhonweni labo lekufundza, lekucoca nobe lekukhuluma. Labanye bangase bative bangakufanelekeli kukhonta Nkulunkulu ngesizatfu setento letimbi labatenta bangakamati Jehova. Kuto tonkhe letimo, lusito lwetfu  lwelutsandvo kanye nekubeketela kungaba nguloko labakudzingako. Jesu watsi: “Bantfu labanemphilo lenhle abamdzingi dokotela, kodvwa labagulako bayamdzinga.”—Mat. 9:12, NW.

‘Dweba’ Emadvodza Lengetiwe

17, 18. (a) Singawafinyelela njani emadvodza lengetiwe ensimini yakitsi? (b) Yini lesitawufundza ngayo esihlokweni lesilandzelako?

¹⁷ Kusifiso setfu kutsi emadvodza lengetiwe asabele emlayetweni wetfu lowenetisako lotfolakala kuphela eBhayibhelini. (2 Thim. 3:16, 17) Ngako-ke, singawafinyelela njani emadvodza lengetiwe ensimini yakitsi? Ngekucitsa sikhatsi lesinyenti sifakaza kusihlwa, ngetimphelasontfo ntsambama nobe ngemaholidi lapho emadvodza lamanyenti asuke akhona emakhaya. Nangabe kungenteka, singacela kukhuluma nemadvodza nasifika emitini. Asifakaze kubantfu besilisa lesisebenta nabo, futsi asifinyelele nemadvodza langakholwa lashade nemakholwa lesikanye nawo ebandleni.

¹⁸ Njengobe sishumayela kunobe ngubani lesihlangana naye, singaciniseka kutsi labo labanetinhlitiyo leticotfo batawusabela emlayetweni lesiwushumayelako. Asibasite ngesineke bonkhe labaveta inshisekelo lecotfo ngeliciniso. Kodvwa singawasita njani emadvodza labhajatisiwe lasebandleni lakitsi kutsi atfutfuke futsi afanelekele kutfola imitfwalo enhlanganweni yaNkulunkulu? Sihloko lesilandzelako sitawuphendvula lombuto.

[Umbhalo longentansi]

Ungaphendvula Njani?

• Emadvodza angasitwa njani kutsi abeke tintfo takamoya endzaweni yekucala?

• Singabasita njani bantfu labasandza kucala kuhlanganyela kutsi bamelane nekucindzetelwa bontsanga?

• Singaba sita njani labanye kutsi bancobe kungatetsembi?

[Imibuto Yesihloko Lesifundvwako]

[Sitfombe ekhasini 25]

Uyawavula yini ematfuba ekufinyelela emadvodza ngetindzaba letinhle?

[Sitfombe ekhasini 26]

Ungamsita njani umuntfu lofundza naye liBhayibheli kutsi alungele lushushiso?