Kucondziswa Ngumoya Wankulunkulu, Ngelikhulu Lekucala Kanye Nalamuhla

“Konkhe loko kusetjentwa nguwo lowo [moya] munye.”—1 KHOR. 12:11.

1. Ngumaphi emaphuzu lesitawucoca ngawo kulesihloko?

 LIPHENTEKHOSTE la-33.C.E., laba sikhatsi lesijabulisa kakhulu. (Imis. 2:1-4) Kutfululwa kwemoya longcwele kulowo mkhosi wangelikhulu lekucala, kwaveta lushintjo lolubalulekile endleleni Nkulunkulu labekasebentelana ngayo netinceku takhe. Esihlokweni lesengcile, sifundze ngetindlela umoya waNkulunkulu lowatisita ngayo tinceku takhe letetsembekile tasendvulo kutsi tente imisebenti lematima kanye nalenemininingwane leminyenti. Kodvwa-ke, uyini umehluko endleleni umoya waNkulunkulu lobewusebenta ngayo kubantfu labebaphila ngembikwesikhatsi sebuKhristu kanye nendlela lowasebenta ngayo ngelikhulu lekucala? EmaKhristu alamuhla azuza njani emandleni emoya longcwele waNkulunkulu? Ase sihlole.

‘Incekukati YaJehova’

2. Mariya wawabona njani emandla emoya longcwele?

² Mariya bekakhona ekamelweni lelisetulu  eJerusalema, ngesikhatsi kutfululwa umoya longcwele lobewutsenjisiwe. (Imis. 1:13, 14) Nanobe kunjalo, eminyakeni lengetulu kwemashumi lamatsatfu ngembikwaleso sentakalo, bekawabonile emandla lamangalisako emoya waJehova. Jehova bekendlulisele kuphila kweNdvodzana yakhe kwasezulwini wakuyisa emhlabeni, wenta Mariya wakhulelwa aseyintfombi ntfo. Intfo leyambangela kutsi akhulelwe, ‘ngumoya longcwele’ waNkulunkulu.—Mat. 1:20.

3, 4. Ngusiphi simo sengcondvo Mariya lasiveta, futsi singamlingisa njani?

³ Kungani Mariya akhetfwa kutsi ente lomsebenti lobaluleke kangaka? Ngemuva kwekutsi ingilosi imchazele ngaloko Jehova labekafuna akwente, Mariya watsi: “Ngiyincekukati [yaJehova]; akwenteke kimi loko, njengobe sewushito.” (Luk. 1:38) Ngekukhuluma ngalendlela, Mariya waveta kutsi beyinjani inhlitiyo yakhe, futsi loko bekuyintfo labesavele ayibonile Nkulunkulu. Kuphendvula kwakhe ngekushesha kwaveta kutsi abekulungele kwenta loko lobekufunwa nguNkulunkulu. Akazange abute imibuto mayelana nekutsi bantfu emmangweni wakubo bebatawutsini nabambona akhulelwe, nobe kutsi loko bekutawubutsintsa njani buhlobo bakhe naJosefa. Ngekutibita ngekutsi uyincekukati lephansi, Mariya waveta kutsi bekatsembele kuJehova ngalokuphelele njengeNkhosi yakhe.

⁴ Kuke kwenteke yini ngaletinye tikhatsi utive ucindzetelwa tinkinga lonato nobe yimisebenti loyentela Nkulunkulu? Ngamunye wetfu wenta kahle kutibuta: ‘Ngetsembela kuJehova ngalokuphelele yini kute ngicatulule tinkinga tami ngekuvumelana nentsandvo yakhe? Ngikuveta mbamba yini kutsi ngiyafuna kwenta intsandvo yaJehova?’ Ciniseka ngekutsi Nkulunkulu ubaniketa umoya wakhe labo labametsemba ngenhlitiyo yonkhe, futsi labacaphela bukhosi bakhe.—Imis. 5:32.

Phetro Wasitwa Ngumoya Longcwele

5. Phetro wabona emandla emoya longcwele asebenta ngatiphi tindlela ngembikwekutsi kufike liPhentekhoste la-33 C.E.?

⁵ NjengaMariya, umphostoli Phetro naye watibonela emandla emoya longcwele waNkulunkulu ngembikwekutsi kufike liPhentekhoste la-33 C.E. Jesu waniketa Phetro kanye nalabanye baphostoli emandla ekucosha emadimoni. (Mak. 3:14-16) Nanobe imiBhalo ite imininingwane leminyenti ngaloku, kodvwa kubonakala shengatsi Phetro wawasebentisa lamandla. Emandla aNkulunkulu aphindze abonakala ngesikhatsi Jesu atjela Phetro kutsi ahambe etikweLwandle lwaseGalile, futsi Phetro wenta njalo. (Fundza Matewu 14:25-29.) Kuyacaca-ke kutsi Phetro wetsembela emoyeni longcwele kute umsite akwati kwenta imisebenti yemandla. Ngekushesha, lowo moya bewutawusebenta kuPhetro kanye nakulabanye bafundzi ngendlela leyehlukile.

6. Ngelusito lwemoya waNkulunkulu, yini Phetro layenta ngeliPhentekhoste la-33 C.E., nangemuva kwalo?

⁶ EMkhosini weliPhentekhoste la-33 C.E., Phetro kanye nalabanye baniketwa likhono lelimangalisako lekukhuluma tilwimi tebantfu labebavakashe eJerusalema. Ngemuva kwaloko, Phetro wahola ekufundziseni lesicumbi sebantfu lebesilapho. (Imis. 2:14-36) Nanobe ngaletinye tikhatsi bekaba nemawala nobe esaba, kodvwa waniketwa emandla ekushumayela ngesibindzi nangetulu kwekuhlaselwa kanye nekushushiswa. (Imis. 4:18-20, 31) Watfola lwati ngelusito lwaJehova. (Imis. 5:8, 9) Waphindze waniketwa emandla ekuvusa labafile.—Imis. 9:40.

7. Ngutiphi timfundziso taJesu letacaca kuPhetro ngemuva kwekugcotjwa kwakhe?

⁷ Ngisho nangembikwekufika kweliPhentekhoste, Phetro bekawacondza emaciniso lamanyenti labekafundziswe nguJesu. (Mat. 16:16, 17; Joh. 6:68) Nanobe kunjalo, bekunetincenye tetimfundziso taJesu lachubeka angaticondzi kahle ngesikhatsi lisengakefiki liPhentekhoste. Nasi sibonelo: Phetro bekangacondzi kutsi Khristu abetawuvuswa njengesidalwa semoya ngelilanga lesitsatfu, kanye nekutsi uMbuso bewutawuba sezulwini. (Joh. 20:6-10; Imis. 1:6) Liciniso lekutsi bantfu bebatawuba tidalwa temoya futsi babuse ezulwini, belingacondzakali kahle kuPhetro. Ngesikhatsi sekabhajatiswe ngemoya longcwele futsi sekatfole nelitsemba  lekuphila ezulwini, wakwati kuticondza letimfundziso taJesu.

8. Nguluphi lwati emaKhristu lagcotjiwe kanye ‘naletinye timvu’ labanalo?

⁸ Bafundzi baJesu bacala kucondza letinye timfundziso takhe ngemuva kwekutfululwa kwemoya longcwele. Ngesizatfu sekutsi bebaphefumulelwe, babhali bemiBhalo yemaKhristu yesiGriki bachaza tincenye letimangalisako tenjongo yaJehova, kute kuzuze tsine. (Ef. 3:8-11, 18) Nalamuhla, emaKhristu lagcotjwe ngemoya kanye ‘naletinye timvu,’ bondliwa ndzawonye ngekwakamoya kute bacondze emaciniso lafananako. (Joh. 10:16) Uyakuveta yini kubonga ngelwati lonalo kanye nekucondza kwakho liVi laNkulunkulu lelibe khona ngelusito lwemoya longcwele?

Pawula ‘Wagcwala Umoya Longcwele’

9. Yini Pawula layifeza ngelusito lwemoya longcwele?

⁹ Cishe ngemuva kwemnyaka lowodvwa kwendlule liPhentekhoste la-33 C.E., kunalomunye umuntfu lowatfola sipho semoya longcwele waNkulunkulu. Lomuntfu bekunguSawula, lowagcina asanguPawula. Umoya wasebenta kuye ngendlela lesizuzisako nalamuhla. Umphostoli Pawula waphefumulelwa kutsi abhale tincwadzi teliBhayibheli letingu-14. Njengobe kwenteka nakuPhetro, umoya waNkulunkulu wasita Pawula kutsi acondze aphindze abhale ngendlela lecacile ngelitsemba lasezulwini lekungafi kanye nekungaboli. Ngelusito lwemoya longcwele, Pawula welapha labagulako, wacosha emadimoni futsi wavusa ngisho nalabafile. Nanobe kunjalo, emandla latfolakala ngemoya longcwele bewanenjongo lebaluleke kakhulu, leyo tinceku taNkulunkulu lamuhla letiyifezako, ngisho nobe tingayifezi ngalokusimangaliso.

10. Umoya longcwele walitsintsa njani likhono laPawula lekukhuluma?

¹⁰ Njengobe Pawula ‘bekagcwele umoya longcwele,’ wakhuluma ngesibindzi nebantfu labebasebentelana nemimoya. Loko kwamtsintsa kakhulu umbusi lomkhulu waseSiphrosi, lobekalalele ngesikhatsi akhuluma. Lombusi walemukela liciniso, ngobe ‘bekamangaliswe yimfundziso [yaJehova].’ (Imis. 13:8-12) Kuyacaca-ke, kutsi Pawula bekakwati kubaluleka kwemoya longcwele waNkulunkulu nakutiwa endzabeni yekukhuluma liciniso. (Mat. 10:20) Ngekuhamba kwesikhatsi, wacela libandla lase-Efesu kutsi limthandazele kute abe nelikhono lekukhuluma.—Ef. 6:18-20.

11. Pawula wacondziswa njani ngumoya waNkulunkulu?

¹¹ Umoya longcwele awuzange ugcine ngekusita Pawula kutsi akwati kukhuluma, kodvwa ngaletinye tikhatsi bewumalela kutsi afundzise kuletinye tindzawo. Njengobe Pawula bekamatasatasa enta umsebenti wetitfunywa teliVangeli, bekacondziswa ngumoya waNkulunkulu. (Imis. 13:2; fundza Imisebenti 16:6-10.) Jehova usachubeka nekucondzisa umsebenti wekushumayela ngemoya wakhe. NjengaPawula, tonkhe tinceku taJehova letilalelako, tilwa kamatima kute timemetele liciniso ngesibindzi nangenkhutsalo. Ngisho nobe indlela Nkulunkulu lacondzisa ngayo lamuhla yehlukile kuneyesikhatsi saPawula, singaciniseka ngekutsi utawuchubeka asebentisa umoya wakhe longcwele kute aciniseke kutsi bantfu labafanelekako bayaliva liciniso.—Joh. 6:44.

“Imisebenti Yemandla Leyehlukene”

12-14. Umoya waNkulunkulu usebenta ngendlela lefananako yini etincekwini takhe? Chaza.

¹² Kulandzisa lokumayelana netibusiso taJehova  letatfolwa ngemaKhristu lagcotjiwe elikhulu lekucala, kuyatiniketa yini tinceku taNkulunkulu letitinikele lamuhla sikhutsato lesikhulu? Yebo, kuyatinika! Khumbula emavi aPawula laphefumulelwe laya ebandleni laseKhorinte, lamayelana netipho letimangalisako temoya tangesikhatsi sakhe, latsi: ‘Kukhona tiphiwo temusa letehlukene, kepha munye umoya. Kukhona imisebenti leminyenti leyehlukene yekusitana; kepha yinye iNkhosi. Kukhona imisebenti yemandla leyehlukene, kepha munye Nkulunkulu losebenta konkhe kubo bonkhe.’ (1 Khor. 12:4-6, 11) Kuliciniso kutsi umoya longcwele ungasebenta ngetindlela letingafanani etincekwini taNkulunkulu letehlukehlukene, kute ufeze injongo letsite. Lomoya uyatfolakala ‘emhlambini lomncane’ waKhristu kanye ‘nakuletinye timvu’ takhe. (Luk. 12:32; Joh. 10:16) Nanobe kunjalo, awuhlali usebenta ngendlela lefananako kumuntfu ngamunye ebandleni.

¹³ Nasi sibonelo: Labadzala bakhetfwa ngelusito lwemoya longcwele. (Imis. 20:28) Nanobe kunjalo, akusiwo onkhe emaKhristu lagcotjiwe lakhonta njengebabonisi ebandleni. Ngako-ke, yini lesingaphetsa ngayo kuloku? Singaphetsa ngekutsi umoya waNkulunkulu usebenta ngetindlela letehlukehlukene emalungwini elibandla.

¹⁴ Umoya lowenta kutsi emaKhristu lagcotjiwe aciniseke ngekutsi atsengwe njengemadvodzana aNkulunkulu, nguwo futsi Jehova lawusebentisile kute avuse iNdvodzana yakhe letelwe yodvwa ekuphileni kwasezulwini lokute kufa. (Fundza Roma 8:11, 15.) Lowo moya, nguwo futsi Jehova lawusebentisa ngesikhatsi adala indzawo yonkhe. (Gen. 1:1-3) Ngalomoya, Jehova wabangela kutsi Besaleli afanelekele kwenta umsebenti lokhetsekile ethendeni lekukhontela, waniketa Samsoni emandla ekwenta imisebenti lebeyidzinga emandla langakavami, futsi wasita Phetro kutsi ahambe etikwemanti. Kodvwa-ke, akukafaneli sicabange kutsi kuba nemoya waNkulunkulu kuyafanana nekugcotjwa ngawo, ngobe kugcotjwa ngemoya longcwele kuyindlela lekhetsekile umoya waNkulunkulu losebenta ngayo. Nkulunkulu nguye lotikhetsela labo lafuna kubagcoba ngemoya.

15. Kubhajatiswa ngemoya longcwele kutawuchubeka kute kube phakadze yini? Chaza.

¹⁵ Emandla aNkulunkulu lasebentako bewaloku asebenta ngetindlela letehlukehlukene etincekwini takhe letetsembekile, eminyakeni letinkhulungwane ngembikwekutsi bantfu bacale kugcotjwa ngawo. NgeliPhentekhoste la-33 C.E., lomoya wacala kusebenta ngendlela leyehlukile, kodvwa angeke uchubeke ukwenta loko kute kube phakadze. Kubhajatiswa ngemoya kutawuphela, kodvwa umoya longcwele utawuchubeka usebenta kubantfu baNkulunkulu kute bakwati kwenta intsandvo yakhe phakadze.

16. Yini leyentiwa tinceku taNkulunkulu lamuhla ngelusito lwemoya wakhe?

¹⁶ Ngalokuyinhloko, yini leyenteka emhlabeni lamuhla ngelusito lwemoya longcwele waJehova? Sembulo 22:17 siyaphendvula: “[Umoya] namakoti batsi: “Kota!” Wonkhe umuntfu lovako akatsi: “Kota!” Lowo lowomile akete; nalowo lofuna emanti ekuphila, akawanatse mahhala.” Ngesizatfu sekutsi agcugcutelwa ngumoya waNkulunkulu, emaKhristu lamuhla asakata simemo saJehova lesiniketa kuphila kulabo ‘labafuna’ kutfola emanti ekuphila. EmaKhristu lagcotjiwe ahamba embili ekwenteni lomsebenti. Nanobe kunjalo, naletinye timvu tiyahlanganyela ekusakateni lesimemo. Totimbili letigaba tisebentisa umoya longcwele lofananako kute tifeze lomsebenti. Bonkhe baveta kutinikela kwabo kuJehova ngekubhajatiswa “egameni leYise, neleNdvodzana, [nelemoya longcwele].” (Mat. 28:19) Bavumela umoya waNkulunkulu kutsi usebente ekuphileni kwabo, kanye nekutsi uvete titselo tawo kubo. (Gal. 5:22, 23) NjengemaKhristu lagcotjiwe, letinye timvu tivumela umoya waNkulunkulu kutsi utisite. Ngelusito lwawo, tenta konkhe lokusemandleni ato, kute tivumelanise kuphila kwato netimfuneko taJehova letingcwele.—2 Khor. 7:1; Semb. 7:9, 14.

Chubekani Nicela Umoya Longcwele

17. Singaveta njani kutsi sinemoya waNkulunkulu?

¹⁷ Ngisho nobe unelitsemba lekuphila phakadze  ezulwini nobe emhlabeni, Jehova angakupha ‘emandla lamakhulu’ kute ulondvolote bucotfo bakho futsi utfole nemvuzo. (2 Khor. 4:7) Kungenteka uhlekwe njengobe uchubeka ushumayela tindzaba letinhle teMbuso. Nanobe kunjalo, khumbula kutsi, ‘ubusisiwe nawetfukwa ngenca yelibito laKhristu, ngobe loko kukhombisa kutsi umoya webukhosi, waNkulunkulu, ukufukamele.’—1 Phet. 4:14.

18, 19. Jehova utakusita njani ngemoya wakhe longcwele, futsi yini lotimisele kuyenta kuloku?

¹⁸ Umoya longcwele usipho samahhala lesivela kuNkulunkulu, lesitfolwa ngulabo labasifuna ngebucotfo. Awugcini nje ngekutfutfukisa emakhono akho, kodvwa uphindze utfutfukise nesifiso sakho sekufuna kwenta lokuncono kakhulu emsebentini waJehova. ‘NguNkulunkulu losebenta kuwe ngekutsandza kwakhe kute wente intsandvo yakhe lenhle.’ Sipho lesiligugu lesingumoya longcwele, kanye nemetamo yakho yekuchubeka ubambisise “livi lekuphila,” kutakusita kutsi ‘ufeze kusindziswa kwakho ngekwesaba nangekutfutfumela.’—Fil. 2:12, 13, 16.

¹⁹ Ngako-ke, nawuchubeka wetsembela emoyeni waNkulunkulu futsi wenta umsebenti lophatsiswe wona ngenhlitiyo yonkhe, utawuba nelikhono kuwo futsi wetsembele kuJehova kute akusite. (Jak. 1:5) Utakunika loko lokudzingako kute ucondze liVi lakhe, ubeketelele tinkinga tekuphila uphindze ushumayele tindzaba letinhle. Chubeka ‘ucela, utawunikwa; funa, utawutfola; nconcotsa, utawuvulelwa,’ futsi loku kufaka ekhatsi nekutfola umoya longcwele. (Luk. 11:9, 13) Ngako-ke, chubeka uthandaza kuJehova umcele akusite kutsi ufanane netinceku takhe letetsembekile—tasendvulo kanye netalamuhla, lebeticondziswa ngumoya wakhe longcwele.

Ungachaza?

• NjengaMariya, ngusiphi simo sengcondvo lesingasiveta kute sitfole tibusiso?

• Pawula wacondziswa ngumoya waNkulunkulu ngamuphi umcondvo?

• Lamuhla, umoya waNkulunkulu uticondzisa njani tinceku takhe?

[Imibuto Yesihloko Lesifundvwako]

[Sitfombe ekhasini 24]

Umoya waNkulunkulu wasita Pawula kutsi ancobe kuhlaselwa yimimoya lemibi

[Sitfombe ekhasini 26]

Nalamuhla, umoya longcwele ungawasita emaKhristu ngisho nobe analiphi litsemba