Ungakuvumeli Kugula Kukucedzele Injabulo

ASEWUTICABANGE uvuka ekuseni ufisa shengatsi lelo langa lingaphela ngisho nobe lisengakacali. Nakulelilanga, kudzingeka ubeketelele buhlungu lobusemtimbeni nobe emivelweni. Ungase utive njengaJobe, lowatsi: “Nginconota kufa kunako konkhe kuhlupheka kwami.” (Jobe 7:15, The New English Bible) Kutsiwani nangabe leso simo sichubeka sikhatsi lesidze, ngisho neminyaka leminyenti imbala?

Nguloko lokwenteka kuMefiboshethi, indvodzana yaJonathani, umngani weNkhosi Davide. Ngesikhatsi Mefiboshethi aneminyaka lesihlanu budzala, ‘wawa, wase uba sishosha.’ (2 Sam. 4:4) Kungenteka kutsi wacindzeteleka kakhulu emivelweni ngesikhatsi asolwa ngekutsi uvukela inkhosi, futsi loko kwamenta walahlekelwa natintfo labekanato. Nanobe kunjalo, wachubeka asibonelo lesihle sekubeketelela kukhubateka, kucalelwa emanga kanye nekudvumateka, futsi akazange avumele tintfo letinjalo kutsi timcedzele injabulo.—2 Sam. 9:6-10; 16:1-4; 19:24-30.

Umphostoli Pawula ungulesinye sibonelo saloku. Wake wabhala ‘ngelinyeva lelisenyameni’ yakhe lobekufanele alibeketelele. (2 Khor. 12:7) Kungenteka kutsi lelinyeva labekakhuluma ngalo bekukugula lokwatsatsa sikhatsi lesidze, nobe mhlawumbe bekakhuluma ngebantfu labebakubekela insayeya kuba kwakhe ngumphostoli. Kunobe ngabe ngukuphi, lenkinga yachubeka sikhatsi lesidze, futsi kwadzingeka kutsi abeketelele buhlungu lobebusenyameni nobe emivelweni.—2 Khor. 12:9, 10.

Tifo letingumahlalakhona nobe kucindzeteleka emivelweni kuhlasela letinye tetinceku taNkulunkulu lamuhla. Ngesikhatsi aneminyaka lengu-18, Magdalena wangenwa sifo lesatiwa ngekutsi yi-lupus (systemic lupus erythematosus), lokusifo lesenta emasotja emtimba ahlasele titfo temtimba. Utsi: “Ngaphatseka kabi kakhulu. Njengobe sikhatsi sichubeka, simo sami saba sibi ngalokwendlulele futsi ngaba nenkinga yekungagayeki kahle kwekudla, tilondza letisemlonyeni kanye nenkinga yemadlala.” Ngakulokunye, Izabela, kudzingeka abeketelele kugula lokungabonakali kubantfu. Uyachaza: “Kusukela ngisemncane, bengihlushwa sifo sekucindzeteleka. Loku bekungenta ngihlale ngetfuka, nginenkinga yekuphefumula futsi ngihlushwa sisu. Ngesizatfu saloko, ngihlale ngitiva ngidziniwe.”

Yemukela Simo Lokuso

Kugula kanye nekukhubateka kungakuphatsa kabi ekuphileni kwakho. Nakwenteka loko, kuyasita kuhlala phansi bese ucabangisisa ngesimo sakho. Kwemukela simo lokuso kungase kungabi melula. Magdalena utsi: “Sifo sami siya siba sibi kakhulu. Ngaletinye tikhatsi ngitiva ngidzinwe kakhulu futsi ngingakhoni nekuvuka. Kushintjashintja kwesifo sami kungenta ngingakwati kuhlela tintfo kusenesikhatsi. Intfo lengicindzetela kakhulu kutsi angisakwati kwenta lokwengetiwe emsebentini waJehova ngendlela lebengivame kwenta ngayo.”

Zbigniew uyachaza: “Njengobe iminyaka  ichubeka, sifo lenginaso sekuvuvuka kwematsambo singicedza emandla, futsi sidla onkhe emalunga ematsambo ami. Ngaletinye tikhatsi, nangiva buhlungu kakhulu, angikwati ngisho nekwenta nemisetjentana lemelula. Loko kungenta ngitive ngingakabaluleki.”

Eminyakeni lembalwa leyendlulile, Barbara waba nesimila ebuchosheni. Naku lakushoko: “Umtimba wami ushintje kakhulu. Ngiphelelwa ngemandla, ngiphatfwa yinhloko njalo futsi ngiba nenkinga yekunakisisa. Ngesizatfu sekutsi besengehluleka kutentela lengikufunako, kwadzingeka kutsi ngitihlele kabusha tonkhe tintfo.”

Bonkhe labantfu lesisandza kukhuluma ngabo batinceku taJehova letitinikele. Kwenta intsandvo yakhe kuta kucala ekuphileni kwabo. Betsembela kuNkulunkulu ngalokuphelele futsi bayazuza ekusekelweni nguye.—Taga 3:5, 6.

Jehova Usisita Njani?

Kufanele sikubalekele kucabanga kutsi tinhlupheko lesinato tibufakazi bekutsi Nkulunkulu akajabuli ngatsi. (Sil. 3:33) Cabanga ngaloko Jobe lahlangabetana nako nanobe abengumuntfu ‘lomsulwa futsi locotfo enhlitiyweni.’ (Jobe 1:8) Nkulunkulu akalingi muntfu. (Jak. 1:13) Konkhe kugula—lokufaka ekhatsi loko lokungumahlalakhona kanye nekwemivelo, kulifa lelibuhlungu lesalizuza kubatali betfu bekucala, bo-Adamu na-Eva.—Rom. 5:12.

Nanobe kunjalo, Jehova kanye naJesu angeke babashiye bantfu labalungile bete lusito. (Hla. 34:15) Etikhatsini letimatima ekuphileni kwetfu, siyacaphela kutsi Nkulunkulu ‘usiphephelo setfu nenqaba yetfu.’ (Hla. 91:2) Ngako-ke, yini lengakusita kutsi ulondvolote injabulo yakho nawubeketelela timo lokulukhuni kutfola sicatululo sato?

Umthandazo: Nawulingisa sibonelo setinceku taNkulunkulu letetsembekile tasendvulo, ungalahlela umtfwalo wakho kuBabe wetfu wasezulwini, ngemthandazo. (Hla. 55:22) Ngekwenta kanjalo, utawutfola ‘kuthula kwaNkulunkulu lokwendlula konkhe kwati.’ Lokuthula kwangekhatsi ‘kutawulondvolota inhlitiyo yakho nemicabango yakho.’ (Fil. 4:6, 7) Ngekwetsembela kuNkulunkulu ngemthandazo, Magdalena wabeketelela sifo sakhe lesicedza emandla. Utsi: “Kutfululela sifuba sami kuJehova kungiletsela imphumuto kanye nenjabulo. Nyalo, sengikucondza  kahle loko lokushiwo kwetsembela kuNkulunkulu malanga onkhe.”—2 Khor. 1:3, 4.

Nakaphendvula imithandazo yakho, Jehova angakuniketa emandla ngelusito lwemoya wakhe longcwele, liVi lakhe kanye nebuzalwane bebuKhristu. Akukafaneli ulindzele kutsi Nkulunkulu akususe ngalokusimangaliso konkhe kugula kwakho. Nanobe kunjalo, ungametsemba kutsi utakunika kuhlakanipha kanye nemandla lowadzingako kute ubeketelela tonkhe tinkinga lonato. (Taga 2:7) Utakucinisa ngekukunika ‘emandla lamakhulu.’—2 Khor. 4:7.

Umndeni: Kuba semndenini lonelutsandvo kanye neluvelo kungakusita kutsi ubeketelele kugula kwakho. Nanobe kunjalo, khumbula kutsi nemalunga emndeni wakho ayacindzeteleka. Kungenteka nawo ative aphelelwa ngemandla njengawe. Nangetulu kwaloko, ayakukhatsalela, ngisho nangetikhatsi letimatima. Kuthandaza ndzawonye njengemndeni, kutanisita kutsi nibe nekuthula etinhlitiyweni tenu.—Taga 14:30.

Naku lokushiwo nguBarbara mayelana nendvodzakati yakhe kanye nalabanye bodzadze labasebasha ebandleni: “Bayangisekela emsebentini wekushumayela. Inkhutsalo yabo iyangikhutsata futsi ingijabulise.” Zbigniew uyakujabulela kusekelwa ngumfati wakhe. Utsi: “Umfati wami unakekela yonkhe imisebenti yasendlini. Uphindze angisite ngekungigcokisa kanye nangekungitfwalela sikhwama nasiya emihlanganweni yelibandla kanye nasensimini.”

Emakholwa lesikanye nawo: Nasikanye nebantfu lesikholwa nabo, siyakhutsateka siphindze sidvudvuteke. Kodvwa kutsiwani nangabe ungakhoni kuya emihlanganweni yelibandla ngesizatfu sekugula kwakho? Magdalena uyachaza: “Libandla liyaciniseka kutsi ngiyazuza emihlanganweni ngekutsi lingitfwebulele tinkhulumo lengitatilalela. Bazalwane bavame kufika kute babone kutsi bangangisita ngani. Baphindze bangibhalele netincwadzi letingikhutsatako. Kwati kutsi bayangikhumbula futsi bayakhatsateka ngemphilo yami, kuyangisita kutsi ngibeketele.”

Izabela, lohlushwa sifo sekucindzeteleka, uyalandzisa: “Ebandleni, nginabobabe kanye nabomake labanyenti, labangilalelako nangikhuluma futsi labetama kucondza simo lengikuso.  Libandla lingumndeni wami, futsi kulo, ngitfola kuthula kanye nenjabulo.”

Labo labahlangabetana netinkinga letehlukehlukene benta kahle ‘ngekungatehlukanisi.’ Kunaloko, bayakujabulela kutihlanganisa nelibandla. (Taga 18:1) Ngekwenta njalo, baba ngumtfombo wesikhutsato kulabanye. Ekucaleni, ungase ungabate kutjela bazalwane kanye nabodzadze ngetintfo lotidzingako. Nanobe kunjalo, emakholwa lokanye nawo angakujabulela kutsi uwatjele tinkinga takho. Loko kungawanika litfuba lekutsi akuvetele ‘lutsandvo lolute kutentisa.’ (1 Phet. 1:22) Kungani ungabatjeli kutsi udzinga imoto letakuyisa emihlanganweni, ungatsandza kusebenta nabo ensimini, nobe kutsi ufuna kukhuluma nabo ngendzaba letsite? Akukafaneli sibe ngulabaphocelelako, kodvwa kufanele sibabonge ngelusito lwabo.

Bani nembono lofanele: Ngalokuvamile, likuwe likhambi lekubeketelela kugula lokungumahlalakhona ngekujabula. Imiva lebuhlungu kanye nekucindzeteleka kungakwenta ube nembono longakafaneli. LiBhayibheli litsi: “Umoya wemuntfu umenta akubeketelele kugula; kodvwa umoya lodzabukile ngubani longawubeketelela?”—Taga 18:14.

Magdalena uyachaza: “Ngilwa kamatima kute ngingatinaki kakhulu tinkinga tami. Ngetama kuwajabulela emalanga lengitiva ngincono ngawo. Ngitfola sikhutsato ngekufundza tindzaba tekuphila tebantfu labahlala bacotfo nangetulu kwetifo letingumahlalakhona.” Izabela uciniswa kwati kutsi Jehova uyamtsandza futsi uyamkhatsalela. Utsi: “Ngitiva ngibalulekile, futsi nginemuntfu lengingamphilela. Ngiphindze ngibe nelitsemba lelimangalisako lelikusasa.”

Zbigniew utsi: “Kugula kwami kungifundzisa kutsi ngitfobeke futsi ngilalele. Kuphindze kungifundzise kuba ngulocabangelako, ngehlulele ngendlela lefanele futsi ngitsetselele labanye ngalokusuka enhlitiyweni. Ngifundze nekukujabulela kukhonta Jehova kunekutsi ngitivele buhlungu. Ngaphindze ngakhutsateka kutsi ngichubeke ngitfutfuka ekukhonteni Jehova.”

Khumbula kutsi Jehova ukubona kahle kukhutsatela kwakho. Uva buhlungu ngekuhlupheka lonako, futsi uyakukhatsalela. Angeke ‘ayikhohlwe imisebenti yakho yelutsandvo loyikhombisile.’ (Heb. 6:10) Cabanga ngesetsembiso lasentele labo labamesabako, sekutsi: ‘Ngingeke nginiyekele, ngingeke nginishiye.’—Heb. 13:5.

Nakwenteka ngaletinye tikhatsi utiva uphelelwa ngemandla, naka litsemba lelimangalisako lekuphila emhlabeni lomusha. Sesiyasondzela sikhatsi lapho utawubona tibusiso teMbuso waNkulunkulu tenteka emhlabeni!

[Libhokisi/Titfombe emakhasini 28, 29]

Bayachubeka Bashumayela Nangetulu Kwekugula Lokungumahlalakhona

“Angisakwati kutihambela, ngako-ke umkami nobe labanye bazalwane kanye nabodzadze, bahamba nami ensimini. Ngibamba ngenhloko tinshumayelo kanye nemavesi eliBhayibheli.”—Jerzy, longaboni kahle emehlweni.

“Ngibhala tincwadzi futsi ngichumana njalo nebantfu labanenshisekelo. Nangisesibhedlela, ngibeka liBhayibheli kanye netincwadzi taboFakazi BaJehova eceleni kwembhedze wami. Loko kungisitile kutsi ngicalise tinshumayelo letinyenti letiphumelelako.”—Magdalena, lowangenwa sifo lesatiwa ngekutsi yi-lupus.

“Ngiyawutsandza umsebenti wekushumayela emtini ngemuti, kodvwa nangingativa kahle, ngifakaza ngelucingo.”—Izabela, lohlushwa sifo sekucindzeteleka emivelweni.

“Ngijabulela kubuyela kubantfu lengicoce nabo kanye nekuchuba tifundvo teliBhayibheli. Nangitiva ngincono, ngitsandza kufakaza emtini ngemuti.”—Barbara, lonesimila ebuchosheni.

“Ngiphatsa kuphela sikhwama sabomagazini lesingasindzi, futsi ngichubeka ngimile nangabe umtimba wami usavuma.”—Zbigniew, lonesifo sekuvuvuka kwematsambo.

[Emavi lahambisana nesitfombe ekhasini 30]

Bantfu labasha kanye nalabadzala bangaba ngumtfombo wesikhutsato